బీజేపీకి కె. అన్నామలై రాజీనామా

•  బీజేపీకి కె. అన్నామలై రాజీనామా
• ఆమోదించిన అధిష్ఠానం

తమిళనాడు రాజకీయాల్లో  కొన్ని రోజులుగా ఉత్కంఠ రేపుతున్న ఊహాగానాలకు తెరపడింది. ఆ రాష్ట్రంలో బీజేప)కి అత్యంత ప్రజాదరణ కలిగిన ముఖచిత్రంగా నిలిచిన కె. అన్నామలై ఆ పార్టీకి అధికారికంగా రాజీనామా చేశారు. తమిళనాడు మాజీ రాష్ట్ర అధ్యక్షుడు కె. అన్నామలై పార్టీ ప్రాథమిక సభ్యత్వానికి సమర్పించిన రాజీనామాను బీజేపీ జాతీయ అధ్యక్షుడు నితిన్ నబిన్ ఆమోదించినట్లు పార్టీ ఒక అధికారిక ప్రకటనలో స్పష్టం చేసింది. సోషల్ మీడియా వేదికగా మధ్యాహ్నం 12 గంటలకు అన్నామలై ప్రజలతో ఒక బహిరంగ, ఆత్మీయ సంభాషణ (లైవ్ సెషన్) నిర్వహించడానికి సరిగ్గా కొన్నిగంటల ముందే ఈ కీలక పరిణామం చోటుచేసుకోవడం గమనార్హం.

ఈ 41 ఏళ్ల యువ నేత మంగళవారం ఢిల్లీకి చేరుకుని పార్టీ జాతీయ అధ్యక్షుడు నితిన్ నబిన్‌ను కలిసి, ఎంతో సౌమ్యమైన వాతావరణంలో ఈ ఐదేళ్ల బంధాన్ని ముగించాలని అనుకుంటున్నట్లు తెలియజేశారు. ఆ తర్వాత కేంద్ర మంత్రి అమిత్ షా, అలాగే తనలోని నాయకత్వ పటిమను గుర్తించి ప్రోత్సహించిన బీజేపీ సీనియర్ నేత బీఎల్ సంతోష్‌లతో కూడా ఆయన సమావేశమయ్యారు. అప్పట్లో పార్టీ అధిష్ఠానం ఆయనను కొద్దిరోజులు వేచి చూడాలని కోరినట్లు సమాచారం. ఈ క్రమంలోనే గురువారం తమిళనాడు ప్రస్తుత బీజేపీ అధ్యక్షుడు నైనార్ నాగేంద్రన్‌ను ఢిల్లీకి పిలిపించి మరో విడత తెరవెనుక చర్చలు జరిపినప్పటికీ, అంతిమంగా అన్నామలై నిర్ణయాన్నే గౌరవిస్తూ శుక్రవారం ఆయన రాజీనామాను ఆమోదించారు. బీజేపీని వీడిన అన్నామలై, తమిళనాడు వ్యాప్తంగా యువ నాయకులను గుర్తించి, వారికి శిక్షణ ఇచ్చి సరైన రీతిలో తీర్చిదిద్దే లక్ష్యంతో ఒక సరికొత్త 'ప్రజా ఉద్యమాన్ని' ప్రారంభించే యోచనలో ఉన్నట్లు ఆయన సన్నిహిత వర్గాలు వెల్లడించాయి. భవిష్యత్తులో ఈ ఉద్యమమే ఒక నూతన రాజకీయ పార్టీగా మారే అవకాశం ఉందని, ఇప్పటికే ఆయన నడుపుతున్న "వి ది లీడర్స్" (We The Leaders) అనే లాభాపేక్ష లేని స్వచ్ఛంద సంస్థే ఈ రాబోయే భారీ రాజకీయ ప్రాజెక్టుకు పునాది కానుందని తెలుస్తోంది.

ప్రధాని నరేంద్ర మోడీకి వీరాభిమాని అయిన అన్నామలై, ఐపీఎస్ (IPS) సివిల్ సర్వీసెస్ ఉద్యోగానికి రాజీనామా చేసి 2020లో బీజేపీలో చేరారు. పార్టీలో చేరిన కొద్ది వారాల్లోనే ఆయనను రాష్ట్ర ఉపాధ్యక్షుడిగా, ఆ తర్వాతి ఏడాదిలోనే కేవలం 37 ఏళ్ల వయసులోనే తమిళనాడు బీజేపీ అధ్యక్షుడిగా అధిష్ఠానం నియమించింది. ద్రవిడ రాజకీయాల కోటలో బీజేపీ ఓటు బ్యాంకును, ఉనికిని పెంచిన నేతగా గుర్తింపు తెచ్చుకున్న అన్నామలైకి కేంద్ర పెద్దలు 2023 కర్ణాటక అసెంబ్లీ ఎన్నికల కో-ఇన్‌ఛార్జ్ బాధ్యతలు కూడా అప్పగించారు. అయితే ఇటీవల జరిగిన 2026 తమిళనాడు అసెంబ్లీ ఎన్నికల సమయంలో అన్నాడీఎంకే (AIADMK)తో బీజేపీ తిరిగి పొత్తు పెట్టుకోవడంతో ఇరు పక్షాల మధ్య విభేదాలు తీవ్రమయినట్లు తెలుస్తోంది. తమిళనాడులో ఒంటరిగా పోటీ చేయడం ద్వారానే పార్టీ పునాది బలపడుతుందని అన్నామలై భావించగా, కేంద్ర నాయకత్వం మాత్రం పొత్తుకే మొగ్గు చూపింది. పైగా, పొత్తు కుదరాలంటే అన్నామలైని రాష్ట్ర అధ్యక్ష పదవి నుండి తప్పించాలని అన్నాడీఎంకే అధినేత ఎడప్పాడి పళనిస్వామి షరతు విధించడంతోనే ఆయనను పదవి నుండి తొలగించినట్లు అప్పట్లో రాజకీయ విశ్లేషకులు భావించారు. తమిళనాడులో బీజేపీకి విపరీతమైన పాపులారిటీ తెచ్చినప్పటికీ, అన్నామలై 2021 అసెంబ్లీ ఎన్నికల్లో, అలాగే 2024 లోక్‌సభ ఎన్నికల్లో పోటీ చేసి ఓటమి పాలయ్యారు. ప్రస్తుతం బీజేపీతో బంధాన్ని పూర్తిగా తెంచుకున్న అన్నామలై రాబోయే రోజుల్లో తమిళనాడులో ఎలాంటి సరికొత్త రాజకీయ వ్యూహాలతో ముందుకెళ్తారో చూడాలి.