జైపూర్‌లో వాణిజ్య, పరిశ్రమల భవన్‌ ప్రారంభం

• వర్చువల్‌గా ప్రారంభించిన కేంద్ర మంత్రి పీయూష్‌ గోయల్‌

న్యూఢిల్లీ, నవంబర్‌ 4 : జైపూర్‌లో నిర్మించిన **వాణిజ్య, పరిశ్రమల భవన్‌ (వాణిజ్య అండ్‌ ఉద్యోగ్‌ భవన్‌)**ను కేంద్ర వాణిజ్య, పరిశ్రమల శాఖ మంత్రి పీయూష్‌ గోయల్‌ వర్చువల్‌గా ప్రారంభించారు. కేంద్ర వాణిజ్య, పరిశ్రమల మంత్రిత్వ శాఖ చేపట్టిన కార్యాలయాల సమీకరణ కార్యక్రమం (కో-లొకేషన్‌ ఇనిషియేటివ్‌) కింద పూర్తయిన తొలి ప్రాజెక్టుగా ఈ భవన్‌ ప్రత్యేకతను సంతరించుకుందని ఆయన తెలిపారు. ప్రభుత్వంలోని వివిధ విభాగాల మధ్య సమన్వయాన్ని పెంచే ‘సంపూర్ణ ప్రభుత్వ విధానం’ (Whole-of-Government Approach) పట్ల ప్రధాని నరేంద్ర మోడీ ప్రభుత్వం చూపుతున్న నిబద్ధతకు ఈ భవన్‌ నిదర్శనమని గోయల్‌ పేర్కొన్నారు. కీలక కార్యాలయాలన్నింటినీ ఒకే భవనంలోకి తీసుకురావడం ద్వారా పరస్పర సమన్వయం మెరుగుపడటంతో పాటు సేవల అందజేత వేగవంతమవుతుందని, వ్యాపార నిర్వహణ మరింత సులభతరం అవుతుందని వివరించారు. పరిశ్రమలు, సూక్ష్మ, చిన్న, మధ్యతరహా పరిశ్రమలు (ఎంఎస్‌ఎంఈలు), పారిశ్రామికవేత్తలు, ఎగుమతిదారులకు ఈ భవన్‌ ద్వారా మెరుగైన సేవలు అందుతాయని, అదే సమయంలో కార్యాలయాల నిర్వహణ వ్యయాలు కూడా తగ్గుతాయని ఆయన ఆశాభావం వ్యక్తం చేశారు. రాజస్థాన్‌ ముఖ్యమంత్రి భజన్‌లాల్‌ శర్మ నేతృత్వంలోని రాష్ట్ర ప్రభుత్వం చురుకైన సహకారంతో ఈ భవన్‌ వాణిజ్యం, పెట్టుబడుల ప్రోత్సాహానికి కీలక కేంద్రంగా ఎదుగుతుందని పీయూష్‌ గోయల్‌ విశ్వాసం వ్యక్తం చేశారు. రాష్ట్రవ్యాప్తంగా వ్యాపార సంస్థలకు కొత్త అవకాశాలు కల్పించడంలో ఇది దోహదపడుతుందని ఆయన ‘ఎక్స్‌’ వేదికగా పేర్కొన్నారు.