- లండన్ వేదికగా ఒక్కటైన కోలీవుడ్ దిగ్గజాలు..
- అభిమానుల మధ్య వివాదాలకు చెక్ పెడుతూ ప్రత్యేక కానుకలు మార్పిడి
లండన్: తమిళ చిత్రసీమలో ఒకరికొకరు పోటీదారులుగా భావించే అగ్ర కథానాయకుడు అజిత్ కుమార్ (Ajith), తమిళగ వెట్రి కజగం (TVK) అధినేత, ముఖ్యమంత్రి విజయ్ (Vijay) లండన్ వేదికగా ఎంతో ఆప్యాయంగా కలుసుకున్నారు. 'సిల్వర్స్టోన్ సర్క్యూట్'లో జరిగిన 'మిచెలిన్ లే మాన్స్ కప్' రేసింగ్ టోర్నమెంట్లో పాల్గొన్న అజిత్కు మద్దతుగా విజయ్ అక్కడకు వెళ్లడం, మ్యాచ్ అనంతరం ఇద్దరూ ఎంతో ప్రేమగా కలుసుకోవడం కోలీవుడ్లో హాట్ టాపిక్గా మారింది. రేసింగ్ ముగిసిన తర్వాత వీరిద్దరూ ఒకరికొకరు ప్రత్యేకమైన కానుకలను ఇచ్చిపుచ్చుకున్నారు. అజిత్కు విజయ్ ఒక చిన్న రేసింగ్ కారు బొమ్మను బహుమతిగా ఇవ్వగా, దానిపై "నా ప్రియమైన సోదరుడు అజిత్కు ప్రేమతో.." అని తన స్వహస్తాలతో ఆటోగ్రాఫ్ చేసి ఇచ్చారు. ఇందుకు బదులుగా అజిత్ మోటార్ స్పోర్ట్స్ హెల్మెట్ను విజయ్కి బహుమతిగా అందజేశారు.
తమిళ సినీ పరిశ్రమలో విజయ్, అజిత్ అభిమానుల మధ్య దశాబ్దాలుగా తీవ్ర పోటీ, సోషల్ మీడియా యుద్ధాలు జరుగుతున్న సంగతి తెలిసిందే. తాజాగా వీరిద్దరూ నవ్వుతూ ఆలింగనం చేసుకుని కానుకలు ఇచ్చిపుచ్చుకోవడంతో అభిమానుల మధ్య ఉన్న వైరి వర్గాల వార్తలకు పూర్తిగా చెక్ పడినట్లయింది. కాగా, లండన్ పర్యటనలో ఉన్న ప్రముఖ నటీమణులు త్రిష, రాధికా శరత్కుమార్ కూడా అజిత్ను కలిసి ఆయన రేసింగ్ ప్రదర్శనను అభినందించారు.
