“నాన్న చనిపోయారు”

• రాజీవ్ గాంధీ హత్య వార్తను సోనియాకు చెప్పిన ప్రియాంక
• ఆ విషాద క్షణాలను గుర్తుచేసుకున్న సోనియా

మాజీ ప్రధానమంత్రి రాజీవ్ గాంధీ హత్య తన జీవితంలో అత్యంత విషాదకరమైన ఘట్టమని కాంగ్రెస్ సీనియర్ నాయకురాలు, మాజీ యూపీఏ చైర్‌పర్సన్ సోనియా గాంధీ తన ఆత్మకథలో వెల్లడించారు. 1991 మేలో జరిగిన ఈ దారుణ ఘటనకు సంబంధించిన వార్త తనకు ఎలా తెలిసిందో, ఆ సమయంలో కుమార్తె ప్రియాంక గాంధీ తన వద్దకు ఎలా వచ్చిందో ఆమె హృదయవిదారకంగా వివరించారు.

రాజీవ్ గాంధీ ఎన్నికల ప్రచారంలో పాల్గొని తాను, ప్రియాంక కొద్ది రోజుల కిందటే తిరిగి వచ్చామని సోనియా గుర్తుచేసుకున్నారు. అయితే ప్రచారంలో అలసిపోయిన రాజీవ్‌ను రాయ్‌బరేలీలో కలుసుకోలేకపోయానన్న బాధ తనను వెంటాడిందని తెలిపారు. ఢిల్లీలోనూ ఆయనతో గడిపేందుకు కేవలం ఒక రోజు మాత్రమే అవకాశం దొరికిందని, ఆ తర్వాత ఆయన మళ్లీ ప్రచారానికి వెళ్లిపోయారని చెప్పారు. మే 10న రాయ్‌బరేలీలో తండ్రిని కలిసినప్పుడు ఆయన తీవ్రంగా అలసిపోయి కనిపించారని ప్రియాంక చెప్పిన మాటలు తన మనసులో పదేపదే మెదిలాయని సోనియా రాశారు.

రాజీవ్ ఇంట్లో లేని సమయంలో ఆయన పడుకునే మంచం వైపు తాను పడుకోవడం అలవాటని, అలా చేస్తే కొంత ఓదార్పు కలిగేదని సోనియా వివరించారు. ఆరోజు కూడా ఆయన మంచం వైపు పడుకుని పుస్తకం చదువుతున్నానని చెప్పారు. మరోవైపు ప్రియాంక తన స్నేహితురాలి 21వ పుట్టినరోజు వేడుకకు వెళ్లేందుకు సిద్ధమవుతూ, ఏ దుస్తులు ధరించాలన్న విషయంపై తన అభిప్రాయం అడిగేందుకు పలుమార్లు గదిలోకి వచ్చిందని గుర్తుచేసుకున్నారు. ప్రియాంక గదిలో వినిపిస్తున్న సంగీతం ఒక్కసారిగా ఆగిపోవడంతో ఆమె బయలుదేరి ఉంటుందని భావించానని తెలిపారు. అయితే కొద్దిసేపటికే ఎవరో వేగంగా తన గది వైపు పరుగెత్తుకొస్తున్న అడుగుల శబ్దం వినిపించిందని, ఇంట్లో మరెవరూ లేకపోవడంతో అది ప్రియాంక అయి ఉంటుందని అనుకున్నానని సోనియా రాశారు. అడుగుల శబ్దం తన గది తలుపు వద్ద అకస్మాత్తుగా ఆగిపోవడంతో పుస్తకం మూసి, ఏం జరిగిందోనని ఆందోళనగా ఎదురుచూశానని తెలిపారు.

తలుపు తెరిచి లోపలికి వచ్చిన ప్రియాంక నెమ్మదిగా తనవైపు నడుచుకుంటూ వచ్చిందని సోనియా వివరించారు. బయటకు ప్రశాంతంగా కనిపించేందుకు ప్రయత్నిస్తున్నప్పటికీ, ఆమె శ్వాస వేగంగా, అస్థిరంగా ఉందని, ముఖంలో రంగు వెలిసిపోయిందని, కళ్లలో ఎన్నడూ చూడని బాధ కనిపించిందని పేర్కొన్నారు. ఆ క్షణంలో ప్రియాంక ముఖంలో కనిపించిన ఆందోళన తనకు ఇప్పటికీ గుర్తుందని ఆత్మకథలో వివరించారు. 1991 మే 21న తమిళనాడులోని శ్రీపెరంబుదూరులో ఎన్నికల ప్రచారానికి వెళ్లిన రాజీవ్ గాంధీని ఎల్టీటీఈ (LTTE)కు చెందిన ఆత్మాహుతి దళ సభ్యురాలు బాంబు దాడిలో హత్య చేసింది. శ్రీలంకలో భారత శాంతి పరిరక్షక దళం (IPKF)ను పంపించిన నిర్ణయానికి ప్రతీకారంగా ఈ దాడి జరిగినట్లు పేర్కొంటారు. భర్త హత్యతో తన కుటుంబం ఎదుర్కొన్న తీవ్ర విషాదాన్ని సోనియా గాంధీ తన ఆత్మకథలో తొలిసారిగా ఇంత వ్యక్తిగతంగా వివరించడం ప్రాధాన్యం సంతరించుకుంది.

గోకుల్ డెయిరీ పీఠం మహాయుతి కైవసం

• బోర్డు ఎన్నికల్లో ఓడినా చైర్మన్ పదవి దక్కించుకున్న బీజేపీ కూటమి

మహారాష్ట్రలో కీలక సహకార సంస్థ అయిన కొల్హాపూర్ జిల్లా సహకార పాల ఉత్పత్తిదారుల సంఘం (గోకుల్) చైర్మన్ ఎన్నికల్లో బీజేపీ నేతృత్వంలోని మహాయుతి కూటమి విజయం సాధించింది. మాజీ ఎన్సీపీ ఎమ్మెల్యే రాజేశ్ పాటిల్ మంగళవారం గోకుల్ చైర్మన్‌గా ఎన్నికయ్యారు. కాంగ్రెస్ ఎమ్మెల్సీ సతేజ్ పాటిల్ నేతృత్వంలోని ప్యానెల్ బలపరిచిన అభ్యర్థి శశికాంత్ పాటిల్ చుయేకర్‌పై ఆయన మూడు ఓట్ల తేడాతో గెలుపొందారు. రాష్ట్రంలో ఆర్థికంగా, రాజకీయంగా ఎంతో ప్రాధాన్యం కలిగిన గోకుల్ డెయిరీపై పట్టు సాధించేందుకు జరిగిన ఈ ఎన్నిక తీవ్ర ఉత్కంఠకు దారితీసింది.

గోకుల్ 25 మంది సభ్యుల పాలకవర్గానికి అక్టోబర్ 19న జరిగిన ఎన్నికల్లో సతేజ్ పాటిల్ నేతృత్వంలోని సమవిచారి ఆఘాడీ 13 స్థానాలు గెలుచుకోగా, మహాయుతి కూటమికి 12 స్థానాలు దక్కాయి. దీంతో బోర్డులో స్వల్ప ఆధిక్యం సాధించిన సమవిచారి ఆఘాడీ చైర్మన్ పదవి కూడా తమకే దక్కుతుందని భావించింది. అయితే ప్రభుత్వ నామినేటెడ్ డైరెక్టర్లకు ఓటు హక్కు కల్పించడంపై వివాదం తలెత్తడంతో చైర్మన్ ఎన్నిక వాయిదా పడుతూ వచ్చింది. అక్టోబర్ 29న జరిగిన సమావేశానికి తప్పనిసరిగా హాజరు కావాల్సిన 14 మంది డైరెక్టర్లలో మహాయుతికి చెందిన 12 మంది గైర్హాజరు కావడంతో కోరం లేక సమావేశం వాయిదా పడింది. అనంతరం సమవిచారి ఆఘాడీ ప్రత్యేక సమావేశం నిర్వహించి శశికాంత్ పాటిల్ చుయేకర్‌ను చైర్మన్‌గా ప్రకటించింది. ఈ నిర్ణయం న్యాయపరమైన వివాదానికి దారితీసింది.

మహారాష్ట్ర ప్రభుత్వ ఆర్డినెన్స్, హైకోర్టు తీర్పుతో టర్న్

ప్రభుత్వం పెద్ద సహకార సంఘాల్లో నామినేటెడ్ డైరెక్టర్ల నియామకానికి వీలు కల్పిస్తూ జారీ చేసిన ఆర్డినెన్స్‌ను సవాలు చేస్తూ దాఖలైన పిటిషన్‌పై సోమవారం బాంబే హైకోర్టు విచారణ చేపట్టింది. ఆ ఆర్డినెన్స్ అమలును నిలిపివేయడానికి నిరాకరించిన న్యాయస్థానం, చైర్మన్ ఎన్నికను వాయిదా వేయాలన్న విజ్ఞప్తినీ తిరస్కరించింది. అయితే ప్రభుత్వం నామినేట్ చేసిన నలుగురు డైరెక్టర్లకు ఓటు వేసేందుకు అనుమతిస్తూ, వారి బ్యాలెట్ పత్రాలను ప్రత్యేక పెట్టెలో భద్రపరచాలని ఆదేశించింది. ఎన్నికల ప్రక్రియకు సంబంధించిన రికార్డులను కూడా భద్రపరచాలని, ఈ ఎన్నిక ఫలితం నవంబర్ 25న జరగనున్న తదుపరి విచారణలో వెలువడే తుది నిర్ణయానికి లోబడి ఉంటుందని స్పష్టం చేసింది.

హైకోర్టు ఆదేశాల నేపథ్యంలో ప్రభుత్వ నామినేటెడ్ నలుగురు డైరెక్టర్లు కూడా ఓటింగ్‌లో పాల్గొన్నారు. దీంతో మహాయుతి కూటమి బలపరిచిన 12 మంది ఎన్నికైన డైరెక్టర్లకు ఈ నలుగురి ఓట్లు కలవడంతో మొత్తం 16 ఓట్లు వచ్చాయి. మరోవైపు సమవిచారి ఆఘాడీ అభ్యర్థి శశికాంత్ పాటిల్ చుయేకర్‌కు 13 ఓట్లు మాత్రమే లభించాయి. దీంతో రాజేశ్ పాటిల్ మూడు ఓట్ల ఆధిక్యంతో చైర్మన్‌గా ఎన్నికయ్యారు. బోర్డు ఎన్నికల్లో 12 స్థానాలకే పరిమితమైన మహాయుతి, నామినేటెడ్ డైరెక్టర్ల ఓట్లతో చైర్మన్ పదవిని దక్కించుకోవడం రాజకీయంగా ప్రాధాన్యం సంతరించుకుంది.

ప్రభుత్వ ఆర్డినెన్స్ కారణంగా ఓటింగ్‌లో అక్రమాలు జరిగాయని, తమ విజయాన్ని అడ్డుకునేందుకు అధికార పక్షం ప్రయత్నించిందని కాంగ్రెస్ ఆరోపించింది. అయితే ముఖ్యమంత్రి దేవేంద్ర ఫడ్నవీస్ ఈ ఆరోపణలను ఖండిస్తూ, నామినేటెడ్ డైరెక్టర్ల నియామకం, వారి ఓటింగ్‌కు సంబంధించి ప్రభుత్వానికి చట్టబద్ధమైన అధికారం ఉందని సమర్థించారు. నవంబర్ 25న హైకోర్టు ఈ వ్యవహారంపై తుది విచారణ చేపట్టనున్న నేపథ్యంలో గోకుల్ చైర్మన్ ఎన్నికపై న్యాయపరమైన పరిణామాలు ఎలా ఉంటాయన్నది ఆసక్తికరంగా మారింది.

మోదీ నాతో మాట్లాడేటప్పుడు కళ్లలోకి చూడరు

• తన ఆత్మకథలో సోనియా గాంధీ ఆసక్తికర వ్యాఖ్యలు

న్యూఢిల్లీ: ప్రధానమంత్రి నరేంద్ర మోదీతో తనకు పెద్దగా వ్యక్తిగత పరిచయాలు లేవని, సమావేశాల్లో ఎదురుపడినప్పుడు ఆయన కళ్లలోకి చూస్తూ మాట్లాడేందుకు ఇష్టపడరని కాంగ్రెస్‌ అగ్రనేత సోనియా గాంధీ వెల్లడించారు. తన ఆత్మకథ ‘బిలాంగింగ్‌: ఎ జర్నీ ఆఫ్‌ లవ్‌’ (Belonging: A Journey of Love)లో మోదీతో తనకున్న రాజకీయ, సైద్ధాంతిక విభేదాల గురించి ఆసక్తికర విషయాలు రాసుకొచ్చారు. ఈ పుస్తకాన్ని హార్పర్‌కోలిన్స్‌ ఇండియా ప్రచురించగా, మంగళవారం నుంచి అందుబాటులోకి వచ్చింది.

మోదీతో తనకు అధికారిక పలకరింపులు, అప్పుడప్పుడు జరిగే చిన్నపాటి సంభాషణలు మినహా పెద్దగా పరిచయం లేదని సోనియా పేర్కొన్నారు. పార్లమెంట్‌ సమావేశాలు ముగిసిన తర్వాత స్పీకర్‌ ఛాంబర్‌లో వివిధ పార్టీల నేతలు సంప్రదాయంగా సమావేశమయ్యే సందర్భాల్లో ఇద్దరం ఎదురుపడుతుంటామని తెలిపారు. అలాంటి సమయంలో తాము నమస్కారం చేసుకుంటామని, అయితే గతంలో వివిధ పార్టీల నాయకుల మధ్య ఉండే స్నేహపూర్వక వాతావరణం ఇప్పుడు కనిపించడం లేదని వ్యాఖ్యానించారు. మోదీ తనను కలిసినప్పుడు చూపు పక్కకు తిప్పుకుంటారని, కళ్లలోకి చూసి మాట్లాడరని పేర్కొన్నారు.

ఆసుపత్రి నుంచి తిరిగి వచ్చిన తర్వాత ఒకట్రెండు సందర్భాల్లో తన ఆరోగ్యం గురించి మోదీ ఆరా తీశారని, పుట్టినరోజు, నూతన సంవత్సర శుభాకాంక్షలు తెలిపిన సందర్భాలు కూడా ఉన్నాయని సోనియా వెల్లడించారు. అయితే వీటికి మించి తమ మధ్య పెద్దగా సంభాషణలు జరగలేదని తెలిపారు.

• భారత్‌పై ఇద్దరివీ భిన్నమైన దృక్పథాలు

భారత్‌ భవిష్యత్తుపై తమ ఇద్దరి ఆలోచనలు పూర్తిగా భిన్నంగా ఉన్నాయని సోనియా అభిప్రాయపడ్డారు. తన కుటుంబం ప్రజాసేవలో కొనసాగిన అనుభవం, వివిధ మతాలు, భాషలు, సంస్కృతులు, సమాజాలకు సమాన స్థానం కల్పించే భారతదేశంపై ఉన్న విశ్వాసం తన ఆలోచనా విధానాన్ని రూపొందించాయని వివరించారు. స్వేచ్ఛ, సమానత్వం, లౌకికవాదం తన దృక్పథానికి పునాదులని పేర్కొన్నారు.

మరోవైపు మోదీ ఆలోచనా విధానం ఆయన బాల్యం, రాష్ట్రీయ స్వయంసేవక్‌ సంఘ్‌ (ఆర్‌ఎస్‌ఎస్‌) సిద్ధాంతాల ప్రభావంతో రూపుదిద్దుకుందని సోనియా విశ్లేషించారు. ఒక మతం, సంస్కృతికి ఇతరుల కంటే అధిక ప్రాధాన్యం ఇచ్చే విధానంగా దానిని అభివర్ణించారు. సమాజంలో క్రమశిక్షణ, ఆధిపత్యం, నియంత్రణకు ప్రాధాన్యం ఇచ్చే దృక్పథమని పేర్కొన్నారు. మోదీ తన భారతదేశ భావన కోసం పోరాడుతుంటే, తాను సమ్మిళితత్వం, లౌకికవాదం, సామాజిక న్యాయం ప్రాతిపదికగా ఉండే భారతదేశం కోసం పోరాడుతున్నానని, ఈ విభేదాలు వ్యక్తిగతమైనవి కావని స్పష్టం చేశారు.

మోదీ ఆర్‌ఎస్‌ఎస్‌లో అణగారిన నేపథ్యం నుంచి ఎదిగి అధికార శిఖరాలకు చేరుకున్నారని సోనియా పేర్కొన్నారు. అయితే ఆయన నేపథ్యం ఎంత సాధారణమైనదన్న విషయాన్ని ప్రచార బృందం ప్రచారం చేస్తున్న స్థాయిలో అంగీకరించలేమని వ్యాఖ్యానించారు.

• నెహ్రూపై విమర్శలు.. బీజేపీ వైఖరిపైనా విమర్శలు

పార్లమెంట్‌లో మోదీ ప్రసంగించే తీరుపైనా సోనియా విమర్శలు చేశారు. కొన్నిసార్లు సభలోనూ బహిరంగ సభల్లో మాట్లాడినట్లే కఠినమైన, అసభ్యకరమైన భాషను ఉపయోగిస్తారని ఆరోపించారు. ప్రతిపక్షాలను తీవ్రంగా విమర్శిస్తూ ప్రసంగిస్తారని పేర్కొన్నారు. దేశ తొలి ప్రధాని జవహర్‌లాల్‌ నెహ్రూ బీజేపీకి ప్రత్యేక లక్ష్యంగా మారారని, ప్రజాస్వామ్య, లౌకిక భారతదేశ నిర్మాణానికి ఆయన పునాదులు వేశారనే కారణంతోనే ఆయనపై విమర్శలు చేస్తున్నారని అభిప్రాయపడ్డారు.

సంఘ్‌ పరివార్‌కు చెందిన ఇంటర్నెట్‌ వేదికల్లో నెహ్రూపై తప్పుడు ప్రచారం, దూషణలు విస్తృతంగా జరుగుతున్నాయని తన ఆత్మకథలో పేర్కొన్నారు. బీజేపీ నినాదమైన ‘కాంగ్రెస్‌ ముక్త్‌ భారత్‌’ అనేది కేవలం కాంగ్రెస్‌ పార్టీని తొలగించాలనే ప్రయత్నం మాత్రమే కాదని, ఆ పార్టీ సిద్ధాంతాలు, విధానాలను కూడా దేశ రాజకీయాల నుంచి దూరం చేయాలనే లక్ష్యంతో ఉందని విమర్శించారు.

ఆర్‌ఎస్‌ఎస్‌ సిద్ధాంతాల ప్రభావంతో మోదీ రాజకీయ దృక్పథం రూపుదిద్దుకుందని, హిందూ మతంలోని ఒక కఠినమైన, ఇతరులను వెలివేసే వ్యాఖ్యానాన్ని రాజకీయ కార్యక్రమంగా మార్చారని సోనియా ఆరోపించారు. అయితే మోదీ రాజకీయాల్లోకి వచ్చిన మార్గం, తాను రాజకీయాల్లోకి వచ్చిన మార్గం పూర్తిగా భిన్నమైనప్పటికీ, రాజకీయ ఉన్నత వర్గాలపై మోదీకి ఉన్న అసంతృప్తిలోని కొన్ని అంశాలను తాను అర్థం చేసుకోగలనని కూడా ఆమె పేర్కొన్నారు.

మేనక చెప్పిన అబద్ధం ఎంతో బాధించింది

 

• కుటుంబ విభేదాలపై సోనియా గాంధీ కీలక వ్యాఖ్యలు

న్యూఢిల్లీ: గాంధీ-నెహ్రూ కుటుంబంలో ఒకప్పుడు చోటుచేసుకున్న విభేదాలు, రాజకీయ పరిణామాలపై కాంగ్రెస్‌ అగ్రనేత సోనియా గాంధీ తన ఆత్మకథ ‘బిలాంగింగ్‌: ఎ జర్నీ ఆఫ్‌ లవ్‌’లో పలు ఆసక్తికర విషయాలను వెల్లడించారు. తన తోడికోడలు మేనకా గాంధీతో సంబంధాలు, సంజయ్‌ గాంధీతో ఆమె వైవాహిక జీవితం, ఇందిరా గాంధీతో ఏర్పడిన విభేదాల గురించి వివరించారు. అప్పట్లో కుటుంబంలో జరిగిన పరిణామాలు ఓ రియాలిటీ షోను తలపించాయని పేర్కొన్నారు.

1973లో మేనకకు సంజయ్‌ గాంధీతో పరిచయం ఏర్పడిందని, ఆమె అందమైన, చురుకైన యువతి అని సోనియా గుర్తుచేసుకున్నారు. సంజయ్‌ కంటే పదేళ్లు చిన్నదైన మేనక అప్పటికి మైనర్‌ అని, ఏడాది తర్వాత 18 ఏళ్ల వయసులో గాంధీ కుటుంబంలోకి అడుగుపెట్టిందని తెలిపారు. మొదట్లో ఉత్సాహంగా ఉండే తోడికోడలు రావడంతో ఇంట్లో సందడి నెలకొందని, అయితే క్రమంగా ఆమెతో విభేదాలు మొదలయ్యాయని పేర్కొన్నారు. కుటుంబంలో ప్రశాంతత దెబ్బతినకూడదనే ఉద్దేశంతో ఆమె కఠినంగా మాట్లాడిన సందర్భాల్లోనూ తాను మౌనంగా ఉండేదాన్నని చెప్పారు.

కాలక్రమేణా సంజయ్‌, మేనక మధ్య విభేదాలు పెరిగాయని, మేనక ప్రభావంతో రాజీవ్‌, సంజయ్‌ మధ్య కూడా దూరం పెరిగిందని సోనియా వివరించారు. 1978 ఎన్నికల్లో ఎదురైన ఘోర పరాజయానికి సంజయ్‌ కూడా కారణమని రాజీవ్‌ వ్యాఖ్యానించడంతో కుటుంబంలో ఉద్రిక్తతలు మరింత పెరిగాయని తెలిపారు. ఈ క్రమంలో రాజీవ్‌ చేసిన వ్యాఖ్యలపై మేనక జోక్యం చేసుకోవడానికి ప్రయత్నించగా, ఇందిరా గాంధీ తీవ్రంగా స్పందించారని పేర్కొన్నారు.

తనను, రాజీవ్‌ను మేనక శత్రువులుగా చూసేదని, తనకు పరిచయమున్న కొందరు పాత్రికేయుల ద్వారా తమపై తప్పుడు ప్రచారం చేయించేదని సోనియా ఆరోపించారు. ఎన్నికల్లో ఓటమి తర్వాత తాను, రాజీవ్‌ దేశం విడిచి పారిపోవాలని భావించామంటూ మేనక చెప్పినట్లు వచ్చిన వార్త తమను తీవ్రంగా బాధించిందని పేర్కొన్నారు.

1980 జూన్‌ 23న విమాన ప్రమాదంలో సంజయ్‌ గాంధీ మరణించిన తర్వాత కుటుంబంతో మేనకకు సంబంధాలు మరింత క్షీణించాయని సోనియా తెలిపారు. సంజయ్‌ మరణం తర్వాత మేనకకు రాజకీయ పదవి ఇవ్వాలని ఆమె తల్లి ప్రయత్నించినట్లు తెలిసిందని, అయితే అప్పటికి మేనక వయసు కేవలం 23 ఏళ్లు కావడంతో ఇందిరా గాంధీ అందుకు సుముఖంగా లేరని వివరించారు. ఆమెకు రాజకీయాల్లో ఎదిగేందుకు భవిష్యత్తులో తగిన అవకాశాలు ఉంటాయని ఇందిర భావించారని పేర్కొన్నారు.

వరుణ్‌ గాంధీ తొలి పుట్టినరోజు వేడుకల విషయంలోనూ కుటుంబంలో వివాదం తలెత్తిందని సోనియా వెల్లడించారు. ఆర్‌ఎస్‌ఎస్‌ మద్దతుదారురాలైన వసుంధరా రాజే ఇంట్లో వేడుకలు నిర్వహించడం, తన ఆధ్వర్యంలోని ‘సూర్య’ మ్యాగజైన్‌ను ఆర్‌ఎస్‌ఎస్‌ సభ్యుడికి విక్రయించడం వంటి చర్యలతో మేనక కుటుంబ పరిమితులను దాటారని ఇందిర భావించినట్లు తెలిపారు.

ఇందిరా గాంధీ లండన్‌ పర్యటనలో ఉన్న సమయంలో మేనక తన సామాన్లను ఇంటి నుంచి తీసుకెళ్లారని, తిరిగి వచ్చిన తర్వాత ఇందిర ఆమెను నిలదీశారని సోనియా వివరించారు. కుటుంబంలో ఉండాలా, లేక వేరుగా నివసించాలా నిర్ణయించుకోవాలని ఇందిర స్పష్టం చేశారని తెలిపారు. ఈ పరిణామాల అనంతరం వరుణ్‌ను కలుసుకునే హక్కు కోసం గాంధీ కుటుంబం న్యాయపరమైన పోరాటం చేయాల్సి వచ్చిందని పేర్కొన్నారు.

వరుణ్‌ నాలుగో పుట్టినరోజు సందర్భంగా ఇందిరా గాంధీ తనకు బహుమతులు పంపాలని చెప్పారని, అయితే మరుసటి రోజు పత్రికల్లో మేనక తన కుమారుడిని కిడ్నాప్‌ చేసేందుకు ప్రయత్నించారని ఆరోపించినట్లు వార్తలు రావడం ఆశ్చర్యపరిచిందని సోనియా వెల్లడించారు. ఈ వివాదంపై ఇందిరా గాంధీ 1984 ఏప్రిల్‌ 19న మేనక తరఫు న్యాయవాదికి సమాధానం ఇచ్చారని, అదే ఆమె నుంచి వచ్చిన చివరి సమాధానమని పేర్కొన్నారు. ఆపరేషన్‌ బ్లూస్టార్‌కు రెండు నెలల ముందు ఈ పరిణామం చోటుచేసుకుందని గుర్తుచేశారు.

1984 లోక్‌సభ ఎన్నికల్లో మేనకా గాంధీ స్వతంత్ర అభ్యర్థిగా రాజీవ్‌ గాంధీపై పోటీ చేసి ఓడిపోయారు. అనంతరం 1988లో వీపీ సింగ్‌ నేతృత్వంలోని జనతాదళ్‌లో చేరగా, 2004లో బీజేపీలో చేరారు.

ఇదే ఆత్మకథలో సంజయ్‌ గాంధీ రాజకీయ శైలిపైనా సోనియా వ్యాఖ్యానించారు. సంజయ్‌ వేగంగా నిర్ణయాలు తీసుకునే వ్యక్తి అని, ఎలాంటి రాజ్యాంగబద్ధమైన పదవి లేకపోయినా రాజకీయ వ్యవహారాల్లో ఆయన జోక్యం ఎక్కువగా ఉండేదని తెలిపారు. 1975-77 మధ్య అమలైన ఎమర్జెన్సీ నిర్ణయం పట్ల ఇందిరా గాంధీకి పూర్తిస్థాయి సమ్మతి లేకపోయినా, అప్పటి పరిస్థితులు, ఒత్తిళ్ల కారణంగా అమలు చేయాల్సి వచ్చిందని సోనియా తన ఆత్మకథలో పేర్కొన్నారు.

సెమీస్‌కు దూసుకెళ్లిన యువ భారత్‌.. యూఏఈపై 70 పరుగుల ఘన విజయం

అల్‌ అమెరత్‌ (ఒమన్‌): అండర్‌-19 ఆసియా వన్డే కప్‌లో భారత యువ జట్టు సెమీఫైనల్‌కు అర్హత సాధించింది. మంగళవారం జరిగిన మ్యాచ్‌లో యూఏఈపై 70 పరుగుల తేడాతో ఘన విజయం అందుకుంది. తొలుత బ్యాటింగ్‌ చేసిన భారత్‌ నిర్ణీత 50 ఓవర్లలో ఏడు వికెట్ల నష్టానికి 309 పరుగుల భారీ స్కోరు సాధించింది. అనంతరం లక్ష్య ఛేదనకు దిగిన యూఏఈ 50 ఓవర్లలో 239 పరుగులకు ఆలౌటైంది.

భారత ఇన్నింగ్స్‌లో మాజీ క్రికెటర్‌ వీరేంద్ర సెహ్వాగ్‌ కుమారుడు ఆర్యవీర్‌ సెహ్వాగ్‌ అద్భుతంగా ఆడాడు. 168 బంతుల్లో 17 ఫోర్లు, ఏడు సిక్సర్లతో 160 పరుగులు సాధించి జట్టు భారీ స్కోరులో కీలక పాత్ర పోషించాడు. వీకే వినీత్‌ 67 పరుగులతో అర్ధశతకం నమోదు చేశాడు. లక్ష్య రాజేశ్‌ రాయ్‌చందాని, యశ్‌బర్దాన్‌ చౌహాన్‌ చెరో 17 పరుగులు చేయగా, అన్వయ్‌ ద్రవిడ్‌ 12 పరుగులు సాధించాడు.

యూఏఈ బ్యాటర్లలో అహ్మద్‌ ఖుదాదాద్‌ 74 పరుగులతో పోరాడగా, నూరుల్లా అయోబీ 39 పరుగులు చేశాడు. ఏడో వికెట్‌కు వీరిద్దరూ 52 బంతుల్లోనే 90 పరుగుల భాగస్వామ్యం నెలకొల్పినా జట్టును విజయతీరాలకు చేర్చలేకపోయారు. భారత బౌలర్‌ ఇషాన్‌ సోద్‌ 37 పరుగులిచ్చి నాలుగు వికెట్లు పడగొట్టి ఆకట్టుకున్నాడు. ఈ విజయంతో సెమీఫైనల్‌కు చేరిన భారత్‌ గురువారం జరిగే రెండో సెమీఫైనల్‌లో అఫ్గానిస్థాన్‌తో తలపడనుంది.

భారత్‌పై తప్పుడు ప్రచారం.. చైనా వ్లాగర్ల తీరుపై కేంద్రం తీవ్ర ఆగ్రహం

న్యూఢిల్లీ: భారత్‌ ప్రతిష్ఠను దెబ్బతీసేలా సామాజిక మాధ్యమాల్లో తప్పుడు ప్రచారం చేస్తున్న కొంతమంది చైనా వ్లాగర్ల వ్యవహారంపై కేంద్ర ప్రభుత్వం తీవ్రంగా స్పందించింది. బంగ్లాదేశ్‌ రాజధాని ఢాకాలోని మురికివాడల దృశ్యాలను చిత్రీకరించి, అవి దేశ రాజధాని ఢిల్లీలోని ప్రాంతాలంటూ ప్రచారం చేయడంపై విదేశాంగ శాఖ అభ్యంతరం వ్యక్తం చేసింది.

ఇటీవల పలువురు చైనా వ్లాగర్లు తమ సోషల్‌ మీడియా ఖాతాల్లో భారత్‌లోని జీవన పరిస్థితులంటూ కొన్ని వీడియోలను పోస్ట్‌ చేశారు. అయితే ఆ దృశ్యాలు వాస్తవానికి ఢాకాలోని మురికివాడలకు చెందినవని, వాటిని ఢిల్లీ ప్రాంతాలుగా చూపిస్తూ తప్పుడు ప్రచారం చేశారని ఆరోపణలు వచ్చాయి. దాదాపు 150 మంది చైనా పౌరులు ఈ వీడియోలను చిత్రీకరించినట్లు సమాచారం.

ఈ వ్యవహారంపై విదేశాంగ శాఖ అధికార ప్రతినిధి రణధీర్‌ జైస్వాల్‌ స్పందిస్తూ.. ఒక దేశాన్ని వక్రీకరించి చూపించే ప్రయత్నాలు దురదృష్టకరమని అన్నారు. విదేశీయుల సహకారంతో ఢాకాను ఢిల్లీగా చిత్రీకరించే ప్రయత్నం జరుగుతున్నట్లు కనిపిస్తోందని పేర్కొన్నారు. ఇలాంటి తప్పుడు ప్రచారంతో సంబంధిత వ్యక్తులు తమ విశ్వసనీయతను కోల్పోతారని హెచ్చరించారు. తప్పుడు కథనాలు ప్రచారం చేస్తున్న వారిపై కఠిన చర్యలు తీసుకోవాలని సంబంధిత అధికారులను కోరినట్లు వెల్లడించారు.

ట్రంప్‌ ప్రకటనతో కుప్పకూలిన చమురు ధరలు.. మూడు నెలల కనిష్ఠానికి బ్రెంట్‌ క్రూడ్‌

అంతర్జాతీయ మార్కెట్లో ముడి చమురు ధరలు భారీగా తగ్గాయి. ఇరాన్‌పై అమెరికా దాడులు జరిగే అవకాశం లేదంటూ అధ్యక్షుడు డొనాల్డ్‌ ట్రంప్‌ చేసిన ప్రకటనతో పశ్చిమాసియాలో ఉద్రిక్తతలు తగ్గవచ్చనే అంచనాలు నెలకొన్నాయి. దీంతో చమురు మార్కెట్లో ట్రేడర్లు అమ్మకాలకు మొగ్గుచూపారు. బ్రెంట్‌ క్రూడ్‌ ధర మూడు నెలల కనిష్ఠానికి పడిపోయి బ్యారెల్‌కు 90 డాలర్ల దిగువకు చేరింది. మంగళవారం ట్రేడింగ్‌లో బ్రెంట్‌ క్రూడ్‌ 3.3 శాతం తగ్గగా, అమెరికా వెస్ట్‌ టెక్సాస్‌ ఇంటర్మీడియట్‌ (WTI) క్రూడ్‌ ధర 2.6 శాతం పతనమై 84.1 డాలర్ల వద్ద ట్రేడైంది.

వైట్‌హౌస్‌లో జరిగిన సమావేశంలో ట్రంప్‌ మాట్లాడుతూ ఇరాన్‌ సైనిక సామర్థ్యం పూర్తిగా దెబ్బతిన్నదని, ప్రస్తుత పరిస్థితుల్లో ఆ దేశంపై మరిన్ని దాడులు చేయాల్సిన అవసరం ఉండకపోవచ్చని పేర్కొన్నారు. అయితే ఇరాన్‌ అణు కార్యకలాపాలకు దూరంగా ఉండేలా దీర్ఘకాలిక ఒప్పందం కుదుర్చుకోవాలని అమెరికా భావిస్తోందని తెలిపారు. పరిస్థితులు మారితే ఎదుర్కొనేందుకు అమెరికా సైన్యం సిద్ధంగా ఉందని స్పష్టం చేశారు. ఇరాన్‌ అణు కార్యక్రమంపై ఒప్పందం కుదిరి, హర్మూజ్‌ జలసంధి తిరిగి తెరుచుకుంటే దాడుల అవకాశాలు మరింత తగ్గుతాయని ట్రంప్‌ గతంలోనూ వ్యాఖ్యానించారు. ఈ పరిణామాలు అంతర్జాతీయ చమురు మార్కెట్‌పై ప్రభావం చూపుతున్నాయి.