- ఫ్లోరిడాలో జీ20 సదస్సుకు హాజరయ్యే అవకాశం
- ట్రంప్తో ద్వైపాక్షిక భేటీపై అంచనాలు
- రష్యా చమురు కొనుగోళ్లపై 100% వరకు సుంకాల అధికారం అమెరికా అధ్యక్షుడికి
న్యూఢిల్లీ: అమెరికా-భారత్ వాణిజ్య సంబంధాలపై సుంకాల ముప్పు కొనసాగుతున్న వేళ ప్రధాని నరేంద్ర మోదీ డిసెంబర్లో అమెరికా పర్యటనకు వెళ్లే అవకాశం ఉందని సంబంధిత వర్గాలు తెలిపాయి. డిసెంబర్ 14, 15 తేదీల్లో ఫ్లోరిడాలోని మియామీలో అమెరికా అధ్యక్షుడు డొనాల్డ్ ట్రంప్ ఆతిథ్యమివ్వనున్న జీ20 శిఖరాగ్ర సదస్సుకు మోదీ హాజరయ్యే అవకాశం ఉందని సమాచారం. పర్యటన ఖరారైతే ట్రంప్తో ద్వైపాక్షిక సమావేశం కూడా జరిగే అవకాశముంది. అయితే దీనిపై భారత ప్రభుత్వం నుంచి అధికారిక ప్రకటన వెలువడాల్సి ఉంది.
ఈ భేటీ జరిగితే వాణిజ్యం, ఇంధన భద్రత, ద్వైపాక్షిక సంబంధాలతో పాటు రష్యా నుంచి భారత్ చమురు కొనుగోళ్ల అంశం కూడా చర్చకు వచ్చే అవకాశం ఉంది. ఇటీవల అమెరికా అధ్యక్షుడు ట్రంప్ ‘లిండ్సే ఓ. గ్రాహం శాంక్షనింగ్ రష్యా అండ్ ఇరాన్ యాక్ట్-2026’పై సంతకం చేశారు. ఈ చట్టం రష్యా చమురు, గ్యాస్ కొనుగోలు కొనసాగించే దేశాలపై 100 శాతం వరకు సుంకాలు విధించే అధికారాన్ని అధ్యక్షుడికి కల్పించింది. భారత్, చైనా వంటి దేశాలు ఈ పరిధిలోకి వచ్చే అవకాశం ఉంది. అయితే సుంకం స్వయంచాలకంగా అమలులోకి రాదని, ఏ దేశాలపై ఎంత విధించాలన్నది అధ్యక్షుడి నిర్ణయంపై ఆధారపడి ఉంటుందని నివేదికలు పేర్కొంటున్నాయి.
ఇప్పటికే ఈ పరిణామంపై భారత్ ఇంధన భద్రతే తమ ప్రధాన ప్రాధాన్యమని స్పష్టం చేసింది. దీంతో డిసెంబర్లో మోదీ-ట్రంప్ భేటీ జరిగితే వాణిజ్య చర్చలకు కొత్త ప్రాధాన్యం ఏర్పడే అవకాశం ఉంది. అయితే మోదీ అమెరికా పర్యటన, ద్వైపాక్షిక సమావేశంపై తుది నిర్ణయం అధికారికంగా వెల్లడికావాల్సి ఉంది.
No comments:
Post a Comment