నాకౌట్ వేటకు లియోనెల్ మెస్సి సిద్ధం

• కేప్ వర్డేతో రౌండ్ ఆఫ్ 32 పోరుకు ముందు అర్జెంటీనా జట్టు తీవ్ర ప్రాక్టీస్
• ట్రైనింగ్ ఫొటోలను ఇన్‌స్టాగ్రామ్‌లో పంచుకున్న లెజెండ్!
• ఫిఫా వరల్డ్ కప్ టైటిల్ డిఫెన్స్ రేసులో దూసుకుపోతున్న డిఫెండింగ్ ఛాంపియన్స్, 
• గోల్డెన్ బూట్ రేసులో ఎంబాప్పేతో కలిసి ఆరు గోల్స్‌తో అగ్రస్థానంలో మెస్సి
• మయామి స్టేడియంలో జరగనున్న చావో రేవో పోరు!

ఫిఫా వరల్డ్ కప్ 2026 (FIFA World Cup 2026) లో డిఫెండింగ్ ఛాంపియన్ అర్జెంటీనా తన టైటిల్‌ను నిలబెట్టుకునేందుకు \ కీలకమైన నాకౌట్ దశకు చేరుకుంది. టోర్నమెంట్‌లో గ్రూప్-జె టాపర్‌గా నిలిచిన అర్జెంటీనా జట్టు, రౌండ్ ఆఫ్ 32 (Round of 32) లో ‘కేప్ వర్డే’ (కాబో వర్డే) తో తలపడనుంది. ఈ చావో రేవో పోరుకు ముందు అర్జెంటీనా కెప్టెన్, ఎనిమిది సార్లు బ్యాలన్ డి ఓర్ విజేత లియోనెల్ మెస్సి తమ జట్టు సన్నద్ధతకు సంబంధించిన ఫొటోలను గురువారం రాత్రి తన అధికారిక ఇన్‌స్టాగ్రామ్ ఖాతాలో పంచుకున్నారు. మయామి స్టేడియంలో జరగబోయే ఈ ప్రతిష్టాత్మక నాకౌట్ మ్యాచ్ కోసం కోచ్ లియోనెల్ స్కలోని నేతృత్వంలో ఎంజో ఫెర్నాండెజ్, రోడ్రిగో డి పాల్, అలెక్సిస్ మాక్ అలిస్టర్, జూలియన్ అల్వారెజ్ వంటి స్టార్ ఆటగాళ్లతో కూడిన పూర్తి స్థాయి బలమైన జట్టుతో అర్జెంటీనా మైదానంలోకి దిగనుంది.

ప్రస్తుతం 39 ఏళ్ల వయసులోనూ తన అద్భుతమైన ఫామ్,నైపుణ్యంతో జట్టును ముందుండి నడిపిస్తున్న మెస్సి.. ఈ ప్రపంచకప్ టోర్నమెంట్‌లో ఇప్పటికే 6 గోల్స్ సాధించి అత్యధిక గోల్స్ చేసిన ఆటగాళ్లకు ఇచ్చే ‘గోల్డెన్ బూట్’ (Golden Boot) రేసులో ఫ్రాన్స్ కెప్టెన్ కిలియన్ ఎంబాప్పేతో కలిసి ఉమ్మడిగా అగ్రస్థానంలో కొనసాగుతున్నారు. కాగా, మోకాలి గాయం నుండి కోలుకున్న స్టార్ డిఫెండర్ క్రిస్టియన్ రొమేరో తిరిగి జట్టుతో కలిసి పూర్తిస్థాయి ప్రాక్టీస్ సెషన్‌లో పాల్గొనడం అర్జెంటీనా డిఫెన్స్‌కు భారీ బూస్ట్‌నిచ్చింది. ఈ మ్యాచ్‌లో విజయం సాధించిన జట్టు నేరుగా రౌండ్ ఆఫ్ 16 (ప్రీ-క్వార్టర్స్) కు అర్హత సాధించనుండటంతో ఫుట్‌బాల్ ప్రపంచమంతా ఈ ఉత్కంఠభరిత పోరు కోసం ఆసక్తిగా ఎదురుచూస్తోంది.