- ఉమ్మడి ప్రకటన విడుదల కావడం కీలకం..
- ఇరాన్‌ అధ్యక్షుడి చురుకైన భాగస్వామ్యం ముఖ్య పరిణామం
- చైనాతో చర్చలు కొనసాగాలి.. అయితే విశ్వసించే పరిస్థితి లేదు
హజారీబాగ్‌, సెప్టెంబర్‌ 13:
2026 బ్రిక్స్‌ సదస్సు విజయవంతమైందని మాజీ కేంద్ర ఆర్థిక, విదేశాంగ మంత్రి యశ్వంత్‌ సిన్హా అన్నారు. ఆహ్వానించిన దేశాధినేతలంతా సదస్సుకు హాజరుకావడం, సమావేశం అనంతరం ఉమ్మడి ప్రకటన విడుదల కావడం ప్రధాన విజయాలని పేర్కొన్నారు. గత మేలో ఢిల్లీలో జరిగిన విదేశాంగ మంత్రుల సమావేశంలో విభేదాల కారణంగా ఉమ్మడి ప్రకటన వెలువడలేదని గుర్తుచేశారు. ఈసారి అధికారులు ఎంతో కృషి చేసి ఏకాభిప్రాయంతో ప్రకటనను రూపొందించారని చెప్పారు.
సదస్సులో అన్ని దేశాల నేతలతో ద్వైపాక్షిక చర్చలు జరగడం కూడా ముఖ్య పరిణామమని సిన్హా అన్నారు. ముఖ్యంగా చైనా అధ్యక్షుడు షీ జిన్‌పింగ్‌తో ప్రధాని మోదీ భేటీ ప్రాధాన్యమైందన్నారు. ఇరాన్‌ అధ్యక్షుడు మసూద్‌ పెజెష్కియాన్‌ హాజరై ఉమ్మడి ప్రకటన రూపకల్పనలో చురుకుగా పాల్గొనడం కీలకమని పేర్కొన్నారు. పశ్చిమాసియాలో ఉద్రిక్తతల నేపథ్యంలో బ్రిక్స్‌ ప్రకటనలో గరిష్ఠ సంయమనం, చర్చలు-దౌత్యం ద్వారా సమస్యల పరిష్కారానికి పిలుపునివ్వడం జరిగింది.
ఇజ్రాయెల్‌ గాజా, లెబనాన్‌లో చేపడుతున్న చర్యలపై బ్రిక్స్‌ వైఖరి వ్యక్తం చేయడం సంతృప్తికరమని సిన్హా అన్నారు. ఈ పరిణామంతో పాలస్తీనా-ఇజ్రాయెల్‌ అంశంపై భారత్‌ తన గత వైఖరికి తిరిగి వచ్చినట్లుగా భావించవచ్చని వ్యాఖ్యానించారు.
అయితే చైనాను పూర్తిగా విశ్వసించలేమని సిన్హా స్పష్టం చేశారు. ‘‘చైనా ఎప్పటికప్పుడు భారత్‌కు ఇబ్బందులు సృష్టించింది. వెన్నుపోటు పొడిచింది. అందువల్ల చర్చలు కొనసాగాలి కానీ నమ్మకం పెట్టుకోవడానికి వీల్లేదు’’ అని అన్నారు. ద్వైపాక్షిక చర్చల్లో ఇరు దేశాలు తమ సమస్యలను గట్టిగా ప్రస్తావించాయని, కొంత ఉద్రిక్తత కూడా నెలకొని ఉండొచ్చని పేర్కొన్నారు.
జిన్‌పింగ్‌ గాలా విందుకు గైర్హాజరు కావడానికి ద్వైపాక్షిక చర్చలపై అసంతృప్తే కారణమై ఉండొచ్చన్న అభిప్రాయాలు ఉన్నాయని సిన్హా చెప్పారు. మొత్తంగా చూస్తే ఈ పరిస్థితిని ‘గ్లాస్‌ సగం నిండింది.. సగం ఖాళీగా ఉంది’ అన్నట్లుగా చూడవచ్చన్నారు.
బ్రిక్స్‌ అధ్యక్ష హోదాలో భారత్‌ తన బాధ్యతలను సమర్థంగా నిర్వర్తించిందని సిన్హా ప్రశంసించారు. వివాదాస్పద అంశాలను అన్ని దేశాలూ ఆమోదించేలా సమన్వయంతో తీర్చిదిద్ది, ఏకాభిప్రాయానికి తీసుకురావడంలో భారత్‌ విజయవంతమైందని అన్నారు.
No comments:
Post a Comment