- మహేశ్వరి చేనేత నుంచి గోవా అజులేజో కళ వరకు విశేష ఆకర్షణ
న్యూఢిల్లీ: స్వాతంత్య్ర దినోత్సవం సందర్భంగా రాష్ట్రపతి భవన్లో ఆగస్టు 15న నిర్వహించే వార్షిక ‘ఎట్ హోమ్’ విందు కార్యక్రమానికి సంబంధించిన ఆహ్వాన పత్రిక ఈసారి భారతదేశ గొప్ప కళా, చేనేత, హస్తకళల వైభవాన్ని ప్రతిబింబించేలా ప్రత్యేకంగా రూపొందించారు. రాష్ట్రపతి ద్రౌపది ముర్ము ఆతిథ్యం ఇవ్వనున్న ఈ కార్యక్రమం కోసం రూపొందించిన ఆహ్వాన పత్రికలో దేశవ్యాప్తంగా ఉన్న సాంప్రదాయ చేనేత కళలు, జానపద కళలు, హస్తకళలు, ప్రకృతి పరిరక్షణ సంప్రదాయాలను అందంగా ఆవిష్కరించారు. త్రివర్ణ పతాక రంగులతో రూపొందించిన వస్త్ర కవర్పై రాష్ట్రపతి భవన్ చిత్రాన్ని ముద్రించగా, ‘ఇండిపెండెన్స్ డే–2026’ గుర్తుతో చెక్కిన వెదురు కోస్టర్ను కూడా జత చేశారు. అంతేకాకుండా భారతదేశంలోని వివిధ ప్రాంతాల కళా సంప్రదాయాలను పరిచయం చేసే ప్రత్యేక సమాచార కార్డులను ఆహ్వాన పత్రికలో చేర్చారు.
ఈసారి కార్యక్రమానికి విచ్చేసే అతిథులకు స్వాగత సూచకంగా ప్రత్యేకంగా రూపొందించిన మహేశ్వరి స్టోల్ను కప్పి ఆహ్వానించనున్నారు. మధ్యప్రదేశ్లోని మహేశ్వర్ ప్రాంతానికి చెందిన సాంప్రదాయ పట్టు–పత్తి నేయ పద్ధతిలో చేతితో నేసిన ఈ స్టోల్లో మహారాష్ట్ర కర్వత్ కాఠి చీర నమూనా, గోవా కున్బీ చీర అంచు, మధ్యప్రదేశ్ మహేశ్వరి నేయ కళలోని కంగ్రా డిజైన్, ఛత్తీస్గఢ్కు చెందిన చింతా చౌక్ నమూనాలను సమన్వయం చేశారు. దీంతో నాలుగు రాష్ట్రాల వస్త్ర సంప్రదాయాలను ఒకే రూపంలో ప్రతిబింబించే అరుదైన కళాఖండంగా ఇది నిలిచింది.
ఆహ్వాన పత్రికలో గోవాకు ప్రత్యేక గుర్తింపుగా నిలిచిన అజులేజో టైల్స్ సంప్రదాయాన్నీ పరిచయం చేశారు. నీలం–తెలుపు రంగులతో చేతితో చిత్రించిన ఈ టైల్స్లో గోవా గ్రామీణ జీవనం, మత్స్యకారుల సంస్కృతి, ప్రకృతి దృశ్యాలు, స్థానిక వృక్షజాలం, జంతుజాలాన్ని కళాత్మకంగా చిత్రీకరించారు. శతాబ్దాల కిందట ప్రారంభమైన ఈ కళను గోవా కళాకారులు భారతీయ శైలిలో అభివృద్ధి చేసి నేటికీ ఇళ్లలో, ప్రజా భవనాల్లో అలంకరణగా వినియోగిస్తున్నారు. అలాగే తరతరాలుగా గ్రామీణ సమాజాలు సంరక్షిస్తున్న పవిత్ర అటవీ ప్రాంతాల ప్రాధాన్యాన్ని కూడా ఆహ్వాన పత్రికలో వివరించారు. జీవవైవిధ్యానికి నిలయాలుగా ఉన్న ఈ అడవులు సంప్రదాయ జ్ఞానంతో సంరక్షించబడుతున్నాయని పేర్కొన్నారు. ముఖ్యంగా ఆహారం, నూనె, కలపతో పాటు గ్రామీణ జీవనోపాధికి ఆధారంగా నిలిచే మహువా చెట్టును ‘జీవన వృక్షం’గా అభివర్ణించారు.
ఛత్తీస్గఢ్లోని బస్తర్ ఇనుప హస్తకళకు కూడా ఆహ్వాన పత్రికలో ప్రత్యేక స్థానం కల్పించారు. గిరిజన కళాకారులు ఇనుముతో ప్రకృతి, పురాణాలు, దైనందిన జీవితాన్ని ప్రతిబింబించే అలంకార, వినియోగ వస్తువులను తయారు చేసే సంప్రదాయాన్ని చిత్రాలు, వివరణలతో పరిచయం చేశారు. భారతీయ సంప్రదాయం, కళాత్మకత, పర్యావరణహిత దృక్పథాన్ని సమన్వయం చేస్తూ రూపొందించిన ఈ ఆహ్వాన పత్రిక దేశ సాంస్కృతిక వైవిధ్యాన్ని ప్రపంచానికి మరోసారి చాటిచెబుతోందని అధికారులు పేర్కొన్నారు.
