హైదరాబాద్, అక్టోబర్ 2: తమ కుటుంబంపై, తన వ్యాపారాలపై ముఖ్యమంత్రి రేవంత్ రెడ్డి చేస్తున్న విమర్శలపై బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా స్పందించారు. 2009 నాటి తన ఎన్నికల అఫిడవిట్‌లో తాను పేర్కొన్న వివరాలనే ఇప్పుడు రేవంత్ రెడ్డి ఏదో కొత్తగా కనుగొన్నట్లు గొప్పలు చెబుతున్నారని ఎద్దేవా చేశారు. హైదరాబాద్‌లో మీడియాతో మాట్లాడుతూ ఆయన ఈ వ్యాఖ్యలు చేశారు.
"నేను హోటళ్లు నడుపుతున్నానని రేవంత్ రెడ్డి ఏదో కొలంబస్ లేదా వాస్కోడిగామా మాదిరిగా కొత్తగా డిస్కవర్ చేసినట్లు మాట్లాడుతున్నారు. నా అఫిడవిట్‌లో ఉన్నదే ఆయన కూడా చెబుతున్నారు. వ్యాపారం చేయడం తప్పా? నా భార్యాపిల్లలను పోషించుకోవాలి కదా! లేదంటే రాజకీయాల్లో ఎందుకున్నారని అడుగుతారు. కుటుంబ పోషణ కోసం వ్యాపారం చేస్తే తప్పేంటి? ఒకవేళ నేను రాజకీయాలను పక్కన పెట్టి పూర్తిగా వ్యాపారం మీదే దృష్టి పెట్టి ఉంటే ఇప్పటికి పది హోటళ్లు ఉండేవి. కానీ నా దగ్గర కేవలం మూడు హోటళ్లే ఉన్నాయి" అని కేటీఆర్ స్పష్టం చేశారు. ఇదే సమయంలో రేవంత్ రెడ్డికి ఆయన ప్రత్యేకంగా ధన్యవాదాలు తెలిపారు. "ఏదేమైనప్పటికీ రేవంత్ రెడ్డి నా హోటళ్లకు మంచి ఫ్రీ పబ్లిసిటీ ఇచ్చారు. ఆయన వల్ల నా వ్యాపారానికి ప్రచారం లభించినందుకు నాకు చాలా సంతోషంగా ఉంది. మనస్ఫూర్తిగా ఆయనకు ధన్యవాదాలు తెలుపుతున్నాను" అంటూ కేటీఆర్ సెటైర్లు వేశారు.
No comments:
Post a Comment