- పెరంబూరులో 'దళపతి' ముందంజ.. తిరుచ్చి ఈస్ట్లో వెనుకంజ!
తమిళనాడు అసెంబ్లీ ఎన్నికల ఫలితాల్లో అందరి దృష్టిని ఆకర్షిస్తున్న నటుడు విజయ్, తాను పోటీ చేస్తున్న రెండు స్థానాల్లో భిన్నమైన ఫలితాలను ఎదుర్కొంటున్నారు. పెరంబూరు నియోజకవర్గంలో విజయ్ తన సమీప ప్రత్యర్థిపై స్పష్టమైన ఆధిక్యంలో కొనసాగుతుండగా, తిరుచ్చి ఈస్ట్ స్థానంలో మాత్రం ఆయన వెనుకంజలో ఉన్నారు. రాష్ట్రవ్యాప్తంగా డీఎంకే కూటమి తన ఆధిపత్యాన్ని ప్రదర్శిస్తున్నప్పటికీ, విజయ్ పార్టీ కొన్ని కీలక పట్టణ ప్రాంతాల్లో ఓట్లను చీలుస్తున్నట్లు కనిపిస్తోంది. ముఖ్యంగా యువత , సినీ అభిమానుల మద్దతు విజయ్కు ప్లస్ పాయింట్గా మారుతుండగా, అనుభవజ్ఞులైన రాజకీయ నేతలు ఆయనకు గట్టి పోటీనిస్తున్నారు.
మరోవైపు, రాష్ట్రవ్యాప్త ధోరణులను పరిశీలిస్తే ముఖ్యమంత్రి ఎం.కే. స్టాలిన్ నేతృత్వంలోని డీఎంకే కూటమి మెజారిటీ స్థానాల్లో ముందంజలో ఉంది. అన్నాడీఎంకే కూడా గత ఎన్నికల కంటే మెరుగైన ప్రదర్శన కనబరుస్తూ కొన్ని జిల్లాల్లో గట్టి పోటీనిస్తోంది. విజయ్ నేతృత్వంలోని టీవీకే పార్టీ కేవలం ఓట్లను చీల్చే శక్తిగా మాత్రమే మిగిలిపోతుందా లేదా చెప్పుకోదగ్గ స్థాయిలో సీట్లను సాధిస్తుందా అన్నది మరికొద్ది గంటల్లో తేలనుంది. రాష్ట్రవ్యాప్తంగా దాదాపు 80 శాతానికి పైగా పోలింగ్ నమోదు కావడంతో, ఈ భారీ ఓటింగ్ శాతం ఎవరికి పట్టం కడుతుందనే ఉత్కంఠ సర్వత్రా నెలకొంది.
