ప్రపంచ ఆర్థిక వ్యవస్థకు 'పవర్‌హౌస్'గా భారత్

ఐఎంఎఫ్ ప్రశంసల జల్లు
వృద్ధి అంచనాలు పెరిగే అవకాశం!
వాషింగ్టన్/న్యూఢిల్లీ: ప్రపంచవ్యాప్తంగా నెలకొన్న ఆర్థిక అనిశ్చితిలోనూ భారత ఆర్థికవ్యవస్థ ధీటుగా దూసుకుపోతున్నదని అంతర్జాతీయ ద్రవ్య నిధి (IMF) కొనియాడింది. గ్లోబల్ ఎకానమీకి భారత్ ఒక శక్తివంతమైన 'గ్రోత్ ఇంజిన్' (Growth Engine) అని ఐఎంఎఫ్ కమ్యూనికేషన్స్ విభాగం డైరెక్టర్ జూలీ కోజాక్ ప్రశంసించారు. డిసెంబర్‌తో ముగిసిన మూడవ త్రైమాసికంలో (Q3) భారత వృద్ధి గణాంకాలు తాము ఊహించిన దానికంటే అత్యంత బలంగా నమోదయ్యాయని ఆమె విశ్లేషించారు. ముఖ్యంగా దేశీయంగా పెరుగుతున్న వినియోగం (Domestic Consumption) భారత వృద్ధికి ప్రధాన చోదకశక్తిగా నిలుస్తున్నదని ఆమె పేర్కొన్నారు.

గతంలో ఐఎంఎఫ్ 2025-26 ఆర్థిక సంవత్సరానికి గాను భారత వృద్ధి రేటును 6.6 శాతంగా అంచనా వేసింది. అయితే, ప్రస్తుత ట్రెండ్స్, బలమైన ఆర్థిక సూచికలను గమనిస్తే, రానున్నరోజుల్లో ఈ వృద్ధి అంచనాలను మరింత పెంచే (Upgrade) అవకాశం ఉందని జూలీ కోజాక్ స్పష్టం చేశారు. దీనికి సంబంధించిన సవరించిన అంచనాలను వచ్చే వారం విడుదల చేయనున్న 'వరల్డ్ ఎకనామిక్ అవుట్‌లుక్' (World Economic Outlook) నివేదికలో వెల్లడించనున్నారు. ప్రపంచంలోనే అత్యంత వేగంగా వృద్ధి చెందుతున్న ప్రధాన ఆర్థికవ్యవస్థగా భారత్ తన స్థానాన్ని సుస్థిరం చేసుకోవడం, అంతర్జాతీయ పెట్టుబడిదారుల్లో మరింత నమ్మకాన్ని పెంచుతున్నది.


చైనా వంటి అగ్రరాజ్యాల వృద్ధి నెమ్మదిస్తున్న తరుణంలో, భారత్ ప్రపంచ వృద్ధిలో కీలక పాత్ర పోషించడం విశేషం. ద్రవ్యోల్బణ నియంత్రణ, ప్రభుత్వ మౌలిక సదుపాయాల పెట్టుబడులు, యువతలో పెరుగుతున్న కొనుగోలుశక్తి వంటి అంశాలు భారత ఆర్థిక రథచక్రాన్ని ముందుకు నడిపిస్తున్నాయని ఆర్థిక నిపుణులు భావిస్తున్నారు. ఈ సానుకూల పరిణామాలు భారత్ త్వరలోనే 5 ట్రిలియన్ డాలర్ల ఆర్థిక వ్యవస్థగా అవతరించాలనే లక్ష్యానికి మరింత చేరువ చేస్తున్నాయి.