- డెమోక్రాట్ల విజయాలపై హిల్లరీ క్లింటన్‌ హర్షం!
- మధ్యంతర ఎన్నికల ఫలితాలు అమెరికా రాజకీయాల్లో కీలక మలుపు అన్న మాజీ విదేశాంగ మంత్రి..
- ప్రజలు జవాబుదారీతనం, ధరల భారానికి ఉపశమనం కోరుకున్నారని వ్యాఖ్య
వాషింగ్టన్‌: అమెరికా 2026 మధ్యంతర ఎన్నికల్లో డెమోక్రటిక్‌ పార్టీ సాధించిన విజయాలపై మాజీ విదేశాంగ మంత్రి, 2016 అధ్యక్ష ఎన్నికల్లో డెమోక్రటిక్‌ అభ్యర్థిగా పోటీ చేసిన హిల్లరీ క్లింటన్‌ హర్షం వ్యక్తం చేశారు. ఈ ఫలితాలు అమెరికా రాజకీయాల్లో కీలక మలుపునకు సంకేతమని పేర్కొంటూ.. “ట్రంప్‌ అనంతర శకం ఇప్పుడే ప్రారంభమవుతోంది” అని వ్యాఖ్యానించారు. కాంగ్రెస్‌లోని ప్రతినిధుల సభ, సెనేట్‌తో పాటు పలు రాష్ట్రాల గవర్నర్‌ పదవుల్లోనూ డెమోక్రాట్లు ఆధిక్యం సాధించడం ప్రజల స్పష్టమైన తీర్పును ప్రతిబింబిస్తోందని అన్నారు.
“నిన్న రాత్రి అమెరికన్లు జవాబుదారీతనం, భరించగలిగే ధరల కోసం తమ ఆకాంక్షను స్పష్టంగా చాటారు” అని హిల్లరీ క్లింటన్‌ ఎక్స్‌ వేదికగా పేర్కొన్నారు. ట్రంప్‌ ప్రభుత్వం గత రెండేళ్లుగా తీసుకున్న చర్యలను పరోక్షంగా ప్రస్తావిస్తూ, ప్రజాస్వామ్య వ్యవస్థల్లో ఏర్పడిన నష్టాన్ని సరిదిద్దాల్సిన అవసరం ఉందని అభిప్రాయపడ్డారు.
రాజ్యాంగ ఉల్లంఘనలకు జవాబుదారీతనం ఉండాలి
రాజకీయ వ్యవస్థకు తగిలిన గాయాలకు చికిత్స చేసి, వాటిని మాన్పినప్పుడే అది తిరిగి కోలుకోగలదని హిల్లరీ అన్నారు. ప్రజలకు, అమెరికా రాజ్యాంగానికి వ్యతిరేకంగా జరిగిన నేరాలకు బాధ్యులు సమాధానం చెప్పాల్సిందేనని వ్యాఖ్యానించారు. గత రెండేళ్లలో చోటుచేసుకున్న చారిత్రాత్మక అధికార దుర్వినియోగాలు మళ్లీ పునరావృతం కాకుండా తగిన రక్షణ చర్యలు తీసుకోవాలని పిలుపునిచ్చారు.
ట్రంప్‌ ప్రభుత్వ నిర్ణయాల వల్ల ప్రజాస్వామ్య సంస్థలకు జరిగిన నష్టాన్ని సరిదిద్దడంతో పాటు, అధ్యక్షుడి అధికారాలు హద్దులు దాటకుండా నియంత్రణలు ఏర్పాటు చేయాలని ఆమె అభిప్రాయపడ్డారు. ప్రజాస్వామ్య వ్యవస్థపై ప్రజల్లో విశ్వాసాన్ని పునరుద్ధరించేందుకు కొత్త కాంగ్రెస్‌ బాధ్యతాయుతంగా వ్యవహరించాలని సూచించారు.
ప్రజలు బతకడమే కాదు.. అభివృద్ధి చెందాలి
ఎన్నికల్లో ఓటర్ల నిర్ణయాన్ని ప్రభావితం చేసిన ఆర్థిక సమస్యలను కూడా హిల్లరీ ప్రస్తావించారు. పెరుగుతున్న జీవన వ్యయం, కుటుంబాలపై ఆర్థిక భారం నేపథ్యంలో ప్రతి ఒక్కరికీ సమాన అవకాశాలు కల్పించే విధానాలు అవసరమని అన్నారు.
“అమెరికా కుటుంబాలు కేవలం బతుకుబండిని లాగడం మాత్రమే కాదు.. సంతోషంగా, సౌభాగ్యంగా జీవించగలగాలి. ప్రతి చిన్నారికి తన పూర్తి సామర్థ్యాన్ని చాటుకునే అవకాశం ఉండాలి. అమెరికన్‌ డ్రీమ్‌ కేవలం భ్రమగా మిగిలిపోకూడదు” అని ఆమె పేర్కొన్నారు.
కొత్తగా బలం పుంజుకున్న డెమోక్రటిక్‌ మెజారిటీలు ఈ లక్ష్యాలను నెరవేర్చగలవన్న విశ్వాసం తనకు ఉందని హిల్లరీ తెలిపారు. “డెమోక్రాట్లు ఈ లక్ష్యాలను మాత్రమే కాదు.. ఇంకా ఎన్నో సాధించగలరని నమ్ముతున్నాను. ట్రంప్‌ అనంతర శకం ఇప్పుడే ప్రారంభమవుతోంది” అని తన పోస్టును ముగించారు.
ఈ సందర్భంగా మిన్నియాపాలిస్‌, హ్యూస్టన్‌ వంటి నగరాల్లో ఓటు హక్కు వినియోగించుకున్న ప్రజలు ధరించిన ‘ఐ వోటెడ్‌’ (నేను ఓటు వేశాను) స్టిక్కర్ల చిత్రాన్ని కూడా ఆమె పంచుకున్నారు. ఫెడరల్‌ వలస నియంత్రణ అధికారులు జరిపిన కాల్పుల్లో ప్రాణాలు కోల్పోయిన వ్యక్తులను స్మరించుకుంటూ ఈ చిత్రాన్ని షేర్‌ చేసినట్లు పేర్కొన్నారు.
కాంగ్రెస్‌ ఉభయ సభల్లోనూ డెమోక్రాట్ల ఆధిపత్యం
నవంబర్‌ 3న జరిగిన మధ్యంతర ఎన్నికల్లో డెమోక్రాట్లు ప్రతినిధుల సభతో పాటు సెనేట్‌పైనా నియంత్రణ సాధించినట్లు అమెరికా వార్తా సంస్థలు అంచనా వేశాయి. టెక్సాస్‌లో గినా హినోజోసా గవర్నర్‌గా విజయం సాధించడం, కాన్సాస్‌లో ఆడమ్‌ హామిల్టన్‌ చారిత్రాత్మక సెనేట్‌ గెలుపు, ఐయోవాలో రాబ్‌ శాండ్‌ గవర్నర్‌ పదవిని కైవసం చేసుకోవడం వంటి విజయాలతో సంప్రదాయంగా రిపబ్లికన్లకు అనుకూలంగా ఉండే రాష్ట్రాల్లోనూ డెమోక్రాట్లు పుంజుకున్నారు.
ప్రతినిధుల సభలో డెమోక్రాట్ల ఆధిక్యం ఖరారైతే, ఆ పార్టీ మైనారిటీ నేత హకీమ్‌ జెఫ్రీస్‌ కొత్త కాంగ్రెస్‌ సమావేశమైనప్పుడు సభాపతి పదవిని చేపట్టే అవకాశం ఉంది. అయితే, జనవరిలో కొత్త కాంగ్రెస్‌ కొలువుదీరినప్పుడు అవసరమైన సభ్యుల మద్దతు ఆయనకు లభించాల్సి ఉంటుంది. ఈ పదవిని చేపడితే అమెరికా చరిత్రలో తొలి ఆఫ్రికన్‌ అమెరికన్‌ స్పీకర్‌గా జెఫ్రీస్‌ నిలుస్తారు.
గతంలో ఉభయ సభలపై నియంత్రణ కలిగిన రిపబ్లికన్లకు ఈ ఫలితాలు గట్టి ఎదురుదెబ్బగా మారాయి. హౌస్‌లో మెజారిటీ సాధించడం ద్వారా ట్రంప్‌ ప్రభుత్వంపై డెమోక్రాట్లు విచారణలు చేపట్టడం, బహిరంగ విచారణలు నిర్వహించడం, అవసరమైన పత్రాల కోసం సమన్లు జారీ చేయడం వంటి అధికారాలను వినియోగించుకోవచ్చు. సెనేట్‌పై పట్టు సాధించడంతో చట్టాల రూపకల్పన, న్యాయమూర్తుల నియామకాలు, అధ్యక్షుడి ఇతర కీలక నియామకాలపై కూడా డెమోక్రాట్లకు ఎక్కువ ప్రభావం లభించనుంది.
