అమెరికాపై ఇరాన్ భీకర క్షిపణి దాడి

• యూఎస్ ఎయిర్ బేస్‌పై 10 బాలిస్టిక్ మిసైళ్లతో విరుచుకుపడ్డ ఐఆర్‌జీసీ
• పశ్చిమాసియాలో ముదురుతున్న యుద్ధ మేఘాలు
• టెహ్రాన్‌పై అమెరికా దాడులకు ప్రతీకారంగా చర్యలని ఇరాన్ ప్రకటన
• కువైట్, బహ్రెయిన్‌లలోని అమెరికా స్థావరాల ధ్వంసం
• సైన్యాన్ని హై అలర్ట్‌లో ఉంచిన జోర్డాన్ ప్రభుత్వం

పశ్చిమాసియాలోఉద్రిక్తతలు ప్రమాదకరస్థాయికి చేరుకున్నాయి. అమెరికా సైన్యం ఇరాన్ రాజధాని టెహ్రాన్‌పై జరిపిన వైమానిక దాడులకు ప్రతీకారంగా.. ఇరాన్‌కు చెందిన శక్తివంతమైన ఇస్లామిక్ రివల్యూషనరీ గార్డ్ కార్ప్స్ (IRGC) గురువారం (జూలై 9, 2026) జోర్డాన్ దేశంలోని అమెరికాకు చెందిన ‘అల్-అజ్రాక్’ (Al-Azraq) వ్యూహాత్మక వైమానిక స్థావరంపై ఏకంగా 10 బాలిస్టిక్ క్షిపణులతో భీకర దాడి చేసింది. ఈ దాడులను పశ్చిమాసియాలోని శత్రు దేశాల కమాండ్ అండ్ కంట్రోల్ సెంటర్‌ను లక్ష్యంగా చేసుకుని జరిపినట్లు ఇరాన్ అధికారిక మీడియా సంస్థ ఐఆర్ఐబీ (IRIB) వెల్లడించింది. అమెరికా జరిపిన అక్రమ దాడులకు తాము చేపట్టిన శిక్షార్హమైన చర్యలలో ఇది 'రెండో విడత' అని ఐఆర్‌జీసీ ప్రకటించింది. మధ్యాహ్నం 2:20 గంటల ప్రాంతంలో తమ ఏరోస్పేస్ ఫైటర్లు ఈ బాలిస్టిక్ క్షిపణులను విజయవంతంగా ప్రయోగించి శత్రు స్థావరాన్ని ధ్వంసం చేశాయని స్పష్టం చేసింది. ఒకవేళ అమెరికా గనుక మళ్లీ దుశ్చర్యలకు పాల్పడితే ఈ ప్రాంతంలోని మరే ఇతర యూఎస్ సైనిక స్థావరాలు కూడా తమ భారీ దాడుల నుండి తప్పించుకోలేవని ఇరాన్ తీవ్రంగా హెచ్చరించింది.

ఇరాన్ నుండి దూసుకొచ్చిన క్షిపణులు తమ వైమానిక పరిధిలోకి ప్రవేశించడంతో జోర్డాన్ దేశంలో ఒక్కసారిగా ఎయిర్ రైడ్ (వైమానిక దాడి) సైరన్లు మోగాయి. ఈ పరిణామాలను జోర్డాన్ ప్రభుత్వ అధికార ప్రతినిధి మొహమ్మద్ అల్-మొమానీ సామాజిక మాధ్యమం ఎక్స్ (X) ద్వారా ధృవీకరించారు. ఇరాన్ వైపు నుంచి వచ్చిన క్షిపణులను తమ రక్షణ వ్యవస్థలు అడ్డుకుని కూల్చివేసాయన్నారు. దేశ రక్షణ కోసం, పౌరుల భద్రత కోసం తమ సాయుధ బలగాలు (జోర్డాన్ ఆర్మీ) ప్రస్తుతం అత్యంత అప్రమత్తంగా (హై అలర్ట్) ఉన్నాయని ఆయన ప్రకటించారు. కాగా, ఈ దాడుల కంటే ముందే ఇరాన్ తన 'మొదటి విడత' ప్రతీకార చర్యలలో భాగంగా కువైట్, బహ్రెయిన్ దేశాల్లో విస్తరించి ఉన్న నాలుగు ప్రధాన అమెరికా సైనిక స్థావరాలపై డ్రోన్లు, క్షిపణులతో విరుచుకుపడింది. కువైట్‌లోని ఆరిఫ్‌జాన్, అలీ అల్ సలేం , బహ్రెయిన్‌లోని జుఫైర్, షేక్ ఈసా సైనిక కేంద్రాలే లక్ష్యంగా ఇరాన్ ఈ దాడులు నిర్వహించింది. అమెరికా సైన్యాన్ని 'పిల్లలను చంపే ఉగ్రవాద మూక'గా అభివర్ణించిన ఐఆర్‌జీసీ.. తమ దేశంపై దాడులు చేయడం ద్వారా అమెరికా అంతర్జాతీయ ఒప్పందాలను ఉల్లంఘించిందని మండిపడింది.

ఈ అంతర్జాతీయ సంక్షోభం అమెరికా మిలిటరీకి చెందిన సెంట్రల్ కమాండ్ (CENTCOM) తీసుకున్న నిర్ణయంతో మొదలైంది. హార్ముజ్ జలసంధిలో అంతర్జాతీయ వాణిజ్య నౌకలపై ఇరాన్ సాగిస్తున్న దాడులకు అడ్డుకట్ట వేయడానికి మరియు అక్కడ నౌకాయాన స్వేచ్ఛను కాపాడటానికి ఇరాన్‌పై అదనపు దాడులు ప్రారంభించినట్లు బుధవారం రాత్రి అమెరికా ప్రకటించింది. తమ కమాండర్ ఇన్ చీఫ్ (అధ్యక్షుడు) ఆదేశాల మేరకే ఇరాన్ సామర్థ్యాన్ని దెబ్బతీసేందుకు ఈ ఆపరేషన్ చేపట్టినట్లు యూఎస్ సెంట్రల్ కమాండ్ పేర్కొంది. ఈ అమెరికా వైమానిక దాడుల ధాటికి ఇరాన్ దక్షిణ రేవు నగరమైన ‘చబహార్’ (Chabahar) లో విద్యుత్ వ్యవస్థ పూర్తిగా స్తంభించిపోయి చీకట్లు అలుముకున్నాయి. అలాగే ఇరాన్ అణు విద్యుత్ కేంద్రం ఉన్న ‘బుషెహర్’ (Bushehr) నగరంలోనూ భారీ పేలుళ్లు సంభవించినట్లు అంతర్జాతీయ మీడియా సంస్థలు వెల్లడించాయి. ఈ పరస్పర క్షిపణి దాడుల పరంపరతో పశ్చిమాసియా ప్రాంతం మరోసారి పూర్తి స్థాయి యుద్ధ కోరల్లోకి చిక్కుకునే ప్రమాదం స్పష్టంగా కనిపిస్తోంది.