- రెండోసారి ముఖ్యమంత్రిగా హిమంత బిశ్వ శర్మ ఖాయం
- 87 స్థానాల్లో ఎన్డీఏ స్పష్టమైన ఆధిక్యం!
అస్సాం అసెంబ్లీ ఎన్నికల ఓట్ల లెక్కింపులో అధికార బీజేపీ నేతృత్వంలోని ఎన్డీఏ కూటమి దూసుకుపోతోంది. తాజా ట్రెండ్స్ ప్రకారం, మొత్తం 126 స్థానాలున్న అసెంబ్లీలో ఎన్డీఏ ఏకంగా 87 స్థానాల్లో ముందంజలో ఉండి, ప్రభుత్వం ఏర్పాటుకు అవసరమైన మ్యాజిక్ ఫిగర్ను సునాయాసంగా దాటేసింది. ఈ ఫలితాలతో హిమంత బిశ్వ శర్మ రెండోసారి ముఖ్యమంత్రిగా బాధ్యతలు చేపట్టడం దాదాపు ఖాయమైంది. ఆయన అనుసరించిన అభివృద్ధి వ్యూహాలు, మౌలిక సదుపాయాల కల్పన, సంక్షేమ పథకాలు ప్రజలను విశేషంగా ఆకట్టుకున్నట్లు ఈ తీర్పు స్పష్టం చేస్తోంది. ముఖ్యంగా జలుక్బారీ నియోజకవర్గంలో హిమంత బిశ్వ శర్మ భారీ మెజారిటీతో దూసుకుపోతుండగా, అస్సాం గణ పరిషత్ (AGP) ,యూపీపీఎల్ (UPPL) వంటి మిత్రపక్షాలు కూడా ఆశించిన దానికంటే మెరుగైన ప్రదర్శన కనబరుస్తున్నాయి. కాంగ్రెస్ నేతృత్వంలోని విపక్ష కూటమి కొన్ని చోట్ల గట్టి పోటీనిచ్చినప్పటికీ, ఎన్డీఏ ప్రభంజనాన్ని అడ్డుకోలేకపోయింది. అస్సాం అస్తిత్వం , సుస్థిరతకు ప్రజలు పట్టం కట్టారని ఈ ధోరణులు సూచిస్తున్నాయి. ఈ ఘనవిజయంతో అస్సాంలో బీజేపీ తన పట్టును మరింత సుస్థిరం చేసుకుంది.
