- 20 వేల మంది పోలీసులతో బందోబస్తు.. 10 వేల సీసీ కెమెరాలు, 24 డ్రోన్లతో నిఘా
- ట్యాంక్బండ్, నెక్లెస్ రోడ్ పరిసరాల్లో ఆంక్షలు.. ప్రైవేటు బస్సులు, ట్రక్కులపై ప్రత్యేక నియంత్రణ
హైదరాబాద్: వినాయక నిమజ్జనం, శోభాయాత్రను దృష్టిలో పెట్టుకుని హైదరాబాద్ నగరంలో భారీ భద్రతా ఏర్పాట్లు చేసినట్లు సీపీ వీసీ సజ్జనార్ తెలిపారు. సెప్టెంబర్ 25న జరిగే మహా నిమజ్జనానికి హైదరాబాద్లో సుమారు 20 వేల మంది పోలీసులు, ఇతర జిల్లాల్లో మరో 8,400 మంది సిబ్బంది విధుల్లో ఉంటారని చెప్పారు. ఖైరతాబాద్, బాలాపూర్ గణేశ్ శోభాయాత్రలకు ప్రత్యేక బందోబస్తు ఏర్పాటు చేసినట్లు వెల్లడించారు.
నిమజ్జన మార్గాలను పర్యవేక్షించేందుకు 24 డ్రోన్లు, సుమారు 10 వేల సీసీ కెమెరాలను కమాండ్ కంట్రోల్ సెంటర్కు అనుసంధానించినట్లు సజ్జనార్ తెలిపారు. హుస్సేన్సాగర్ చుట్టూ హైరైజ్ కెమెరాలతోనూ నిఘా కొనసాగుతుందని చెప్పారు. చైన్ స్నాచింగ్, ఇతర చోరీలను అరికట్టేందుకు ప్రత్యేక క్రైమ్ టీమ్లు, మహిళల భద్రత కోసం షీటీమ్లు అందుబాటులో ఉంటాయని వెల్లడించారు.
గణేశ్ వేడుకలకు సంబంధించి పాత లేదా నకిలీ వీడియోలను సోషల్ మీడియాలో ప్రచారం చేస్తే కఠిన చర్యలు తీసుకుంటామని సీపీ హెచ్చరించారు. నిమజ్జన ఊరేగింపుల్లో డీజేలు, అధిక శబ్దం చేసే పరికరాల వినియోగంపై కూడా చర్యలు తప్పవన్నారు. సెప్టెంబర్ 25న నగరంలో ట్రాఫిక్ రద్దీని నియంత్రించేందుకు పలు ప్రాంతాల్లో ఆంక్షలు, మళ్లింపులు అమలు చేయనున్నట్లు పోలీసులు ఇప్పటికే వెల్లడించారు.
No comments:
Post a Comment