దేశ ఇంధన భద్రతపై పార్లమెంట్‌లో కీలక ప్రకటన

•  నేడు ఉభయ సభలను ఉద్దేశించి ప్రసంగించనున్న హర్దీప్ సింగ్ పూరీ
• చమురు సరఫరాపై క్లారిటీ!

న్యూఢిల్లీ: పశ్చిమాసియాలో ముదురుతున్న యుద్ధ మేఘాల నేపథ్యంలో భారతదేశ ఇంధన సరఫరా పరిస్థితిపై కేంద్ర పెట్రోలియం , సహజ వాయువు శాఖ మంత్రి హర్దీప్ సింగ్ పూరీ నేడు పార్లమెంట్‌లో కీలక ప్రకటన చేయనున్నారు. హార్ముజ్ జలసంధిలో నెలకొన్న ఉద్రిక్తతలు , అంతర్జాతీయ మార్కెట్‌లో చమురు ధరల అస్థిరతపై దేశవ్యాప్తంగా ఆందోళనలు వ్యక్తమవుతున్న తరుణంలో, ప్రభుత్వం అనుసరిస్తున్న వ్యూహాలను ఆయన ఉభయ సభలకు వివరించనున్నారు. ఈ రోజు మధ్యాహ్నం ఆయన చేసే ప్రసంగం ద్వారా దేశంలో ముడి చమురు ,ఎల్‌పీజీ (LPG) నిల్వలపై నెలకొన్న సందిగ్ధతకు తెరపడనుంది.

ప్రస్తుతం పశ్చిమాసియాలో జరుగుతున్న ఘర్షణల వల్ల భారత్‌కు చమురు దిగుమతులు తగ్గాయనే వార్తలు వస్తున్న నేపథ్యంలో, మంత్రి పూరీ ఇచ్చే నివేదిక అత్యంత ప్రాధాన్యం సంతరించుకుంది. దేశవ్యాప్తంగా గ్యాస్ సిలిండర్ల కొరత ఏర్పడవచ్చని ప్రతిపక్షాలు చేస్తున్న ఆరోపణలను తిప్పికొట్టడంతో పాటు, భారతదేశం వద్ద ఉన్న వ్యూహాత్మక చమురు నిల్వలు (Strategic Petroleum Reserves) ఎన్ని రోజులకు సరిపోతాయి , ప్రత్యామ్నాయ మార్గాల ద్వారా చమురును ఎలా సేకరిస్తున్నారు అనే విషయాలపై ఆయన పూర్తి వివరాలను వెల్లడించనున్నారు.

అంతేకాకుండా, అంతర్జాతీయంగా ధరలు పెరిగినప్పటికీ దేశీయంగా పెట్రోల్, డీజిల్ ధరలు సామాన్యుడిపై భారం పడకుండా ప్రభుత్వం తీసుకుంటున్న చర్యలను కూడా ఆయన ప్రస్తావించే అవకాశం ఉంది. ప్రపంచ ఇంధన సంస్థ (IEA) ఇటీవల విడుదల చేసిన 40 కోట్ల బారెళ్ల చమురు నిల్వల వల్ల భారత్‌కు కలిగే ప్రయోజనాలను కూడా ఆయన వివరించనున్నారు. దేశ ఇంధన భద్రత పటిష్టంగా ఉందనే భరోసాను ప్రజలకు కల్పించడమే ఈ ప్రకటన  ప్రధాన ఉద్దేశమని అధికారికవర్గాలు పేర్కొంటున్నాయి.