- న్యూఢిల్లీ సదస్సు విజయవంతంపై భారత విదేశాంగ శాఖ కీలక ప్రకటన!
దేశ రాజధాని న్యూఢిల్లీలో జరిగిన 'బ్రిక్స్' (BRICS 2026) విదేశాంగ మంత్రుల సదస్సు విజయవంతంగా ముగిసింది. ప్రస్తుత అంతర్జాతీయ భౌగోళిక-రాజకీయ పరిస్థితులు, పశ్చిమ ఆసియా (మిడిల్ ఈస్ట్) సంక్షోభం వంటి ఉద్రిక్తతల నడుమ జరిగిన ఈ సమావేశంలో సభ్యదేశాల మధ్య భిన్నాభిప్రాయాలు వ్యక్తమైనప్పటికీ, అంతిమంగా ఒక ఉమ్మడి అంగీకారానికి (Common Ground) రాగలిగామని భారత విదేశాంగ మంత్రిత్వ శాఖ (MEA) అధికారికంగా ప్రకటించింది. ఈ సదస్సు ముగిసిన అనంతరం విదేశాంగ శాఖ మీడియా ప్రతినిధి విలేకరుల సమావేశంలో మాట్లాడుతూ, ప్రపంచవ్యాప్తంగా ఎదురవుతున్న ఆర్థిక , వ్యూహాత్మక సవాళ్లను ఎదుర్కొనేందుకు బ్రిక్స్ కూటమి ఏకాభిప్రాయంతో ముందుకు సాగాలని నిర్ణయించినట్లు వెల్లడించారు.
రష్యా-ఉక్రెయిన్ యుద్ధం, ఇజ్రాయెల్-ఇరాన్ ఉద్రిక్తతలు ,అంతర్జాతీయ చమురు సరఫరా ఆటంకాల నేపథ్యంలో ఈ ఏడాది బ్రిక్స్ మంత్రుల భేటీ అత్యంత ప్రాధాన్యం సంతరించుకుంది. కూటమిలోని వేర్వేరు దేశాలకు భిన్నమైన వ్యూహాత్మక ప్రయోజనాలు ,దృక్పథాలు ఉన్నప్పటికీ, చర్చల ద్వారా వాటన్నింటినీ సమన్వయం చేసుకున్నట్లు విదేశాంగ శాఖ తెలిపింది. ముఖ్యంగా గ్లోబల్ సౌత్ (అభివృద్ధి చెందుతున్న దేశాల) ప్రయోజనాల పరిరక్షణ, బహుళపక్ష దౌత్యం (Multilateralism), అంతర్జాతీయ ఆర్థిక సంస్కరణలపై సభ్యదేశాలన్నీ ఒకే తాటిపైకి వచ్చాయని పేర్కొంది. భిన్నత్వంలో ఏకత్వాన్ని ప్రదర్శిస్తూ, పరస్పర గౌరవంతో సాగిన ఈ చర్చలు ప్రపంచ శాంతికి, స్థిరత్వానికి ఎంతో దోహదపడతాయని భారత్ ఆశాభావం వ్యక్తం చేసింది.
