- అమెరికాకు ఇరాన్ గట్టి సంకేతం
పశ్చిమాసియాలో ఉద్రిక్తతలు తారాస్థాయికి చేరిన వేళ, ఇరాన్ విదేశాంగ మంత్రి అబ్బాస్ అరాగ్చీ చైనాలో పర్యటిస్తూ కీలక వ్యాఖ్యలు చేశారు. బీజింగ్‌లో తన చైనా ప్రతిరూపం వాంగ్ యీతో భేటీ అయిన ఆయన, అమెరికాతో జరుగుతున్న శాంతి చర్చలపై స్పష్టతనిచ్చారు. అమెరికా ఆధిపత్య ధోరణిని వీడి, ఇరు పక్షాలకు ఆమోదయోగ్యమైన ‘న్యాయబద్ధమైన, సమగ్రమైన ఒప్పందాన్ని’ ప్రతిపాదిస్తేనే తాము అంగీకరిస్తామని ఆయన తెగేసి చెప్పారు. తమ దేశ సార్వభౌమత్వాన్ని, హక్కులను కాపాడుకోవడంలో రాజీ పడే ప్రసక్తే లేదని, చర్చల రంగంలో తాము అత్యంత పట్టుదలతో ఉన్నామని అరాగ్చీ స్పష్టం చేశారు. అమెరికా , ఇజ్రాయెల్ చర్యలను ఖండించడంలో చైనా చూపుతున్న మద్దతును ఈ సందర్భంగా ఆయన కొనియాడారు.
మరోవైపు, పశ్చిమాసియాలో తక్షణమే పూర్తిస్థాయి కాల్పుల విరమణ జరగాలని చైనా విదేశాంగ మంత్రి వాంగ్ యీ పిలుపునిచ్చారు. యుద్ధం వల్ల ఇరాన్ ప్రజలు తీవ్రంగా నష్టపోవడమే కాకుండా, ప్రపంచ శాంతికి కూడా ముప్పు వాటిల్లుతోందని ఆయన ఆందోళన వ్యక్తం చేశారు. హార్ముజ్ జలసంధిలో నౌకల రాకపోకలు పునరుద్ధరించడం అంతర్జాతీయ వాణిజ్యానికి అత్యంత అవసరమని చైనా పేర్కొంది. ఇరాన్ అణు ఆయుధాలను అభివృద్ధి చేయకూడదనే నిర్ణయాన్ని స్వాగతిస్తూనే, శాంతియుత అవసరాల కోసం అణు ఇంధనాన్ని వాడుకునే హక్కు ఆ దేశానికి ఉందని చైనా మద్దతు పలికింది. అమెరికా అధ్యక్షుడు ట్రంప్ శాంతి చర్చలపై ఆశాభావం వ్యక్తం చేస్తున్న తరుణంలో, ఇరాన్ తన పంతాన్ని వీడకపోవడం చర్చల ప్రక్రియను మరింత ఉత్కంఠభరితంగా మార్చింది.
