హర్మూజ్ జలసంధిలో దాడిని తట్టుకుని.. ఒడిశాలోని పారాదీప్ పోర్ట్‌కు సురక్షితంగా చేరిన చమురు ట్యాంకర్

భువనేశ్వర్/పారాదీప్: పశ్చిమాసియాలో తీవ్ర ఉద్రిక్తతలు కొనసాగుతున్న వేళ, హర్మూజ్ జలసంధిలో అపరిచిత శక్తుల నుంచి తుపాకీ కాల్పుల (Gunfire) దాడిని ఎదుర్కొన్న ఒక భారీ చమురు ట్యాంకర్ కొన్ని గంటల క్రితం ఒడిశాలోని పారాదీప్ పోర్ట్‌కు సురక్షితంగా చేరుకుంది. దాదాపు 2 మిలియన్ బ్యారెళ్ల ఇరాక్ ముడి చమురుతో భారతదేశానికి వస్తున్న ‘ఎంటీ సన్మార్ హెరాల్డ్’ (MT Sanmar Herald) అనే నౌకపై ఇరాన్ జలాల్లో ప్రయాణిస్తున్న సమయంలో ఈ దాడి జరిగినట్లు పారాదీప్ పోర్ట్ అథారిటీ ఎక్స్ (ట్విట్టర్) వేదికగా వెల్లడించింది. అత్యంత క్లిష్టమైన ఆ పరిస్థితుల్లో నౌకలోని విలువైన చమురు నిల్వలతో పాటు సిబ్బంది ప్రాణరక్షణను దృష్టిలో ఉంచుకుని, ఘటన జరిగిన వెంటనే నౌక తన ప్రయాణ మార్గాన్ని మార్చుకుంది. అనంతరం భారత నౌకాదళం (Indian Navy) తో పూర్తిస్థాయిలో సమన్వయం చేసుకుంటూ, ఎలాంటి భద్రతా ఉల్లంఘనలు జరగకుండా దేశ తీరానికి సురక్షితంగా చేరుకోగలిగింది. ఈ నౌకపై కాల్పులు జరిపింది ఎవరనేది ఇంకా తెలియరాలేదు. కాగా, ప్రస్తుతం పారాదీప్ పోర్ట్‌కు 22 కిలోమీటర్ల దూరంలో లంగరేసిన ఈ నౌక నుండి చమురును అన్‌లోడ్ చేసే ప్రక్రియను అధికారులు ప్రారంభించారు.