ఆస్ట్రేలియా పార్లమెంటులో ఇళయరాజాకు అరుదైన గౌరవం

 

• 50 ఏళ్ల సినీ సంగీత ప్రస్థానానికి గుర్తింపుగా ప్రత్యేక స్మారక తపాలా బిళ్ల విడుదల
• తమిళనాడు చిన్న గ్రామం నుంచి ఆస్ట్రేలియా పార్లమెంటు వరకు.. భావోద్వేగానికి గురైన సంగీత దిగ్గజం

సంగీత దర్శకుడు ఇళయరాజాకు ఆస్ట్రేలియాలో అరుదైన గౌరవం దక్కింది. ఆయన సినీ సంగీత ప్రస్థానంలో 50 ఏళ్లు పూర్తయిన సందర్భంగా విక్టోరియా పార్లమెంటులో ప్రత్యేక స్మారక తపాలా బిళ్లను విడుదల చేశారు. ఈ గౌరవంపై ఇళయరాజా ఆనందం వ్యక్తం చేస్తూ, తమిళనాడులోని ఓ చిన్న గ్రామంలో జన్మించిన తనకు ఆస్ట్రేలియా పార్లమెంటులో గుర్తింపు లభించడం ఎంతో భావోద్వేగానికి గురిచేసిందని తెలిపారు. ఈ సందర్భంగా విక్టోరియా ప్రభుత్వ ఆర్థిక మంత్రి, ఎంపీ ఎన్వర్‌ ఎర్డొగాన్‌తో పాటు పార్లమెంటు సభ్యులకు ఆయన కృతజ్ఞతలు తెలిపారు. తన సంగీతానికి జీవం పోసిన కళాకారులు, తనతో కలిసి ప్రయాణించిన సాంకేతిక నిపుణులు, తరతరాలుగా తన స్వరాలను ఆదరిస్తున్న శ్రోతలకు కూడా ధన్యవాదాలు చెప్పారు.

ఇళయరాజా 50 ఏళ్ల సినీ ప్రయాణాన్ని పురస్కరించుకుని ఈ ఏడాది అంతర్జాతీయంగా పలు సంగీత కార్యక్రమాల్లో పాల్గొంటున్నారు. ఇటీవల ఆయన సంగీతం అందించిన మరాఠీ చిత్రం ‘గోంధల్‌’ ఆస్కార్‌ అంతర్జాతీయ ఫీచర్‌ ఫిలిం విభాగానికి భారత్‌ తరఫున అధికారిక ఎంట్రీగా ఎంపికైంది.