విద్యార్థుల నిరసనలను ప్రభుత్వం ఎప్పుడూ అడ్డుకోలేదు

• కేంద్ర ఆర్థికమంత్రి నిర్మలా సీతారామన్

న్యూఢిల్లీ: పరీక్షల పేపర్ లీకేజీలపై విద్యార్థులు చేపట్టిన నిరసనలను ప్రభుత్వం ఏనాడూ అడ్డుకోవడానికి ప్రయత్నించలేదని కేంద్ర ఆర్థిక మంత్రి నిర్మలా సీతారామన్ స్పష్టం చేశారు. 'బిజినెస్ లీడర్‌షిప్ అవార్డ్స్ 2026' కార్యక్రమంలో ఎన్డీటీవీతో మాట్లాడుతూ, ఈ నిరసనలు ప్రభుత్వాన్ని ఆశ్చర్యపరిచాయా అనే ప్రశ్నకు ఆమె పైవిధంగా స్పందించారు. యువత ఉత్సాహాన్ని తానేమీ తక్కువ చేసి చూడటం లేదని, ప్రతి తరంలోనూ యువత నిరసనల్లో పాల్గొనడం సహజమేనని సీతారామన్ అన్నారు. కొన్ని రాలుగా జరిగిన పరిణామాలను తక్కువగా అంచనా వేయడం లేదని చెప్పారు. ఢిల్లీలోని ప్రతిష్టాత్మక జవహర్‌లాల్ నెహ్రూ యూనివర్సిటీ (జేఎన్‌యూ) పూర్వ విద్యార్థిని అయిన ఆమె, తన కాలంలోనూ అలాగే జరిగిందని, భావి తరాలు కూడా ఇలాగే వ్యవహరిస్తాయని వ్యాఖ్యానించారు. సమాజంలో లేదా వ్యవస్థలో సరైన పరిస్థితులు లేనప్పుడు యువత త్వరగా స్పందిస్తుందని తెలిపారు.

పరీక్షల పేపర్ లీకేజీలపై పోరాటం చేసిన వ్యంగ్య రాజకీయ భాగస్వామ్య సమూహం 'కాకరోచ్ జనతా పార్టీ' (సీజేపీ) డిమాండ్ మేరకు కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయడంతో ఈ ఆందోళనలు ముగిశాయి. దీనిని ఉద్దేశించి మాట్లాడిన మంత్రి, యువత సరైన, సమయానుకూల నిర్ణయాలను, పారదర్శకమైన చర్యలను కోరుకుంటుందని, అది ఎంతైనా సమంజసమని అభిప్రాయపడ్డారు. మార్పు తీసుకురాగలమనే నమ్మకంతోనే వారు నిరసనలు తెలుపుతారని, యువతలో ఉన్న ఆ పోరాట పటిమను తాను స్వాగతిస్తున్నానని పేర్కొన్నారు. యువత ఆలోచనలను అర్థం చేసుకుని, దానికి తగినట్లుగా స్పందించడంలోనే నిజమైన మార్పు ఉంటుందని సీతారామన్ వివరించారు. ప్రతి దేశంలోనూ, ప్రతి తరంలోనూ యువత ఇలా స్పందించడం ఒక సహజమైన సాంప్రదాయమని చెప్పారు. ఏం జరుగుతుందో తెలుసుకోవడానికి, ప్రజల మాటలను ఆలకించడానికి ప్రభుత్వం ఎల్లప్పుడూ సిద్ధంగా ఉండాలని చెప్పారు.