అమెరికాలో కుప్పకూలిన రిపబ్లికన్ల కంచుకోటలు.. హౌస్‌, సెనేట్‌పై డెమోక్రాట్ల పట్టు

• 2026 మధ్యంతర ఎన్నికల్లో ట్రంప్‌కు గట్టి ఎదురుదెబ్బ
• ఆరు సెనేట్‌, పన్నెండుకు పైగా హౌస్‌ స్థానాలు డెమోక్రాట్ల ఖాతాలోకి
• టెక్సాస్‌, కాన్సాస్‌, సౌత్‌ కరోలినాలో దశాబ్దాల తర్వాత డెమోక్రాట్లకు సెనేట్‌ విజయం

అమెరికా అధ్యక్షుడు డొనాల్డ్‌ ట్రంప్‌, రిపబ్లికన్‌ పార్టీకి 2026 మధ్యంతర ఎన్నికలు గట్టి ఎదురుదెబ్బగా నిలిచాయి. మంగళవారం జరిగిన ఎన్నికల్లో డెమోక్రాట్లు సెనేట్‌పై పట్టు సాధించడంతో పాటు ప్రతినిధుల సభ (హౌస్‌)లోనూ మెజారిటీ దిశగా దూసుకెళ్లారు. రిపబ్లికన్లకు సంప్రదాయంగా బలమైన రాష్ట్రాల్లోనూ డెమోక్రాట్లు విజయాలు సాధించడం రాజకీయంగా ప్రాధాన్యం సంతరించుకుంది. ఇప్పటివరకు ఆరు సెనేట్‌ స్థానాలు, పన్నెండుకు పైగా హౌస్‌ స్థానాలు డెమోక్రాట్ల చేతికి మారాయి. టెక్సాస్‌, కాన్సాస్‌, సౌత్‌ కరోలినా రాష్ట్రాలు దశాబ్దాల తర్వాత డెమోక్రాట్లను సెనేటర్లుగా ఎన్నుకున్నాయి. నార్త్‌ కరోలినా, ఒహాయోల్లోనూ సెనేట్‌ స్థానాలను డెమోక్రాట్లు కైవసం చేసుకున్నారు.

గవర్నర్‌ ఎన్నికల్లోనూ డెమోక్రాట్లకు విజయాలు దక్కాయి. జార్జియాలో కీషా లాన్స్‌ బాటమ్స్‌, ఒహాయోలో అమీ ఆక్టన్‌, ఐయోవాలో రాబ్‌ శాండ్‌, టెక్సాస్‌లో గినా హినోజోసా విజయం సాధించారు. గతంలో రిపబ్లికన్ల ఆధీనంలో ఉన్న గవర్నర్‌ పదవులను డెమోక్రాట్లు తమ ఖాతాలో వేసుకున్నారు. ట్రంప్‌ తనే ఎన్నికల్లో పోటీ చేస్తున్నట్లుగా భావించి ఓటు వేయాలని ప్రజలకు పిలుపునిచ్చారు. అయితే, పెరుగుతున్న జీవన వ్యయం, తన ప్రభుత్వ విధానాలపై అసంతృప్తి కారణంగా ఓటర్లు రిపబ్లికన్లకు వ్యతిరేకంగా తీర్పునిచ్చినట్లు అసోసియేటెడ్‌ ప్రెస్‌ (ఏపీ) ఓటర్‌ పోల్‌ వెల్లడించింది. అధ్యక్షుడిపై మరింత పర్యవేక్షణ, నియంత్రణ ఉండేలా కాంగ్రెస్‌ వ్యవహరించాలని కూడా ఓటర్లు కోరుకుంటున్నట్లు సర్వే పేర్కొంది.

ట్రంప్‌ విధానాల ప్రభావం లేదన్న అధ్యక్షుడు

ఎన్నికల్లో రిపబ్లికన్లకు ఎదురైన పరాజయాల నుంచి ట్రంప్‌ తనను తాను దూరంగా ఉంచుకునే ప్రయత్నం చేశారు. బుధవారం తెల్లవారుజామున ప్రసారమైన ఫాక్స్‌ న్యూస్‌ ఇంటర్వ్యూలో డెమోక్రాట్ల ప్రచారాన్ని ప్రశంసించారు. వారు బాగా పనిచేశారని, రిపబ్లికన్‌ అభ్యర్థులే ఓటమికి బాధ్యత వహించాలని వ్యాఖ్యానించారు. ట్రంప్‌ మద్దతు పొందిన పలువురు అభ్యర్థులు 2024లో ఆయన ఘన విజయం సాధించిన రాష్ట్రాల్లోనే ఓటమి పాలయ్యారు. అయినప్పటికీ ఆర్థిక వ్యవస్థ, ఇరాన్‌ యుద్ధ నిర్వహణ సహా తన ప్రభుత్వ విధానాల వల్లే ఓటమి ఎదురైందన్న వాదనను ట్రంప్‌ అంగీకరించలేదు. “దీనిని నాపై వచ్చిన దెబ్బగా నేను భావించడం లేదు. అధ్యక్ష పదవీ చరిత్రలోనే అత్యుత్తమ రెండేళ్లను మేం పూర్తి చేశాం” అని ఆయన పేర్కొన్నారు. మధ్యంతర ఎన్నికల ఫలితాలను తన అధ్యక్షతకు ప్రజలు ఇచ్చిన తీర్పుగా చూడకూడదని అన్నారు. డెమోక్రాట్లు బాగా పనిచేశారని, గట్టిగా పోరాడారని ఫాక్స్‌ న్యూస్‌తో ఫోన్‌ ఇంటర్వ్యూలో ప్రశంసించారు.

కాలిఫోర్నియాలో ఓటరు గుర్తింపు ప్రతిపాదనకు తిరస్కారం

డెమోక్రాట్ల ఆధిపత్యం ఉన్న కాలిఫోర్నియాలో ఓటరు గుర్తింపు నిబంధనలను మరింత కఠినతరం చేయాలన్న ప్రతిపాదనను ఓటర్లు తిరస్కరించారు. ఓ సంప్రదాయవాద సంస్థ వేలాది పిటిషన్‌ సంతకాలు సేకరించడంతో ఈ ప్రతిపాదనను బ్యాలెట్‌పైకి తీసుకొచ్చారు. దేశవ్యాప్తంగా ఓటింగ్‌కు ఫొటో గుర్తింపు కార్డు తప్పనిసరి చేయాలని ట్రంప్‌ గతంలో చేసిన ప్రయత్నాలతో ఈ ప్రతిపాదనకు సంబంధం ఉందని వ్యతిరేకులు విమర్శించారు. ఈ ప్రతిపాదన ఆమోదం పొందితే, వ్యక్తిగతంగా పోలింగ్‌ కేంద్రానికి వెళ్లి ఓటు వేసేవారు ప్రభుత్వం జారీ చేసిన గుర్తింపు కార్డును చూపించాల్సి వచ్చేది. పోస్టల్‌ బ్యాలెట్‌ ద్వారా ఓటు వేసేవారు తమ గుర్తింపు సంఖ్యలోని చివరి నాలుగు అంకెలను అందించాల్సి ఉండేది. కాలిఫోర్నియాలో అత్యధిక శాతం ఓట్లు పోస్టల్‌ బ్యాలెట్‌ ద్వారానే నమోదవుతాయి.

‘టెక్సాస్‌ను తిరిగి చేజిక్కించుకున్నాం’.. టలారికో ప్రకటనతో హర్షాతిరేకాలు

రిపబ్లికన్లకు బలమైన రాష్ట్రంగా పేరున్న టెక్సాస్‌లో డెమోక్రటిక్‌ అభ్యర్థి జేమ్స్‌ టలారికో సెనేట్‌ ఎన్నికల్లో విజయం సాధించారు. “మేం టెక్సాస్‌ను తిరిగి చేజిక్కించుకున్నాం” అంటూ ఆయన చేసిన ప్రకటనతో విజయోత్సవ సభలో హర్షధ్వానాలు మార్మోగాయి. అయితే, ఈ విజయం కేవలం ఒక పార్టీకి సంబంధించినది కాదని టలారికో స్పష్టం చేశారు. “ఒకరినొకరు ద్వేషించుకోవాలని చెబుతున్న మాటలు వింటూ మేం విసిగిపోయాం. పొరుగువారిని దూరం చేసుకోవడం ద్వారా లేదా వారిని అవమానించడం ద్వారా ఈ ఎన్నికల్లో గెలవలేదు” అని ఆయన అన్నారు. ప్రేమతో కూడిన రాజకీయాల ద్వారా రాజకీయ వాతావరణాన్ని మార్చేందుకు తమ ప్రచారం ప్రయత్నించిందని పేర్కొన్నారు. “తమ మాటలను ఎవరైనా ఆలకిస్తున్నారా అని ఎప్పుడైనా సందేహించిన ప్రతి టెక్సాస్‌ పౌరుడి కోసం ఈ విజయం. నేను మీ మాట విన్నాను. మేం మీ మాట విన్నాం. ఈ రాత్రి ప్రపంచం మొత్తం మీ గొంతును వింటోంది” అని టలారికో వ్యాఖ్యానించారు.

మిన్నెసోటాను ముందుకు తీసుకెళ్తా: అమీ క్లోబుచర్‌

అమెరికా సెనేట్‌లో 20 ఏళ్లుగా సేవలందిస్తున్న డెమోక్రటిక్‌ నాయకురాలు అమీ క్లోబుచర్‌ మిన్నెసోటా గవర్నర్‌గా విజయం సాధించారు. రాష్ట్రాన్ని ఎడమవైపో, కుడివైపో నడిపించడం తన లక్ష్యం కాదని, అభివృద్ధి దిశగా ముందుకు తీసుకెళ్లడమే తన ఉద్దేశమని విజయోత్సవ సభలో తెలిపారు. రాష్ట్ర ప్రభుత్వ పనితీరుపై ఆడిట్‌ నిర్వహిస్తానని, మోసాలను గుర్తించి అడ్డుకునేందుకు కొత్త సాంకేతిక పరిజ్ఞానాన్ని వినియోగిస్తానని హామీ ఇచ్చారు. ప్రభుత్వ సేవలను వేగవంతం చేయడం, ప్రజల్లో విశ్వాసాన్ని పునరుద్ధరించడం, వారి కోసం పనిచేయడం తన ప్రాధాన్యాలని పేర్కొన్నారు. తాను తీసుకునే ప్రతి నిర్ణయం అందరికీ నచ్చకపోవచ్చని కూడా వ్యాఖ్యానించారు. ట్రంప్‌ నిర్ణయాలను గుడ్డిగా అనుసరించే ప్రసక్తే లేదని క్లోబుచర్‌ స్పష్టం చేశారు. “డొనాల్డ్‌ ట్రంప్‌ నిర్ణయాలకు నేను మద్దతు తెలిపే వ్యక్తిగా ఉండను. ఎలాంటి భయం, పక్షపాతం లేకుండా నా బాధ్యతలు నిర్వర్తిస్తాను. మిన్నెసోటా ప్రజల కోసమే పాలన సాగిస్తాను.. మరెవరి కోసం కాదు” అని ఆమె అన్నారు.

మైనేలో సుసాన్‌ కాలిన్స్‌కు ఓటమి

రిపబ్లికన్‌ సెనేటర్‌ సుసాన్‌ కాలిన్స్‌ మైనే రాష్ట్రంలో డెమోక్రటిక్‌ అభ్యర్థి ట్రాయ్‌ జాక్సన్‌ చేతిలో ఓటమిని అంగీకరించారు. దీంతో అమెరికా సెనేట్‌లో ఆరోసారి ఎన్నిక కావాలన్న ఆమె ప్రయత్నానికి తెరపడింది. రిపబ్లికన్లకు కీలకంగా భావించే రాష్ట్రాల్లోనూ డెమోక్రాట్లు విజయాలు సాధించడం, సెనేట్‌తో పాటు హౌస్‌లోనూ ఆధిక్యం దిశగా సాగడం ట్రంప్‌ ప్రభుత్వానికి రాజకీయంగా కొత్త సవాళ్లను విసురుతోంది.