- సువేందు ప్రభుత్వంపై నాగాలాండ్ సీఎం నెయిఫియు రియో ఆశాభావం!
పశ్చిమ బెంగాల్ రాజకీయాల్లో నూతన శకం మొదలవుతోందని, బీజేపీ ప్రభుత్వం కొలువుదీరిన తర్వాత రాష్ట్రంలో అనూహ్యమైన మార్పులు చూస్తారని నాగాలాండ్ ముఖ్యమంత్రి నెయిఫియు రియో ధీమా వ్యక్తం చేశారు. కోల్‌కతాలోని బ్రిగేడ్ పరేడ్ గ్రౌండ్స్‌లో ఈరోజు జరగనున్న సువేందు అధికారి ప్రమాణ స్వీకార మహోత్సవానికి హాజరయ్యేందుకు వచ్చిన ఆయన మీడియాతో మాట్లాడారు. బెంగాల్ ప్రజలు అభివృద్ధి , శాంతిని కోరుకుంటూ బీజేపీకి పట్టం కట్టారని, ప్రధాని మోదీ మార్గనిర్దేశంలో కొత్త ప్రభుత్వం అతి తక్కువ సమయంలోనే రాష్ట్ర రూపురేఖలను మారుస్తుందని ఆయన ఆకాంక్షించారు. ముఖ్యంగా ఈశాన్య రాష్ట్రాలకు బెంగాల్ ప్రవేశద్వారం వంటిదని, ఇక్కడ బీజేపీ అధికారంలోకి రావడం వల్ల మొత్తం తూర్పు , ఈశాన్య భారత ప్రాంతాల మధ్య సమన్వయం పెరిగి ఆర్థికాభివృద్ధి వేగవంతం అవుతుందని రియో పేర్కొన్నారు.
సువేందు అధికారి నాయకత్వంపై ప్రశంసలు కురిపించిన నెయిఫియు రియో, ఆయనకు క్షేత్రస్థాయిలో ఉన్న పట్టు బెంగాల్ పురోగతికి ఎంతగానో దోహదపడుతుందని అన్నారు. ఇన్నాళ్లూ కొనసాగిన రాజకీయ అస్థిరతకు, హింసకు ఇక స్వస్తి పలికి బెంగాల్ మళ్లీ తన పూర్వ వైభవాన్ని సంతరించుకుంటుందని ఆయన జోస్యం చెప్పారు. ఈ చరిత్రాత్మక ఘట్టంలో భాగస్వామి కావడం సంతోషంగా ఉందని తెలుపుతూ, సువేందు నేతృత్వంలోని మంత్రివర్గానికి అభినందనలు తెలియజేశారు. ప్రధాని నరేంద్ర మోదీ సమక్షంలో జరగనున్న ఈ వేడుకకు రియోతో పాటు దేశంలోని పలువురు బీజేపీ , మిత్రపక్షాల ముఖ్యమంత్రులు తరలివచ్చారు.
