దేశవ్యాప్తంగా వరుణుడి ఉగ్రరూపం

• వేర్వేరు ప్రమాదాల్లో పది మందికి పైగా మృతి
• పలు రాష్ట్రాలు జలమయం 
• ఢిల్లీలో రికార్డుస్థాయి వర్షపాతంతో క్లీన్ ఎయిర్ 
• యూపీలో పిడుగుపాట్లు-గోడ కూలి ఏడుగురు బలి
• సూరత్‌లో 17కు చేరిన మరణాల సంఖ్య
• కొండచరియలు విరిగిపడి హిమాచల్
• అరుణాచల్‌లలో ఇళ్లు, వంతెనలు ధ్వంసం

నైరుతి రుతుపవనాలు దేశవ్యాప్తంగా వినాశనాన్ని సృష్టిస్తున్నాయి. గురువారం (జూలై 9, 2026) దేశంలోని పలు రాష్ట్రాల్లో కురిసిన కుండపోత వర్షాల కారణంగా సంభవించిన వేర్వేరు ప్రమాదాల్లో పది మందికి పైగా ప్రాణాలు కోల్పోయారు. వందలాది ఇళ్లు, ప్రభుత్వ ఆస్తులు దెబ్బతినగా, ప్రధాన నగరాల్లోని నివాస ప్రాంతాలు మోకాళ్లోతు నీటిలో మునిగిపోయాయి. జాతీయ రహదారులపై ట్రాఫిక్ కిలోమీటర్ల మేర నిలిచిపోవడంతో రవాణా వ్యవస్థ పూర్తిగా స్తంభించింది. గుజరాత్‌లోని సూరత్ నగరంలో వరద నీరు నెమ్మదిగా తగ్గుముఖం పడుతున్నప్పటికీ, గురువారం మరో ఆరు మృతదేహాలు లభ్యమవడంతో  కొన్ని రోజులుగా కురిసిన వర్షాలకు అక్కడ మరణించిన వారి సంఖ్య 17కు చేరింది. ముఖ్యమంత్రి భూపేంద్ర పటేల్ స్వయంగా సూరత్‌లో పర్యటించి సహాయక చర్యలను సమీక్షించారు. మరోవైపు, మహారాష్ట్రలోని పుణె సమీపంలో పింప్రి చించ్వాడ్ భవన ప్రమాద స్థలంలో గురువారం ఒకరి మృతదేహాన్ని వెలికితీశారు, ఇంకా ఎనిమిది మంది శిథిలాల కింద చిక్కుకున్నట్లు భావిస్తున్నారు. థానే నగరంలో చెట్టు కూలిన ఘటనలో గాయపడిన 64 ఏళ్ల వృద్ధుడు చికిత్స పొందుతూ మరణించాడు.

ఉత్తరప్రదేశ్‌లో వాతావరణ శాఖ ‘రెడ్ అలర్ట్’ జారీ చేసిన వేళ వర్షాల బీభత్సానికి ఏడుగురు బలయ్యారు. సంత్ కబీర్ నగర్, కుషీనగర్ జిల్లాల్లో పిడుగుపాటుకు గురై ఇద్దరు మహిళలు, ఒక 14 ఏళ్ల బాలుడు మరణించారు. బులంద్‌షహర్‌లోని ముందాఖేడా గ్రామంలో భారీ వర్షానికి ఒక గోడ కూలి పక్కనే ఉన్న తాత్కాలిక గుడారాలపై పడటంతో ఇద్దరు మృతి చెందగా, నలుగురు గాయపడ్డారు. షామ్లీ జిల్లాలో రేకులతో నిర్మించిన షెడ్ గోడ కూలి ఒకరు మరణించగా, ఆయన ఇద్దరు కుమారులు తీవ్రంగా గాయపడ్డారు. ఘాజియాబాద్‌లో మూడేళ్ల చిన్నారి పల్లవి నివాస గృహం బయట ఉన్న డ్రైనేజీ కాల్వలో కొట్టుకుపోయి మృతి చెందింది. ఢిల్లీ సరిహద్దులోని ఎన్‌హెచ్-9 ఘాజీపూర్ వద్ద తీవ్రమైన జలమయం కారణంగా ఢిల్లీ-ఘాజియాబాద్ మార్గంలో భారీగా ట్రాఫిక్ నిలిచిపోయింది. ఘాజియాబాద్‌లోని వసుంధరలో నిర్మాణంలో ఉన్న బేస్‌మెంట్ పక్కన రోడ్డు కుంగిపోవడంతో పార్క్ చేసి ఉన్న కారు, స్కూటర్ ఆ గోతిలో పడిపోయాయి. పరిస్థితిని గమనించిన ఘాజియాబాద్ జిల్లా యంత్రాంగం ప్రభుత్వ పాఠశాలలకు సెలవు ప్రకటించింది.

దేశ రాజధాని ఢిల్లీ ఈ సీజన్‌లోనే అత్యంత భారీ వర్షాన్ని నమోదు చేసుకుంది. కొన్ని ప్రాంతాల్లో 160 మిమీ కంటే ఎక్కువ వర్షపాతం నమోదుకావడం వల్ల రోడ్లు నదులుగా మారినప్పటికీ, ఈ భారీ డౌన్‌పోర్ట్ ఢిల్లీలో సెప్టెంబర్ 2023 తర్వాత అత్యంత స్వచ్ఛమైన గాలి (Cleanest Air) నమోదు కావడానికి సహాయపడింది. రోహిణి ప్రాంతంలో భవనం కుప్పకూలిన ఘటనలో మరణాల సంఖ్య మూడుకు చేరింది. వికాస్ మార్గ్, సదర్ బజార్, ద్వారకతో పాటు నోయిడాలోని సెక్టార్లు, నోయిడా-గ్రేటర్ నోయిడా ఎక్స్‌ప్రెస్‌వే పూర్తిగా జలమయమయ్యాయి. గురుగ్రామ్‌లోని ఒక లగ్జరీ అపార్ట్‌మెంట్ బాల్కనీ భాగం కూలిపోయింది. పర్వత ప్రాంత రాష్ట్రాలైన ఉత్తరాఖండ్, హిమాచల్ ప్రదేశ్, అరుణాచల్ ప్రదేశ్‌లలో పరిస్థితి మరింత ఆందోళనకరంగా మారింది. ఉత్తరాఖండ్‌లో ఎడతెరిపి లేని వర్షాల కారణంగా 9 రాష్ట్ర రహదారులతో సహా 107 రవాణా మార్గాలు మూతపడ్డాయి. డెహ్రాడూన్ సహా ఏడు జిల్లాలకు ‘రెడ్ అలర్ట్’ ప్రకటించి పాఠశాలలకు సెలవులు ఇచ్చారు.

హిమాచల్‌ ప్రదేశ్‌లోని కిన్నౌర్ జిల్లా కుప్పా ప్రాంతంలో జాతీయ రహదారి-5పై కొండచరియలు విరిగిపడటంతో భారీ బండరాళ్లు రోడ్డుకు అడ్డంగా పడిపోయాయి, మూడు ఇళ్లు, తోటలు దెబ్బతిన్నాయి. ఒక నదిలో నీటి మట్టం ప్రమాదకరంగా పెరగడంతో కిన్నౌర్‌లోని 100 అడుగుల ఇనుప వంతెన పూర్తిగా నీట మునిగిపోయి లిప్పా గ్రామానికి బాహ్య ప్రపంచంతో సంబంధాలు తెగిపోయాయి. అరుణాచల్ ప్రదేశ్‌లోని ఆరు జిల్లాల్లో సరికొత్త వరదలు, కొండచరియల విపత్తు సంభవించి ఇళ్లు, రోడ్లు, పంటలు ధ్వంసమయ్యాయి. కేంద్ర హోం మంత్రిత్వ శాఖకు చెందిన బృందం నష్టాన్ని అంచనా వేసేందుకు వరద ప్రభావిత ప్రాంతాల్లో పర్యటించింది. కేరళలో కూడా మలప్పురం, కోజికోడ్, వయనాడ్ జిల్లాలకు ‘ఆరెంజ్ అలర్ట్’ కొనసాగుతోంది. వయనాడ్ కొండచరియల విపత్తు స్థలంలో గురువారం మరో మూడు మృతదేహాలు లభ్యం కావడంతో అక్కడ మొత్తం మరణాల సంఖ్య ఆరుకు చేరింది. కాగా, నైరుతి రుతుపవనాలు రాజస్థాన్, హరియాణా, పంజాబ్‌లలోని మిగిలిన ప్రాంతాలకూ విస్తరించి దేశమంతటా కమ్మేసాయన ఐఎండీ ప్రకటించింది. జూలై మొదటి తొమ్మిది రోజుల్లోనే దేశవ్యాప్తంగా సాధారణం (73.8 మిమీ) కంటే చాలా ఎక్కువగా అంటే 101.9 మిమీ వర్షపాతం నమోదైంది.