- బాక్సాఫీస్ వద్ద రికార్డు కలెక్షన్లతో దూసుకుపోతున్న ‘మీర్జాపూర్: ది మూవీ’
- దేశీయంగా రూ.220 కోట్లు దాటిన గ్రాస్ వసూళ్లు
ముంబై: ఓటీటీ ప్లాట్ఫారమ్పై డిజిటల్ సిరీస్గా సుదీర్ఘకాలం విశేషాదరణ పొందిన 'మీర్జాపూర్' ఫ్రాంచైజీ, ఇప్పుడు వెండితెరపై కూడా అదే స్థాయి విధ్వంసాన్ని సృష్టిస్తోంది. పంకజ్ త్రిపాఠి, అలీ ఫజల్, దివ్యేందు ప్రధాన పాత్రల్లో తెరకెక్కిన ‘మీర్జాపూర్: ది మూవీ’ థియేటర్లలో విడుదలై బాక్సాఫీస్ వద్ద భారీ వసూళ్లతో దూసుకుపోతోంది. దేశీయంగా ఈ చిత్రం ఇప్పటికే రూ.220 కోట్ల గ్రాస్ కలెక్షన్ల మార్కును అధిగమించింది.
ట్రేడ్ వర్గాల నివేదికల ప్రకారం.. భారతదేశంలో ఈ సినిమా రూ.220.10 కోట్ల గ్రాస్ వసూళ్లను సాధించగా, నెట్ కలెక్షన్లు రూ.184.79 కోట్లుగా నమోదయ్యాయి. సెప్టెంబర్ 4న థియేటర్లలోకి వచ్చిన ఈ చిత్రం తొలిరోజే రూ.20 కోట్లకు పైగా గ్రాస్ సాధించి శుభారంభం చేసింది. 2018లో ఓటీటీ సిరీస్గా ప్రారంభమై మూడు విజయవంతమైన సీజన్లతో దేశవ్యాప్తంగా రికార్డు స్థాయి క్రేజ్ తెచ్చుకున్న ఈ ఫ్రాంచైజీ, ఫస్ట్ టైమ్ లార్జర్ ద్యాన్ లైఫ్ వెండితెర రూపంలో వచ్చి ప్రేక్షకులను విశేషంగా అలరిస్తోంది.
ఈ చిత్రంలో 2018 కథా నేపథ్యానికి సంబంధించిన సరికొత్త కోణాన్ని దర్శకుడు గుర్మీత్ సింగ్ ఆవిష్కరించారు. పాత పాత్రల్లో రసిక దుగల్, శ్రియ పిల్గావ్కర్, శ్వేతా త్రిపాఠి, అభిషేక్ బెనర్జీ నటించగా.. జితేంద్ర కుమార్, రవి కిషన్, సోనాల్ చౌహాన్ నయా క్యారెక్టర్లతో ఆకట్టుకున్నారు. ఎక్సెల్ ఎంటర్టైన్మెంట్స్, అమెజాన్ ఎంజీఎం స్టూడియోస్ సంయుక్తంగా ఈ బిగ్ స్కేల్ యాక్షన్ డ్రామాను నిర్మించాయి.
