- యుద్ధానికి ముగింపు పలికేలా 14 పాయింట్ల ఫార్ములా!
అమెరికా , ఇరాన్ దేశాల మధ్య నెలకొన్న ఉద్రిక్తతలకు స్వస్తి పలికేలా ఒక కీలక ముందడుగు పడింది. రెండు దేశాల మధ్య యుద్ధాన్ని అధికారికంగా ముగించేందుకు ఉద్దేశించిన ‘14 పాయింట్ల అవగాహన ఒప్పందం’ (MoU) తుది దశకు చేరుకున్నట్లు ‘యాక్సియోస్’ (Axios) నివేదిక వెల్లడించింది. వాషింగ్టన్ , టెహ్రాన్ ప్రతినిధుల మధ్య జరుగుతున్న ఈ చర్చలు సఫలమైతే, గల్ఫ్ రీజియన్‌లో శాంతి నెలకొనే అవకాశముంది. ఈ ఒప్పందం ప్రకారం తక్షణమే కాల్పుల విరమణ ప్రకటించి, సమగ్ర పరిష్కారం కోసం ‘30 రోజుల చర్చల గడువు’ను ఖరారు చేయనున్నారు. ఈ చరిత్రాత్మక చర్చలకు అమెరికా తరపున స్టీవ్ విట్‌కాఫ్ , జారెడ్ కుష్నర్ నాయకత్వం వహిస్తున్నారు. ఈ ప్రతిపాదిత ఒప్పందంలోని ప్రధానాంశాల ప్రకారం, ఇరాన్ తన యురేనియం శుద్ధి ప్రక్రియను తాత్కాలికంగా నిలిపివేసేందుకు అంగీకరించాలి. ప్రతిగా అమెరికా ఆ దేశంపై ఉన్న ఆంక్షలను తొలగించి, స్తంభింపజేసిన బిలియన్ల కొద్దీ డాలర్ల ఇరాన్ ఆస్తులను విడుదల చేస్తుంది. అంతేకాకుండా, అంతర్జాతీయ వాణిజ్యానికి అత్యంత కీలకమైన హార్ముజ్ జలసంధిలో సంచార ఆంక్షలను సడలించేందుకు కూడా ఇరు దేశాలు అంగీకరించినట్లు సమాచారం. అయితే, యురేనియం శుద్ధి ప్రక్రియపై విధిస్తున్న గడువు విషయంలో (అమెరికా 20 ఏళ్లు కోరుతుండగా, ఇరాన్ 5 ఏళ్లకే మొగ్గు చూపుతోంది) ఇంకా స్పష్టత రావాల్సి ఉంది. రాబోయే 48 గంటలు ఈ ఒప్పందానికి అత్యంత కీలకం కానున్నాయి. ఒకవేళ చర్చలు సఫలమైతే, తదుపరి సాంకేతిక చర్చలు ఇస్లామాబాద్ లేదా జెనీవాలో నిర్వహించే అవకాశముంది.
