తొలి వర్ధంతి వేళ శశి థరూర్ భావోద్వేగ నివాళి
న్యూఢిల్లీ: భారత మాజీ ప్రధాని డాక్టర్ మన్మోహన్ సింగ్ ప్రథమ వర్ధంతి సందర్భంగా కాంగ్రెస్ ఎంపీ శశి థరూర్ ఆయనకు ఘనంగా నివాళులర్పించారు. మన్మోహన్ సింగ్‌ను 'స్పృహ కలిగిన దేశభక్తుడు' 'నిజాయితీ గల గొప్ప నాయకుడు'గా ఆయన అభివర్ణించారు. శుక్రవారం తన అధికారిక సామాజిక మాధ్యమ ఖాతాలో ఒక వీడియో సందేశాన్ని పంచుకుంటూ, మన్మోహన్ సింగ్‌తో తనకున్న అనుబంధాన్ని గుర్తుచేసుకున్నారు.
ఆర్థిక సంస్కరణల పితామహుడు
నేటి రాజకీయాల్లో వినిపించే మితిమీరిన అరుపుల కంటే, మన్మోహన్ సింగ్ మౌనమే ఎంతో శక్తివంతంగా పనిచేసేదని థరూర్ పేర్కొన్నారు. ఆయన మరణం భారత మేధో, నైతిక రంగంలో భర్తీ చేయలేని లోటును మిగిల్చిందని ఆవేదన వ్యక్తం చేశారు. 1991లో లైసెన్స్ రాజ్ వ్యవస్థను అంతం చేసి, కోట్లాదిమంది భారతీయులను పేదరికం నుంచి విముక్తి చేసిన ఘనత ఆయనదేనని కొనియాడారు. చరిత్ర ఆయనను ఒక గొప్ప ఆర్థికవేత్తగానే కాకుండా, దేశ గమనాన్ని మార్చిన దార్శనికుడిగా గుర్తుంచుకుంటుందని చెప్పారు.
హక్కుల చట్టాల సృష్టికర్త
మన్మోహన్ హయాం అంటే కేవలం ఆర్థికవృద్ధి మాత్రమే కాదని, సామాన్యుల కోసం సమాచార హక్కు (RTI), విద్యా హక్కు (RTE), ఉపాధి హామీ పథకం (MGNREGA) వంటి చారిత్రాత్మక చట్టాలను రూపొందించిన కాలమని థరూర్ గుర్తు చేశారు.
నిజమైన రాజనీతిజ్ఞుడు
మన్మోహన్ సింగ్ ఎప్పుడూ తన గౌరవాన్ని, హుందాతనాన్ని కోల్పోలేదని.. పౌర అణు ఒప్పందం వంటి క్లిష్ట సమయాల్లో కూడా ఆయన తన దృఢ నిశ్చయంతో దేశాన్ని ప్రపంచస్థాయికి తీసుకెళ్లారని ప్రశంసించారు. "చరిత్ర నా పట్ల కరుణ చూపుతుంది" అని మన్మోహన్ సింగ్ గతంలో అన్న మాటలను ప్రస్తావిస్తూ.. నేడు చరిత్ర ఆయనను కేవలం కరుణతో చూడటమే కాదు, ఆయన దార్శనికతను పూర్తిగా అంగీకరిస్తోందని శశి థరూర్ అన్నారు.
