యువత వీధుల్లో ఉంటే ప్రధాని మోదీ సభకు రావడం లేదు

•  నీట్ లీకేజీ రగడపై ప్రియాంక గాంధీ, విపక్ష ఎంపీల తీవ్ర ఆగ్రహం

దేశవ్యాప్తంగా పెను సంచలనం సృష్టిస్తున్న నీట్ (NEET-UG) ప్రవేశ పరీక్షల ప్రశ్నాపత్రాల లీకేజీ వివాదం, విద్యాశాఖ మంత్రి ధర్మేంద్ర ప్రధాన్ రాజీనామా డిమాండ్‌పై పార్లమెంట్ వెలుపల, లోపల నిరసన జ్వాలలు మిన్నంటుతున్నాయి. దేశ యువత అంతా రోడ్లపైకి వచ్చి పోరాడుతుంటే ప్రధాని నరేంద్ర మోదీ పార్లమెంట్‌కు రాకుండా ముఖం చాటేస్తున్నారని కాంగ్రెస్ ఎంపీ ప్రియాంక గాంధీ వాద్రా తీవ్రస్థాయిలో ధ్వజమెత్తారు. దేశ భవిష్యత్తు అయిన యువత సభ వెలుపల ఆందోళన చేస్తుంటే, సభను సజావుగా ఎలా నడపగలమని పార్లమెంట్ వెలుపల మీడియాతో మాట్లాడుతూ ఆమె ప్రభుత్వాన్ని సూటిగా ప్రశ్నించారు.  మరోవైపు నీట్ పరీక్షల లీకేజీ ఆందోళనల తీవ్రత పెరుగుతున్న నేపథ్యంలో ప్రధాని నరేంద్ర మోదీ స్పందిస్తూ సోషల్ మీడియా వేదికగా కీలక ప్రకటన చేశారు. విద్యార్థుల ప్రయోజనాలు, వారి భవిష్యత్తు కంటే తమకు ఏదీ ముఖ్యం కాదని, పేపర్ లీకేజీలకు పాల్పడి యువత జీవితాలతో ఆటలాడుకునే వారిని ఎట్టి పరిస్థితుల్లోనూ వదిలిపెట్టేది లేదని స్పష్టం చేశారు. బాధ్యులపై వేగంగా, కఠినంగా విచారణ జరిపి తక్షణమే శిక్షలు పడేలా చేయడానికి ప్రత్యేకంగా 'ఫాస్ట్ ట్రాక్ కోర్టులను' ఏర్పాటు చేయాలని నిర్ణయించినట్లు వెల్లడించారు.

అయితే ప్రధాని ప్రకటనపై విపక్ష నేతలు తీవ్రస్థాయిలో విరుచుకుపడ్డారు. ప్రజలకు కావాల్సింది సోషల్ మీడియా ట్వీట్లు కాదని, స్పష్టమైన చర్యలు , న్యాయం మాత్రమేనని కాంగ్రెస్ ఎంపీ సుఖ్‌దేవ్ భగత్ స్పష్టం చేశారు.  సమాజ్‌వాదీ పార్టీ ఎంపీ డింపుల్ యాదవ్ మాట్లాడుతూ.. నీట్ లీకేజీ కారణంగా మనస్తాపంతో 20 మందికి పైగా విద్యార్థులు ఆత్మహత్య చేసుకున్నారని ప్రభుత్వం ఒప్పుకున్నప్పుడు, దానికి బాధ్యత ఎందుకు వహించడం లేదని నిలదీశారు. శాంతియుతంగా నిరసన తెలుపుతున్న విద్యార్థులపై జులై 20న విచక్షణారహితంగా పోలీసులతో దాడి చేయించిన కేంద్ర హోంమంత్రి అమిత్ షా దీనికి పూర్తి బాధ్యత వహించాలని డిమాండ్ చేశారు. విద్యాశాఖ మంత్రి తక్షణమే రాజీనామా చేయాలని ఆమె ఒత్తిడి తెచ్చారు. అలాగే శివసేన (యుబిటి) ఎంపీ అరవింద్ సావంత్ మాట్లాడుతూ.. జంతర్ మంతర్ వద్ద ఆందోళన చేస్తున్న ఆడపిల్లలపై పోలీసులు కొట్టిస్తుంటే ప్రభుత్వానికి సిగ్గు అనిపించడం లేదా అని ప్రశ్నించారు. ముందుగా విద్యాశాఖ మంత్రి రాజీనామా తీసుకున్న తర్వాతే ఇతర విషయాలపై మాట్లాడాలని విమర్శించారు.  మరోవైపు కేంద్ర సహాయ మంత్రి డాక్టర్ జితేంద్ర సింగ్ మాట్లాడుతూ.. ప్రభుత్వం సమస్య పరిష్కారానికి సిద్ధంగా ఉందని, విద్యార్థుల ప్రతినిధులకు ఇప్పటికే నాలుగుసార్లు చర్చలకు అధికారిక ప్రతిపాదనలు పంపామని తెలిపారు. ప్రభుత్వం ఎలాంటి పట్టింపులకు పోవడం లేదని, విద్యార్థులు కోరిన సమయానికి ఎప్పుడైనా ముఖాముఖి చర్చలు జరిపేందుకు సిద్ధమని స్పష్టం చేశారు. జులై 20నాటి 'చలో సంసద్' మార్చ్ తర్వాత ఢిల్లీ సహా ఇతర నగరాల్లో నిరసనలు తీవ్రరూపం దాల్చడంతో గురువారం కూడా పార్లమెంట్ ఉభయ సభలు ఎలాంటి కార్యకలాపాలు లేకుండానే వాయిదా పడ్డాయి.