అసలు ఎవరికి బుద్ధి ఉంది?

• కాళేశ్వరం ప్రాజెక్టుపై రాజకీయం ఆపండి
• బాధ్యతారాహిత్యాన్ని వీడకుంటే ప్రభుత్వానికి ప్రజలే బుద్ధి చెబుతారు
• ముంచుకొస్తున్న కరవుపై కాంగ్రెస్ సర్కార్‌పై సాగు నీటి నిపుణులు, సీనియర్ ఎడిటర్ కట్టా శేఖర్ రెడ్డి హెచ్చరిక
• కన్నెపల్లి నీళ్లను ఎత్తిపోయకుంటే ఉత్తర తెలంగాణతో పాటు హైదరాబాద్‌కు తాగునీటి ముప్పు తప్పదని హెచ్చరిక!

తెలంగాణలో నీటి సంక్షోభం , కాళేశ్వరం ప్రాజెక్టు నిర్వహణపై అధికార, ప్రతిపక్షాల మధ్య మాటల యుద్ధం ముదిరింది. నిజానికి ప్రతి ఒక్కరికీ మెదడుతో పాటు కాస్త హృదయం కూడా ఉండాలని, అసలు ఎవరికి బుద్ధి ఉంది, ఎవరికి లేదు అనే విషయాన్ని కాసేపు పక్కన పెడితే.. ప్రస్తుత పరిస్థితుల్లో అత్యవసరంగా గోదావరి జలాలను లిఫ్ట్ చేసి పంపింగ్ చేయడం అత్యంత ప్రధానమని నీటి నిపుణులు, సీనియర్ ఎడిటర్ కట్టా శేఖర్ రెడ్డి డిమాండ్ చేస్తున్నారు. ఈ ఏడాది ఎల్ నినో ప్రభావం వల్ల తీవ్రమైన కరవు వచ్చే అవకాశం ఉందని, శ్రీరాంసాగర్ ప్రాజెక్టు నుంచి గోదావరిలోకి వరద నీరు వచ్చే అవకాశం అస్సలు లేదని స్వయంగా ముఖ్యమంత్రి, నీటి పారుదల శాఖ మంత్రి అంగీకరిస్తున్నారని.. అయినప్పటికీ కనీస అవగాహన లేకుండా ఏకపక్షంగా వ్యవహరిస్తున్నారని మండిపడుతున్నారు. కన్నెపల్లి నుండి నీటిని లిఫ్ట్ చేసి అన్నారం, సుందిళ్ల బ్యారేజీలను నింపితే అవి కుప్పకూలిపోతాయని, గ్రామాలు మునిగిపోతాయని, భద్రాచలం కొట్టుకుపోతుందని ప్రభుత్వం అనవసరపు భయాందోళనలు సృష్టిస్తోందని ధ్వజమెత్తారు. గతంలో 20 లక్షల క్యూసెక్కుల అసాధారణ వరదలు వచ్చినప్పుడే ఈ బ్యారేజీలకు గానీ, భద్రాచలానికి గానీ ఎలాంటి నష్టం జరగలేదని.. అన్నారం, సుందిళ్ల బ్యారేజీల వద్ద ఏర్పడిన చిన్నపాటి బుంగలను గ్రాటింగ్ ద్వారా ఎప్పుడో సరిచేశారని గుర్తుచేస్తున్నారు.

ఈ బ్యారేజీలను వాటి పూర్తి సామర్థ్యం వరకు నింపాల్సిన అవసరం లేదని, కేవలం సగం మట్టానికి నింపినా అన్నారం, సుందిళ్ల పంప్ హౌస్‌ల ద్వారా ఎల్లంపల్లికి నీటిని సులభంగా పంప్ చేయవచ్చని నిపుణులు సూచిస్తున్నారు. ఎగువ నుండి భారీగా వరదలు వచ్చినప్పుడే బ్యారేజీలపై ఒత్తిడి పెరుగుతుందని, పంపింగ్ చేసే నీటి ఒత్తిడి వల్ల బ్యారేజీలు కూలిపోయే ప్రమాదం ఏమాత్రం లేదని స్పష్టం చేస్తున్నారు. ప్రస్తుత కాంగ్రెస్ ప్రభుత్వం కేవలం నేషనల్ డ్యామ్ సేఫ్టీ అథారిటీ (NDSA) నివేదికలను సాకుగా చూపిస్తూ తన బాధ్యతల నుండి తప్పించుకోవాలని చూస్తోందని ఆరోపిస్తున్నారు. బ్యారేజీల్లో సమస్యలు ఉన్నాయని తెలిసినప్పుడు.. గత రెండున్నరేళ్లుగా ఎలాంటి మరమ్మతులు చేయకుండా కాలయాపన ఎందుకు చేశారని ప్రశ్నిస్తున్నారు. ఇటువంటి వాస్తవ పరిస్థితులు కళ్లముందు ఉన్నప్పుడు మేధస్సు గురించి మాట్లాడటం సమంజసం కాదని, ఇప్పటికే హైదరాబాద్ మహానగరం తీవ్రమైన తాగునీటి ఎద్దడిని ఎదుర్కొంటోందని ఆందోళన వ్యక్తం చేస్తున్నారు. తక్షణమే నీటిని లిఫ్ట్ చేసి సరఫరా చేయకుంటే, హైదరాబాద్ నీటి కష్టాలకు , ఉత్తర తెలంగాణ కరవు పరిస్థితులకు ముఖ్యమంత్రి, ఇరిగేషన్ మంత్రి మాత్రమే పూర్తి బాధ్యత వహించాల్సి ఉంటుందని హెచ్చరించారు.

కాళేశ్వరం ప్రాజెక్టు అంటే కేవలం మేడిగడ్డ మాత్రమే కాదని, ఎల్లంపల్లి నుండి బస్వాలపూర్ వరకు నిర్మించిన రిజర్వాయర్లన్నీ అందులో భాగమేనని గుర్తుంచుకోవాలి. గతంలో ప్రాణహిత-చేవెళ్ల ప్రాజెక్టును 60 టీఎంసీల సామర్థ్యంతో డిజైన్ చేయగా, కాళేశ్వరం ప్రాజెక్టు కింద ఏకంగా 150 టీఎంసీల మొత్తం సామర్థ్యంతో రిజర్వాయర్లను నిర్మించారు. కానీ ప్రస్తుతం ఈ రిజర్వాయర్లన్నీ నీరు లేక వెలవెలబోతున్నాయి. గత రెండున్నరేళ్లుగా కేవలం గత ప్రభుత్వంపై నిందలు వేస్తూ, రాజకీయ పగతీర్చుకోవడానికే సమయాన్ని వృథా చేశారని.. ఇకనైనా ఈ బ్లేమ్ గేమ్ ఆపి మేడిగడ్డ బ్యారేజీకి తక్షణమే మరమ్మతులు పూర్తి చేయాలని డిమాండ్ చేస్తున్నారు. ఈ అంశాన్ని ఇలాగే సాగదీస్తూ పోతే రాబోయే రోజుల్లో తెలంగాణ ప్రజల ఆగ్రహానికి గురికాక తప్పదని ఆయన హెచ్చరిస్తున్నారు.

ఇండోనేషియా పార్లమెంట్‌లో ప్రధాని మోదీ చరిత్రాత్మక ప్రసంగం

• నెహ్రూ, సుకర్ణోల బాండుంగ్ సదస్సును గుర్తుచేస్తూ భిన్నత్వంలో ఏకత్వానికి జైకొట్టిన ప్రధాని
• ఇండోనేషియా స్వాతంత్య్ర పోరాటంలో బిజూ పట్నాయక్ సాహసాన్ని కొనియాడిన మోదీ
• బ్రహ్మోస్ క్షిపణులు, యూపీఐ-క్యూఆర్ఐఎస్ అనుసంధానం , ‘సెయిల్’ ఉమ్మడి ప్రాజెక్టులతో దౌత్య, ఆర్థికరంగాల్లో సరికొత్త రికార్డు!

ఇండోనేషియా పార్లమెంట్‌ను ఉద్దేశించి ప్రసంగించిన మొట్టమొదటి భారత ప్రధానిగా నరేంద్ర మోదీ సరికొత్త చరిత్ర సృష్టించారు. మంగళవారం నాటి తన చరిత్రాత్మక ప్రసంగంలో భారత్, ఇండోనేషియా దేశాల ప్రజాస్వామ్యాల్లో ‘భిన్నత్వంలో ఏకత్వమే’ జాతీయ సమగ్రతకు బలమైన పునాదిగా నిలిచిందని ప్రధాని మోదీ పేర్కొన్నారు. ఇరు దేశాల ప్రాచీన, ఆధునిక బంధాలను గుర్తుచేస్తూ.. ఐక్యరాజ్యసమితి వేదికగా ఇండోనేషియా స్వాతంత్య్ర కాంక్షకు భారతదేశం ఎలా బలమైన గొంతుకగా నిలిచిందో ఆయన వివరించారు. 1950లో భారత్ తన మొదటి గణతంత్ర దినోత్సవాన్ని జరుపుకున్నప్పుడు, ఆ చారిత్రక వేడుకకు ఇండోనేషియా వ్యవస్థాపక అధ్యక్షుడు సుకర్ణో ముఖ్యఅతిథిగా హాజరయ్యారని ప్రధాని గుర్తుచేశారు. ఆ తర్వాతి కాలంలో 1955 నాటి చరిత్రాత్మక ‘బాండుంగ్ సదస్సు’లో అధ్యక్షుడు సుకర్ణో, భారత తొలి ప్రధాని జవహర్‌లాల్ నెహ్రూలు కలిసి.. వలసపాలన నుంచి విముక్తి పొందిన స్వతంత్ర దేశాలకు తమ స్వంత నిర్ణయాలు తీసుకునే సార్వభౌమాధికారం ఉందని ప్రపంచానికి చాటిచెప్పారని మోదీ కొనియాడారు.

వలసపాలనకు వ్యతిరేకంగా పోరాడిన ఆసియా, ఆఫ్రికా దేశాల మధ్య సహకారాన్ని పెంచుతూ ‘అలీన విధానానికి’ (Non-Aligned Movement) బాండుంగ్ సదస్సే బీజం వేసిందని ప్రధాని పేర్కొన్నారు. ఇరు దేశాల పూర్వీకులు కలిసి ఎన్నో అనుభవాలను పంచుకున్నారని, ఇండోనేషియా 1945లో, భారత్ 1947లో దాదాపు ఒకే సమయంలో విదేశీ పాలన నుంచి స్వాతంత్య్రం పొందాయని చెప్పారు. ఈ సందర్భంగా ఒడిశా మాజీ ముఖ్యమంత్రి, ప్రముఖ పైలట్ బిజూ పట్నాయక్ , ఆయన భార్య జ్ఞానవతి పట్నాయక్ చూపిన అసాధారణ సాహసాన్ని ప్రధాని పార్లమెంట్‌లో ప్రత్యేకంగా ప్రస్తావించారు. 1945 ఆగస్టు 17న డచ్ పాలన నుంచి ఇండోనేషియా స్వాతంత్య్రం ప్రకటించుకున్న తరుణంలో.. డచ్ సైన్యం విమానాన్ని కూల్చేస్తామని బెదిరించినప్పటికీ భయపడకుండా, బిజూ పట్నాయక్ దంపతులు తమ ‘డకోటా’ విమానంలో ఇండోనేషియా ప్రధాని సుతాన్ షహ్రీర్, వైస్ ప్రెసిడెంట్ మహమ్మద్ హట్టాలను సురక్షితంగా ఢిల్లీకి చేర్చిన ఉదంతాన్ని మోదీ గుర్తుచేసుకోవడంతో పార్లమెంట్ హర్షధ్వనులతో మార్మోగింది.

ప్రధాని మోదీ , ఇండోనేషియా అధ్యక్షుడు ప్రబోవో సుబియాంటోల మధ్య జరిగిన ద్వైపాక్షిక చర్చల్లో రక్షణ, ఆర్థిక రంగాలకు సంబంధించిన కీలక నిర్ణయాలు తీసుకున్నారు. ఇరు దేశాల రక్షణ బంధాన్ని తదుపరిస్థాయికి తీసుకెళ్లేలా ‘బ్రహ్మోస్’ (BrahMos) క్షిపణి వ్యవస్థల సరఫరాపై చర్చించడంతో పాటు, భారత డిజిటల్ చెల్లింపుల వ్యవస్థ ‘యూపీఐ’ (UPI) ని ఇండోనేషియా ‘క్యూఆర్ఐఎస్’ (QRIS) పేమెంట్ నెట్‌వర్క్‌తో అనుసంధానించే ప్రక్రియ పురోగతిని సమీక్షించారు. ముఖ్యంగా గనులు, వ్యూహాత్మక ఖనిజాల సరఫరా గొలుసును బలోపేతం చేసేందుకు ఇరు దేశాల మధ్య కుదిరిన ఒప్పందంలో భాగంగా.. భారత ప్రభుత్వ రంగానికి చెందిన ‘స్టీల్ అథారిటీ ఆఫ్ ఇండియా లిమిటెడ్’ (SAIL), ఇండోనేషియాకు చెందిన ‘పీటీ క్రాకటావో స్టీల్’ సంస్థతో కలిసి ఇండోనేషియాలోనే ఒక భారీ స్టెయిన్‌లెస్ స్టీల్ స్లాబ్ తయారీ కర్మాగారాన్ని ఏర్పాటు చేయడానికి వ్యూహాత్మక జాయింట్ వెంచర్ ఒప్పందాన్ని కుదుర్చుకున్నాయి. గత రెండు దశాబ్దాలుగా ఇండోనేషియా ఆర్థికంగా వేగంగా వృద్ధి చెందుతూ లక్షలాదిమందిని పేదరికం నుంచి దూరం చేసిందని, అదే తరహాలో భారతదేశం కూడా ప్రస్తుతం ప్రపంచంలోనే అత్యంత వేగంగా వృద్ధి చెందుతున్న ప్రధాన ఆర్థికవ్యవస్థగా నిలిచిందని, గత పదేళ్లలో 25 కోట్లకు పైగా భారతీయులు పేదరికం నుంచి విముక్తి పొందారని ప్రధాని మోదీ సగర్వంగా ప్రకటించారు.

ఇండోనేషియాలోని ప్రాంబనన్ శివాలయాన్ని సందర్శించిన ప్రధాని మోదీ

• ఇరు దేశాల ప్రాచీన సాంస్కృతిక బంధానికి దౌత్యపరమైన జీవం
• 
  
• శతాబ్దాల నాటి చారిత్రక వారసత్వ సంపదను పునరుద్ధరించడంలో భారతదేశం పోషించిన అద్భుత పాత్రను గుర్తుచేసుకున్న అంతర్జాతీయ నిపుణులు
• రామాయణ, మహాభారత గాథల మేళవింపుతో విరాజిల్లుతున్న ఆగ్నేయాసియాలోనే అతిపెద్ద హిందూ దేవాలయం

ప్రధానమంత్రి నరేంద్ర మోదీ ఇండోనేషియా అధికారిక పర్యటనలో భాగంగా ఆ దేశంలోని చరిత్రాత్మక, అత్యంత ప్రతిష్టాత్మకమైన ‘ప్రాంబనన్’ (Prambanan) శివాలయాన్ని సందర్శించడం ఇరు దేశాల మధ్య ఉన్న శతాబ్దాల నాటి నాగరికత బంధాన్ని మరోసారి ప్రపంచానికి చాటిచెప్పింది. 9వ శతాబ్దానికి చెందిన ఈ అద్భుత హిందూ దేవాలయ సముదాయం ఆగ్నేయాసియాలోనే అతిపెద్దదిగా, ఇండోనేషియాలో హిందూ సంస్కృతీ సంప్రదాయాలకు సజీవ సాక్ష్యంగా నిలుస్తోంది. ప్రధాని మోదీ ఈ పవిత్ర క్షేత్రాన్ని సందర్శించిన తరుణంలో.. భారతదేశం , ఇండోనేషియా దేశాల మధ్య ఉన్న సనాతన సాంస్కృతిక, చారిత్రక వారసత్వాన్ని పునరుద్ధరించడంలో భారత్ కాలక్రమేణా ఎలాంటి కీలకపాత్ర పోషించిందో అంతర్జాతీయ నిపుణులు ప్రత్యేకంగా గుర్తుచేస్తున్నారు. భౌగోళికంగా ఇరు దేశాలు వేర్వేరుగా ఉన్నప్పటికీ, రామాయణ , మహాభారత గాథలు ఇండోనేషియా సంస్కృతిలో, ముఖ్యంగా అక్కడి నృత్యాలు, శిల్పకళల్లో ఎలా భాగమయ్యాయో ఈ ఆలయ ప్రాంగణం స్పష్టం చేస్తోంది.

శతాబ్దాలుగా ప్రకృతి వైపరీత్యాలు, భూకంపాల వల్ల దెబ్బతిన్న ప్రాంబనన్ ఆలయ పునరుద్ధరణ పనుల్లో భారతదేశానికి చెందిన ఆర్కియాలజికల్ సర్వే ఆఫ్ ఇండియా (ASI) , సాంస్కృతిక విభాగాలు ఇండోనేషియా ప్రభుత్వంతో కలిసి దశాబ్దాలుగా పనిచేశాయి. ఈ ఆలయ నిర్మాణ శైలి దక్షిణ భారతదేశంలోని పల్లవ, చోళ రాజుల కాలం నాటి ద్రవిడ శిల్పకళను పోలి ఉండటం గమనార్హం. ప్రధాని మోదీ తన పర్యటనలో భాగంగా ఆలయంలోని త్రిమూర్తులైన బ్రహ్మ, విష్ణు, మహేశ్వరుల ఉపాలయాలను దర్శించుకుని ప్రత్యేక పూజలు నిర్వహించారు. ఈ సందర్భంగా ఆయన మాట్లాడుతూ.. ప్రాంబనన్ కేవలం ఒక పర్యాటక ప్రాంతం కాదని, భారత్-ఇండోనేషియా దేశాల మధ్య ఉన్న లోతైన ఆధ్యాత్మిక అనుబంధానికి , పరస్పర గౌరవానికి ఇది ఒక సమున్నత చిహ్నమని కొనియాడారు.

భారతదేశం అవలంబిస్తున్న 'యాక్ట్ ఈస్ట్' (Act East) విధానంలో ఇండోనేషియా అత్యంత కీలకమైన భాగస్వామిగా ఉన్న తరుణంలో, ఈ ఉన్నత స్థాయి పర్యటన కేవలం వాణిజ్య, రక్షణ రంగాలకే పరిమితం కాకుండా.. ఇరు దేశాల ప్రజల మధ్య ఉన్న సాంస్కృతిక బంధాన్ని (People-to-People connect) మరింత బలోపేతం చేయడానికి ఉపయోగపడుతుందని రాజకీయ విశ్లేషకులు భావిస్తున్నారు. ప్రాంబనన్ ఆలయ పునరుద్ధరణ , సంరక్షణలో భారత్ అందించిన సాంకేతిక, చారిత్రక సహాయాన్ని ఇండోనేషియా ప్రభుత్వం కూడా ఈ సందర్భంగా శ్లాఘించింది. ముస్లిం జనాభా ఆధిక్యంగా ఉన్న ఇండోనేషియాలో.. హిందూ వారసత్వ సంపద అయిన ప్రాంబనన్ క్షేత్రాన్ని ఎంతో భద్రంగా కాపాడుకుంటూ రావడం ప్రపంచవ్యాప్తంగా వైవిధ్యతకు, మతసామరస్యానికి ఒక గొప్ప ఉదాహరణగా నిలుస్తోంది.

దిలీప్ కుమార్ ఐకానిక్ చిత్రాల విశేషాలు

• ట్రాజెడీ కింగ్ ప్రస్థానం

భారతీయ చలనచిత్ర పరిశ్రమలో అత్యంత ప్రతిభావంతుడైన నటుడిగా, 'ట్రాజెడీ కింగ్' (Tragedy King) గా గుర్తింపు పొందిన దిలీప్ కుమార్  నటన, తరాల తరబడి నటులకు ఒక పాఠ్యపుస్తకంలా నిలిచింది.

దేవదాస్ (Devadas): శరత్ చంద్ర ఛటోపాధ్యాయ నవల ఆధారంగా వచ్చిన ఈ చిత్రంలో భగ్నప్రేమికుడిగా దిలీప్ కుమార్ కనబరిచిన అభినయం అమరత్వ క్లాసిక్‌గా నిలిచిపోయింది. నిరాశ, ఆవేదనను ఆయన తన కళ్లతో పలికించిన తీరు అద్భుతం.

మొఘల్-ఎ-ఆజం (Mughal-e-Azam): భారతీయ సినిమా చరిత్రలోనే ఒక దృశ్యకావ్యంగా నిలిచిన ఈ పీరియడ్ డ్రామాలో ఆయన పోషించిన ప్రిన్స్ సలీం పాత్ర ఎప్పటికీ గుర్తుండిపోతుంది. అక్బర్ చక్రవర్తిగా పృథ్వీరాజ్ కపూర్, సలీంగా దిలీప్ కుమార్ మధ్య వచ్చే సంభాషణలు సినిమాకే హైలైట్.

నయా దౌర్ (Naya Daur): ఆధునీకీకరణ, మానవ శ్రమల మధ్య జరిగే సంఘర్షణ ఆధారంగా తెరకెక్కిన ఈ సాంఘిక చిత్రంలో టోంగావాలా (టాంగా నడిపే వ్యక్తి) గా దిలీప్ కుమార్ విప్లవాత్మక నటనను కనబరిచారు.

గంగా జమునా (Gunga Jumna): ఈ చిత్రంలో ఆయన యాస, గ్రామీణ యువకుడి పాత్రలో చూపిన వైవిధ్యం బాలీవుడ్‌లో యాక్షన్-డ్రామా సినిమాలకు సరికొత్త దిశను చూపింది. ఈ సినిమా తదుపరి తరం నటులపై (ముఖ్యంగా అమితాబ్ బచ్చన్ యాగ్రీ యంగ్ మ్యాన్ పాత్రలపై) తీవ్ర ప్రభావం చూపింది.

మధుమతి (Madhumati): పునర్జన్మ నేపథ్యంతో వచ్చిన ఈ మిస్టరీ థ్రిల్లర్‌లో దిలీప్ కుమార్ నటన , వైజయంతీమాలతో ఆయన కెమిస్ట్రీ ప్రేక్షకులను ఎంతగానో ఆకట్టుకుంది.

క్రాంతి & శక్తి (Kranti & Shakti): తన కెరీర్ రెండో ఇన్నింగ్స్‌లో క్రాంతి, & ‘శక్తి’ చిత్రంలో అమితాబ్ బచ్చన్‌కు తండ్రిగా ఒక పవర్‌ఫుల్ పోలీస్ ఆఫీసర్ పాత్రలో ఆయన నటన అద్వితీయం.

రాబోయే మూడు రోజుల్లో గుజరాత్, రాజస్థాన్, పంజాబ్‌లలో విస్తరించనున్న నైరుతి రుతుపవనాలు

నైరుతి రుతుపవనాలు రాబోయే మూడు రోజుల్లో ఉత్తర అరేబియా సముద్రం, గుజరాత్ తో పాటు హర్యానా, పంజాబ్, రాజస్థాన్ లోని మిగిలిన ప్రాంతాలకు మరింత విస్తరించడానికి అనుకూల వాతావరణం ఉందని భారత వాతావరణ శాఖ (IMD) తెలిపింది. ఈ రోజు కోస్టల్ కర్ణాటక, గుజరాత్, కొంకణ్, గోవా, మధ్య మహారాష్ట్రలలో అత్యంత భారీ వర్షాలు కురుస్తాయని పేర్కొంది. అలాగే దిల్లీ, హర్యానా, ఉత్తరప్రదేశ్, ఒడిశాలలో మోస్తరు నుండి భారీ వర్షాలు కురిసే అవకాశం ఉందని, తెలంగాణ , కర్ణాటకలలో పిడుగులతో కూడిన ఈదురు గాలులు వీస్తాయని హెచ్చరించింది. కాగా, ఈ మధ్యాహ్నం ఢిల్లీలోని పలు ప్రాంతాల్లో కురిసిన తేలికపాటి జల్లులు ఉక్కపోత నుండి ఉపశమనాన్ని ఇచ్చాయి.

స్టీల్ పరిశ్రమ వృద్ధి, పోటీతత్వంపై గోయల్ , కుమారస్వామి ఉన్నత స్థాయి సమీక్ష

దేశీయ ఉక్కు (Steel) పరిశ్రమ  అంతర్జాతీయ పోటీతత్వాన్ని పెంపొందించడానికి , ఈ రంగంలో వేగవంతమైన వృద్ధిని సాధించడానికి కేంద్ర ప్రభుత్వం కట్టుబడి ఉందని కేంద్ర వాణిజ్య, పరిశ్రమల శాఖ మంత్రి పీయూష్ గోయల్ తెలిపారు. కేంద్ర భారీ పరిశ్రమలు, ఉక్కు శాఖ మంత్రి హెచ్.డి. కుమారస్వామితో కలిసి ఆయన స్టీల్, స్టెయిన్‌లెస్ స్టీల్ , మెట్‌కోక్ పరిశ్రమల ప్రముఖులతో ఒక ఉన్నత స్థాయి సంప్రదింపుల సమావేశాన్ని నిర్వహించారు. స్వయంసమృద్ధ (Self-Reliant) భారతదేశ నిర్మాణంలో ఈ రంగాలు కీలక పాత్ర పోషిస్తాయని, పరిశ్రమల ఆకాంక్షలకు అనుగుణంగా ప్రభుత్వం పూర్తి మద్దతునిస్తుందని పీయూష్ గోయల్ స్పష్టం చేశారు.

విద్యా రంగంలో సరికొత్త మైలురాయి

ఇండోనేషియాలో ఐఐఎం బెంగళూరు విదేశీ క్యాంపస్

భారతీయ ప్రతిష్టాత్మక విద్యాసంస్థ 'ఇండియన్ ఇన్‌స్టిట్యూట్ ఆఫ్ మేనేజ్‌మెంట్' (IIM) బెంగళూరు ఇండోనేషియాలో తన సరికొత్త ఓవర్సీస్ (విదేశీ) క్యాంపస్‌ను ఏర్పాటు చేయడానికి ఆమోదం లభించిందని కేంద్ర విద్యాశాఖ మంత్రి ధర్మేంద్ర ప్రధాన్ తెలిపారు. ప్రధానమంత్రి నరేంద్ర మోదీ ఇండోనేషియా పర్యటన సందర్భంగా ఈ ప్రతిపాదనకు గ్రీన్ సిగ్నల్ లభించింది. ఈ నిర్ణయం భారతీయ విద్యా రంగంలో ఒక సరికొత్త అధ్యాయాన్ని లిఖించిందని, భారతదేశ సాంప్రదాయ జ్ఞాన సంపదను మరియు విద్యా వ్యవస్థను ప్రపంచీకరించే దిశగా ఇది ఒక చారిత్రాత్మక అడుగు అని మంత్రి ధర్మేంద్ర ప్రధాన్ అభివర్ణించారు.

ఢిల్లీ యూనివర్సిటీ విద్యార్థుల 'డ్రగ్ ఫ్రీ క్యాంపస్' ప్రతిజ్ఞను అభినందించిన ఉపరాష్ట్రపతి

ఢిల్లీ విశ్వవిద్యాలయానికి (Delhi University) చెందిన 2.3 లక్షల మందికి పైగా విద్యార్థులు తమ క్యాంపస్‌ను డ్రగ్స్ రహితంగా మార్చుకుంటామని ఉమ్మడిగా ప్రతిజ్ఞ చేయడం పట్ల ఉపరాష్ట్రపతి సి.పి. రాధాకృష్ణన్ హర్షం వ్యక్తం చేశారు. ఆరోగ్యకరమైన, బలమైన , సంపన్నమైన భారతదేశ నిర్మాణానికి యువత చూపిన నిబద్ధతకు ఇది నిదర్శనమని ఆయన ప్రశంసించారు. దేశవ్యాప్తంగా ఉన్న అన్ని విశ్వవిద్యాలయాలు, విద్యాసంస్థలు ఈ చొరవను స్ఫూర్తిగా తీసుకుని, విద్యార్థులను మాదకద్రవ్యాలకు దూరంగా ఉంచేలా 'నషా ముక్త్ భారత్' (వ్యసన రహిత భారత్) ప్రచారంలో చురుగ్గా పాల్గొనాలని ఉపరాష్ట్రపతి పిలుపునిచ్చారు.

కాటన్ ఉత్పాదకత మిషన్‌పై ఉపరాష్ట్రపతి కి కేంద్ర మంత్రి శివరాజ్ సింగ్ చౌహాన్ బ్రీఫింగ్

కేంద్ర వ్యవసాయ, రైతు సంక్షేమ శాఖ మంత్రి శివరాజ్ సింగ్ చౌహాన్ నేడు ఉపరాష్ట్రపతి భవన్‌లో ఉపరాష్ట్రపతి సి.పి. రాధాకృష్ణన్‌ను కలిసి 'మిషన్ ఫర్ కాటన్ ప్రొడక్టివిటీ' (పత్తి ఉత్పాదకత మిషన్) పై వివరాలను అందజేశారు. భారతదేశ పత్తి పర్యావరణ వ్యవస్థను బలోపేతం చేయడానికి ఈ మిషన్ తీసుకుంటున్న సమగ్ర చర్యలను ఉపరాష్ట్రపతి అభినందించారు. దేశంలో పత్తి పరిశోధనలు, ఆవిష్కరణలను వేగవంతం చేయడానికి కాలపరిమితితో కూడిన అనుమతుల వ్యవస్థ అవసరమని ఉపరాష్ట్రపతి నొక్కిచెప్పారు. ఎకరాకు పత్తి దిగుబడిని పెంచడానికి స్పష్టమైన, కొలవగల లక్ష్యాలను నిర్దేశించుకోవాలని, అంతర్జాతీయ మార్కెట్‌లో భారత పత్తి పోటీతత్వాన్ని మరియు నాణ్యతను పెంచేలా వ్యూహాలుండాలని ఆయన కోరారు.

కేరళ ఆరోగ్య రంగ పురోగతిపై కేంద్ర మంత్రి జేపీ నడ్డా వర్చువల్ సమీక్ష

కేంద్ర ఆరోగ్య, కుటుంబ సంక్షేమ శాఖ మంత్రి జగత్ ప్రకాష్ నడ్డా మంగళవారం కేరళ ఆరోగ్య శాఖ మంత్రి కె. మురళీధరన్‌తో కలిసి ఒక ఉన్నత స్థాయి వర్చువల్ సమీక్షా సమావేశాన్ని నిర్వహించారు. రాష్ట్రంలో అమలవుతున్న జాతీయ ఆరోగ్య కార్యక్రమాలు, ప్రజారోగ్య సంరక్షణ చర్యల పురోగతిని ఆయన అంచనా వేశారు. కేరళలో హెల్త్ ఇనిషియేటివ్స్ అమలు తీరును అభినందించిన నడ్డా, రాష్ట్ర ఆరోగ్య వ్యవస్థను బలోపేతం చేయడానికి కేంద్రం నుండి పూర్తి మద్దతు ఉంటుందని హామీ ఇచ్చారు. ఈ సమావేశంలో ముఖ్యంగా టీబీ ముక్త్ భారత్ అభియాన్, ఉచిత మందుల పంపిణీ, ఉచిత వ్యాధి నిర్ధారణ సేవలు (Free Diagnostics), నేషనల్ హెల్త్ మిషన్ (NHM) కింద మానవ వనరుల పెంపొందింపు, ఆహార భద్రత ప్రమాణాలపై ప్రత్యేకంగా చర్చించారు.

బహ్రెయిన్ డిప్యూటీ పీఎం ఖలీద్‌తో విదేశాంగ మంత్రి డాక్టర్ ఎస్. జైశంకర్ భేటీ

కేంద్ర విదేశాంగ శాఖ మంత్రి డాక్టర్ ఎస్. జైశంకర్ ఈరోజు బహ్రెయిన్ ఉపప్రధాని ఖలీద్ బిన్ అబ్దుల్లా అల్ ఖలీఫాతో సమావేశమయ్యారు. ఈ ఉన్నతస్థాయి భేటీలో ఇరు దేశాల మధ్య వివిధ రంగాలలో ద్వైపాక్షిక సహకారాన్ని మరింత ముందుకు తీసుకెళ్లే అంశాలపై వారు విస్తృతంగా చర్చించారు. దీంతో పాటు ప్రస్తుత ప్రాంతీయ పరిస్థితులు, అంతర్జాతీయ పరిణామాలపై ఇరు దేశాల నేతలు తమ అభిప్రాయాలను పంచుకున్నట్లు డాక్టర్ జైశంకర్ సోషల్ మీడియా వేదికగా వెల్లడించారు.

ఏక్ పేడ్ మా కే నామ్

• 
  
  ఢిల్లీలో 70 లక్షల మొక్కల నాటే బృహత్తర మిషన్‌ను ప్రారంభించిన అమిత్ షా

దేశ రాజధాని ఢిల్లీలో హరితహారాన్ని పెంచేందుకు 'ఏక్ పేడ్ మా కే నామ్' ప్రచారంలో భాగంగా 70 లక్షల మొక్కలు నాటే భారీ కార్యక్రమాన్ని కేంద్ర హోంమంత్రి అమిత్ షా ప్రారంభించారు. ఢిల్లీ పర్యావరణాన్ని మార్చడంలో ఈ ప్రచారం ఒక ముఖ్యమైన మైలురాయిగా నిలుస్తుందని ఆయన పేర్కొన్నారు. రాబోయే నాలుగేళ్లలో 6,300 హెక్టార్ల గ్రీన్ రిడ్జ్ ప్రాంతాన్ని పూర్తి అటవీ భూమిగా అభివృద్ధి చేయాలని కేంద్ర, ఢిల్లీ ప్రభుత్వాలు నిశ్చయించుకున్నాయని మంత్రి తెలిపారు. యమునా నది ప్రక్షాళన కోసం గత ఏడాది కాలంలో 129 మురుగునీటి శుద్ధి ప్లాంట్లు (STP) అందుబాటులోకి వచ్చాయని చెప్పారు. ఈ సందర్భంగా హోంమంత్రి 300 ఎలక్ట్రికల్ బస్సులను, మూడు కొత్త బస్ డిపోలను ప్రారంభించడంతో పాటు నరేలాలో హై సెక్యూరిటీ జైలుకు శంకుస్థాపన చేశారు. ఈ కార్యక్రమంలో ఢిల్లీ ముఖ్యమంత్రి రేఖా గుప్తా, కేంద్ర పర్యావరణ శాఖ మంత్రి భూపేందర్ యాదవ్ తదితరులు పాల్గొన్నారు.

ఇండోనేషియా పార్లమెంట్‌లో ప్రధాని మోదీ ప్రసంగం

ఇరు దేశాల వ్యూహాత్మక భాగస్వామ్యానికి పిలుపు

భారత్-ఇండోనేషియా మధ్య బలమైన వ్యూహాత్మక భాగస్వామ్యం రెండు దేశాల శ్రేయస్సుకే కాకుండా ప్రాంతీయ, ప్రపంచ శాంతి, స్థిరత్వానికి ఎంతో దోహదపడుతుందని ప్రధానమంత్రి నరేంద్ర మోదీ పిలుపునిచ్చారు. ఇండోనేషియా రాజధాని జకార్తాలోని పార్లమెంటును ఉద్దేశించి ఆయన ప్రసంగించారు. శతాబ్దాల నాటి సాంస్కృతిక బంధాలు ఉన్న ఇరు దేశాలు ఒకే రకమైన ప్రజాస్వామ్య విలువలు, పరస్పర నమ్మకం, ఉమ్మడి భవిష్యత్ దార్శనికతను పంచుకుంటున్నాయని ప్రధాని పేర్కొన్నారు. తీవ్రవాదానికి వ్యతిరేకంగా , ప్రాంతీయ భద్రతను దెబ్బతీసే ఏకపక్ష చర్యలకు వ్యతిరేకంగా ఉమ్మడి పోరాటం చేయాల్సిన అవసరం ఉందని ఆయన నొక్కిచెప్పారు. రక్షణ, నౌకాదళ భద్రత, సైబర్ సెక్యూరిటీ, ఆర్టిఫిషియల్ ఇంటెలిజెన్స్ (AI), యూపీఐ (UPI) వంటి డిజిటల్ పబ్లిక్ ఇన్‌ఫ్రాస్ట్రక్చర్‌ రంగాల్లో సహకారాన్ని మరింత విస్తరించాలని ప్రధాని మోదీ ఆకాంక్షించారు.

అహ్మదాబాద్ వరుస పేలుళ్ల కేసు: 38 మంది ఉరిశిక్షను సమర్థించిన గుజరాత్ హైకోర్టు

 

దేశవ్యాప్తంగా సంచలనం సృష్టించిన 2008 అహ్మదాబాద్ వరుస బాంబు పేలుళ్ల కేసులో గుజరాత్ హైకోర్టు చరిత్రాత్మక తుది తీర్పును వెలువరించింది. ఈ ఘోర ఉగ్రదాడికి సంబంధించి 38 మంది నిందితులకు ఉరిశిక్ష, మరో 11 మందికి జీవిత ఖైదు విధిస్తూ గతంలో ప్రత్యేక కింది కోర్టు ఇచ్చిన తీర్పును హైకోర్టు పూర్తిగా సమర్థించింది. ప్రాసిక్యూషన్ సమర్పించిన సాక్ష్యాధారాలను పరిశీలించిన అనంతరం న్యాయస్థానం ఈ నిర్ణయాన్ని ఖరారు చేసింది.

పార్టీ పేరు వివాదం: కవితకు ఢిల్లీ హైకోర్టు కీలక స్పష్టత

'తెలంగాణ రక్షణ సమితి' పేరును తన నూతన పార్టీకి కేటాయించేలా కేంద్ర ఎన్నికల సంఘాన్ని ఆదేశించాలని కోరుతూ కవిత ఢిల్లీ హైకోర్టును ఆశ్రయించారు. ఈ పిటిషన్‌పై విచారణ జరిపిన హైకోర్టు కీలక వ్యాఖ్యలు చేసింది. ఈ పార్టీ పేరు కేటాయింపునకు సంబంధించి కేంద్ర ఎన్నికల సంఘం (ECI) గతంలో జారీ చేసిన నోటీసుకు పిటిషనర్ ముందుగా సరైన వివరణ, సమాధానం ఇవ్వాలని హైకోర్టు స్పష్టం చేసింది.

కాళేశ్వరం ప్రాజెక్టుపై టీపీసీసీ చీఫ్ మహేష్ కుమార్ గౌడ్ ధ్వజం

కాళేశ్వరం ప్రాజెక్టు పేరుతో గత బీఆర్‌ఎస్ ప్రభుత్వం వేల కోట్ల రూపాయల అవినీతికి పాల్పడిందని టీపీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ తీవ్ర విమర్శలు చేశారు. హైదరాబాద్‌లో ఆయన విలేకరులతో మాట్లాడుతూ.. అప్పట్లో నిపుణులైన ఇంజినీర్ల మాట వినకుండా ఏకపక్షంగా నిర్ణయాలు తీసుకోవడం వల్లే నేడు కాళేశ్వరం కాస్తా "కూళేశ్వరం"గా మారిందని ఎద్దేవా చేశారు. ఈ ప్రాజెక్టు అక్రమాలపై, లోపాలపై బీఆర్‌ఎస్‌ నాయకులు ఎంత తక్కువ మాట్లాడితే వారి అంత మంచిదని ఆయన హితవు పలికారు.

ఓటరు జాబితా సవరణ పారదర్శకంగా చేపట్టాలి: సీఈఓను కోరిన బీజేపీ ప్రతినిధి బృందం

రాష్ట్రంలో ప్రత్యేక ఓటరు జాబితా సవరణ ప్రక్రియను అత్యంత పారదర్శకంగా, సమర్థవంతంగా అమలుచేయాలని బీజేపీ డిమాండ్ చేసింది. బీజేపీ రాష్ట్ర అధ్యక్షుడు రాంచందర్‌రావు నేతృత్వంలోని ఒక ఉన్నతస్థాయి బృందం హైదరాబాద్‌లోని బీఆర్‌కే భవన్‌లో రాష్ట్ర ప్రధాన ఎన్నికల అధికారిని (CEO) కలిసి వినతిపత్రం సమర్పించింది. ఓటర్ల నమోదు, తప్పుల సవరణలో ఎలాంటి అక్రమాలకు తావులేకుండా నిష్పక్షపాతంగా వ్యవహరించాలని వారు కోరారు. ఈ ప్రతినిధి బృందంలో ఎమ్మెల్సీ అంజిరెడ్డితో పాటు పార్టీకి చెందిన పలువురు సీనియర్ నాయకులు పాల్గొన్నారు.

వలస కార్మికుల పిల్లల కోసం ‘మొబైల్ అంగన్వాడీ వాహనాలు’ ప్రారంభం

 

రాష్ట్రంలోని వలస కార్మికుల పిల్లల సంక్షేమం కోసం తెలంగాణ ప్రభుత్వం సరికొత్త ‘మొబైల్ అంగన్వాడీ వాహనాలను’ అందుబాటులోకి తెచ్చింది. హైదరాబాద్‌లోని ఎంసీఆర్‌ హెచ్‌ఆర్‌డీ (MCR HRD) లో రాష్ట్ర మంత్రులు సీతక్క, వివేక్ వెంకటస్వామి సంయుక్తంగా ఈ వాహనాలకు పచ్చజెండా ఊపారు. మహిళా శిశు సంక్షేమ, కార్మిక శాఖలు సంయుక్తంగా రూపొందించిన ఈ సంచార వాహనాల ద్వారా అంగన్వాడీ కేంద్రాలు లేని నిర్మాణ ప్రాంతాల్లోని చిన్నారులకు నేరుగా పోషకాహారం, ప్రీ-స్కూల్ విద్య , ప్రాథమిక ఆరోగ్య సేవలు అందుతాయి.

ఢిల్లీలో 'ఏక్ పేడ్ మా కే నామ్': 70 లక్షల మొక్కల కార్యక్రమాన్ని ప్రారంభించిన అమిత్ షా

దేశ రాజధాని ఢిల్లీలో హరితహారాన్ని , పర్యావరణ సమతుల్యతను పెంపొందించేందుకు కేంద్ర హోంమంత్రి అమిత్ షా సరికొత్త హరిత ప్రచారానికి శ్రీకారం చుట్టారు. 'ఏక్ పేడ్ మా కే నామ్' ప్రచారంలో భాగంగా ఢిల్లీ వ్యాప్తంగా రికార్డు స్థాయిలో 70 లక్షల మొక్కలు నాటే బృహత్తర కార్యక్రమాన్ని ఆయన ప్రారంభించారు. ఈ సందర్భంగా అమిత్ షా మాట్లాడుతూ.. ఢిల్లీ పర్యావరణ రూపురేఖలను మార్చడంలో , కాలుష్య నియంత్రణలో ఈ ప్రచారం ఒక ముఖ్యమైన మైలురాయిగా నిలుస్తుందని పేర్కొన్నారు.

ప్రధాని నరేంద్ర మోడీకి ఇండోనేషియా అత్యున్నత పురస్కారం

 

ప్రధానమంత్రి నరేంద్ర మోడీకి ఇండోనేషియా దేశపు అత్యున్నత పౌర పురస్కారం దక్కింది. భారత్, ఇండోనేషియా దేశాల మధ్య ద్వైపాక్షిక సంబంధాల బలోపేతానికి, వ్యూహాత్మక భాగస్వామ్యానికి ప్రధాని మోడీ చేసిన విశేష కృషికి గుర్తింపుగా ఆ దేశం ఈ గౌరవాన్ని ప్రకటించింది. ఇండోనేషియా ప్రభుత్వం తమ అత్యున్నత అవార్డు అయిన 'బింటాంగ్‌ ఆదిపూర్ణ ఆఫ్‌ రిపబ్లిక్‌ ఆఫ్‌ ఇండోనేషియా' (Bintang Adipurna) ను ప్రధానమంత్రి మోడీకి ప్రదానం చేసింది.

2026 డురాండ్ కప్ ట్రోఫీలను ఆవిష్కరించిన రాష్ట్రపతి ద్రౌపది ముర్ము

న్యూఢిల్లీలో జరిగిన ఒక అధికారిక కార్యక్రమంలో రాష్ట్రపతి ద్రౌపది ముర్ము 2026 డురాండ్ కప్ ఫుట్‌బాల్ ట్రోఫీలను ఆవిష్కరించి, ఈ చరిత్రాత్మక టోర్నమెంట్‌ను జెండా ఊపి ప్రారంభించారు. ఈ సందర్భంగా రాష్ట్రపతి ప్రసంగిస్తూ.. ఈ ఏడాది భారతీయ జట్లతో పాటు శ్రీలంక జట్టు , ఇతర సరికొత్త జట్లు పోటీ పడటం విశేషమని పేర్కొన్నారు. ఈ నూతన జట్ల భాగస్వామ్యం ఆసియాలోనే అత్యంత పురాతనమైన ఈ ఫుట్‌బాల్ పోటీల ప్రజాదరణను, అంతర్జాతీయస్థాయిని మరింత పెంచుతుందని ఆమె ఆశాభావం వ్యక్తం చేశారు.

నాకంటే ముందు పోర్చుగల్ ఒక్క టైటిల్ కూడా గెలవలేదు

• వరల్డ్ కప్ నిష్క్రమణ తర్వాత క్రిస్టియానో రొనాల్డో సంచలన వ్యాఖ్యలు
• స్పెయిన్ చేతిలో ఓటమితో కన్నీటిపర్యంతమైన స్టార్ ఫుట్‌బాలర్
• రిటైర్మెంట్‌పై తొందరపడి నిర్ణయం తీసుకోనని వెల్లడి.. 
• జట్టు ఓటమికి బాధ్యత వహిస్తూ తక్షణమే రాజీనామా చేసిన కోచ్ రాబర్టో మార్టినెజ్

ఫిఫా (FIFA) ప్రపంచ కప్ టోర్నమెంట్‌లో భాగంగా సోమవారం జరిగిన రౌండ్ ఆఫ్ 16 మ్యాచ్‌లో స్పెయిన్ చేతిలో 0-1 తేడాతో పోర్చుగల్ జట్టు పరాజయం పాలై టోర్నీ నుంచి నిష్క్రమించింది. ఈ ఓటమితో తీవ్ర మనస్తాపానికి గురైన పోర్చుగల్ స్టార్ ఫుట్‌బాలర్, రికార్డుల వీరుడు క్రిస్టియానో రొనాల్డో మ్యాచ్ అనంతరం తన అంతర్జాతీయ కెరీర్‌ పై కీలక వ్యాఖ్యలు చేశారు. తన కెరీర్‌లో ఇదే చివరి ప్రపంచ కప్ అని ఇప్పటికే స్పష్టం చేసిన 41 ఏళ్ల రొనాల్డో.. తన సుదీర్ఘ అంతర్జాతీయ ప్రయాణాన్ని గుర్తుచేసుకుంటూ, క్రిస్టియానో రొనాల్డో రాకముందు పోర్చుగల్ దేశం చరిత్రలో ఒక్క టైటిల్ కూడా గెలవలేదనే నిజాన్ని అందరికీ గుర్తుచేశారు. తాను పోర్చుగల్ దేశానికి ఒంటిచేత్తో మూడు ప్రతిష్టాత్మక టైటిళ్లను (2016 లో యూరోపియన్ ఛాంపియన్‌షిప్, అలాగే 2019 , 2025 లలో రెండు యూఈఎఫ్ఏ నేషన్స్ లీగ్‌లు) అందించానని గర్వంగా ప్రకటించారు. ప్రపంచ కప్ గెలవాలనే కల నెరవేరకపోయినప్పటికీ, దేశానికి తానే మొదటిసారి అందించిన 2016 యూరో కప్ విజయం తనకు ప్రపంచ కప్‌ తో సమానమైన సంతృప్తిని ఇచ్చిందని భావోద్వేగంగా పేర్కొన్నారు.

మ్యాచ్ ముగిసిన తర్వాత మీడియాతో మాట్లాడిన రొనాల్డో, తన అంతర్జాతీయ రిటైర్మెంట్‌ పై తక్షణమే ఎలాంటి తొందరపాటు నిర్ణయం తీసుకోనని స్పష్టం చేశారు. ఈ ప్రపంచ కప్ ముగియగానే రొనాల్డో బూట్లకు పక్కనబెట్టేస్తాడని (రిటైర్ అవుతాడని) అంతకుముందు ఆయన సోదరి ప్రకటించినప్పటికీ, రొనాల్డో మాత్రం భావోద్వేగాల తీవ్రతలో ఇప్పుడే అంత పెద్ద నిర్ణయం తీసుకోలేనని చెప్పారు. ఈ విధంగా ప్రపంచ కప్ నుంచి నిష్క్రమించడం బాధాకరంగానే ఉన్నా, తాను దేశం కోసం తన శాయశక్తులా ప్రయత్నించానని, ఎలాంటి తప్పు చేయలేదనే స్పష్టమైన మనస్సాక్షితో టోర్నీ నుంచి బయటకు వెళ్తున్నానని అన్నారు. ప్రస్తుతానికి కొంతకాలం పాటు ఫ్యామిలీతో గడుపుతూ భవిష్యత్తు గురించి ఆలోచిస్తానని, అంతేకానీ ఆవేశంలో ఎలాంటి నిర్ణయాలు తీసుకోనని పునరుద్ఘాటించారు.

ఇదే సమయంలో, జట్టు ఘోర పరాజయానికి నైతిక బాధ్యత వహిస్తూ పోర్చుగల్ ప్రధాన కోచ్ రాబర్టో మార్టినెజ్ తక్షణమే తన పదవికి రాజీనామా చేశారు. కోచ్ నిర్ణయంపై రొనాల్డో స్పందిస్తూ.. మార్టినెజ్ ఒక అద్భుతమైన మేనేజర్ మాత్రమే కాకుండా ఎంతో మంచి మనసున్న వ్యక్తి అని కొనియాడారు. ఆయన ఆధ్వర్యంలో ఆడటం తనకు ఎంతో ఆనందాన్ని ఇచ్చిందని, పోర్చుగల్ ఫుట్‌బాల్‌కు ఆయన చేసిన సేవలు ప్రశంసనీయమని పేర్కొంటూ కృతజ్ఞతలు తెలిపారు. ఒక పెద్ద టోర్నమెంట్ నుంచి, అది కూడా ప్రపంచ కప్ నుంచి ఇలా విఫలమై వెనుతిరగడం ఎప్పుడూ బాధాకరంగానే ఉంటుందని, స్పెయిన్‌ తో జరిగిన మ్యాచ్‌ లో తమ జట్టు ఎంతో బాగా ఆడిందని రొనాల్డో అభిప్రాయపడ్డారు. ఆటలో గెలుపోటములు సహజమని, ఈ ఓటమి నుంచి త్వరగా కోలుకుని ముందుకు సాగాల్సి ఉంటుందని రొనాల్డో తెలిపారు. 

రణ్‌వీర్ సింగ్ బర్త్‌డే స్పెషల్: ‘బ్యాండ్ బాజా బారాత్’ నుంచి ‘ధురంధర్’ వరకు

 బాలీవుడ్ స్టార్ నటుడు రణ్‌వీర్ సింగ్ పుట్టినరోజు (జూలై 6) సందర్భంగా, ఆయన సినీ కెరీర్‌లో 'బ్యాండ్ బాజా బారాత్' నుంచి రాబోయే 'ధురంధర్' వరకు ఉన్న అత్యంత శక్తివంతమైన పర్ఫార్మెన్స్‌లను చూద్దాం

బ్యాండ్ బాజా బారాత్ (Band Baaja Baaraat - 2010): రణ్‌వీర్ సింగ్ ఈ చిత్రంతోనే బాలీవుడ్‌లోకి హీరోగా ఎంట్రీ ఇచ్చారు. ఇందులో ఢిల్లీకి చెందిన బిట్టు శర్మ అనే ఒక సాధారణ కాలేజీ యువకుడి పాత్రలో ఆయన చూపించిన సహజమైన నటన, ఎనర్జీ ప్రేక్షకులను ఎంతగానో ఆకట్టుకున్నాయి. మొదటి సినిమాతోనే ఆయన పరిశ్రమలో తనకంటూ ఒక ప్రత్యేక గుర్తింపు తెచ్చుకున్నారు.

గోలియోన్ కి రాస్లీలా రామ్-లీలా (Goliyon Ki Raasleela Ram-Leela - 2013): ప్రముఖ దర్శకుడు సంజయ్ లీలా భన్సాలీ దర్శకత్వంలో రణ్‌వీర్ నటించిన మొదటి సినిమా ఇది. రామ్ అనే గుజరాతీ యువకుడి పాత్రలో రణ్‌వీర్ చూపించిన రొమాంటిక్, అగ్రెసివ్ నటన ఆయన కెరీర్‌ను మలుపు తిప్పింది. దీపికా పదుకోన్‌తో ఆయన ఆన్-స్క్రీన్ కెమిస్ట్రీ అప్పట్లో పెద్ద సంచలనం సృష్టించింది.

బాజీరావ్ మస్తానీ (Bajirao Mastani - 2015): మరాఠా పీష్వా 'బాజీరావ్ 1' పాత్రలో రణ్‌వీర్ సింగ్ నటన అద్భుతమనే చెప్పాలి. ఒక యోధుడి గంభీరత్వాన్ని, డైలాగ్ డెలివరీని, బాడీ లాంగ్వేజ్‌ను ఆయన అద్భుతంగా పండించారు. ఈ చిత్రంలోని నటనకు గానూ ఆయన ఉత్తమ నటుడిగా మొదటి ఫిలింఫేర్ అవార్డును అందుకున్నారు.

పద్మావత్ (Padmaavat - 2018): రణ్‌వీర్ సింగ్ సినీ కెరీర్‌లోనే మైలురాయిగా నిలిచే పాత్ర 'అలావుద్దీన్ ఖిల్జీ'. ఒక క్రూరమైన, సైకో తరహా విలన్ పాత్రలో ఆయన చూపించిన నటన ప్రేక్షకులను భయపెట్టడమే కాకుండా విమర్శకుల నుంచి ప్రశంసలు అందుకుంది. రణ్‌వీర్ కేవలం పాజిటివ్ పాత్రలే కాదు, ఇలాంటి నెగటివ్ పాత్రలను కూడా రక్తికట్టించగలరని నిరూపించింది.

గల్లీ బాయ్ (Gully Boy - 2019): ముంబై మురికివాడకు చెందిన మురాద్ అనే ఒక సాధారణ హిప్-హాప్ రాపర్ పాత్రలో రణ్‌వీర్ ఒదిగిపోయారు. ఎంతో భావోద్వేగంతో కూడిన ఈ పాత్రలో ఆయన నటనకు , స్వయంగా పాడిన రాప్ పాటలకు ప్రేక్షకులు బ్రహ్మరథం పట్టారు. ఈ సినిమా ఆస్కార్ రేసులో భారతదేశం తరఫున అధికారిక ఎంట్రీగా నిలిచింది.

83 (2021): భారత క్రికెట్ దిగ్గజం కపిల్ దేవ్ బయోపిక్‌గా వచ్చిన ఈ చిత్రంలో రణ్‌వీర్ సింగ్ నటన అమోఘం. కపిల్ దేవ్ లాగే బౌలింగ్ యాక్షన్, నడక, మాట్లాడే విధానాన్ని అచ్చుగుద్దినట్లు దించేసి, 1983 వరల్డ్ కప్ చరిత్రాత్మక విజయాన్ని కళ్లముందు ఉంచారు.

ధురంధర్ (Dhurandhar - 2026): 'ధురంధర్', 'ధురంధర్: ది రివెంజ్' (2025–2026) చిత్రాలలో జస్కీరత్ సింగ్ రంగీ/ హంజా అలీ మజారీగా:ఈ స్పై యాక్షన్ ఫ్రాంచైజీలో రణ్‌వీర్ సింగ్ ఒక అండర్‌కవర్ ఇండియన్ ఇంటెలిజెన్స్ అధికారిగా మునుపెన్నడూ లేని విధంగా ఒక ఇంటెన్స్, శారీరకంగా ఎంతో శ్రమతో కూడిన పవర్‌ఫుల్ ప్రదర్శనను ఇచ్చారు. అద్భుతమైన శారీరక మార్పులు, భావోద్వేగాలతో కూడిన యాక్షన్ సన్నివేశాల ద్వారా ఈ పాత్రల కోసం ఆయన చూపించిన అంకితభావం.. భారతీయ చలనచిత్ర రంగంలో టాప్ యాక్షన్ స్టార్లలో ఒకరిగా ఆయన స్థానాన్ని మరింత బలోపేతం చేసింది.

తెలంగాణలోని పలు ప్రాంతాలలో మోస్తరు వర్షాలు కురిసే అవకాశం

హైదరాబాద్:రాష్ట్రంలోని పలు జిల్లాల్లో ఈరోజు తేలికపాటి నుండి ఒక మోస్తరు వర్షాలు కురిసే అవకాశం ఉందని హైదరాబాద్ ప్రాంతీయ వాతావరణ కేంద్రం వెల్లడించింది. నైరుతి రుతుపవనాల ప్రభావంతో అక్కడక్కడా ఆకాశం మేఘావృతమై ఉంటుందని, కొన్ని ప్రాంతాలలో ఉరుములు, మెరుపులతో కూడిన జల్లులు పడవచ్చని తెలిపింది. ముందస్తు జాగ్రత్తగా ప్రయాణికులు వాతావరణ పరిస్థితులను గమనించాలని అధికారులు సూచించారు.

దక్షిణ భారత కానోయీ ఛాంపియన్‌షిప్‌లో తెలంగాణ జట్టు ఘనత

•  ఓవరాల్ ఛాంపియన్లుగా సబ్ జూనియర్ బాలికలు

విశాఖపట్నం: ఆంధ్రప్రదేశ్‌లోని విశాఖపట్నంలో జరిగిన అస్మిత సౌత్ జోన్ కానోయీ స్ప్రింట్ ఛాంపియన్‌షిప్‌ (Canoeing Sprint Championship) లో తెలంగాణ జట్టు అద్భుత ప్రతిభ కనబరిచింది. సబ్ జూనియర్ బాలికల విభాగంలో తెలంగాణ అమ్మాయిలు సంచలన ప్రదర్శనతో ఓవరాల్ చాంపియన్‌షిప్‌ను కైవసం చేసుకున్నారు. ఈ టోర్నీలో తెలంగాణ జట్టు మొత్తం 3 బంగారు, 3 వెండి, 7 కాంస్య పతకాలతో కలిపి 13 పతకాలు సాధించింది. అద్భుత విజయం సాధించిన క్రీడాకారిణులను తెలంగాణ స్పోర్ట్స్ అథారిటీ చైర్మన్ శివసేన రెడ్డి, మేనేజింగ్ డైరెక్టర్ డాక్టర్ సోనీ బాలాదేవి ప్రత్యేకంగా అభినందించారు.

ప్రపంచ జూనోసెస్ దినోత్సవం

• జంతువుల నుంచి సంక్రమించే వ్యాధులపై అవగాహనకు పిలుపు

న్యూఢిల్లీ / హైదరాబాద్: జంతువులు, పక్షుల నుండి మనుషులకు సంక్రమించే జూనోటిక్ (Zoonotic) వ్యాధుల పట్ల ప్రజల్లో చైతన్యం కల్పించేందుకు సోమవారం ప్రపంచ జూనోసెస్ దినోత్సవాన్ని జరుపుకుంటున్నారు. ఫ్రెంచ్ ప్రసిద్ధ శాస్త్రవేత్త లూయిస్ పాశ్చర్ 1885 జూలై 6న మానవునికి మొట్టమొదటి సారిగా రేబీస్ వ్యాక్సిన్‌ను విజయవంతంగా అందించిన చరిత్రాత్మక సంఘటనకు గుర్తుగా ఏటా ఈ రోజును ఎంచుకున్నారు. ప్రపంచవ్యాప్తంగా వస్తున్న అంటువ్యాధులలో సుమారు 60 శాతం, కొత్తగా పుట్టుకొస్తున్న వ్యాధులలో 75 శాతం జంతువుల ద్వారానే మనుషులకు వ్యాపిస్తున్నాయని ప్రపంచ ఆరోగ్య సంస్థ (WHO) హెచ్చరిస్తున్న తరుణంలో ఈ రోజు ప్రాధాన్యం సంతరించుకుంది.

తెలంగాణ ఉద్యమకారుల గుర్తింపు కమిటీ తొలి అడుగు

• ఓయూ విద్యార్థి జేఏసీతో కేశవరావు భేటీ

హైదరాబాద్:తెలంగాణ ఉద్యమంలో క్రియాశీలక పాత్ర పోషించిన ఉద్యమకారుల సంక్షేమం కోసం ప్రభుత్వం ప్రత్యేక చర్యలు ప్రారంభించింది. సచివాలయం ఎదురుగా ఉన్న అమర జ్యోతి కార్యాలయంలో ప్రభుత్వ సలహాదారు కేశవరావు నేతృత్వంలోని కమిటీ.. ఉస్మానియా యూనివర్సిటీ (OU) విద్యార్థి జేఏసి నాయకులతో తొలి సంప్రదింపుల సమావేశాన్ని నిర్వహించింది. ఈ భేటీలో ఉద్యమకారుల గుర్తింపు, వారి సంక్షేమం కోసం అనుసరించాల్సిన విధివిధానాలపై ఓయూ జేఏసీ నేతల నుండి కమిటీ సలహాలు, సూచనలు, అభిప్రాయాలను సేకరించింది.

కాళేశ్వరం పేరుతో ప్రజాధనం వృథా

• బీఆర్ఎస్ నేతలపై మంత్రి పొంగులేటి శ్రీనివాసరెడ్డి తీవ్ర విమర్శలు

హైదరాబాద్: కాళేశ్వరం ప్రాజెక్టు పేరుతో గత ప్రభుత్వం వేల కోట్ల రూపాయల ప్రజాధనాన్ని వృథా చేసిందని రాష్ట్ర రెవెన్యూ శాఖ మంత్రి పొంగులేటి శ్రీనివాసరెడ్డి మండిపడ్డారు. నాణ్యతలేని నిర్మాణాలతో తెలంగాణ ప్రజలపై భారీ ఆర్థిక భారాన్ని మోపిన బీఆర్ఎస్ నాయకులకు, ఇప్పుడు కాంగ్రెస్ ప్రభుత్వాన్ని ప్రశ్నించే ఎలాంటి నైతిక హక్కు లేదని ఆయన తీవ్రంగా విమర్శించారు. ప్రాజెక్టు వైఫల్యాలపై వాస్తవాలు ప్రజలందరికీ తెలుసని, తమ తప్పులను కప్పిపుచ్చుకునేందుకే విపక్షాలు బురదజల్లే రాజకీయాలు చేస్తున్నాయని ధ్వజమెత్తారు.

ఓటరు జాబితా సవరణపై భట్టి దిశానిర్దేశం

• ఆరు గ్యారెంటీలను ప్రతి ఇంటికీ తీసుకెళ్లండి

హైదరాబాద్: రాష్ట్రంలో ఓటరు జాబితా సవరణ ప్రక్రియను కాం

గ్రెస్ శ్రేణులు అత్యంత ప్రతిష్ఠాత్మకంగా క్షేత్రస్థాయిలో చేపట్టాలని ఉప ముఖ్యమంత్రి భట్టి విక్రమార్క పిలుపునిచ్చారు. ప్రజాభవన్ లో సికింద్రాబాద్ పార్లమెంట్ నియోజకవర్గ కాంగ్రెస్ నాయకులతో నిర్వహించిన కీలక సమావేశంలో హైదరాబాద్ ఇన్చార్జి మంత్రి పొన్నం ప్రభాకర్, మైనార్టీ సంక్షేమ శాఖ మంత్రి మహమ్మద్ అజారుద్దీన్‌లతో కలిసి ఆయన పాల్గొన్నారు. రాబోయే ఎన్నికల దృష్ట్యా 'స్పెషల్ ఇంటెన్సివ్ రివిజన్' (SIR) ప్రక్రియను పకడ్బందీగా నిర్వహించాలన్నారు. అదే సమయంలో, ప్రభుత్వం ప్రతిష్టాత్మకంగా అమలు చేస్తున్న ఆరు గ్యారెంటీలు, సంక్షేమ పథకాలను ప్రతి ఇంటికీ చేరవేసేలా నాయకులు, కార్యకర్తలు బాధ్యత తీసుకోవాలని స్పష్టం చేశారు.

అయతొల్లా ఖమేనీ అంత్యక్రియల్లో ఇరాన్ అగ్రనేతల ప్రతిజ్ఞ

• శత్రువుల మెడలు వంచుతామంటూ ఆర్మీ చీఫ్ హెచ్చరిక
• లీడర్ మరణానికి కారణమైన అమెరికా, ఇజ్రాయెల్ లను వదిలిపెట్టేది లేదని ప్రకటన
•  టెహ్రాన్ వీధుల్లో ఉప్పెనలా ముంచెత్తిన లక్షలాది మంది ప్రజలు
• భద్రతా కారణాలతో తండ్రి అంత్యక్రియలకు దూరంగా ఉన్న నూతన సుప్రీం లీడర్ మొజ్తబా ఖమేనీ!

ఇరాన్ మాజీ సుప్రీం లీడర్ అయతొల్లా అలీ ఖమేనీ అంత్యక్రియల సందర్భంగా ఇరాన్ రాజకీయ, సైనిక అగ్రనాయకత్వం భావోద్వేగానికి లోనవడంతో పాటు శత్రుదేశాలపై తీవ్రస్థాయిలో నిప్పులు చెరిగింది. ఖమేనీ చూపిన విప్లవాత్మక మార్గంలోనే తాము పయనిస్తామని శపథం చేసిన నేతలు.. ఆయన మరణానికి కారణమైన శక్తులను ఎట్టిపరిస్థితుల్లోనూ వదిలిపెట్టబోమని హెచ్చరించారు. వీడ్కోలు వేడుకల రెండవ రోజైన ఆదివారంనాడు ఇరాన్ అధికారిక మీడియా సంస్థ ఐఆర్ఐబీ (IRIB) తో మాట్లాడిన ఇరాన్ ఆర్మీ చీఫ్ మేజర్ జనరల్ అమీర్ హతామి సంచలన వ్యాఖ్యలు చేశారు. తమ సుప్రీం లీడర్ మరణానికి కారణమైన వారి మెడలు వంచుతామని, వారిని కచ్చితంగా జవాబుదారీ చేస్తామని అమెరికా, ఇజ్రాయెల్ దళాలను పరోక్షంగా హెచ్చరించారు. ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) కుద్స్ ఫోర్స్ డిప్యూటీ కోఆర్డినేటర్ బ్రిగేడియర్ జనరల్ ఇరాజ్ మస్జెడి మాట్లాడుతూ.. దశాబ్దాల పాటు ఇస్లామిక్ వ్యవస్థ కోసం పోరాడిన అమరవీరుడైన తమ నాయకుడికి ఈ వీరమరణం కంటే దక్కాల్సిన పెద్ద బహుమతి మరొకటి లేదన్నారు.

ఇదే వేదికపై నుంచి ఇరాన్ అధ్యక్షుడు మసౌద్ పెజెష్కియాన్ మాట్లాడుతూ.. అమర ఇమామ్ ఆశయాలను, ఆయన వారసత్వాన్ని తాము ముందుకు తీసుకెళ్తామని ప్రతిజ్ఞ చేశారు. కుద్స్ ఫోర్స్ కమాండర్ బ్రిగేడియర్ జనరల్ ఇస్మాయిల్ ఖానీ, ఫస్ట్ వైస్ ప్రెసిడెంట్ మహమ్మద్ రెజా ఆరిఫ్ కూడా ఖమేనీ సేవలను కొనియాడారు. విప్లవ నేత ఆశయాలను క్షేత్రస్థాయిలో అమలు చేయాల్సిన బాధ్యత ఇప్పుడు తమపై మరింత పెరిగిందని వారు పేర్కొన్నారు. కాగా, ఫిబ్రవరి 28 న జరిగిన అమెరికా-ఇశ్రాయేల్ దాడుల్లో అలీ ఖమేనీ , ఆయన కుటుంబానికి చెందిన నలుగురు సభ్యులు మరణించిన సంగతి తెలిసిందే. దీనివల్ల పశ్చిమాసియాలో సుదీర్ఘ కాలం భీకర పోరు సాగింది. అయితే గత నెలలోనే అమెరికా-ఇరాన్ దేశాల మధ్య ఉద్రిక్తతలను తగ్గించేందుకు హార్ముజ్ జలసంధి, అణు కార్యక్రమాలపై 60 రోజుల సాంకేతిక చర్చల కోసం ఒక అవగాహన ఒప్పందంకుదిరింది.

ఈ నేపథ్యంలో టెహ్రాన్‌ లోని ఇమామ్ ఖొమేని గ్రాండ్ ముసల్లా వద్ద శనివారం నుండి ఖమేనీ భౌతికకాయాన్ని ప్రజల సందర్శనార్థం ఉంచగా, ఆదివారం నాటి బహిరంగ అంత్యక్రియల ప్రార్థనల కోసం టెహ్రాన్ వీధుల్లోకి లక్షలాది మంది ప్రజలు ఉప్పెనలా తరలివచ్చారు. ఖమేనీ మరణానంతరం ఆయన కుమారుడు మొజ్తబా ఖమేనీ ఇరాన్ నూతన సుప్రీం లీడర్‌ గా నియమితులయ్యారు. అయితే, ఆయనను కూడా హతమారుస్తామంటూ ఇజ్రాయెల్ నుంచి వస్తున్న వరుస బెదిరింపులు, కఠినమైన భద్రతా కారణాల దృష్ట్యా.. టెహ్రాన్‌ లో ఆరు రోజుల పాటు జరిగే తన తండ్రి అంత్యక్రియల వేడుకలకు మొజ్తబా ఖమేనీ దూరంగా ఉంటున్నట్లు అంతర్జాతీయ మీడియా సంస్థ అల్ జజీరా వెల్లడించింది.

బాహుబలి పంపులను ఆన్ చేయండి, రైతులకు సాగునీరివ్వండి

• తెలంగాణ సర్కార్‌కు కేటీఆర్ అల్టిమేటం
• గోదావరి జలాలు సముద్రం పాలవుతున్నా ప్రభుత్వం పట్టించుకోవట్లేదు
• కన్నెపల్లి పంప్ హౌస్‌ను 60 వేల మందితో ముట్టడిస్తాం
•  బీఆర్‌ఎస్ వర్కింగ్ ప్రెసిడెంట్ హెచ్చరిక
• పెంబర్తి వద్ద కేటీఆర్ కాన్వాయ్‌ను అడ్డుకోవడంతో తీవ్ర ఉద్రిక్తత

తెలంగాణలో సాగునీటి విడుదల, వర్షాభావ పరిస్థితుల నేపథ్యంలో కాంగ్రెస్ ప్రభుత్వంపై ప్రతిపక్ష భారత్ రాష్ట్ర సమితి (BRS)  యుద్ధం ప్రకటించింది. రాష్ట్ర ప్రభుత్వం రైతుల ప్రయోజనాలను విస్మరించి, అందుబాటులో ఉన్న గోదావరి జలాలను సద్వినియోగం చేసుకోకపోతే.. రాబోయే రోజుల్లో 50 నుండి 60 వేల మందితో కన్నెపల్లి పంప్ హౌస్‌ను ముట్టడిస్తామని బీఆర్‌ఎస్ వర్కింగ్ ప్రెసిడెంట్ కేటీఆర్ హెచ్చరించారు. భూపాలపల్లి జిల్లాలోని కన్నెపల్లి పంప్ హౌస్ వద్ద నీరు వృథాగా పోతున్న తీరును పరిశీలించేందుకు బీఆర్‌ఎస్ బృందంతో కలిసి వెళ్లిన కేటీఆర్.. అక్కడ ఏర్పాటు చేసిన ప్రెస్ కాన్ఫరెన్స్‌ లో ప్రభుత్వంపై నిప్పులు చెరిగారు. తక్షణమే స్పందించి అక్కడి బాహుబలి పంపులను ఆన్ చేసి రైతులకు నీళ్లు ఇవ్వాలని, ప్రభుత్వం మొండిగా వ్యవహరిస్తే తామే స్వయంగా కన్నెపల్లికి మార్చ్ నిర్వహించి, పంప్ హౌస్‌ను ముట్టడించి పంపులను ఆన్ చేయిస్తామని స్పష్టం చేశారు.

అంతకుముందు, కేటీఆర్ ,సీనియర్ బీఆర్‌ఎస్ నాయకులు కన్నెపల్లి పంప్ హౌస్ సందర్శనకు బయలుదేరిన సమయంలో తీవ్ర ఉద్రిక్తత చోటుచేసుకుంది. పార్టీ నాయకులు, కార్యకర్తలు, రైతులు ప్రయాణిస్తున్న వాహనాలను పోలీసులు అక్కడక్కడా అడ్డుకున్నారని బీఆర్‌ఎస్ ఆరోపించింది. జనగామ జిల్లా పెంబర్తి వద్ద జాతీయ రహదారిపై బారికేడ్లు ఉంచి కేటీఆర్ కాన్వాయ్‌ను పోలీసులు అడ్డుకోవడంతో.. బీఆర్‌ఎస్ నేతలకు, పోలీసులకు మధ్య తీవ్ర వాగ్వాదం జరిగింది. ఈ సందర్భంగా కేటీఆర్ మాట్లాడుతూ.. ఎల్ నినో ప్రభావం, లోటు వర్షపాతం మరియు ప్రభుత్వ చేతకానితనం వల్ల తెలంగాణ తీవ్రమైన నీటి సంక్షోభాన్ని , కరవును ఎదుర్కోవాల్సి వస్తోందని ఆందోళన వ్యక్తం చేశారు. కరవు నుంచి రాష్ట్రాన్ని కాపాడటానికి కాంగ్రెస్ ప్రభుత్వం వెంటనే కన్నెపల్లి పంప్ హౌస్ ద్వారా గోదావరి జలాలను లిఫ్ట్ చేయాలని డిమాండ్ చేశారు.

కన్నెపల్లి పంప్ హౌస్‌ను పరిశీలించిన అనంతరం కేటీఆర్ మాట్లాడుతూ.. తెలంగాణలోని 33 జిల్లాలకు గానూ ఇప్పటికే 26 జిల్లాల్లో కరవు పరిస్థితులు నెలకొన్నాయని చెప్పారు. కాళేశ్వరం ప్రాజెక్టు మౌలిక సదుపాయాలను ప్రభుత్వం ఉపయోగించకపోవడం వల్లే లక్షలాది క్యూసెక్కుల గోదావరి నీరు వృథాగా సముద్రంలో కలుస్తోందని మండిపడ్డారు. వాతావరణ నిపుణులు ఎల్ నినో గురించి పదే పదే హెచ్చరిస్తున్నా కాంగ్రెస్ ప్రభుత్వం రైతుల పట్ల ఘోరమైన ఉదాసీనతను ప్రదర్శిస్తోందని ధ్వజమెత్తారు. కరవును ఎదుర్కొని వ్యవసాయాన్ని రక్షించాల్సింది పోయి, నీటిని వృథాగా పోనిస్తూ రైతులను గోస పెడుతున్నారని ఆరోపించారు. ఒకవేళ నీరిస్తే పంటలు ఎక్కువగా పండి, వాటిని కొనుగోలు చేయాల్సి వస్తుందని, ఎరువులు సరఫరా చేయాలని, రైతులకు బోనస్ ఇవ్వాల్సి వస్తుందనే భయంతోనే ప్రభుత్వం కావాలనే నీటిని నిలిపివేస్తోందని కేటీఆర్ సంచలన ఆరోపణలు చేశారు. కాళేశ్వరం ప్రాజెక్టుపై వస్తున్న అవినీతి ఆరోపణలను తోసిపుచ్చిన ఆయన.. నిందలు వేయడం ఆపి, మరమ్మతులు ఏమైనా ఉంటే వెంటనే పూర్తి చేయాలన్నారు. మాజీ ముఖ్యమంత్రి కేసీఆర్ నాయకత్వంలో నిర్మించిన ఈ ప్రాజెక్టు.. పద్ధతి ప్రకారం నిర్వహిస్తే రాష్ట్రాంతటికీ నీరిచ్చేందుకు సంపూర్ణ సామర్థ్యంతో సిద్ధంగా ఉందని కేటీఆర్ భరోసా ఇచ్చారు.

మొండితనం వీడి కన్నెపల్లి పంప్‌హౌస్ నుంచి నీటిని ఎత్తిపోయండి

•  ప్రభుత్వాన్ని హెచ్చరించిన సాగునీటి నిపుణులు

హైదరాబాద్: రాజకీయ విభేదాలను తర్వాత పరిష్కరించుకోవచ్చని, ప్రస్తుతానికి ఉత్తర తెలంగాణ ప్రయోజనాలను కాపాడటం కోసం కన్నెపల్లి పంప్‌హౌస్ నుంచి తక్షణమే గోదావరి నీటిని ఎత్తిపోయడం (లిఫ్ట్ చేయడం) పై ప్రభుత్వం దృష్టి పెట్టాలని సాగునీటి నిపుణులు హెచ్చరిస్తున్నారు. మేడిగడ్డ బ్యారేజ్ మరమ్మతులు పూర్తయ్యే వరకు నీటిని ఎత్తిపోసేది లేదు అంటూ ప్రభుత్వం మొండిగా వ్యవహరిస్తే, దానివల్ల నష్టపోయేది రాజకీయ పార్టీలు కాదు.. ఉత్తర తెలంగాణ ప్రజలని వారు స్పష్టం చేశారు. ముఖ్యంగా ‘ఎల్ నినో’ (El Niño) ప్రభావం వల్ల రాబోయే రోజుల్లో తీవ్రమైన కరవు పరిస్థితులు ఏర్పడే ప్రమాదం ఉందని వాతావరణ నిపుణులు హెచ్చరిస్తున్న వేళ, ప్రభుత్వం అత్యంత అప్రమత్తంగా వ్యవహరించాల్సిన అవసరం ఎంతైనా ఉంది. సాధారణంగా మేడిగడ్డ, అన్నారం, సుందిళ్ల బ్యారేజీలు కరవు కాలంలోనే అత్యంత ఉపయోగకరంగా ఉంటాయని, ప్రస్తుతం మేడిగడ్డ బ్యారేజ్‌తో సంబంధం లేకుండానే కన్నెపల్లి వద్ద గోదావరి నదిలో 70,000 నుండి 80,000 క్యూసెక్కుల నీరు ప్రవహిస్తోందని ఇంజినీర్లు గుర్తుచేస్తున్నారు.

ప్రస్తుత పరిస్థితుల్లో కన్నెపల్లి నుం,ఇ రోజుకు రెండు టీఎంసీల (2 TMC) నీటిని తక్షణమే ఎత్తిపోసే అవకాశం ఉందని, ఎల్లంపల్లి నుంచి కొండపోచమ్మ సాగర్ , బస్వాపూర్ వరకు విస్తరించి ఉన్న వివిధ జలాశయాలలో సుమారు 150 టీఎంసీల నీటిని నిల్వ చేసుకునే సామర్థ్యం మనకు అందుబాటులో ఉందని నిపుణులు వివరిస్తున్నారు. కాళేశ్వరం ప్రాజెక్టు వల్ల చేకూరిన ప్రధాన ప్రయోజనం ఈ గొలుసుకట్టు జలాశయాల నిర్మాణమేనని, ఎగువన శ్రీరాంసాగర్ నుంచి నీరు వచ్చినా లేదా దిగువన మేడిగడ్డ నుంచి ఎత్తిపోసినా.. చివరికి ఆ నీటిని ఈ రిజర్వాయర్లలోనే నిల్వ చేసి వాడుకోవాల్సి ఉంటుందని వారు పేర్కొన్నారు. ప్రస్తుతం ఈ రిజర్వాయర్లలో అదనంగా మరో 100 టీఎంసీల నీటిని నిల్వ చేసేందుకు తగినంత ఖాళీ స్థలం ఉంది. ఎల్లంపల్లి, మిడ్ మానేరు, లోయర్ మానేరు, అనంతగిరి, రంగనాయక సాగర్, మల్లన్న సాగర్, కొండపోచమ్మ సాగర్, బస్వాపూర్ వంటి బృహత్తర జలాశయాల జలాలే తెలంగాణకు, అలాగే హైదరాబాద్ మహానగర తాగునీటి అవసరాలకు ప్రధాన జీవనాడి. కాబట్టి, పాలకులు తమ పంతాలు, అహంకారాలు లేదా రాజకీయ కక్ష సాధింపు చర్యల కోసం ప్రజలను కరవు కోరల్లోకి నెట్టేస్తే, భవిష్యత్తులో ప్రజలు కూడా తమ ఓటు హక్కు ద్వారా పాలకులకు బుద్ధి చెప్పేందుకు సిద్ధంగా ఉంటారని నేతలు గ్రహించాలని హితవు పలికారు.

రాముడి సొమ్ము దోపిడీపై శివసేన సమరం

• ఉద్ధవ్ ఠాక్రే నేతృత్వంలో ‘రామ్ రక్షా ఆందోళన’
• హనుమాన్ చాలీసా పారాయణంతో నిరసనలు

ముంబై:అయోధ్య రామాలయ విరాళాల దుర్వినియోగం వివాదం మహారాష్ట్రలో రాజకీయ ప్రకంపనలు సృష్టిస్తోంది. ఈ నిధుల అక్రమాలపై భారతీయ జనతా పార్టీ (BJP) నిలదీస్తూ శివసేన (యూబీటీ) చీఫ్ ఉద్ధవ్ ఠాక్రే నేతృత్వంలో ముంబైలోని దాదర్ వేదికగా ‘రామ్ రక్షా ఆందోళన’ పేరిట భారీ నిరసన కార్యక్రమాన్ని చేపట్టారు. ఈ విషయాన్ని పార్టీ ఎంపీ సంజయ్ రౌత్ మీడియాకు వెల్లడిస్తూ.. దాదర్‌లోని హనుమాన్ దేవాలయం సాక్షిగా ప్రారంభమయ్యే ఈ ఉద్యమం కేవలం ముంబైకే పరిమితం కాకుండా మహారాష్ట్ర వ్యాప్తంగా, ఆపై దేశంలోని ఇతర ప్రాంతాలకూ విస్తరిస్తుందని స్పష్టం చేశారు. కోట్ల మంది భక్తులు సమర్పించిన కానుకలు, విరాళాల సొమ్ముతో పాటు సీతాదేవి బంగారు మంగళసూత్రం, బంగారు రామచరితమానస్ ప్రతి, శ్రీరాముడి ఆభరణాలు దొంగిలించబడ్డాయని సంజయ్ రౌత్ తీవ్ర ఆరోపణలు గుప్పించారు. ఈ దోపిడీకి పాల్పడిన వారంతా బీజేపీకి చెందినవారేనని మండిపడుతూ.. గతంలో గుడులను దోచుకున్న శక్తులతో వారిని పోల్చారు.

మరోవైపు ఈ నిరసనల గురించి ఉద్ధవ్ ఠాక్రే మాట్లాడుతూ.. హిందూత్వాన్ని వదులుకోని భక్తులంతా ఈ ఉద్యమంలో భాగస్వాములు కావాలని, దేవాలయాల్లో హనుమాన్ చాలీసా పారాయణంతో ఈ ఆందోళనలు కొనసాగుతాయని పిలుపునిచ్చారు. ఎమ్మెల్యేలు, ఎంపీలను కొనుగోలు చేయడానికి రాముల వారి ఆలయం నుండి దొంగిలించిన సొమ్మును వాడుతున్నారంటూ ఆయన ‘ఆపరేషన్ రామ్ మందిర్’ పేరిట సంచలన ఆరోపణలు చేశారు. గతంలో అటల్ బిహారీ వాజ్‌పేయి  చెప్పినట్లు హిందువులు ఇకపై బాధితులుగా మిగిలిపోరని, రాముడి సొమ్మును లూటీ చేసిన వారిని భక్తులు ఎప్పటికీ క్షమించరని ఉద్ధవ్ హెచ్చరించారు. ఈ కఠిన సమయంలో రాజకీయాలకు అతీతంగా రాముడిపై భక్తి ఉన్న ప్రతి ఒక్కరూ ఈ దోపిడీకి వ్యతిరేకంగా గళం విప్పాలని శివసేన (యూబీటీ) పిలుపునిచ్చింది.

ఒక్క దెబ్బతో వారందరినీ ఖతం చేయవచ్చు

• ఇరాన్ నేతలందరినీ ఉద్దేశిస్తూ ట్రంప్ చేసిన సంచలన వ్యాఖ్యల వెనుక అసలు కథ

వాషింగ్టన్: అమెరికా అధ్యక్షుడు  డొనాల్డ్ ట్రంప్ మరోసారి అంతర్జాతీయ రాజకీయాల్లో తీవ్ర దుమారం రేపేలా సంచలన వ్యాఖ్యలు చేశారు. ఇరాన్ మాజీ సుప్రీం లీడర్ ఆయతుల్లా అలీ ఖమేనీ అంత్యక్రియల సందర్భంగా టెహ్రాన్‌లో ఇరాన్ దేశపు అగ్రశ్రేణి రాజకీయ, సైనిక నాయకులందరూ ఒకే చోట గుమిగూడటాన్ని ప్రస్తావిస్తూ.. ‘ఒక్క దెబ్బతో (ఒక్క దాడితో) వారందరినీ పూర్తిగా తుడిచిపెట్టే అవకాశం మాకు లభించింది’ అంటూ ఆయన వ్యాఖ్యానించారు. అమెరికా 250వ స్వాతంత్య్ర దినోత్సవ వేడుకల అనంతరం శ్వేతసౌధంలో మీడియాతో మాట్లాడిన ఆయన, సైనిక పరంగా తాము ఎంత శక్తివంతమైన వ్యూహాత్మక స్థితిలో ఉన్నామో చెప్పడానికి ఈ ఉదాహరణను వాడుకున్నారు. ఇరాన్ ప్రభుత్వంలోని కీలక నేతలందరూ భద్రతాపరమైన ముప్పులను పక్కనబెట్టి ఒకే బహిరంగ ప్రదేశంలో అంత్యక్రియల ఊరేగింపులో పాల్గొనడంపై ట్రంప్ ఆశ్చర్యం వ్యక్తం చేస్తూ, సైనిక కోణంలో చూస్తే శత్రుదేశ నాయకత్వాన్ని పూర్తిగా అణచివేయడానికి అది అత్యంత అనుకూలమైన సమయమని, అయితే తాము దౌత్యానికే ప్రాధాన్యం ఇస్తున్నామని పరోక్షంగా పేర్కొన్నారు.

అయితే, ఈ విధమైన దూకుడు వ్యాఖ్యలు చేసినప్పటికీ ప్రస్తుతానికి ఇరాన్‌తో యుద్ధం చేసే ఉద్దేశం అమెరికాకు లేదని, శాంతియుత మార్గంలోనే సమస్యలను పరిష్కరించుకోవాలని చూస్తున్నట్లు ట్రంప్ స్పష్టం చేశారు. ప్రస్తుతం ఖతార్ , పాకిస్తాన్‌ల మధ్యవర్తిత్వంలో దోహా వేదికగా జరుగుతున్న 14-అంశాల అవగాహన ఒప్పంద (MoU) చర్చలు చాలా సానుకూల దిశగా సాగుతున్నాయని ఆయన వెల్లడించారు. ఇరాన్ ఇప్పటికే తమ ప్రధాన డిమాండ్లు ,షరతులు అన్నింటికీ దాదాపు అంగీకరించిందని, ఇరు దేశాల మధ్య శాంతి పునరుద్ధరణకు ఈ చర్చలు ఎంతో దోహదపడతాయని ఆశాభావం వ్యక్తం చేశారు. ఖమేనీ అంత్యక్రియల సంతాపాది కార్యక్రమాలు ముగిసిన వెంటనే తదుపరి రౌండ్ చర్చలు ప్రారంభం కానున్నాయని, పశ్చిమ ఆసియాలో శాంతి భద్రతలను కాపాడటమే తమ పరమావధి అని ట్రంప్ వివరించారు.

ఆయనంటే జనం అసహ్యించుకుంటారనుకున్నా

• ఇరాన్ సుప్రీం లీడర్ ఖమేనీ అంత్యక్రియల్లో ప్రజల కన్నీళ్లపై ట్రంప్ ఆశ్చర్యం

వాషింగ్టన్: ఇటీవల మరణించిన ఇరాన్ మాజీ అత్యున్నత నేత (సుప్రీం లీడర్) ఆయతుల్లా అలీ ఖమేనీ అంత్యక్రియల సందర్భంగా ఇరాన్ ప్రజలు పెద్ద ఎత్తున తరలివచ్చి కన్నీరుమున్నీరు కావడంపై అమెరికా అధ్యక్షుడు డొనాల్డ్ ట్రంప్ విచిత్రమైన వ్యాఖ్యలు చేశారు. వాషింగ్టన్‌లో జరిగిన 250వ స్వాతంత్య్ర దినోత్సవ వేడుకల అనంతరం ఒక ప్రముఖ అంతర్జాతీయ మీడియాతో మాట్లాడిన ఆయన.. ఖమేనీ అంటే ఇరాన్ ప్రజలందరికీ తీవ్రమైన ద్వేషం, అసహ్యం ఉన్నాయని తాము భావించామని, కానీ ఆయన అంత్యక్రియల దృశ్యాలు చూశాక తాము అంచనా వేసిన దానికి భిన్నమైన వాస్తవం కనిపించిందని ఆశ్చర్యం వ్యక్తం చేశారు. అంత్యక్రియల ఊరేగింపులో లక్షలాది మంది ఇరాన్ పౌరులు తీవ్రమైన శోకసంద్రంలో మునిగిపోవడాన్ని ప్రస్తావిస్తూ.. "అక్కడ అంతమంది జనం ఏడవడం చూసి నేను నిజంగా ఆశ్చర్యపోయాను.. ఇరాన్ ప్రజలు ఆయనను ఎంతగానో అసహ్యించుకుంటున్నారని మాకు చెప్పబడింది, కానీ అక్కడ కనిపించిన దృశ్యాలు మాత్రం అందుకు పూర్తి భిన్నంగా ఉన్నాయి" అని ట్రంప్ వ్యాఖ్యానించారు.

ఇదే తరుణంలో ఇరాన్ దౌత్యవేత్తలతో అమెరికా సాగిస్తోన్న అంతర్జాతీయ చర్చల పురోగతిని కూడా ట్రంప్ ప్రస్తావించారు. ప్రస్తుతం దోహాలో జరుగుతున్న 14-అంశాల అవగాహన ఒప్పందచర్చల్లో ఇరాన్ ప్రతినిధులు దాదాపు అమెరికా పెట్టిన అన్ని ప్రధాన నిబంధనలకు అంగీకరించారని ఆయన స్పష్టం చేశారు. అయితే ఇరాన్ మాజీ సుప్రీం లీడర్ ఖమేనీ అంత్యక్రియల ముగింపు ప్రక్రియల కారణంగానే ప్రస్తుతం ఈ దౌత్యపరమైన చర్చలకు తాత్కాలిక విరామం లభించిందని, ఆ దేశ అధికారిక సంతాప దినాలు ముగిసిన వెంటనే మధ్యవర్తిత్వ దేశాలైన ఖతార్, పాకిస్తాన్‌ల నేతృత్వంలో తదుపరి చర్చల ప్రక్రియ అత్యంత వేగంగా ప్రారంభం కానుందని ట్రంప్ వివరించారు. ఈ ప్రాంతంలో శాంతి భద్రతలను పునరుద్ధరించడానికి, ఇరాన్ అణు సామర్థ్య దేశంగా ఎదగకుండా అడ్డుకోవడానికి తాము కట్టుబడి ఉన్నామని ఆయన పునరుద్ఘాటించారు.

రామ్ మందిర్ ట్రస్ట్‌ను రద్దు చేయాలి

• శివసేన (యూబీటీ) నేత ప్రియాంకా చతుర్వేది డిమాండ్

ముంబై: అయోధ్య రామాలయ నిధుల దుర్వినియోగం వ్యవహారంపై రాజకీయాలు మరింత వేడెక్కాయి. ఈ వివాదంపై శివసేన (యూబీటీ) ఎంపీ ప్రియాంకా చతుర్వేది స్పందిస్తూ.. కోట్ల మంది హిందువుల నమ్మకంతో కూడిన రామ్ మందిర్ విరాళాలలో భారీ కుంభకోణం జరిగిందని ఆరోపించారు. పవిత్రమైన ఆలయ నిధులను దారి మళ్లించిన ఈ 'శ్రీరామ జన్మభూమి తీర్థ క్షేత్ర ట్రస్ట్'ను కేంద్ర ప్రభుత్వం తక్షణమే రద్దు చేయాలని ఆమె డిమాండ్ చేశారు. కేవలం కొద్దిమంది రాజీనామాలతోనో లేదా సిట్‌ విచారణలతోనో ఈ పాపం కొట్టుకుపోదని, భక్తుల నమ్మకాన్ని కాపాడటానికి ఈ ట్రస్ట్‌ను రద్దు చేసి, సుప్రీంకోర్టు పర్యవేక్షణలో సరికొత్త పారదర్శక బోర్డును ఏర్పాటు చేయడమే ఏకైక మార్గమని స్పష్టం చేశారు. హిందూ సమాజం సెంటిమెంట్లను వ్యాపారంగా మార్చుకున్న ప్రతి ఒక్కరినీ కఠినంగా శిక్షించాలని, ఈ విషయంలో ప్రతిపక్షాలు పోరాటాన్ని మరింత ఉధృతం చేస్తాయని ఆమె హెచ్చరించారు.

యూపీ లో ప్రధాని మోదీ, సీఎం యోగి నాయకత్వంలో భారీ మెజారిటీతో మళ్లీ అధికారంలోకి వస్తాం

 

•  బీజేపీ జాతీయ అధ్యక్షుడు నితిన్ నవీన్

లక్నో:ఉత్తరప్రదేశ్‌లో రాబోయే 2027 అసెంబ్లీ ఎన్నికలలో భారతీయ జనతా పార్టీ నేతృత్వంలోని ఎన్‌డీఏ (NDA) కూటమి ఘనవిజయం సాధించి, భారీ మెజారిటీతో మళ్లీ ప్రభుత్వాన్ని ఏర్పాటు చేస్తుందని బీజేపీ జాతీయ అధ్యక్షుడు నితిన్ నవీన్ ధీమా వ్యక్తం చేశారు. ఉత్తరప్రదేశ్ రాష్ట్రంలో రెండు రోజుల పర్యటనలో భాగంగా లక్నో చేరుకున్న ఆయన, కూటమి భాగస్వామ్య పక్షాలు , పార్టీ ముఖ్య నేతలతో కలిసి రాబోయే ఎన్నికల వ్యూహాలపై సుదీర్ఘంగా చర్చించారు. ప్రధాని నరేంద్ర మోదీ, ముఖ్యమంత్రి యోగి ఆదిత్యనాథ్ సేవా దృక్పథంతో ప్రజల కోసం చేసిన అభివృద్ధి పనులే ఎన్‌డీఏ కూటమిని క్లీన్ స్వీప్ వైపు నడిపిస్తాయని ఆయన విలేకరులకు తెలిపారు. క్షేత్రస్థాయిలో ప్రభుత్వ సంక్షేమ పథకాలను ప్రజల్లోకి తీసుకెళ్లాలని, బూత్ స్థాయి నుండి పార్టీని మరింత బలోపేతం చేయాలని కార్యకర్తలకు పిలుపునిచ్చారు.

ఇదే వేదికపై సమాజ్‌వాదీ పార్టీ (SP) లక్ష్యంగా బీజేపీ నేతలు తీవ్ర విమర్శలు గుప్పించారు. యూపీ రాష్ట్ర మంత్రి భూపేంద్ర చౌదరి మాట్లాడుతూ.. సమాజ్‌వాదీ పార్టీ కేవలం కులాలు, మతాలు మరియు ప్రాంతాల వారీగా సమాజాన్ని విభజించి దేశాన్ని బలహీనపరచాలనే ప్రతికూల ఎజెండాతో రాజకీయం చేస్తోందని మండిపడ్డారు. రాష్ట్ర ఉపముఖ్యమంత్రి కేశవ్ ప్రసాద్ మౌర్య కూడా దీనిని సమర్థిస్తూ.. గతంలో ఉన్న గుండారాజ్యం, మాఫియా సంస్కృతి, అల్లర్లు మరియు వారసత్వ రాజకీయాలను ఉత్తరప్రదేశ్ ప్రజలు ఎప్పుడో తిరస్కరించారని గుర్తుచేశారు. నేటి యూపీ కేవలం అభివృద్ధి, సుపరిపాలన , మహిళల భద్రతను మాత్రమే కోరుకుంటోందని, అందుకే రాబోయే ఎన్నికల్లోనూ ప్రజలంతా అభివృద్ధి వైపే నిలబడాలని నిశ్చయించుకున్నారని ఆయన స్పష్టం చేశారు.

రామ్ మందిర్ విరాళాల దుర్వినియోగం

•  దోషులకు కఠిన శిక్ష పడాల్సిందేనన్న ఆరెస్సెస్
• హోసబలే ప్రకటనను ఉదహరించిన మోహన్ భాగవత్

నాగ్‌పూర్: అయోధ్య శ్రీరామ జన్మభూమి తీర్థ క్షేత్ర ట్రస్ట్‌కు అందిన విరాళాల నిధులలో జరిగినట్లుగా చెప్తున్న అక్రమాలపై (Embezzlement) రాష్ట్రీయ స్వయంసేవక్ సంఘ్ (RSS) తీవ్రంగా స్పందించింది. నాగ్‌పూర్‌లో జరిగిన ఒక కార్యక్రమం సందర్భంగా ఆరెస్సెస్ చీఫ్ మోహన్ భాగవత్ ఈ వివాదంపై స్పందిస్తూ.. ఈ వ్యవహారంలో సంఘ్ అధికారిక వైఖరిని ఇప్పటికే ఆరెస్సెస్ ప్రధాన కార్యదర్శి దత్తాత్రేయ హోసబలే స్పష్టం చేశారని, తాము అదే విధానానికి కట్టుబడి ఉన్నామని విలేకరులకు తెలిపారు. అంతకుముందు దత్తాత్రేయ హోసబలే విడుదల చేసిన వివరణాత్మక ప్రకటనలో.. కోట్ల మంది రామభక్తుల త్యాగాలు, దశాబ్దాల పోరాటాల ఫలితంగా నిర్మితమైన రామాలయ హుండీ కానుకల చోరీ ఉదంతం దేశవ్యాప్తంగా ఉన్న హిందూ సమాజం , భక్తుల మనోభావాలను తీవ్రంగా గాయపరిచిందని ఆవేదన వ్యక్తం చేశారు. ప్రస్తుతం ఉత్తరప్రదేశ్ ప్రభుత్వం ఏర్పాటు చేసిన ప్రత్యేక దర్యాప్తు బృందం (SIT) విచారణ జరుపుతోందని, ఈ విరాళాల దుర్వినియోగానికి పాల్పడిన వారు ఎంతటి వారైనా సరే వారికి చట్టపరంగా అత్యంత కఠినమైన శిక్ష పడేలా చూడటం అత్యవసరమని డిమాండ్ చేశారు.

ఈ దురదృష్టకర సంఘటనను ఒక అసాధారణ విషయంగా పరిగణించి, ఆలయ ఆర్థిక నిర్వహణ , పరిపాలనా వ్యవస్థలలో ఉన్న లోపాలన్నింటినీ తక్షణమే సరిదిద్దాలని శ్రీరామ జన్మభూమి తీర్థ క్షేత్ర ట్రస్ట్‌ను ఆరెస్సెస్ కోరింది. భక్తుల నమ్మకాన్ని, పారదర్శకతను కాపాడటానికి ట్రస్ట్ తగిన చర్యలు తీసుకుంటుందనే నమ్మకం తమకు ఉందని పేర్కొంది. అలాగే, ఈ క్లిష్ట సమయంలో హిందూ సమాజం అంతా సంయమనం, ఓపిక పాటించాలని, ఈ దురదృష్టకర ఘటనను అడ్డుపెట్టుకుని హిందూ ధర్మానికి , సమాజానికి మచ్చ తెచ్చేందుకు ప్రయత్నిస్తున్న వ్యతిరేక శక్తుల కుట్రలను తిప్పికొట్టాలని పిలుపునిచ్చింది.

స్వేచ్ఛా పోరాటం వర్ధిల్లాలి

• అమెరికా 250వ స్వాతంత్య్ర వేడుకల్లో ట్రంప్‌
• 107 డిగ్రీల రికార్డు ఎండలో 80 నిమిషాల పాటు  ప్రసంగం
• అమెరికా ప్రయోగం ప్రపంచ చరిత్రలోనే ఒక అద్భుతం
• వాషింగ్టన్ వేడుకలు ముగిశాక నెతన్యాహుతో భేటీ కానున్నట్లు వైట్ హౌస్ వెల్లడి!

అమెరికా దేశం ఆవిర్భవించి 250 వసంతాలు పూర్తయిన చరిత్రాత్మక సందర్భాన్ని పురస్కరించుకుని శనివారం దేశ రాజధాని వాషింగ్టన్ డీసీలో నిర్వహించిన ‘సల్యూట్ టు అమెరికా’ వేడుకల్లో అధ్యక్షుడు డొనాల్డ్ ట్రంప్  ఆవేశపూరిత, జాతీయవాద ప్రసంగం చేశారు. వాషింగ్టన్ నగర చరిత్రలోనే ఎన్నడూ లేని విధంగా 107 డిగ్రీల ఫారెన్‌హీట్ (42 డిగ్రీల సెల్సియస్) రికార్డుస్థాయి ఉష్ణోగ్రతలతో వడగాల్పులు వీస్తున్నప్పటికీ, ట్రంప్ ఏమాత్రం వెనక్కి తగ్గకుండా సుదీర్ఘంగా ప్రసంగించారు. మానవ స్వేచ్ఛకు, హక్కులకు అమెరికా ఒక గొప్ప నిదర్శనమని, ప్రపంచ చరిత్రలోనే ఇది అత్యంత అద్భుతమైన ప్రయోగమని ఆయన కొనియాడారు. వాషింగ్టన్ మాన్యుమెంట్ సాక్షిగా నేషనల్ మాల్‌ లో ప్రత్యేకంగా ఏర్పాటు చేసిన వేదికపై నుంచి ప్రసంగిస్తూ.. 250 ఏళ్ల కిందట కొంతమంది దేశభక్తులు కలిసి స్వేచ్ఛతో, శ్రామికుల కష్టంతో, దేవుడి ఆశీస్సులతో నిర్మించిన ఈ దేశం.. నేడు మునుపెన్నడూ లేనంత బలంగా, పటిష్టమైన ఆత్మవిశ్వాసంతో ఉందని, అమెరికా స్వాతంత్య్ర పోరాట స్ఫూర్తి ఎప్పటికీ వర్ధిల్లాలని ట్రంప్ నినదించారు.

సుమారు 80 నిమిషాల పాటు సాగిన ఈ ప్రసంగంలో ట్రంప్ చరిత్ర విశేషాలను గుర్తుచేస్తూనే, తన శైలిలో రాజకీయ ప్రత్యర్థులపై విమర్శనాస్త్రాలు సంధించారు. అమెరికా సైనిక వీరులను, పారిశ్రామిక ఆవిష్కర్తలను ఆకాశానికెత్తిన ఆయన.. అమెరికా గొప్పదనాన్ని గుర్తించని అంతర్జాతీయ సంస్థలను, దేశీయ రాజకీయ శత్రువులను తీవ్రంగా తప్పుపట్టారు. అమెరికాలోని 50 రాష్ట్రాల సంస్కృతి, వ్యవసాయ రంగాన్ని ప్రతిబింబించేలా ట్రంప్ ఆలోచనల ప్రకారం నేషనల్ మాల్‌ లో ప్రతిష్టాత్మకంగా ఏర్పాటు చేసిన ‘గ్రేట్ అమెరికన్ స్టేట్ ఫెయిర్’ ప్రదర్శనకు ఎండతీవ్రత పెద్ద శాపంగా మారింది. వడదెబ్బ కారణంగా డజన్ల కొద్దీ సందర్శకులు తీవ్ర అస్వస్థతకు గురికావడంతో అత్యవసర వైద్య సిబ్బంది వారికి చికిత్స అందించారు. మధ్యాహ్నం వేళలో ఎండ తీవ్రతకు జనాలు రాక అనేక రాష్ట్రాల పవిలియన్లు వెలవెలబోయాయి. అయినప్పటికీ స్టేజీపై ఏమాత్రం అలసట లేకుండా కనిపించిన ట్రంప్.. ఎండ ఎక్కువగా ఉంటుందని తనతో అన్నారని, కానీ భూమిపైనే అత్యంత గొప్ప దేశ వేడుకలను జరుపుకుంటున్నప్పుడు అమెరికా దేశభక్తులకు ఈ చిన్న ఎండ ఒక లెక్కే కాదని అనడంతో ముందు వరుసలోని మద్దతుదారులు పెద్ద ఎత్తున కేకలు వేశారు.

అంతర్జాతీయ వ్యవహారాల గురించి మాట్లాడుతూ.. తన పరిపాలన ‘అమెరికా ఫస్ట్’ విధానాన్ని ట్రంప్ పునరుద్ఘాటించారు. ప్రపంచ స్థిరత్వం అనేది కేవలం అమెరికా ఆర్థిక స్థితిస్థాపకత ,సైనిక ఆధిపత్యంపైనే పూర్తిగా ఆధారపడి ఉంటుందని స్పష్టం చేశారు. పశ్చిమాసియాలో జరుగుతున్న దౌత్యపరమైన చర్చలను ప్రస్తావిస్తూ.. ప్రత్యర్థి దేశాలు అమెరికా  అపారమైన క్తిని పూర్తిగా అంగీకరించాయని పేర్కొన్నారు. సాయంత్రం చీకటి పడే సమయానికి ట్రంప్ ప్రసంగం ముగియడంతో.. అమెరికా చరిత్రలోనే అతిపెద్దదిగా అభివర్ణించిన బహుళ నగరాల సమన్వయ భారీ బాణసంచా ప్రదర్శనకు వేదిక సిద్ధమైంది. కాగా, ఈ వాషింగ్టన్ వేడుకల అనంతరం ఇజ్రాయెల్‌ ప్రధాని బెంజమిన్ నెతన్యాహుతో జరగబోయే అత్యంత కీలకమైన ద్వైపాక్షిక సమావేశానికి సిద్ధమవడానికి అధ్యక్షుడు ట్రంప్ ఒక రహస్య ప్రాంతానికి బయలుదేరనున్నట్లు వైట్ హౌస్ అధికారులు ధృవీకరించారు. శుక్రవారం జరిగిన టెలిఫోన్ సంభాషణలో ఇరు దేశాల అధినేతలు ఈ భేటీకి అంగీకరించినట్లు సమాచారం.