ట్రంప్ విమానంలో సాంకేతిక లోపం

• దావోస్ పర్యటనలో అంతరాయం

స్విట్జర్లాండ్‌లోని దావోస్‌లో జరుగుతున్న ప్రపంచ ఆర్థిక వేదిక (WEF) సదస్సుకు వెళ్తున్న అమెరికా అధ్యక్షుడు డొనాల్డ్ ట్రంప్ విమానం గాలిలో ఉండగానే వెనుదిరిగింది. ప్రయాణం ప్రారంభమైన కొద్దిసేపటికే ఎయిర్ ఫోర్స్ వన్ విమానంలో చిన్నపాటి విద్యుత్ సంబంధిత సాంకేతిక సమస్య తలెత్తింది. ముందు జాగ్రత్త చర్యగా పైలట్లు విమానాన్ని వాషింగ్టన్ సమీపంలోని ఆండ్రూస్ వైమానిక స్థావరానికి మళ్లించారు. విమానం టేకాఫ్ అయిన వెంటనే ప్రెస్ క్యాబిన్‌లోని లైట్లు కాసేపు ఆరిపోయినట్లు సమాచారం. అయితే ఈ అంతరాయం వల్ల పర్యటన రద్దు కాలేదు. అధ్యక్షుడు ట్రంప్ మరో ప్రత్యామ్నాయ విమానంలో తన దావోస్ పర్యటనను కొనసాగిస్తారని వైట్ హౌస్ వర్గాలు వెల్లడించాయి. ప్రస్తుత ఎయిర్ ఫోర్స్ వన్ విమానాలు దశాబ్దాల కాలం నాటివి కావడంతో కొత్త విమానాల తయారీపనులు ఇప్పటికే జరుగుతున్నాయి. ఈలోగా ఖతార్ రాజకుటుంబం బహుకరించిన విలాసవంతమైన విమానాన్ని కూడా భద్రతా ప్రమాణాలకు అనుగుణంగా సిద్ధం చేస్తున్నారు. ఈ చిన్న సాంకేతిక లోపం మినహా అధ్యక్షుడి పర్యటనలో ఎలాంటి మార్పు లేదు.