ఓట్ల తొలగింపుపై అఖిలేశ్ యాదవ్ తీవ్ర ఆగ్రహం.. ఈసీ తీరుపై ప్రశ్నల వర్షం!

 

లక్నో: ఓటర్ల జాబితా నుంచి ఓట్లను అక్రమంగా తొలగిస్తున్నారంటూ సమాజ్‌వాదీ పార్టీ (ఎస్పీ) అధినేత అఖిలేశ్ యాదవ్ ఎన్నికల సంఘం తీరుపై తీవ్రస్థాయిలో మండిపడ్డారు. సమాజ్‌వాదీ పార్టీ, పీడీఏ (PDA) మద్దతుదారుల ఓట్లను తొలగించడం కోసం 'దశరథ్' అనే వ్యక్తి ఏకంగా వందకు పైగా 'ఫారం-7' దరఖాస్తులను సమర్పించాడని, ఎస్పీ కార్యకర్తలు అతన్ని పట్టుకుని ఎన్నికల సంఘానికి ఫిర్యాదు చేసినా అధికారుల నుంచి ఎలాంటి చర్యలు లేవని ఆయన ఆరోపించారు. అలాగే సుల్తాన్‌పూర్‌లో కనీసం సంతకం చేయడం కూడా రానటువంటి నందలాల్ నిషాద్‌తో ఫారం-7పై సంతకం చేయించి ఓట్లు తొలగించేందుకు యత్నించిన బీజేపీ కార్యకర్తలు దొరికారని అఖిలేశ్ తెలిపారు. అసలు ఎన్నికల సంఘం ఏం చేస్తోంది? ఎవరి ఆదేశాల మేరకు నడుస్తోందని ఆయన నిలదీశారు. ఎన్నికల సంఘం నిష్పక్షపాతంగా వ్యవహరించాలని, పౌరులకు ఎలాంటి ఇబ్బందులు కలగకుండా చూడటమే దాని విధి అని స్పష్టం చేశారు. బీజేపీ ప్రయోజనాల కోసం ఈసీ పనిచేయకూడదని హితవు పలికారు. విపక్షాలు ఎన్నికల సంఘం తీరును ప్రశ్నిస్తుంటే బీజేపీ ఎందుకు రంగంలోకి దిగి సమర్థించుకుంటోందని, ఎందుకంటే ఆ వ్యవస్థను బీజేపీనే తన చేతుల్లోకి తీసుకుని దుర్వినియోగం చేస్తోందని అఖిలేశ్ యాదవ్ తీవ్ర ఆరోపణలు చేశారు. ఈ నేపథ్యంలో ఈసీకి వ్యతిరేకంగా తాము చేస్తున్న ఆందోళనలు కొనసాగుతూనే ఉంటాయని ఆయన స్పష్టం చేశారు.