శత్రువులకు గుండెపోటు ఖాయం

 

• ట్రంప్ శాంతి ప్రతిపాదనను తిరస్కరించిన వేళ.. ఇరాన్ 'రహస్య ఆయుధ' హెచ్చరిక

టెహ్రాన్: అమెరికా అధ్యక్షుడు డొనాల్డ్ ట్రంప్ ఇరాన్ పంపిన శాంతి ప్రతిపాదనను నిర్ద్వంద్వంగా తోసిపుచ్చడంతో ఇరాన్ తన స్వరాన్ని మరింత పెంచింది. హార్ముజ్ జలసంధిని తిరిగి తెరిచేందుకు ఇరాన్ చేసిన ప్రతిపాదనను తిరస్కరిస్తూ, అణు కార్యక్రమంపై స్పష్టత వచ్చే వరకు నౌకా దళ దిగ్బంధం కొనసాగుతుందని ట్రంప్ ప్రకటించిన నేపథ్యంలో ఇరాన్ నౌకాదళ కమాండర్ తీవ్రస్థాయిలో స్పందించారు. అమెరికా, ఇజ్రాయెల్ దళాలు భయపడేలా అతి త్వరలోనే ఒక సరికొత్త ఆయుధాన్ని యుద్ధ క్షేత్రంలోకి ప్రవేశపెట్టబోతున్నామని, అది చూసి శత్రువులకు 'గుండెపోటు' రావడం ఖాయమని ఇరాన్ నేవీ కమాండర్ రియర్ అడ్మిరల్ షహ్రామ్ ఇరానీ హెచ్చరించారు. ఆ ఆయుధం ఇప్పటికే శత్రు దళాలకు అత్యంత సమీపంలోనే ఉందని ఆయన వ్యాఖ్యానించడం అంతర్జాతీయంగా సంచలనం రేకెత్తిస్తోంది.

ఆర్థిక ఒత్తిడి ద్వారా తమను చర్చల కు తీసుకురావచ్చని ట్రంప్ భావించడం హాస్యాస్పదమని, మిలిటరీ అకాడమీల్లో ఇదొక జోక్‌గా మారిందని ఇరానీ ఎద్దేవా చేశారు. అమెరికాకు చెందిన భారీ యుద్ధ నౌక 'అబ్రహం లింకన్' పై ఇరాన్ దళాలు ఇప్పటికే కనీసం ఏడుసార్లు క్షిపణి దాడులు నిర్వహించాయని, దీనివల్ల కొంతకాలం పాటు ఆ నౌక నుండి విమానాలను నడపడం అమెరికాకు సాధ్యం కాలేదని ఆయన వెల్లడించారు. అమెరికా తమ నౌకలను అక్రమంగా స్వాధీనం చేసుకోవడాన్ని 'సొమాలియా సముద్ర దొంగల' చర్యల కంటే ఘోరమైనదిగా ఆయన అభివర్ణించారు. సొమాలియా దొంగలు పేదరికం వల్ల అలా చేస్తే, అమెరికన్లు మాత్రం సిబ్బందిని, వారి కుటుంబాలను బందీలుగా పట్టుకుని అంతకంటే నీచంగా ప్రవర్తిస్తున్నారని మండిపడ్డారు.

మరోవైపు, ఇరాన్ తన అణ్వాయుధ తయారీ దిశగా సాగిస్తున్న ప్రయత్నాలను అడ్డుకోవడమే తమ ప్రధాన లక్ష్యమని ట్రంప్ స్పష్టం చేశారు. బాంబు దాడుల కంటే ఈ ఆర్థిక దిగ్బంధమే ఇరాన్‌ను ఉక్కిరిబిక్కిరి చేస్తోందని, వారు అణ్వాయుధాలను కలిగి ఉండటానికి తాము ఎట్టిపరిస్థితుల్లోనూ ఒప్పుకోబోమని ఆయన తేల్చి చెప్పారు. అణు చర్చలను వాయిదా వేస్తూ, కేవలం దిగ్బంధాన్ని ఎత్తివేయాలని ఇరాన్ చేసిన ప్రతిపాదనలో అర్థం లేదని వాషింగ్టన్ అభిప్రాయపడుతోంది. ఇరాన్ మాత్రం యుద్ధంలో చనిపోయిన తమ పౌరుల ప్రతి రక్తపు బొట్టుకు ప్రతీకారం తీర్చుకుంటామని, శత్రువులకు ఎప్పటికీ గుర్తుండిపోయేలా బలమైన దెబ్బ కొడతామని ప్రతిజ్ఞ చేసింది. ఈ నేపథ్యంలో పశ్చిమ ఆసియాలో యుద్ధ జ్వాలలు మరింత తీవ్రమయ్యే సూచనలు కనిపిస్తున్నాయి.

మీ చట్టాలను మార్చండి

• గర్భం దాల్చిన మైనర్ బాధితురాలి విషయంలో కేంద్రానికి సుప్రీంకోర్టు ఘాటు హెచ్చరిక

న్యూఢిల్లీ: లైంగిక దాడికి గురై గర్భం దాల్చిన 15 ఏళ్ల బాలిక విషయంలో సుప్రీంకోర్టు గురువారం కేంద్ర ప్రభుత్వంపై తీవ్ర ఆగ్రహం వ్యక్తం చేసింది. 31 వారాల గర్భాన్ని తొలగించేందుకు గతంలో తామిచ్చిన ఉత్తర్వులను సవాలు చేస్తూ కేంద్రం క్యురేటివ్ పిటిషన్ వేయడాన్ని కోర్టు తప్పుబట్టింది. మహిళలు తమ శరీరంపై పూర్తి నియంత్రణ కలిగి ఉండాలని, వారి వ్యక్తిగత నిర్ణయాలను ప్రభుత్వం గౌరవించాలని ఈ సందర్భంగా ధర్మాసనం స్పష్టం చేసింది.  

ముఖ్యంగా, అత్యాచారం వంటి కేసుల్లో గర్భ విచ్ఛిన్నానికి కాలపరిమితి ఉండకూడదని, మారుతున్న కాలానికి అనుగుణంగా చట్టాల్లో మార్పులు రావాలని కోర్టు సూచించింది. "అత్యాచారం వల్ల కలిగే వేదనను ఏదీ భర్తీ చేయలేదు. పౌరుల నిర్ణయాలను గౌరవించడం నేర్చుకోండి" అని ప్రధాన న్యాయమూర్తి సూర్యకాంత్ ఈ ఉదయం కేంద్ర ప్రభుత్వ న్యాయవాది ఐశ్వర్య భాటిని మందలించారు. కోర్టు ఉత్తర్వులను సవాలు చేసే హక్కు బాధితురాలికి లేదా ఆమె కుటుంబానికి మాత్రమే ఉంటుందని, ప్రభుత్వానికి కాదని ఆయన తేల్చి చెప్పారు.  

జస్టిస్ జాయ్‌మాల్యా బాగ్చీ స్పందిస్తూ, "మేము వ్యక్తిగత ఎంపికలను గౌరవిస్తాము, మీరు కూడా అలాగే చేయాలి" అని పేర్కొన్నారు. ఒకవేళ బాధితురాలి మానసిక ఆరోగ్యం ప్రమాదంలో ఉంటే, ఆ నిర్ణయం ఆమె కుటుంబానికే వదిలేయాలని, దీనిని ప్రభుత్వం , పౌరుల మధ్య పోరాటంగా మార్చవద్దని హితవు పలికారు. అంతకుముందు ప్రభుత్వం తరపున వాదిస్తూ ఐశ్వర్య భాటి, 31 వారాల దశలో గర్భ విచ్ఛిన్నం సాధ్యం కాదని, అది పుట్టబోయే బిడ్డ ఆరోగ్యానికి , మైనర్ తల్లికి ప్రాణాపాయమని వాదించారు. బిడ్డను ప్రసవించి దత్తతకు ఇవ్వడమే సరైన మార్గమని ఆమె పేర్కొన్నారు.  అయితే, 15 ఏళ్ల బాలిక ప్రతి నిమిషం అనుభవిస్తున్న నరకాన్ని ఊహించాలని, ఆ గర్భం ఆమెకు ఇష్టం లేనిదని కోర్టు గుర్తుచేసింది. ఒక చిన్నారి , పిండం మధ్య పోరాటం వస్తే, ఆ చిన్నారి గౌరవంగా జీవించే హక్కుకే ప్రాధాన్యం ఇవ్వాలని ధర్మాసనం వ్యాఖ్యానించింది. చట్టం అవసరమైనప్పుడు కఠినంగా ఉండాలని, బాధితురాలి ఆశయాలను, కలలను చిదిమేసి ఆమెను బలవంతంగా తల్లిని చేయలేమని కోర్టు ఆవేదన వ్యక్తం చేసింది. ఇప్పటికే రెండుసార్లు ఆత్మహత్యాయత్నం చేసిన ఆ బాలికను బలవంతం చేయడం ఆమె జీవించే హక్కును ఉల్లంఘించడమేనని కోర్టు తన తీర్పులో స్పష్టం చేసింది. 

ఒపెక్ నుంచి యూఏఈ ఔట్‌

• చమురు మార్కెట్‌పై దీని ప్రభావం తక్షణమే ఉంటుందా? 
• విశ్లేషకులు ఏమంటున్నారు!

అబుదాబీ: ప్రపంచ చమురు మార్కెట్‌లో 'ఒపెక్' (OPEC) కూటమి గుత్తాధిపత్యానికి గండి కొడుతూ యునైటెడ్ అరబ్ ఎమిరేట్స్ (UAE) తీసుకున్న నిర్ణయం అంతర్జాతీయంగా చర్చనీయాంశమైంది. అయితే, ఈ నిష్క్రమణ వల్ల చమురు సరఫరా ,ధరలపై తక్షణ ప్రభావం కంటే దీర్ఘకాలిక ప్రభావమే ఎక్కువగా ఉంటుందని ఆర్థిక నిపుణులు విశ్లేషిస్తున్నారు. 

ప్రస్తుతం ఇరాన్ యుద్ధం కారణంగా హార్ముజ్ జలసంధి దిగ్బంధానికి గురవ్వడం వల్ల చమురు రవాణా ఇప్పటికే స్తంభించిపోయింది. ఈ భౌగోళిక రాజకీయ ఉద్రిక్తతల వల్ల సరఫరాలో అంతరాయం ఏర్పడి, ధరలు ఇప్పటికే బ్యారెల్‌కు 110-120 డాలర్ల మధ్య ఊగిసలాడుతున్నాయి. ఇటువంటి సమయంలో యూఏఈ కూటమి నుంచి బయటకు వచ్చినప్పటికీ, రవాణా మార్గాలు మూసుకుపోయి ఉండటంతో ఆ దేశం తన పెంచిన ఉత్పత్తిని మార్కెట్లోకి వెంటనే పంపలేదు. అందువల్ల, స్వల్పకాలంలో ధరలు తగ్గడం కంటే మార్కెట్‌లో అనిశ్చితి పెరిగే అవకాశం ఉందని నిపుణులు హెచ్చరిస్తున్నారు.  

దీర్ఘకాలికంగా చూస్తే, యూఏఈ నిర్ణయం ప్రపంచ చమురు మార్కెట్ స్వరూపాన్ని మార్చేయవచ్చు.  

సరఫరా పెరుగుదల: ఒపెక్ కోటాల నుంచి విముక్తి లభించడంతో, యూఏఈ తన ఉత్పత్తిని 2027 నాటికి రోజుకు 50 లక్షల బ్యారెళ్లకు పెంచాలని లక్ష్యంగా పెట్టుకుంది. ఇది మార్కెట్లోకి అదనపు చమురును చేర్చి, ధరలు క్రమంగా 5 నుంచి 10 డాలర్ల వరకు తగ్గడానికి దోహదపడవచ్చు. 

 ఒపెక్ పట్టు సడలింపు: ఉత్పత్తి , ధరలను నియంత్రించే ఒపెక్ శక్తి ఈ నిష్క్రమణతో గణనీయంగా తగ్గుతుంది. ఇది ఉత్పత్తి దేశాల మధ్య పోటీని పెంచి, ధరలు మరింత సరళతరం కావడానికి దారితీస్తుంది. 

భారత్‌కు మేలు: చమురును అధికంగా దిగుమతి చేసుకునే భారత్ వంటి దేశాలకు ఇది శుభవార్త. పెరిగిన సరఫరా వల్ల భవిష్యత్తులో దిగుమతి బిల్లులు తగ్గి, దేశీయంగా ద్రవ్యోల్బణం అదుపులోకి వచ్చే అవకాశం ఉంది.  

మొత్తానికి, యూఏఈ నిర్ణయం చమురు మార్కెట్‌లో ఒక కొత్త అధ్యయనానికి నాంది పలికింది. తక్షణమే చమురు ధరలు పతనం కాకపోయినా, యుద్ధ మేఘాలు తొలగి రవాణా పునరుద్ధరించబడిన తర్వాత యూఏఈ ప్రభావం స్పష్టంగా కనిపిస్తుందని ఆర్థిక నిపుణులు అభిప్రాయపడుతున్నారు.  

ఎగ్జిట్ పోల్స్ 2026: బెంగాల్‌లో నువ్వా-నేనా

• కేరళలో కాంగ్రెస్ వైపు మొగ్గు
• తమిళనాట విజయ్ సంచలనం

న్యూఢిల్లీ: దేశవ్యాప్తంగా ఐదు రాష్ట్రాల అసెంబ్లీ ఎన్నికల పోలింగ్ ముగిసింది.దీంతో వెలువడిన వివిధ సంస్థల ఎగ్జిట్ పోల్స్ అంచనాలు ఆసక్తికరమైన ఫలితాలను సూచిస్తున్నాయి. ముఖ్యంగా పశ్చిమ బెంగాల్‌లో తృణమూల్ కాంగ్రెస్ (TMC), భారతీయ జనతా పార్టీ (BJP) మధ్య హోరాహోరీ పోటీ నెలకొన్నది. పోల్ ఆఫ్ పోల్స్ ప్రకారం.. రెండు పార్టీలు దాదాపు 145 స్థానాల వద్ద సమంగా నిలిచే అవకాశం ఉందని అంచనా. పీ-మార్క్ వంటి సంస్థలు బీజేపీకి 150-175 స్థానాలతో మెజారిటీని ఇస్తుండగా, పీపుల్స్ పల్స్ మాత్రం మమతా బెనర్జీ నేతృత్వంలోని టీఎంసీకే 177-187 స్థానాలతో అధికారాన్ని కట్టబెట్టింది. దీంతో బెంగాల్ పీఠం ఎవరిదనే అంశంపై తీవ్ర ఉత్కంఠ నెలకొంది.  

అటు కేరళలో పదేళ్ల ఎల్డీఎఫ్ (LDF) పాలనకు చెక్ పెడుతూ కాంగ్రెస్ నేతృత్వంలోని యూడీఎఫ్ (UDF) తిరిగి పుంజుకోనుందని దాదాపు అన్ని సర్వేలు ఏకగ్రీవంగా పేర్కొన్నాయి. యాక్సిస్ మై ఇండియా యూడీఎఫ్‌కు 78-90 స్థానాలను అంచనా వేసింది. ఇక తమిళనాడులో ముఖ్యమంత్రి ఎం.కె.స్టాలిన్ నేతృత్వంలోని డీఎంకే కూటమి వరుసగా రెండోసారి అధికారాన్ని నిలబెట్టుకునే అవకాశాలు ఉన్నట్లు మెజారిటీ సర్వేలు చెబుతున్నాయి. అయితే, రాజకీయాల్లోకి కొత్తగా ప్రవేశించిన నటుడు విజయ్ తన ‘తమిళగ వెట్రి కళగం’ (TVK) పార్టీతో భారీ ప్రభావాన్ని చూపుతారని, కొన్ని సర్వేల ప్రకారం ఆయన పార్టీ ఏకంగా 98-120 స్థానాలు గెలుచుకుని అతిపెద్ద పార్టీగా అవతరించవచ్చని అంచనా వేయడం విశేషం.  

ఈశాన్య రాష్ట్రం అసోంలో మాత్రం ముఖ్యమంత్రి హిమంత బిస్వా శర్మ నేతృత్వంలోని బీజేపీ కూటమి స్పష్టమైన ఆధిక్యతతో మూడోసారి అధికారాన్ని దక్కించుకోబోతోందని సర్వేలు వెల్లడించాయి. ఎన్డీయే కూటమికి 88-100 స్థానాలు రావచ్చని యాక్సిస్ మై ఇండియా పేర్కొంది. అలాగే కేంద్రపాలిత ప్రాంతం పుదుచ్చేరిలో కూడా ఎన్డీయే కూటమికే ప్రజలు మళ్లీ పట్టం కట్టనున్నట్లు ఎగ్జిట్ పోల్స్ స్పష్టం చేశాయి. మే 4వ తేదీన వెలువడే అధికారిక ఫలితాలతో ఈ అంచనాలు ఎంతవరకు నిజమవుతాయో తేలనున్నది.  

హార్ముజ్ దిగ్బంధంపై వెనక్కి తగ్గేది లేదు

• ఇరాన్ ప్రతిపాదనను తిరస్కరించిన ట్రంప్
• ‘అణు విముక్త ఒప్పందం’ జరిగే వరకు ఆంక్షలు తప్పవని హెచ్చరిక

వాషింగ్టన్: పశ్చిమ ఆసియాలో యుద్ధ మేఘాలు కమ్ముకున్న వేళ, ఇరాన్ పట్ల అమెరికా తన కఠిన వైఖరిని మరింత పెంచింది. హార్ముజ్ జలసంధి దిగ్బంధాన్ని ఎత్తివేయాలని, చర్చలకు సిద్ధమని ఇరాన్ చేసిన తాజా ప్రతిపాదనను అమెరికా అధ్యక్షుడు డొనాల్డ్ ట్రంప్ నిర్ద్వంద్వంగా తోసిపుచ్చారు. ఇరాన్ తన అణ్వాయుధ ఆకాంక్షలను పూర్తిగా విడనాడి, అమెరికా ఆందోళనలను పరిష్కరించే వరకు నౌకాదళ దిగ్బంధం కొనసాగుతుందని ఆయన స్పష్టం చేశారు. ఈ దిగ్బంధాన్ని ‘జీనియస్’ , ‘వంద శాతం ఫూల్‌ప్రూఫ్’ వ్యూహంగా అభివర్ణించిన ట్రంప్, ఇది ఇరాన్ పైన అత్యుత్తమ ఆర్థిక ఒత్తిడిని కలిగిస్తోందని వ్యాఖ్యానించారు. 

ఈ పరిణామాల నేపథ్యంలో అంతర్జాతీయంగా చమురు సంక్షోభం మరింత ముదిరింది. బ్రెంట్ క్రూడ్ ఆయిల్ ధర బ్యారెల్‌కు 120 డాలర్లు దాటి రికార్డుస్థాయికి చేరుకుంది. ఇరాన్ కరెన్సీ ‘రియాల్’ మునుపెన్నడూ లేని విధంగా కనిష్టస్థాయికి పడిపోయింది. ఇరాన్ పార్లమెంట్ స్పీకర్ ఈ దిగ్బంధాన్ని తమ దేశాన్ని లోపలి నుంచి బలహీనపరిచే ‘కొత్త కుట్ర’గా అభివర్ణించారు. ఇరాన్ తనను తాను ‘కుప్పకూలే స్థితి’లో ఉందని అంగీకరించిందని ట్రంప్ పేర్కొనగా, ఇరాన్ ఆ వ్యాఖ్యలను ‘ప్రచార ఆర్భాటం’గా కొట్టిపారేసింది.  

మరోవైపు, ఇజ్రాయెల్-లెబనాన్ సరిహద్దులో కాల్పుల విరమణ ఉన్నప్పటికీ ఉద్రిక్తతలు కొనసాగుతూనే ఉన్నాయి. దక్షిణ లెబనాన్‌లో ఇజ్రాయెల్ దాడుల వల్ల ప్రాణనష్టం సంభవిస్తోంది. రష్యా మధ్యవర్తిత్వం వహించేందుకు మొగ్గు చూపుతుండగా, ఇరాన్ విదేశాంగ మంత్రి అబ్బాస్ అరగ్చీ మాస్కోలో పర్యటించి మద్దతు కోరుతున్నారు. కాగా, యూఏఈ ‘ఒపెక్’ నుంచి వైదొలగడం ప్రపంచ చమురు మార్కెట్‌లో పెను మార్పులకు సంకేతంగా మారింది. అటు బ్రిటన్ రాజు కింగ్ చార్లెస్ సైతం ఇరాన్ అణ్వాయుధాలను కలిగి ఉండకూడదనే అమెరికా వైఖరితో ఏకీభవించినట్లు ట్రంప్ వెల్లడించారు. 

బెంగాల్‌ పీఠంపై తొలిసారి కమల వికాసం

• కేరళలో కాంగ్రెస్ కూటమి ఘనవిజయం
• తమిళనాట నటుడు విజయ్ ‘పవర్’ఫుల్ ఎంట్రీ!
• ఎగ్జిట్ పోల్స్ అంచనాలు

న్యూఢిల్లీ: దేశవ్యాప్తంగా ఐదు రాష్ట్రాల అసెంబ్లీ ఎన్నికల పోలింగ్ ముగియడంతో వెలువడిన ఎగ్జిట్ పోల్స్ అంచనాలు రాజకీయవర్గాల్లో పెను ప్రకంపనలు సృష్టిస్తున్నాయి. పశ్చిమ బెంగాల్‌లో దశాబ్దాల నిరీక్షణకు తెరదించుతూ భారతీయ జనతా పార్టీ (BJP) తొలిసారిగా అధికారాన్ని చేజిక్కించుకోబోతోందని మెజారిటీ సర్వేలు వెల్లడించాయి. అటు కేరళలో పదేళ్ల ఎడతెరిపి లేని వామపక్షాల పాలనకు ముగింపు పలుకుతూ కాంగ్రెస్ నేతృత్వంలోని యూడీఎఫ్ (UDF) ప్రభంజనం సృష్టించనుందని అంచనాలు చెబుతున్నాయి. ఇక తమిళనాడులో డీఎంకే కూటమి గెలుపు అవకాశాలు మెరుగ్గా ఉన్నప్పటికీ, రాజకీయాల్లోకి అరంగేట్రం చేసిన నటుడు విజయ్ తన ‘తమిళగ వెట్రి కళగం’ (TVK) పార్టీతో కనీవినీ ఎరుగని రీతిలో ఓట్ల సునామీ సృష్టించబోతున్నారని యాక్సిస్ మై ఇండియా సర్వే సంచలన అంచనాలను వెలువరించింది.

పశ్చిమ బెంగాల్‌లోని 294 స్థానాలకు గాను మెజారిటీకి 148 సీట్లు అవసరం కాగా, చాణక్య స్ట్రాటజీస్ బీజేపీకి 150-160 స్థానాలు, మ్యాట్రిజ్ 146-161 స్థానాలు వస్తాయని అంచనా వేశాయి. ముఖ్యమంత్రి మమతా బెనర్జీ నేతృత్వంలోని తృణమూల్ కాంగ్రెస్ గట్టి పోటీనిచ్చినప్పటికీ, బీజేపీ తన బలాన్ని గణనీయంగా పెంచుకుని ప్రభుత్వాన్ని ఏర్పాటు చేసే దిశగా సాగుతోందని ఈ సర్వేలు స్పష్టం చేస్తున్నాయి. అయితే, పీపుల్స్ పల్స్ వంటి కొన్ని సంస్థలు మాత్రం మమతా బెనర్జీకే తిరిగి పట్టం కట్టాయి. అటు అసోంలో హిమంత బిస్వా శర్మ నేతృత్వంలోని బీజేపీ కూటమి వరుసగా మూడోసారి అధికారాన్ని నిలబెట్టుకోనుందని దాదాపు అన్ని ఎగ్జిట్ పోల్స్ ఏకగ్రీవంగా ప్రకటించాయి.

తమిళనాడు రాజకీయాల్లో నటుడు విజయ్ అరంగేట్రం ఒక చారిత్రక మలుపుగా మారనుంది. యాక్సిస్ మై ఇండియా అంచనాల ప్రకారం, విజయ్ స్థాపించిన టీవీకే పార్టీ తొలి ప్రయత్నంలోనే 98 నుంచి 120 స్థానాలను గెలుచుకునే అవకాశం ఉంది. అంతేకాకుండా, ముఖ్యమంత్రిగా స్టాలిన్ కంటే విజయ్‌కే ఎక్కువ మంది ఓటర్లు (37 శాతం) మద్దతు తెలపడం విశేషం. కేరళలో 140 స్థానాలకు గాను యూడీఎఫ్ 78 నుంచి 90 స్థానాల్లో గెలిచి ఎర్రకోటను బద్దలు కొడుతుందని ఎగ్జిట్ పోల్స్ చెబుతున్నాయి. పుదుచ్చేరిలో ఎన్.రంగస్వామి నేతృత్వంలోని ఎన్డీయే కూటమి తిరిగి అధికారాన్ని చేజిక్కించుకోనుంది. మే 4వ తేదీన వెలువడే ఫలితాలతో ఈ రాష్ట్రాల భవిష్యత్తు మరియు ఎగ్జిట్ పోల్స్ విశ్వసనీయత తేలిపోనుంది.

బెంగాల్ చివరి దశ ఎన్నికల్లో హింసాకాండ

• ఈవీఎంల మొరాయింపు, దాడులతో దద్దరిల్లిన పోలింగ్
• కేంద్ర బలగాలపై మమతా బెనర్జీ 'ఉగ్రవాద' ముద్ర

కోల్‌కతా: పశ్చిమ బెంగాల్ అసెంబ్లీ ఎన్నికల రెండో , చివరి దశ పోలింగ్ బుధవారం తీవ్ర ఉద్రిక్తతల మధ్య సాగింది. చాప్రా, శాంతిపూర్, భంగర్ వంటి పలు ప్రాంతాల్లో హింసాత్మక ఘటనలు చోటుచేసుకున్నాయి. ఎంటల్లీ నియోజకవర్గ బీజేపీ అభ్యర్థి ప్రియాంక టిబ్రేవాల్ పోలింగ్ అధికారులతో వాగ్వాదానికి దిగగా, చాప్రాలో మోషారెఫ్ మీర్ అనే బీజేపీ ఏజెంట్‌పై తృణమూల్ కార్యకర్తలు ఇనుప రాడ్లతో దాడి చేసినట్లు ఆరోపణలు వచ్చాయి. తీవ్రంగా గాయపడిన మీర్‌ను స్థానిక ఆసుపత్రికి తరలించారు. మరోవైపు దక్షిణ 24 పరగణాల బీజేపీ అభ్యర్థి వికాస్ సర్దార్ కారును గుర్తుతెలియని వ్యక్తులు ధ్వంసం చేయడం గమనార్హం.

ఈవీఎంల మొరాయింపు అంశం కూడా ఈ ఎన్నికల్లో ప్రధాన చర్చనీయాంశమైంది. హౌరాలో పలుచోట్ల ఈవీఎంలు పనిచేయకపోగా, డైమండ్ హార్బర్‌లో బీజేపీ గుర్తు ఉన్న బటన్‌పై టీఎంసీ కార్యకర్తలు టేపులు వేశారని బీజేపీ నేత అమిత్ మాలవీయ సంచలన ఆరోపణ చేశారు. దీనినే ఆయన 'డైమండ్ హార్బర్ మోడల్' అని విమర్శిస్తూ, ప్రభావితమైన బూత్‌లలో తిరిగి పోలింగ్ నిర్వహించాలని డిమాండ్ చేశారు. భంగర్‌లో ఐఎస్ఎఫ్ (ISF) ఏజెంట్లను బూత్‌లోకి రానివ్వకుండా అడ్డుకున్నారని, శాంతిపూర్‌లో బీజేపీ శిబిరంలోని ఫర్నిచర్‌ను ధ్వంసం చేశారని ఫిర్యాదులు అందాయి.

ముఖ్యమంత్రి మమతా బెనర్జీ ఈ పరిణామాలపై తీవ్రస్థాయిలో విరుచుకుపడ్డారు. కేంద్ర భద్రతా దళాలు బీజేపీ కనుసన్నల్లో పనిచేస్తున్నాయని, వారు ఓటర్లను భయభ్రాంతులకు గురిచేస్తూ 'ఉగ్రవాదం' సృష్టిస్తున్నారని మండిపడ్డారు. బయటి నుంచి వచ్చిన అబ్జర్వర్లు పక్షపాతంతో వ్యవహరిస్తున్నారని ఆరోపించారు. అయితే, సుమారు 90 లక్షల మంది ఓటర్లను జాబితా నుంచి తొలగించారనే వివాదం మధ్య జరుగుతున్న ఈ ఎన్నికల్లో గెలుపు ఎవరిని వరిస్తుందో అన్నది మే 4న వెలువడే ఫలితాల్లో తేలనుంది. ముఖ్యమంత్రి మమతా బెనర్జీ , ఆమె మాజీ అనుచరుడు సువేందు అధికారి మధ్య భవానీపూర్‌లో జరుగుతున్న పోరు ఈ ఎన్నికల్లో ప్రధాన ఆకర్షణగా నిలిచింది.

డైమండ్ హార్బర్‌లో ఎన్నికల అక్రమాలు

• బీజేపీ బటన్‌కు టేప్ వేసి ఓటింగ్ నిలిపివేత
• తృణమూల్ కాంగ్రెస్‌పై బీజేపీ నిప్పులు
• ఆరోపణలను తీవ్రంగా ఖండించిన  తృణమూల్ కాంగ్రెస్ 

కోల్‌కతా: పశ్చిమ బెంగాల్ రెండో దశ అసెంబ్లీ ఎన్నికల పోలింగ్ వేళ రాజకీయ సెగలు రాజుకున్నాయి. ముఖ్యమంత్రి మమతా బెనర్జీ మేనల్లుడు, ఎంపీ అభిషేక్ బెనర్జీకి కంచుకోటగా ఉన్న డైమండ్ హార్బర్‌లోని ఫాల్టా నియోజకవర్గంలో భారీ ఎన్నికల అక్రమాలు జరిగాయని బీజేపీ ఆరోపించింది. పలు పోలింగ్ కేంద్రాల్లో ఈవీఎంలపై బీజేపీ గుర్తు ఉన్న బటన్‌కు టేపులు వేసి, ఓటర్లు తమ పార్టీకి ఓటు వేయకుండా అడ్డుకుంటున్నారని బీజేపీ మీడియా ఇన్‌ఛార్జ్ అమిత్ మాలవీయ ధ్వజమెత్తారు. దీనినే తృణమూల్ కాంగ్రెస్ గొప్పగా చెప్పుకునే "డైమండ్ హార్బర్ మోడల్" అని ఆయన ఎద్దేవా చేశారు. గత లోక్‌సభ ఎన్నికల్లోనూ ఇలాంటి అక్రమాలతోనే అభిషేక్ బెనర్జీ గెలిచారని ఆరోపిస్తూ, ఫాల్టాలోని బాధిత పోలింగ్ కేంద్రాలన్నింటిలో తిరిగి పోలింగ్ (Repolling) నిర్వహించాలని డిమాండ్ చేశారు.

ఈ ఆరోపణలను తృణమూల్ కాంగ్రెస్ తీవ్రంగా ఖండించింది. ఇదంతా ఎన్నికల కమిషన్ , పోలీసు అబ్జర్వర్ అజయ్ పాల్ శర్మ విఫలమవడానికి నిదర్శనమని టీఎంసీ ప్రతినిధి రిజు దత్తా ఎదురుదాడికి దిగారు. తమ అభ్యర్థిని బెదిరించడానికే పోలీసులు ప్రయత్నిస్తున్నారని, ఈవీఎంలలో లోపాలు ఉంటే దానికి ఈసీ బాధ్యత వహించాలని స్పష్టం చేశారు. బెంగాల్‌లో మమతా బెనర్జీని ఢీకొనలేక, ఓటమి భయంతోనే బీజేపీ నేతలు ఇలాంటి తప్పుడు ఆరోపణలు చేస్తున్నారని మండిపడ్డారు. కాగా, రాష్ట్ర ఎన్నికల ప్రధాన అధికారి మనోజ్ అగర్వాల్ స్పందిస్తూ.. ఎక్కడ ఫిర్యాదులు వచ్చినా వెంటనే స్పందించి తగిన చర్యలు తీసుకుంటున్నామని, ఎన్నికల ప్రక్రియ పారదర్శకంగా సాగేలా చూస్తున్నామని తెలిపారు.

ముంబైలో శ్రేయా ఘోషల్ అద్భుతమైన లగ్జరీ ఇల్లు

• 21 కోట్ల రూపాయలతో విలాసవంతమైన అపార్ట్‌మెంట్ కొనుగోలు
• సంగీత సామ్రాజ్ఞి కొత్త గృహం విశేషాలివే

ముంబై: భారతీయ సంగీత ప్రపంచంలో తన మధురమైన గొంతుతో కోట్లాదిమంది అభిమానులను సంపాదించుకున్న గాయని శ్రేయా ఘోషల్ వార్తల్లో నిలిచారు. తాజాగా ఆమె ముంబైలోని అత్యంత ఖరీదైన ప్రాంతంలో ఒక విలాసవంతమైన అపార్ట్‌మెంట్‌ను కొనుగోలు చేసినట్లు జాతీయ మీడియా నివేదికలు వెల్లడించాయి. సుమారు 21 కోట్ల రూపాయల భారీ వ్యయంతో ఆమె ఈ కొత్త ఇంటిని సొంతం చేసుకున్నట్లు తెలుస్తోంది. ముంబైలోని బాంద్రా లేదా అంధేరీ వంటి ప్రముఖులు నివసించే ప్రాంతంలో ఉన్న ఒక హై-రైజ్ బిల్డింగ్‌లో ఈ అపార్ట్‌మెంట్ ఉందని సమాచారం. ఆధునిక సౌకర్యాలతో పాటు నగర సుందర దృశ్యాలు కనిపించేలా ఈ ఇల్లు రూపొందించబడింది.

శ్రేయా ఘోషల్ కొనుగోలు చేసిన ఈ కొత్త అపార్ట్‌మెంట్ విస్తీర్ణం, దాని ఇంటీరియర్ డిజైన్ ఇప్పుడు సోషల్ మీడియాలో చర్చనీయాంశంగా మారింది. అత్యాధునిక జిమ్, స్విమ్మింగ్ పూల్, ప్రైవేట్ థియేటర్ వంటి సౌకర్యాలు ఈ నివాస సముదాయంలో ఉన్నాయని సమాచారం. బాలీవుడ్ నుంచి టాలీవుడ్ వరకు దాదాపు అన్ని భాషల్లో వేలాది పాటలు పాడిన శ్రేయా, తన కష్టార్జితంతో ఈ కలల సౌధాన్ని నిర్మించుకున్నారు. గతంలోనే ఆమె ముంబైలో ఒక అందమైన ఇల్లు కలిగి ఉన్నప్పటికీ, తన కుటుంబ అవసరాలకు అనుగుణంగా మరింత విశాలమైన , విలాసవంతమైన ఈ కొత్త గృహానికి మారాలని నిర్ణయించుకున్నట్లు తెలుస్తోంది.

ఈ వార్త సోషల్ మీడియాలో వైరల్ అవ్వడంతో అభిమానులు ఆమెకు పెద్ద ఎత్తున శుభాకాంక్షలు తెలుపుతున్నారు. "మీ శ్రమకు తగ్గ ప్రతిఫలం లభించింది" అంటూ నెటిజన్లు కామెంట్స్ చేస్తున్నారు. శ్రేయా ఘోషల్ తన వ్యక్తిగత విషయాలను చాలా గోప్యంగా ఉంచుతారు, అయితే ఈ భారీ రియల్ ఎస్టేట్ ఒప్పందం రిజిస్ట్రేషన్ పత్రాల ద్వారా వెలుగులోకి వచ్చింది. కేవలం గాయనిగానే కాకుండా రియాలిటీ షోలకు జడ్జిగా కూడా వ్యవహరిస్తూ ఆమె బిజీగా గడుపుతున్నారు. ఈ కొత్త ఇంటిలోకి ఆమె త్వరలోనే గృహప్రవేశం చేసే అవకాశం ఉందని సన్నిహిత వర్గాలు పేర్కొంటున్నాయి.

కళాకారులను విదూషకులుగా మార్చకండి

• ఈవెంట్‌లో పాట పాడటానికి నిరాకరించిన కైలాష్ ఖేర్
• నిర్వాహకుల తీరుపై ప్రముఖ గాయకుడి తీవ్ర ఆగ్రహం

ముంబై: ప్రముఖ భారతీయ జానపద, సూఫీ గాయకుడు కైలాష్ ఖేర్ ఇటీవల ఒక బహిరంగ వేదికపై తన అసహనాన్ని వ్యక్తం చేస్తూ చేసిన వ్యాఖ్యలు సంగీత ప్రపంచంలో చర్చనీయాంశంగా మారాయి. ఒక ప్రతిష్టాత్మక కార్యక్రమంలో ప్రదర్శన ఇస్తున్న సమయంలో, నిర్వాహకులు పదేపదే తమకు నచ్చిన పాటలు పాడాలని 'డిమాండ్' చేయడంతో ఆయన తీవ్రంగా స్పందించారు. "కళాకారులను విదూషకులుగా (Clowns) మార్చకండి" అంటూ వేదికపైనే నిక్కచ్చిగా మాట్లాడిన ఆయన, తనకు నచ్చిన రీతిలో ప్రదర్శన ఇవ్వనివ్వకపోతే పాడటం సాధ్యం కాదని తేల్చిచెప్పారు. ఈ సంఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.

సంగీతం అనేది ఒక ఆధ్యాత్మిక ప్రక్రియ అని, దానిని కేవలం ఆర్డర్ ఇస్తే చేసే పనిలా చూడకూడదని కైలాష్ ఖేర్ పేర్కొన్నారు. నిర్వాహకులు లేదా ప్రేక్షకులు ఒక కళాకారుడిని తమ అభీష్టానుసారం ఆడించాలని చూడటం వారి ప్రతిభను అవమానించడమేనని ఆయన అభిప్రాయపడ్డారు. "ప్రతి కళాకారుడికి ఒక శైలి, ఒక ఆత్మ ఉంటుంది. మీరు మమ్మల్ని పిలిచింది మా కళ కోసం అయితే, ఆ కళను గౌరవించండి. అప్పటికప్పుడు ఇది పాడు, అది పాడు అని ఆదేశించడం సరికాదు" అని ఆయన హితవు పలికారు. కళాకారుల పట్ల కనీస మర్యాద పాటించాలని, వారిని వినోదం పంచే యంత్రాలుగా పరిగణించవద్దని ఆయన గట్టిగా కోరారు.

కైలాష్ ఖేర్ చేసిన ఈ వ్యాఖ్యలకు పలువురు తోటి గాయకులు, సంగీత ప్రియుల నుండి మద్దతు లభిస్తోంది. ప్రత్యక్ష ప్రదర్శనల సమయంలో (Live Concerts) కళాకారులు తరచుగా ఇలాంటి ఇబ్బందులు ఎదుర్కొంటారని, వారి సృజనాత్మకతకు స్వేచ్ఛనివ్వడం అవసరమని నెటిజన్లు కామెంట్స్ చేస్తున్నారు. తన పాటలతో దేశవ్యాప్తంగా గుర్తింపు తెచ్చుకున్న కైలాష్, తన ఆత్మగౌరవం విషయంలో రాజీ పడబోనని ఈ ఘటన ద్వారా మరోసారి స్పష్టం చేశారు. ఈ వివాదం నేపథ్యంలో ఈవెంట్ మేనేజర్లు , కళాకారుల మధ్య ఉండాల్సిన వృత్తిపరమైన సంబంధాలపై మరోసారి చర్చ మొదలైంది.

జామ్ నగర్ 'జామ్ సాహెబ్' అజయ్ జడేజా రాజభవనం

• పురాతన కళాఖండాలు, పచ్చని ఉద్యానవనాలతో మెరిసిపోతున్న క్రికెట్ దిగ్గజం నివాసం

జామ్ నగర్: భారత మాజీ క్రికెటర్ అజయ్ జడేజా తన అద్భుతమైన జీవనశైలితో మరోసారి వార్తల్లో నిలిచారు. ఇటీవల జామ్ నగర్ (నవానగర్) రాజవంశ వారసుడిగా, 'జామ్ సాహెబ్'గా బాధ్యతలు చేపట్టిన ఆయన నివాసం ఇప్పుడు పర్యాటకులను, అభిమానులను అమితంగా ఆకర్షిస్తోంది. రాజసం ఉట్టిపడేలా ఉండే ఈ రాజభవనం కేవలం ఒక ఇల్లు మాత్రమే కాదు, జామ్ నగర్ చరిత్రకు , సంస్కృతికి నిలువుటద్దంలా నిలుస్తోంది. వింటేజ్ కళాఖండాలు, అద్భుతమైన వాస్తుశిల్పం , విశాలమైన పచ్చని ఉద్యానవనాలతో కూడిన ఈ భవనం లోపల ఉన్న విశేషాలు ఇప్పుడు నెట్టింట వైరల్ అవుతున్నాయి.

• రాజసం ఉట్టిపడే అంతర్గత అలంకరణ

జడేజా నివాసం లోపలికి అడుగుపెట్టగానే ఎత్తైన పైకప్పులు, పాలరాతి నేలలు, పురాతన శైలిలో చెక్కబడిన చెక్క ఫర్నిచర్ కనిపిస్తాయి. గోడలపై పూర్వపు రాజుల చిత్రపటాలు, వింటేజ్ అలంకరణ వస్తువులు ఈ భవనానికి చారిత్రక శోభను తెచ్చిపెట్టాయి. ప్రతి గదిలోనూ రాజకుటుంబీకుల అభిరుచికి తగ్గట్లుగా సూక్ష్మమైన డిజైన్లతో కూడిన కిటికీలు, తలుపులు , ఖరీదైన షాన్డిలియర్లు (Chandeliers) అమర్చారు. ఆధునిక సౌకర్యాలు ఉన్నప్పటికీ, భవనం, మూల రూపం మాత్రం పాతకాలపు వైభవాన్ని కోల్పోకుండా జాగ్రత్తపడటం విశేషం.

https://www.instagram.com/p/DQBGOEoEqjM/?utm_source=ig_embed&ig_rid=1743ff1c-d88b-4d14-8d1a-b39ff8da9b8d

 

• విశాలమైన గార్డెన్ , ప్రకృతి ఒడిలో

భవనం వెలుపల ఉన్న విశాలమైన ఉద్యానవనం ప్రకృతి ప్రేమికులకు కనువిందు చేస్తుంది. పచ్చని చెట్లు, రంగురంగుల పూలమొక్కలు , ప్రశాంతమైన వాతావరణం ఈ రాజభవనం  అందాన్ని రెట్టింపు చేశాయి. జడేజా తన కుటుంబంతో కలిసి సమయాన్ని గడపడానికి, వ్యాయామం చేయడానికి ఈ ఉద్యానవనాన్ని ఎక్కువగా ఉపయోగిస్తుంటారు. మార్కెట్ ధరతో సంబంధం లేకుండా, ఈ వారసత్వ ఆస్తికి ఉన్న చారిత్రక విలువ వెలకట్టలేనిదని స్థానిక రియల్ ఎస్టేట్ నిపుణులు చెబుతున్నారు. క్రికెట్ రంగంలో తనదైన ముద్ర వేసిన జడేజా, ఇప్పుడు రాజరిక వారసత్వాన్ని కూడా అంతే హుందాగా కొనసాగిస్తున్నారు.

తమిళనాడులో రికార్డు స్థాయిలో 85.15 శాతం ఓటింగ్

• పశ్చిమ జిల్లాల ప్రభంజనం.. వెనుకబడిన దక్షిణాది
• భారీగా పెరిగిన చెన్నై ఓటింగ్ శాతంపై సర్వత్రా ఆసక్తి

చెన్నై: తమిళనాడు అసెంబ్లీ ఎన్నికల్లో ఓటర్లు మునుపెన్నడూ లేని విధంగా చారిత్రాత్మక తీర్పును ఇచ్చారు. రాష్ట్రవ్యాప్తంగా ఏకంగా 85.15 శాతం ఓటింగ్ నమోదైంది. ఇది 2021 ఎన్నికల కంటే 11.4 శాతం ఎక్కువ కావడం గమనార్హం. ఓటర్ల జాబితాలో జరిగిన భారీ మార్పులు, దాదాపు 70 లక్షల పేర్ల తొలగింపు, 30 లక్షల కొత్త ఓటర్ల చేరిక ఈ ఓటింగ్ శాతం పెరగడానికి ప్రధాన కారణమని విశ్లేషకులు భావిస్తున్నారు. ముఖ్యంగా పశ్చిమ తమిళనాడులో ఓటర్లు పోటెత్తారు. కరూర్ (92.63%), సేలం (90.76%), నామక్కల్ (90.21%) జిల్లాలు అగ్రస్థానంలో నిలవగా, కరూర్ , వీరపాండి నియోజకవర్గాల్లో ఏకంగా 93.4 శాతం ఓటింగ్ నమోదై ఎన్నికల రికార్డులను తిరగరాశాయి.

ఒకప్పుడు ఓటింగ్‌లో వెనుకబడి ఉండే రాజధాని చెన్నై ఈసారి విస్మయపరిచే ఫలితాన్ని ఇచ్చింది. గతంలో 59.7 శాతంగా ఉన్న చెన్నై ఓటింగ్, ఈసారి 83.74 శాతానికి పెరగడం రాజకీయ వర్గాల్లో పెద్ద చర్చకు దారితీసింది. అయితే, దక్షిణ జిల్లాలైన కన్యాకుమారి (75.61%), శివగంగ (76.66%) ,రామనాథపురం (77%) రాష్ట్ర సగటు కంటే తక్కువ ఓటింగ్‌ను నమోదు చేశాయి. పళయంకోట్టై నియోజకవర్గంలో అత్యల్పంగా 68.97 శాతం ఓటింగ్ నమోదైంది. ఈ భారీ ఓటింగ్ శాతంపై రాష్ట్రంలోని ప్రధాన రాజకీయపార్టీలు తమకు అనుకూలమైన విశ్లేషణలు చేసుకుంటున్నాయి.

అధికార డీఎంకే ఈ రికార్డు ఓటింగ్‌ను ప్రభుత్వ పథకాలకు లభించిన మద్దతుగా అభివర్ణిస్తుండగా, ప్రతిపక్ష ఏఐఏడీఎంకే దీనిని ప్రభుత్వ వ్యతిరేకతకు నిదర్శనమని పేర్కొంటోంది. ఇక నటుడు విజయ్ నేతృత్వంలోని టీవీకే (TVK) పార్టీ, యువత , పట్టణ ఓటర్ల మార్పు కోసమే ఈ స్థాయిలో ఓటు వేశారని, విజయ్ ముఖ్యమంత్రి కావడం ఖాయమని ధీమా వ్యక్తం చేస్తోంది. డెల్టా , పశ్చిమ ప్రాంతాల్లో తాము బలమైన పట్టు సాధించామని డీఎంకే భావిస్తుండగా, ఉత్తర , దక్షిణ జిల్లాల్లో తాము పుంజుకున్నామని ఏఐఏడీఎంకే ధీమాగా ఉంది. మే 4న వెలువడనున్న ఫలితాలు ఈ చరిత్రాత్మక ఓటింగ్ ఎవరిని గెలిపిస్తుందో తేల్చనున్నాయి.

బెంగాల్ ఎన్నికల విశ్లేషణలో 'మౌనం' వెనుక గూడుకట్టుకున్న భయం

• ఎగ్జిట్ పోల్స్ నిర్వహించడం అక్కడ కత్తిమీద సామే
• ఓటర్ల మనోగతం తెలుసుకోవడం అసాధ్యమంటున్న యాక్సిస్ మై ఇండియా అధినేత

కోల్‌కతా: పశ్చిమ బెంగాల్ అసెంబ్లీ ఎన్నికల ఫలితాలను అంచనా వేయడం దేశంలోని ఏ ఇతర రాష్ట్రం కంటే కూడా అత్యంత కష్టతరమని ప్రముఖ ఎన్నికల విశ్లేషకుడు, యాక్సిస్ మై ఇండియా మేనేజింగ్ డైరెక్టర్ ప్రదీప్ గుప్తా స్పష్టం చేశారు. బెంగాల్ ఓటర్ల మనస్తత్వం, అక్కడ నెలకొన్న రాజకీయ వాతావరణంపై ఆయన సంచలన వ్యాఖ్యలు చేశారు. దేశవ్యాప్తంగా సాధారణంగా 10 శాతం మంది ఓటర్లు తాము ఎవరికి ఓటు వేశామో చెప్పడానికి ఇష్టపడరని, కానీ బెంగాల్‌లో ఆ సంఖ్య ఏకంగా 60 శాతానికి పైగా ఉందని ఆయన వెల్లడించారు. అంటే మెజారిటీ ఓటర్లు తమ మనసులో ఏముందో వెల్లడించకుండా మౌనంగా ఉంటున్నారని, ఇది ఏ సర్వే సంస్థకైనా సవాలుతో కూడుకున్న విషయమని ఆయన అభిప్రాయపడ్డారు.

బెంగాల్‌లో ఓటర్ల ఈ అసాధారణ మౌనం వెనుక లోతైన భయం దాగి ఉందని ప్రదీప్ గుప్తా విశ్లేషించారు. దశాబ్దాలుగా కొనసాగుతున్న రాజకీయ హింసకు తోడు, ఈసారి 'స్పెషల్ ఇంటెన్సివ్ రివిజన్' (SIR) ప్రక్రియ ఓటర్లను మరింత ఆందోళనకు గురిచేసిందని ఆయన పేర్కొన్నారు. ఓటర్ల జాబితా నుండి పెద్ద ఎత్తున పేర్లు తొలగించబడటంతో, తమ రాజకీయ ఇష్టాఇష్టాలను బయటపెడితే తమ పేరు కూడా ఓటరు జాబితా నుండి మాయమవుతుందేమోనన్న భయం ప్రజల్లో నెలకొందని ఆయన వివరించారు. ఈ భయం ఎంత తీవ్రంగా ఉందంటే, సర్వే నిర్వహించడానికి వెళ్ళిన తమ బృందంలోని ఆరుగురు సభ్యులు 24 రోజుల పాటు జైలు శిక్షను కూడా అనుభవించాల్సి వచ్చిందని ఆయన ఆవేదన వ్యక్తం చేశారు.

తొలి దశలో నమోదైన 93 శాతం భారీ ఓటింగ్ వెనుక ఉన్న అసలు కారణాన్ని కూడా గుప్తా విశ్లేషించారు. ఓటర్ల జాబితాలో సుమారు 10 నుండి 11 శాతం పేర్లు తొలగించబడటం వల్ల ఓటర్ల సంఖ్య తగ్గిందని, అందుకే గతంలో ఓటు వేసిన వారే మళ్ళీ ఓటు వేసినా శాతం పరంగా అది చాలా ఎక్కువగా కనిపిస్తోందని ఆయన వివరించారు. 2016లో 20 నుంచి 30 శాతం మంది మాత్రమే సమాధానం చెప్పడానికి నిరాకరించగా, ఇప్పుడు ఆ సంఖ్య రెట్టింపు అవ్వడం బెంగాల్ రాజకీయాల్లో నెలకొన్న అభద్రతా భావానికి నిదర్శనమని ఆయన పేర్కొన్నారు. ఈ నిశ్శబ్ద పోరాటంలో ఓటరు ఎటువైపు మొగ్గు చూపాడనేది మే 4న వెలువడే ఫలితాల వరకూ ఒక మిస్టరీగానే మిగిలిపోనుంది.

సత్యజిత్ రే నడయాడిన నేలపై 'మహా' సంగ్రామం

• భవానీపూర్ కోటలో మమతా బెనర్జీ వర్సెస్ సువేందు అధికారి
•  బెంగాల్ అస్తిత్వానికి పరీక్షగా నిలిచిన ప్రతిష్టాత్మక పోరు

కోల్‌కతా: పశ్చిమ బెంగాల్ రాజకీయ యవనికపై అత్యంత ఉత్కంఠ రేపుతున్న 'క్లాష్ ఆఫ్ ది టైటాన్స్'కు భవానీపూర్ వేదిక కానుంది. ఏప్రిల్ 29న జరగనున్న రెండో దశ ఎన్నికల్లో ముఖ్యమంత్రి మమతా బెనర్జీ, తన మాజీ శిష్యుడు, ప్రస్తుత బీజేపీ నేత సువేందు అధికారితో ముఖాముఖి తలపడనున్నారు. నేతాజీ సుభాష్ చంద్రబోస్, దేశబంధు చిత్తరంజన్ దాస్, శ్యామా ప్రసాద్ ముఖర్జీ వంటి మహనీయుల వారసత్వానికి, సత్యజిత్ రే, మృణాల్ సేన్ వంటి దిగ్గజాల కళా హృదయానికి నిలయమైన ఈ నియోజకవర్గం, ఇప్పుడు బెంగాల్ రాజకీయ భవిష్యత్తును నిర్ణయించే కీలక మలుపులో ఉంది. 2011 నుంచి తన కంచుకోటగా ఉన్న ఈ స్థానాన్ని నిలబెట్టుకోవడానికి మమత 'స్థానిక' సెంటిమెంట్‌ను నమ్ముకోగా, ఆమెను ఓడించి రాష్ట్రంలో తిరుగులేని నాయకుడిగా ఎదగాలని సువేందు పట్టుదలతో ఉన్నారు.

భవానీపూర్ నియోజకవర్గం కేవలం ఒక రాజకీయ స్థానం మాత్రమే కాదు, అది బెంగాలీ సంస్కృతికి ఒక ప్రతిరూపం. కాళీఘాట్ ఆలయం, చారిత్రక గురుద్వారాలు, పురాతన చర్చిలు, మసీదులతో విభిన్న సంస్కృతుల కలయికగా ఉన్న ఈ ప్రాంతంలో.. మమతా బెనర్జీ ప్రతి గల్లీలో తిరుగుతూ తన పాత పరిచయాలను గుర్తు చేసుకుంటున్నారు. "ఆమె ముఖ్యమంత్రి కావచ్చు, కానీ మాకు మాత్రం మా ఇంటి ఆడబిడ్డ" అని స్థానికులు చెబుతుండటం ఆమెకు సానుకూల అంశం. అయితే, నందిగ్రామ్ నుండి వచ్చిన సువేందు అధికారిపై 'బయటి వ్యక్తి' అనే ముద్ర ఉన్నప్పటికీ, ఆయన నిర్వహిస్తున్న భారీ ర్యాలీలు, కాషాయ జెండాల సందడి బిజెపి శ్రేణుల్లో కొత్త ఉత్సాహాన్ని నింపుతున్నాయి. 2021లో నందిగ్రామ్‌లో మమతను ఓడించిన అనుభవం సువేందుకు కొండంత ధైర్యాన్ని ఇస్తోంది.

ఈసారి భవానీపూర్‌లో వాతావరణం గతంలో కంటే భిన్నంగా కనిపిస్తోంది. ఒకప్పుడు ఏకపక్షంగా సాగిన ఇక్కడి తీర్పులో ఇప్పుడు స్పష్టమైన చీలిక కనిపిస్తోంది. బెంగాలీ , బెంగాలీయేతర ఓటర్ల మధ్య అభిప్రాయభేదాలు చర్చనీయాంశంగా మారాయి. చొరబాటుదారులు, ఆర్జీ కర్ ఆసుపత్రి ఘటన , రాష్ట్ర ఆర్థిక మందగమనం వంటి అంశాలను ప్రస్తావిస్తూ కొందరు మార్పు కోరుకుంటుండగా.. మహిళల భద్రత , మైనారిటీల సంక్షేమం విషయంలో మమత వైపే మొగ్గు చూపుతున్న వారు కూడా ఉన్నారు. భవానీపూర్ ప్రజలకు ఇది కేవలం ఓటు మాత్రమే కాదు, ఒక ప్రతిష్టాత్మకమైన అంశం. మే 4న వెలువడే ఫలితాల్లో ఈ చారిత్రక నేల ఎవరికి పట్టం కడుతుందనేది ఇప్పుడు యావత్ దేశం ఆసక్తిగా గమనిస్తోంది.

బెంగాల్ ఎన్నికల్లో ఆర్థికవృద్ధికి, గెలుపోటములకు సంబంధం లేదు

•  ప్రముఖ ఆర్థికవేత్త రుచిర్ శర్మ విశ్లేషణ
• అభివృద్ధి కంటే నగదు బదిలీలే ఓటర్లను ప్రభావితం చేస్తున్నాయని వెల్లడి

కోల్‌కతా: పశ్చిమ బెంగాల్ అసెంబ్లీ ఎన్నికల నేపథ్యంలో ప్రముఖ ఇన్వెస్టర్, రచయిత రుచిర్ శర్మ ఆసక్తికరమైన విశ్లేషణ చేశారు. భారత ఎన్నికల చరిత్రలో రాష్ట్రాల ఆర్థికవృద్ధి రేటుకు, ముఖ్యమంత్రుల పునరాగమనానికి మధ్య ఎటువంటి సంబంధం లేదని ఆయన స్పష్టం చేశారు. సాధారణంగా ఏ దేశంలోనైనా ఆర్థికాభివృద్ధి సాధించిన ప్రభుత్వాలకు ఓటర్లు పట్టం గడతారని, కానీ భారతదేశంలో మాత్రం అది కేవలం 50-50 శాతంగానే ఉందని ఆయన పేర్కొన్నారు. తలసరి ఆదాయంలో 8 శాతం అంతకంటే ఎక్కువ వృద్ధిని నమోదు చేసిన ముఖ్యమంత్రులు కూడా ఎన్నికల్లో ఓడిపోయిన సందర్భాలు చాలానే ఉన్నాయని, ఇది భారత రాజకీయాల్లోని ఒక విచిత్రమైన పరిస్థితి అని ఆయన అభిప్రాయపడ్డారు.

బెంగాల్ ఎన్నికల్లో అభివృద్ధి అనేది ప్రధాన అజెండా కాదని, ఇక్కడ కేవలం మతం, గుర్తింపు, చొరబాట్లు, బుజ్జగింపు రాజకీయాలే కీలకపాత్ర పోషిస్తున్నాయని రుచిర్ శర్మ విశ్లేషించారు. రాష్ట్ర అభివృద్ధి కోసం ఏ పార్టీ దగ్గర కూడా నిర్దిష్టమైన ప్రణాళిక ఉన్నట్లు కనిపించడం లేదని ఆయన అసహనం వ్యక్తం చేశారు. దశాబ్దాలుగా బెంగాల్ తలసరి ఆదాయం పడిపోతూనే ఉందని, ముర్షిదాబాద్ వంటి జిల్లాల్లో వెనుకబాటుతనం కళ్లకు కట్టినట్లు కనిపిస్తోందని పేర్కొన్నారు. అభివృద్ధి స్థానాన్ని ఇప్పుడు నేరుగా ఓటర్ల ఖాతాల్లోకి నగదు బదిలీ చేసే పథకాలు ఆక్రమించాయని, డిజిటలైజేషన్ వల్ల ఈ ప్రయోజనాలు నేరుగా ప్రజలకు అందుతుండటంతో ప్రతి రాష్ట్ర ప్రభుత్వం దీనినే నమ్ముకుంటోందని ఆయన వివరించారు.

ఈసారి బెంగాల్‌లో నమోదవుతున్న చారిత్రాత్మక ఓటింగ్ శాతం (93 శాతం వరకు) వెనుక ఓటర్ల జాబితాల సవరణ (SIR) ప్రభావం ఉండవచ్చని రుచిర్ శర్మ అభిప్రాయపడ్డారు. సాధారణంగా ఓటింగ్ శాతం ఎక్కువగా ఉంటే బలమైన క్యాడర్ లేని పార్టీలకు ప్రయోజనం చేకూరుతుందని, తక్కువ ఓటింగ్ నమోదైతే క్యాడర్ బలం ఉన్న పార్టీలు పైచేయి సాధిస్తాయని నిపుణుల అంచనా అని ఆయన గుర్తు చేశారు. గత ఎన్నికల్లో టీఎంసీ , బీజేపీ మధ్య ఉన్న 10 శాతం ఓట్ల వ్యత్యాసాన్ని ఒక్క ఎన్నికల చక్రంలోనే అధిగమించడం కష్టమైనా, భారత రాజకీయాల్లో అసాధ్యం మాత్రం కాదని ఆయన వ్యాఖ్యానించారు. తమిళనాడులో గతంలో జయలలిత ఇటువంటి భారీ వ్యత్యాసాన్ని అధిగమించి మళ్ళీ అధికారంలోకి వచ్చిన ఉదాహరణను ఆయన ఈ సందర్భంగా ప్రస్తావించారు.

కేజ్రీవాల్‌ను కలిసిన తర్వాతే బీజేపీలోకి వెళ్లానన్న విక్రమ్‌జీత్ సాహ్నీ

• ఆప్ ఎంపీల తిరుగుబాటు వెనుక అసలు కారణాలు ఇవే!

న్యూఢిల్లీ: ఆమ్ ఆద్మీ పార్టీ (AAP) ఎంపీల సామూహిక నిష్క్రమణ దేశవ్యాప్తంగా పెను సంచలనం సృష్టిస్తోంది. ఈ తిరుగుబాటులో పాల్గొన్న ఏడుగురు ఎంపీలలో ఒకరైన విక్రమ్‌జీత్ సింగ్ సాహ్నీ తాజాగా ఒక ఆసక్తికరమైన విషయాన్ని వెల్లడించారు. తాను బుధవారమే అరవింద్ కేజ్రీవాల్‌ను కలిసి, తమ నిర్ణయాన్ని ముందుగానే తెలియజేశానని ఆయన పేర్కొన్నారు. కేవలం ఒకటి లేదా ఇద్దరు ఎంపీలు రాజీనామా చేస్తే అనర్హత వేటు పడే అవకాశం ఉంటుందని, అందుకే తామంతా కలిసి వెళ్తున్నామని కేజ్రీవాల్‌కు వివరించినట్లు సాహ్నీ తెలిపారు. అయితే, అప్పటివరకు సందీప్ పాఠక్ వంటి సన్నిహితులు కూడా పార్టీని వీడుతారని కేజ్రీవాల్ నమ్మలేకపోయారని ఆయన వివరించారు.

 

• సంవత్సరకాలంగా రాజుకుంటున్న అసంతృప్తి

ఈ తిరుగుబాటు ఆకస్మికంగా జరిగింది కాదని, గత ఏడాది కాలంగా పార్టీలో అసంతృప్తి గూడుకట్టుకుని ఉందని సాహ్నీ వెల్లడించారు. పంజాబ్‌లో ఆప్ విజయానికి కీలక సూత్రధారిగా నిలిచిన సందీప్ పాఠక్‌ను, ఢిల్లీ అసెంబ్లీ ఎన్నికల ఓటమి తర్వాత పార్టీ నాయకత్వం పూర్తిగా పక్కన పెట్టేసిందని ఆయన ఆరోపించారు. తనకు ఎటువంటి పనీ ఇవ్వడం లేదని, ప్రాధాన్యం తగ్గించారని పాఠక్ తనతో పలుమార్లు ఆవేదన వ్యక్తం చేశారని సాహ్నీ తెలిపారు. అటు రాఘవ్ చద్దా విషయంలో కూడా ఇదే విధమైన వివక్ష కొనసాగిందని, రాజ్యసభలో ఆయన పదవిని తొలగించడమే ఈ తిరుగుబాటుకు తక్షణ కారణమని ఆయన వివరించారు.

• పంజాబ్ ప్రయోజనాల కోసమే ఈ నిర్ణయం

తమను 'ద్రోహులు' అని పిలుస్తున్న ఆప్ నేతలకు సాహ్నీ గట్టి కౌంటర్ ఇచ్చారు. తాము పంజాబ్‌కు ద్రోహం చేయలేదని, కేంద్ర ప్రభుత్వ మద్దతు లేకుండా రాష్ట్రం అభివృద్ధి చెందడం సాధ్యం కాదనే తాము బీజేపీలో చేరాలని నిర్ణయించుకున్నామని చెప్పారు. ఇటీవలే తాము అమిత్ షాను కలిసి పంజాబ్ సమస్యలపై చర్చించామని, కేంద్ర-రాష్ట్ర ప్రభుత్వాల మధ్య నిరంతరం గొడవలు ఉండటం వల్ల రాష్ట్రానికే నష్టమని ఆయన అభిప్రాయపడ్డారు. రాఘవ్ చద్దా, సందీప్ పాఠక్ వంటి పార్టీ మూలస్తంభాలే తమను రాజ్యసభకు తీసుకువచ్చారని, అటువంటి వారినే పార్టీ 'జీరో'గా మార్చేయాలని చూడటం భరించలేకపోయాయని ఆయన పేర్కొన్నారు.

మరోవైపు, అరవింద్ కేజ్రీవాల్ ఈ పరిణామాలపై స్పందిస్తూ.. బీజేపీ పంజాబ్ ప్రజలకు ద్రోహం చేస్తోందని మండిపడ్డారు. తిరుగుబాటు ఎంపీలను బుజ్జగించేందుకు ఆయన శుక్రవారం రాత్రి తన నివాసానికి పిలిచినప్పటికీ, ఆ భేటీ కంటే ముందే ఎంపీలు తమ నిర్ణయాన్ని బహిరంగపరచడం గమనార్హం. పదేళ్ల పార్టీ చరిత్రలో ఎన్నడూ లేని విధంగా రాజ్యసభ బలం 10 నుంచి 3కి పడిపోవడం ఆమ్ ఆద్మీ పార్టీకి కోలుకోలేని దెబ్బగా మారింది.

ఆప్ సరైన మార్గంలో ఉండి ఉంటే వారు వెళ్లేవారు కాదు

 

•  రాఘవ్ చద్దా బృందం నిష్క్రమణపై అన్నా హజారే సంచలన వ్యాఖ్యలు
• కేజ్రీవాల్ నాయకత్వానిదే తప్పన్న సామాజిక కార్యకర్త

అహిల్యానగర్ (మహారాష్ట్ర): ఆమ్ ఆద్మీ పార్టీ (AAP) రాజ్యసభ ఎంపీలు రాఘవ్ చడ్డాతో సహా ఏడుగురు ఒకేసారి పార్టీని వీడి బీజేపీలో చేరడంపై ప్రముఖ సామాజిక కార్యకర్త అన్నా హజారే ఘాటుగా స్పందించారు. ప్రజాస్వామ్యంలో ఎవరికైనా తమ రాజకీయ భవిష్యత్తుపై నిర్ణయం తీసుకునే హక్కు ఉంటుందని, అయితే ఇంత మంది కీలక నేతలు పార్టీని వీడుతున్నారంటే అది కచ్చితంగా పార్టీ నాయకత్వ లోపమేనని ఆయన అభిప్రాయపడ్డారు. మహారాష్ట్రలోని అహిల్యానగర్ (గతంలో అహ్మద్‌నగర్) జిల్లాలో శుక్రవారం విలేకరులతో మాట్లాడిన హజారే, కేజ్రీవాల్ నాయకత్వంలోని ఆప్ ప్రభుత్వం సరైన దిశలో పయనించి ఉంటే ఇలాంటి తిరుగుబాటు వచ్చేది కాదని కుండబద్దలు కొట్టారు. ఏదైనా సమస్య లేదా ఇబ్బంది ఎదురైనప్పుడే ఎవరైనా ఉన్నచోటును వదిలి వెళ్తారని, ఈ విషయంలో ఆప్ నాయకత్వం ఆత్మపరిశీలన చేసుకోవాలని సూచించారు.

2011లో అవినీతి వ్యతిరేక ఉద్యమం సమయంలో అరవింద్ కేజ్రీవాల్‌తో కలిసి పనిచేసిన అన్నా హజారే, తాజా పరిణామాలపై స్పందిస్తూ.. పార్టీ తన పంథాను మార్చుకోవడం వల్లే ఈ విచ్ఛిన్నం జరిగిందని విశ్లేషించారు. ఒకవేళ పార్టీ నిజాయితీతో కూడిన రాజకీయాలను కొనసాగించి ఉంటే, ఎంపీలు తమంతట తాముగా బయటకు వెళ్లేవారు కాదని ఆయన పేర్కొన్నారు. కేవలం అధికార దాహం లేదా ఇతర ప్రయోజనాలే కాకుండా, పార్టీ అంతర్గత వ్యవహారాల్లో ఏదో పెద్ద పొరపాటు జరిగి ఉంటుందని ఆయన అనుమానం వ్యక్తం చేశారు. ప్రజాస్వామ్య దేశంలో ఎక్కడ ఉండాలి, ఎక్కడి నుండి వెళ్ళాలి అనేది వ్యక్తుల అభీష్టమని, కానీ ఒకేసారి రాజ్యసభ బలం రెండు వంతులు చీలిపోవడం అనేది పార్టీ నైతికతపై ప్రశ్నలు లేవనెత్తుతుందని ఆయన వ్యాఖ్యానించారు.

మరోవైపు, పార్టీని వీడిన రాఘవ్ చద్దా తన నిష్క్రమణకు ప్రధాన కారణం ఆప్‌లో పెరిగిపోయిన అవినీతేనని ఆరోపించారు. తాను 15 ఏళ్లుగా రక్తం, చెమట ధారపోసిన పార్టీ ఇప్పుడు పాత సిద్ధాంతాలను వదిలేసిందని, అవినీతితో రాజీ పడిందని ఆయన మండిపడ్డారు. తాను తప్పుడు పార్టీలో ఉన్న సరైన వ్యక్తినని ఇప్పుడు అర్థమైందని, అందుకే ప్రజలకు దగ్గరగా ఉండేందుకు బీజేపీలో చేరుతున్నానని చద్దా స్పష్టం చేశారు. అయితే దీనిని పంజాబ్ ప్రజలకు చేసిన ద్రోహంగా ఆప్ నాయకత్వం అభివర్ణించింది. మొత్తానికి తన పాత సహచరుడు కేజ్రీవాల్‌కు వ్యతిరేకంగా అన్నా హజారే చేసిన వ్యాఖ్యలు రాజకీయ వర్గాల్లో పెద్ద చర్చకు దారితీశాయి.

పాకిస్థాన్ ఆశలపై ఇరాన్ నీళ్లు

•  చర్చలు జరపకుండానే ఇస్లామాబాద్‌ నుంచి నిష్క్రమణ
• దౌత్యవేత్తగా ఎదగాలనుకున్న పాక్ ప్రయత్నం విఫలం

ఇస్లామాబాద్: అమెరికా, ఇరాన్ మధ్య రెండో విడత శాంతి చర్చలకు ఆతిథ్యమిచ్చి, అంతర్జాతీయస్థాయిలో దౌత్యపరమైన గుర్తింపు పొందాలనుకున్న పాకిస్థాన్ ఆశలు అడియాసలయ్యాయి. ఇరాన్ విదేశాంగ మంత్రి అబ్బాస్ అరాగ్చీ నేతృత్వంలోని ఉన్నతస్థాయి ప్రతినిధి బృందం శనివారం సాయంత్రం పాకిస్థాన్ రాజధాని నుంచి అనూహ్యంగా నిష్క్రమించింది. అమెరికా ప్రతినిధులతో నేరుగా చర్చలు జరిపేందుకు ఇరాన్ నిరాకరించడమే కాకుండా, కేవలం తమ డిమాండ్ల జాబితాను పాక్ పాలకులకు అందజేసి పర్యటనను ముగించడం గమనార్హం. ఈ పరిణామంతో పాకిస్థాన్ చేసిన మధ్యవర్తిత్వ ప్రయత్నాలన్నీ ఒక్కసారిగా నీరుగారిపోయాయి.

ఈ కీలక పర్యటన కోసం పాక్ ప్రభుత్వం నగరాన్ని భారీ భద్రతా వలయంలో ఉంచి, రెడ్ జోన్‌ను పూర్తిగా మూసివేసింది. ప్రధాని షెహబాజ్ షరీఫ్, ఆర్మీ చీఫ్ జనరల్ అసిమ్ మునీర్ సహా అగ్రశ్రేణి నాయకత్వమంతా ఇరాన్ ప్రతినిధులతో సుమారు రెండు గంటల పాటు భేటీ అయ్యారు. అయితే, ఇరాన్ మాత్రం చర్చల కంటే షరతులకే ప్రాధాన్యం ఇచ్చింది. ముఖ్యంగా హార్ముజ్ జలసంధిలో అమెరికా విధిస్తున్న నౌకాదళ దిగ్బంధనాన్ని ఎత్తివేస్తేనే తాము చర్చల మేజా వద్దకు వస్తామని ఇరాన్ తెగేసి చెప్పింది. అమెరికా పంపిన ప్రతినిధులు స్టీవ్ విట్కాఫ్, జారెడ్ కుష్నర్‌లను కలిసేందుకు కూడా ఇరాన్ సుముఖత చూపకపోవడంతో పాక్ దౌత్యపరమైన వైఫల్యం స్పష్టమైంది.

అమెరికా ప్రతినిధులతో నేరుగా మాట్లాడకుండానే అబ్బాస్ అరాగ్చీ తదుపరి పర్యటనల కోసం ఒమన్, రష్యాకు బయలుదేరి వెళ్లారు. దీనిని బట్టి ప్రాంతీయ శాంతి విషయంలో ఇరాన్.. పాకిస్థాన్ కంటే ఒమన్ , రష్యాలనే నమ్మకమైన భాగస్వాములుగా భావిస్తున్నట్లు స్పష్టమవుతోంది. గతంలో జరిగిన 21 గంటల సుదీర్ఘ చర్చలు కూడా ఎటువంటి ఫలితాన్ని ఇవ్వలేదు. ఇప్పుడు రెండో విడత చర్చలు కూడా జరగకుండానే ముగియడం పాకిస్థాన్ వ్యూహాత్మక వైఫల్యానికి నిదర్శనమని విశ్లేషకులు అభిప్రాయపడుతున్నారు. అగ్రరాజ్యం అమెరికా, ఇరాన్ మధ్య వారధిగా నిలవాలనుకున్న పాకిస్థాన్ చివరకు ఒక మూగ ప్రేక్షకునిగా మిగిలిపోయింది.

నేను నరేంద్ర మోడీకి భయపడను

• 24 గంటలూ నన్నే టార్గెట్ చేస్తున్నారు
• రాహుల్ గాంధీ ఘాటు వ్యాఖ్యలు
• బెంగాల్ ఎన్నికల ప్రచారంలో బీజేపీ, టీఎంసీలపై నిప్పులు

దక్షిణ 24 పరగణాలు (పశ్చిమ బెంగాల్): లోక్‌సభ ప్రతిపక్ష నేత రాహుల్ గాంధీ శనివారం కేంద్ర ప్రభుత్వంపై, ప్రధాని నరేంద్ర మోడీపై తీవ్రస్థాయిలో విరుచుకుపడ్డారు. పశ్చిమ బెంగాల్ అసెంబ్లీ ఎన్నికల రెండో దశ ప్రచారంలో భాగంగా దక్షిణ 24 పరగణాల జిల్లాలో జరిగిన బహిరంగ సభలో ఆయన ప్రసంగిస్తూ.. ప్రధాని మోడీ , బీజేపీ తనను ఇరవై నాలుగు గంటలూ లక్ష్యంగా చేసుకుంటున్నాయని ఆరోపించారు. తన గొంతు నొక్కేందుకు ఎన్ని ప్రయత్నాలు చేసినా, తానూ ఎవరికీ భయపడబోనని ఆయన స్పష్టం చేశారు. తనపై 36 కేసులు పెట్టారని, తన ప్రభుత్వ నివాసాన్ని లాగేసుకున్నారని, తన సభ్యత్వాన్ని రద్దు చేయడమే కాకుండా 55 గంటల పాటు విచారించారని, అయినా తాను నరేంద్ర మోడీకి భయపడే ప్రసక్తే లేదని ఆయన గర్జించారు.

ఈ సందర్భంగా రాహుల్ గాంధీ ప్రధాని మోడీ, అమెరికా అధ్యక్షుడు డొనాల్డ్ ట్రంప్ మధ్య ఉన్న సంబంధాలపై కూడా సంచలన వ్యాఖ్యలు చేశారు. ప్రధాని మోడీ అమెరికాతో చేసుకున్న వాణిజ్య ఒప్పందాల్లో భారతదేశ వ్యవసాయరంగం, చిన్న తరహా పరిశ్రమలు, ఇంధన భద్రతను తాకట్టు పెట్టారని ఆయన ఆరోపించారు. దేశ ప్రజల వ్యక్తిగత డేటాను కూడా అమెరికాకు అప్పగించారని, ఒత్తిడి లేకుండా ఏ ప్రధాని కూడా ఇటువంటి నిర్ణయాలు తీసుకోలేరని ఆయన వ్యాఖ్యానించారు. మోడీ కేవలం కొందరు బిలియనీర్ల కోసం మాత్రమే పనిచేస్తున్నారని, దీనివల్ల దేశంలోని చిన్న వ్యాపారులు, ఎంఎస్ఎంఈ (MSME)లు కుప్పకూలిపోయాయని ఆయన విమర్శించారు.

కేంద్రంతో పాటు బెంగాల్‌లోని తృణమూల్ కాంగ్రెస్ (TMC) ప్రభుత్వంపై కూడా రాహుల్ తన విమర్శల పదును పెంచారు. మమతా బెనర్జీ నేతృత్వంలోని ప్రభుత్వం రాష్ట్రంలోని పరిశ్రమలను నాశనం చేసిందని, ఇక్కడ కేవలం టీఎంసీ నాయకుల బంధువులకే ఉద్యోగాలు దొరుకుతున్నాయని ఆయన మండిపడ్డారు. శారదా, రోజ్ వ్యాలీ వంటి చిట్ ఫండ్ కుంభకోణాలను ప్రస్తావిస్తూ.. టీఎంసీ అవినీతిలో కూరుకుపోయిందని, రాష్ట్రంలో గూండా ట్యాక్స్ వసూలు చేస్తున్నారని ఆయన ఆరోపించారు. 5 లక్షల ఉద్యోగాలు ఇస్తామని హామీ ఇచ్చిన మమతా దీదీ, బెంగాల్ యువతను మోసం చేశారని, 84 లక్షల మంది యువత నిరుద్యోగ భృతి కోసం దరఖాస్తు చేసుకున్నారని ఆయన దుయ్యబట్టారు. తొలి దశలో భారీ ఓటింగ్ నమోదైన నేపథ్యంలో, బెంగాల్ మార్పు కోరుకుంటోందని ఆయన ఆశాభావం వ్యక్తం చేశారు.

18 గంటల ప్రయాణం అనవసరం

• మా దగ్గరే అన్ని దారులు ఉన్నాయి
• ఇరాన్‌తో చర్చల కోసం పాక్ వెళ్లాల్సిన ప్రతినిధి బృంద పర్యటనను రద్దు చేసిన ట్రంప్

వాషింగ్టన్: అమెరికా ,ఇరాన్ మధ్య శాంతి చర్చల ప్రక్రియలో శనివారం అనూహ్య పరిణామం చోటుచేసుకుంది. ఇరాన్ ప్రతినిధులతో రెండో విడత చర్చల కోసం పాకిస్తాన్ రాజధాని ఇస్లామాబాద్‌కు వెళ్లాల్సిన తన ఉన్నతస్థాయి ప్రతినిధి బృంద పర్యటనను అమెరికా అధ్యక్షుడు డొనాల్డ్ ట్రంప్ రద్దు చేశారు. తన ప్రత్యేక రాయబారి స్టీవ్ విట్కాఫ్, సీనియర్ సలహాదారు జారెడ్ కుష్నర్ ప్రయాణానికి సిద్ధమవుతుండగా, చివరి నిమిషంలో ఈ నిర్ణయం తీసుకున్నట్లు ట్రంప్ వెల్లడించారు. ఏమీ సాధించలేని నిరర్థక చర్చల కోసం 18 గంటల పాటు సుదీర్ఘ ప్రయాణం చేసి వెళ్లాల్సిన అవసరం లేదని ఆయన తన సిబ్బందికి స్పష్టం చేశారు.

ఈ నిర్ణయం వెనుక బలమైన కారణాలను ట్రంప్ సోషల్ మీడియా వేదికగా వివరించారు. ప్రస్తుతం అమెరికా దగ్గరే అన్ని అవకాశాలు ఉన్నాయని, ఇరాన్ నాయకత్వం తీవ్రమైన అంతర్గత విభేదాలతో సతమతమవుతోందని ఆయన వ్యాఖ్యానించారు. ఇరాన్‌లో అసలు ఎవరి మాట చెల్లుతుందో వారికే తెలియడం లేదని ఎద్దేవా చేసిన ట్రంప్.. ఒకవేళ చర్చలు జరపాలనుకుంటే ఇరాన్ ఎప్పుడైనా తమకు నేరుగా ఫోన్ చేయవచ్చని పేర్కొన్నారు. అదే సమయంలో, ఈ పర్యటన రద్దు చేసినంత మాత్రాన మళ్లీ యుద్ధం మొదలవుతుందని అర్థం కాదని, శాంతి కోసం తాము వేచి చూస్తామని ఆయన స్పష్టం చేశారు.

మరోవైపు, ఇరాన్ విదేశాంగ మంత్రి అబ్బాస్ అరాగ్చీ నేతృత్వంలోని బృందం అప్పటికే ఇస్లామాబాద్‌లో పాక్ నాయకత్వంతో భేటీ అయ్యి, అమెరికాకు తమ డిమాండ్ల జాబితాను అందజేసి తిరిగి వెళ్లిపోయింది. అమెరికాతో నేరుగా చర్చలు జరపడానికి ఇరాన్ సుముఖత చూపకపోవడం కూడా ట్రంప్ నిర్ణయానికి ఒక కారణంగా కనిపిస్తోంది. పాకిస్తాన్ ప్రధాని షెహబాజ్ షరీఫ్ ,ఆర్మీ చీఫ్ అసిమ్ మునీర్ చేసిన మధ్యవర్తిత్వ ప్రయత్నాలు ఈ పరిణామంతో తాత్కాలికంగా దెబ్బతిన్నాయి. ప్రస్తుతం ఇరాన్ ప్రతినిధులు ఒమన్, రష్యాలకు బయలుదేరారు.

బెంగాల్‌లో మమత సర్కార్ పతనం ఖాయం

• తొలి దశలోనే బీజేపీ గెలుపు ఖరారైంది
• 110 సీట్లు పక్కా అంటూ అమిత్ షా జోస్యం

కోల్‌కతా: పశ్చిమ బెంగాల్ అసెంబ్లీ ఎన్నికల నేపథ్యంలో కేంద్ర హోంమంత్రి అమిత్ షా సంచలన వ్యాఖ్యలు చేశారు. బెంగాల్‌లో మమతా బెనర్జీ నేతృత్వంలోని తృణమూల్ కాంగ్రెస్ (TMC) ప్రభుత్వం ఈసారి అధికారంలోకి వచ్చే అవకాశం లేదని ఆయన స్పష్టం చేశారు. శనివారం జరిగిన ఎన్నికల ప్రచార సభల్లో ఆయన మాట్లాడుతూ.. తొలి దశ పోలింగ్ సరళిని బట్టి చూస్తే రాష్ట్రంలో మార్పు స్పష్టంగా కనిపిస్తోందని, ప్రజలు మమతా దీదీకి వీడ్కోలు పలికేందుకు సిద్ధమయ్యారని పేర్కొన్నారు. మొదటి దశలో పోలింగ్ జరిగిన 152 స్థానాల్లో బీజేపీ కనీసం 110 సీట్లు గెలుచుకుంటుందని తమ పార్టీ అంతర్గత అంచనా అని ఆయన వెల్లడించారు. ఈ భారీ విజయం బీజేపీ బెంగాల్‌లో ప్రభుత్వాన్ని ఏర్పాటు చేయబోతోందనే దానికి నిదర్శనమని ఆయన ధీమా వ్యక్తం చేశారు.

రాష్ట్రంలో భయం నీడలు తొలిగి నమ్మకం పెరుగుతోందని, రికార్డు స్థాయిలో నమోదైన 92 శాతానికి పైగా ఓటింగ్ ప్రజల ఆకాంక్షకు అద్దం పడుతోందని అమిత్ షా విశ్లేషించారు. మమతా బెనర్జీ ప్రభుత్వం అవినీతి, సిండికేట్ రాజ్, చొరబాటుదారులకు కొమ్ముకాస్తోందని ఆయన ఆరోపించారు. బీజేపీ అధికారంలోకి వచ్చిన వెంటనే బెంగాల్ నుండి చొరబాటుదారులను ఏరివేస్తామని, మతువా వర్గానికి పౌరసత్వ సవరణ చట్టం (CAA) ద్వారా పౌరసత్వం కల్పిస్తామని హామీ ఇచ్చారు. అలాగే ఆర్జీ కర్ ఆసుపత్రి ఘటన, సందేశ్‌ఖాలీ ఉదంతాలను ప్రస్తావిస్తూ.. బెంగాల్‌లో మహిళల భద్రత గాలికి వదిలేశారని, బీజేపీ ప్రభుత్వంలో మహిళలు అర్ధరాత్రి కూడా నిర్భయంగా తిరిగేలా భద్రత కల్పిస్తామని అమిత్ షా మాటిచ్చారు.

బెంగాల్ అభివృద్ధి కేవలం ప్రధాని నరేంద్ర మోడీ నాయకత్వంలోనే సాధ్యమని, 'సోనార్ బంగ్లా' కలలను నిజం చేసేందుకు ప్రజలు కమలం గుర్తుకు ఓటు వేయాలని ఆయన పిలుపునిచ్చారు. మే 5వ తేదీ తర్వాత బెంగాల్‌లో కొత్త ప్రభుత్వం కొలువుదీరుతుందని, టీఎంసీ చేస్తున్న 'నెఫ్యూ టాక్స్' (అభిషేక్ బెనర్జీని ఉద్దేశించి), కట్ మనీ సంస్కృతికి ముగింపు పలుకుతామని ఆయన హెచ్చరించారు. అమిత్ షా చేసిన ఈ వ్యాఖ్యలు రాష్ట్ర రాజకీయాల్లో ప్రకంపనలు సృష్టిస్తున్నాయి. కాగా, రెండో దశ పోలింగ్ ఏప్రిల్ 29న జరగనుండగా, మే 4న వెలువడనున్న ఫలితాలపై దేశవ్యాప్తంగా ఉత్కంఠ నెలకొంది.

లెబనాన్‌పై ఇజ్రాయెల్ వైమానిక దాడులు

 కాల్పుల విరమణ పొడిగింపు ప్రకటన వెలువడిన గంటల్లోనే లెబనాన్‌పై ఇజ్రాయెల్ వైమానిక దాడులు

టెల్ అవీవ్/వాషింగ్టన్: పశ్చిమాసియాలో శాంతి ప్రయత్నాలకు మరోసారి గట్టి ఎదురుదెబ్బ తగిలింది. ఇజ్రాయెల్, లెబనాన్ మధ్య కాల్పుల విరమణను మరో మూడు వారాల పాటు పొడిగిస్తున్నట్లు అమెరికా అధ్యక్షుడు డొనాల్డ్ ట్రంప్ ప్రకటించిన కొద్ది గంటల్లోనే, ఇజ్రాయెల్ డిఫెన్స్ ఫోర్సెస్ (IDF) దక్షిణ లెబనాన్‌పై విరుచుకుపడ్డాయి. శుక్రవారం ఉదయం దక్షిణ లెబనాన్‌లోని ఖిర్బెత్ సలామ్, తూలిన్ ప్రాంతాల్లోని హెజ్‌బొల్లా స్థావరాలే లక్ష్యంగా ఇజ్రాయెల్ యుద్ధ విమానాలు బాంబుల వర్షం కురిపించాయి. తమ దళాలపై దాడులు చేసేందుకు హెజ్‌బొల్లాఈ భవనాలను వాడుకుంటోందని, అందుకే వీటిని ధ్వంసం చేసినట్లు ఇజ్రాయెల్ వైమానిక దళం స్పష్టం చేసింది.

అంతకుముందు గురువారం రాత్రి హెజ్‌బొల్లా జరిపిన రాకెట్ దాడులకు ప్రతిచర్యగానే ఈ దాడులు చేసినట్లు ఇజ్రాయెల్ పేర్కొంది. అయితే, వైట్ హౌస్‌లో ఇజ్రాయెల్ , లెబనాన్ ఉన్నతాధికారులతో చర్చల అనంతరం కాల్పుల విరమణ పొడిగింపుపై ట్రంప్ , వైస్ ప్రెసిడెంట్ జెడి వాన్స్ ఎంతో ఆశాభావం వ్యక్తం చేశారు. లెబనాన్ తనను తాను కాపాడుకోవడంలో అమెరికా తోడ్పడుతుందని, త్వరలోనే ఇజ్రాయెల్ ప్రధాని నెతన్యాహు, లెబనాన్ అధ్యక్షుడు జోసెఫ్ ఔన్‌లు అమెరికాలో పర్యటిస్తారని ట్రంప్ ప్రకటించారు. ఈ చారిత్రక ఒప్పందం కుదిరిన వెంటనే మళ్ళీ దాడులు జరగడం అంతర్జాతీయంగా ఆందోళన కలిగిస్తోంది.

ప్రస్తుతం దక్షిణ లెబనాన్‌లో ఉద్రిక్తతలు పరాకాష్టకు చేరాయి. ఒకవైపు దౌత్యపరమైన చర్చలు జరుగుతున్నా, క్షేత్రస్థాయిలో మాత్రం కాల్పులు ఆగడం లేదు. ఇజ్రాయెల్ తన సరిహద్దు భద్రత విషయంలో రాజీపడబోమని చెబుతుండగా, హెజ్‌బొల్లా తన ప్రతిఘటనను కొనసాగిస్తోంది. ఈ ఘర్షణల వల్ల ఇప్పటికే లక్షలాది మంది ప్రజలు నిరాశ్రయులయ్యారు. అగ్రరాజ్యం చొరవతో కుదిరిన ఈ మూడు వారాల తాత్కాలిక విరామం ఎంతవరకు నిలుస్తుందోనని ప్రపంచ దేశాలు ఉత్కంఠగా గమనిస్తున్నాయి. యుద్ధం మరింత ముదిరితే అది ఇంధన సరఫరా, ప్రపంచ ఆర్థిక వ్యవస్థపై తీవ్ర ప్రభావం చూపే ప్రమాదం ఉందని విశ్లేషకులు హెచ్చరిస్తున్నారు.

అధికారం ఎవరికీ వంశపారంపర్య ఆస్తి కాదు

•  బిహార్ అసెంబ్లీలో తేజస్వీ యాదవ్ విమర్శలకు సీఎం సామ్రాట్ చౌదరి ఘాటు కౌంటర్

పట్నా: బిహార్ రాజకీయాల్లో నూతన అధ్యాయం మొదలైంది. అసెంబ్లీలో శుక్రవారం జరిగిన బలపరీక్షలో ముఖ్యమంత్రి సామ్రాట్ చౌదరి నేతృత్వంలోని ఎన్డీయే ప్రభుత్వం ఘనవిజయం సాధించింది. సుదీర్ఘకాలం ముఖ్యమంత్రిగా పనిచేసిన నీతీష్ కుమార్ రాజ్యసభకు వెళ్లడంతో, ఆయన రాజీనామా తర్వాత బీజేపీ నేత సామ్రాట్ చౌదరి ముఖ్యమంత్రిగా బాధ్యతలు చేపట్టిన సంగతి తెలిసిందే. ఈ క్రమంలో జరిగిన విశ్వాస తీర్మానంపై చర్చ సందర్భంగా అధికార, ప్రతిపక్షాల మధ్య మాటల యుద్ధం తారస్థాయికి చేరింది. 243 మంది సభ్యులున్న సభలో ఎన్డీయే కూటమికి 202 మంది ఎమ్మెల్యేల మద్దతు లభించగా, విపక్ష ఇండియా కూటమి కేవలం 35 ఓట్లకే పరిమితమైంది.

చర్చను ప్రారంభించిన ప్రతిపక్ష నేత తేజస్వీ యాదవ్, ముఖ్యమంత్రిపై సెటైర్లు వేశారు. "ఎన్నికైన ముఖ్యమంత్రి నుంచి సెలెక్ట్ అయిన (ఎంపిక చేయబడిన) ముఖ్యమంత్రిగా మారిన సామ్రాట్ చౌదరికి నా అభినందనలు. మా నాన్న లాలు ప్రసాద్ యాదవ్  పాఠశాలలో చదువుకున్న విద్యార్థి ఈరోజు ముఖ్యమంత్రి కావడం మాకు గర్వకారణం" అంటూ ఎద్దేవా చేశారు. బిహార్‌లో గత ఐదేళ్లలో ఐదు ప్రభుత్వాలు మారడం రాజకీయ అస్థిరతకు నిదర్శనమని, దీనివల్ల రాష్ట్ర అభివృద్ధి కుంటుపడుతోందని విమర్శించారు. నీతీష్ కుమార్‌ను రాజకీయంగా ముగించడానికే బీజేపీ ఆయనను రాజీనామా చేయించిందని తేజస్వీ ఆరోపించారు.

తేజస్వీ యాదవ్ విమర్శలకు ముఖ్యమంత్రి సామ్రాట్ చౌదరి తనదైన శైలిలో సమాధానమిచ్చారు. "అధికారం అనేది ఎవరికీ వంశపారంపర్య ఆస్తి కాదు. 14 కోట్ల బిహార్ ప్రజల ఆశీర్వాదం వల్లే నేను ఈ స్థితిలో ఉన్నాను. నాకు ప్రధాని మోడీ, నీతీష్ కుమార్ వంటి అగ్రనేతల అండదండలు ఉన్నాయి" అని గట్టిగా బదులిచ్చారు. ఒకవేళ నీతీష్ కుమార్ గనుక లేకపోయి ఉంటే గతంలో లాలు యాదవ్ ముఖ్యమంత్రి అయ్యేవారా అని ప్రశ్నించారు. తన రాజకీయ ప్రస్థానంలో లాలు యాదవ్ పెట్టిన ఇబ్బందులే తనను ఈరోజు ముఖ్యమంత్రి పీఠం వరకు తీసుకువచ్చాయని పేర్కొన్నారు. బిహార్ మొదటి బీజేపీ ముఖ్యమంత్రిగా రికార్డు సృష్టించిన సామ్రాట్ చౌదరి, నీతీష్ కుమార్ బాటలోనే అభివృద్ధిని పరుగులు తీయిస్తామని సభలో స్పష్టం చేశారు.

బెంగాల్‌ను ఢిల్లీ నుంచి పాలిస్తామనుకుంటే అది భ్రమ

•  ప్రధాని మోడీకి మమతా బెనర్జీ కౌంటర్

కోల్‌కతా: పశ్చిమ బెంగాల్ అసెంబ్లీ ఎన్నికల తొలి దశ పోలింగ్ ముగిసిన మరుసటి రోజే రాష్ట్రంలో రాజకీయ వేడి మరింత పెరిగింది. ఢిల్లీలో కూర్చుని బెంగాల్‌ను శాసించవచ్చని భావిస్తున్న వారు తీవ్ర భ్రమలో ఉన్నారని ముఖ్యమంత్రి మమతా బెనర్జీ ఘాటు వ్యాఖ్యలు చేశారు. శుక్రవారం జరిగిన ఒక బహిరంగ సభలో ఆమె మాట్లాడుతూ.. బెంగాల్‌ను కేవలం బెంగాలీలే పాలిస్తారని, బయటి వ్యక్తులు లేదా ఢిల్లీ నాయకుల పెత్తనం ఇక్కడ సాగదని స్పష్టం చేశారు. తొలి దశలో నమోదైన చారిత్రక ఓటింగ్ శాతం తమ పార్టీకి ఉన్న ప్రజాదరణకు నిదర్శనమని, బెంగాల్ ప్రజలు తమ ఆత్మగౌరవాన్ని కాపాడుకోవడానికి సిద్ధంగా ఉన్నారని ఆమె ఉద్ఘాటించారు.

కేంద్రంలోని బీజేపీ ప్రభుత్వం దర్యాప్తు సంస్థలను అడ్డం పెట్టుకుని రాష్ట్ర ప్రభుత్వాన్ని వేధిస్తోందని మమత ఆరోపించారు. ఎన్నికల సమయంలో కేంద్ర బలగాలను భారీగా మోహరించి ఓటర్లను భయభ్రాంతులకు గురిచేయాలని చూసినా, ప్రజలు మాత్రం ధైర్యంగా వచ్చి ఓటు వేశారని ఆమె ప్రశంసించారు. "ఢిల్లీ నుంచి రిమోట్ కంట్రోల్ ద్వారా బెంగాల్ నడవదు. మా రాష్ట్ర సంస్కృతి, సంప్రదాయాలు తెలియని వారు ఇక్కడికి వచ్చి అధికారం చెలాయించాలని చూస్తే ప్రజలు బుద్ధి చెబుతారు" అని ఆమె హెచ్చరించారు. ప్రధాని మోడీ, అమిత్ షా బెంగాల్‌ను లక్ష్యంగా చేసుకుని చేస్తున్న విమర్శలు ఇక్కడి ప్రజల ఐక్యతను దెబ్బతీయలేవని ఆమె పేర్కొన్నారు.

అభివృద్ధి పనుల కోసం రాష్ట్రానికి రావాల్సిన నిధులను కేంద్రం తొక్కిపెట్టిందని, ఇది బెంగాల్ ప్రజలకు చేస్తున్న ద్రోహమని ముఖ్యమంత్రి విమర్శించారు. ఒకవైపు ఉపాధి హామీ పథకం నిధులు ఇవ్వకుండా, మరోవైపు ఎన్నికల ప్రచారంలో పెద్ద పెద్ద మాటలు చెప్పడం బీజేపీకే సాధ్యమని ఆమె ఎద్దేవా చేశారు. పోలింగ్ జరిగిన 152 స్థానాల్లో తృణమూల్ కాంగ్రెస్‌కు తిరుగులేని మెజారిటీ వస్తుందని, మే 4న వెలువడే ఫలితాలతో బీజేపీ అహంకారం అణిగిపోతుందని మమతా బెనర్జీ ధీమా వ్యక్తం చేశారు. ఢిల్లీ గద్దెపై ఉన్న వారు బెంగాల్‌ను జయించడం అసాధ్యమని, ఈ పోరాటం చివరి వరకు కొనసాగుతుందని ఆమె స్పష్టం చేశారు.

ప్రజాస్వామ్య సంగ్రామంలో మహిళా గర్జన

• బెంగాల్, తమిళనాడు తొలి దశ పోలింగ్‌లో 1947 తర్వాత సరికొత్త చరిత్ర
• పురుషుల కంటే 2 శాతం అధికంగా మహిళల ఓటింగ్

న్యూఢిల్లీ: దేశవ్యాప్తంగా ఉత్కంఠ రేపిన పశ్చిమ బెంగాల్, తమిళనాడు అసెంబ్లీ ఎన్నికల తొలి దశ పోలింగ్ కనీవినీ ఎరుగని రీతిలో రికార్డులను తిరగరాసింది. 1947లో స్వాతంత్య్రం వచ్చిన తర్వాత ఇప్పటివరకు ఎన్నడూ లేని విధంగా పశ్చిమ బెంగాల్‌లో 91.78 శాతం ఓటింగ్ నమోదవ్వగా, తమిళనాడులో దాదాపు 85 శాతం (84.69%) మంది తమ ఓటు హక్కును వినియోగించుకున్నారు. ఈ చారిత్రక ఘట్టంలో మహిళా ఓటర్లు అగ్రభాగాన నిలిచారు. రెండు రాష్ట్రాల్లోనూ పురుషుల కంటే మహిళలే సుమారు 2 శాతం అధికంగా ఓట్లు వేయడం విశేషం. బెంగాల్‌లో మహిళా ఓటింగ్ శాతం 92.69 శాతానికి చేరుకోగా, తమిళనాడులో 85.76 శాతంగా నమోదైంది. ఓటర్ల చైతన్యాన్ని చూసి కేంద్ర ఎన్నికల సంఘం సంతోషం వ్యక్తం చేస్తూ, ఇది భారత ప్రజాస్వామ్య ప్రయాణంలో ఒక మైలురాయి అని అభివర్ణించింది.

ఎన్నికల కమిషన్ ప్రవేశపెట్టిన వినూత్న సాంకేతికతలు, ఓటర్లకు కల్పించిన సౌకర్యాలు ఈ భారీ ఓటింగ్‌కు ప్రధాన కారణమని అధికారులు తెలిపారు. మొత్తం 386 నియోజకవర్గాల్లోని 9.33 కోట్ల మంది ఓటర్ల కోసం 6 లక్షల మంది సిబ్బందిని ఈసీ రంగంలోకి దించింది. ప్రతి పోలింగ్ కేంద్రం నుంచి 100 శాతం లైవ్ వెబ్‌కాస్టింగ్ ద్వారా ప్రక్రియను నిరంతరం పర్యవేక్షించారు. వృద్ధులు, దివ్యాంగుల కోసం ప్రత్యేక రవాణా, వీల్ చైర్ వంటి వసతులు కల్పించడం వల్ల ఓటింగ్ శాతం గణనీయంగా పెరిగింది. అటు థర్డ్ జెండర్ కమ్యూనిటీ కూడా పెద్ద ఎత్తున స్పందించి, తమిళనాడులో 60.49 శాతం, బెంగాల్‌లో 56.79 శాతం ఓటింగ్ నమోదు చేసింది.

భారీగా నమోదైన ఓటింగ్ శాతం రాజకీయ పార్టీల మధ్య తీవ్ర యుద్ధానికి దారితీసింది. ప్రధాని నరేంద్ర మోడీ బెంగాల్‌లో ప్రసంగిస్తూ.. ఈ ఓటింగ్ 'మార్పు'కు సంకేతమని, మహిళలు, యువత తృణమూల్ కాంగ్రెస్‌పై తిరుగుబాటు చేశారని వ్యాఖ్యానించారు. అటు కేంద్ర మంత్రి అమిత్ షా సోషల్ మీడియా వేదికగా స్పందిస్తూ, "టీఎంసీ అవినీతి సూర్యుడు అస్తమించాడు" అంటూ ఆ పార్టీ ఓటమిని సూచించేలా పోస్ట్ చేశారు. అయితే, ముర్షిదాబాద్ వంటి ప్రాంతాల్లో హింసాత్మక ఘటనలు చోటుచేసుకున్నాయి. టీఎంసీ, హుమాయున్ కబీర్ అనుచరుల మధ్య ఘర్షణలు జరగగా, అసన్సోల్‌లో బీజేపీ అభ్యర్థి అగ్నిమిత్ర పాల్ వాహనంపై రాళ్ల దాడి జరిగింది.

తమిళనాడులో ముఖ్యమంత్రి ఎం.కె. స్టాలిన్ ఓటు వేస్తూ.. సామాజిక న్యాయం, రాష్ట్ర హక్కుల రక్షణ కోసం ప్రజలు ఓటు వేయాలని పిలుపునిచ్చారు. నటుడు, టీవీకే అధినేత విజయ్ రవాణా సౌకర్యాల కొరతపై ఫిర్యాదు చేస్తూ పోలింగ్ సమయాన్ని పొడిగించాలని కోరారు. 2021 ఎన్నికలతో పోలిస్తే ఈసారి రెండు రాష్ట్రాల్లోనూ ఓటింగ్ శాతం భారీగా పెరగడం విశేషం. బెంగాల్‌లో మిగిలిన 142 స్థానాలకు ఏప్రిల్ 29న పోలింగ్ జరగనుండగా, మే 4వ తేదీన వెలువడనున్న ఫలితాలు ఈ చారిత్రక ఓటింగ్ వెనుక ఉన్న అసలు తీర్పును వెల్లడించనున్నాయి.

కేసీఆర్‌కు తెలంగాణ హైకోర్టులో భారీ ఊరట

• జస్టిస్ ఘోష్ కమిషన్ నివేదిక చెల్లదు 
• కాళేశ్వరం విచారణలో కీలక మలుపు

హైదరాబాద్: తెలంగాణ మాజీ ముఖ్యమంత్రి, బీఆర్ఎస్ అధినేత కె. చంద్రశేఖర్ రావు కు కాళేశ్వరం ప్రాజెక్టు అక్రమాల విచారణ విషయంలో రాష్ట్ర హైకోర్టులో సోమవారం (ఏప్రిల్ 22, 2026) నాడు భారీ ఊరట లభించింది. కాళేశ్వరం ప్రాజెక్టు పనుల్లో జరిగినట్లు చెబుతున్న అవకతవకలపై విచారణ జరిపిన జస్టిస్ పి.సి. ఘోష్ కమిషన్ సమర్పించిన నివేదిక "అమలుకు వీలులేనిది" (Inoperative) అని హైకోర్టు స్పష్టం చేసింది. ఈ నివేదిక ఆధారంగా కేసీఆర్, మాజీ మంత్రి హరీశ్ రావు  ఇతరులపై ఎటువంటి చర్యలు తీసుకోకూడదని న్యాయస్థానం స్పష్టమైన ఆదేశాలు జారీ చేసింది. కమిషన్ విచారణ ప్రక్రియలో సహజ న్యాయ సూత్రాలను, కమిషన్ ఆఫ్ ఎంక్వయిరీ చట్టంలోని నిబంధనలను పాటించలేదని హైకోర్టు ఈ సందర్భంగా వ్యాఖ్యానించింది.

చీఫ్ జస్టిస్ ఆలోక్ అరాధే నేతృత్వంలోని ధర్మాసనం ఈ తీర్పును వెలువరిస్తూ, కమిషన్ విచారణలో అనేక లోపాలు ఉన్నట్లు గుర్తించింది. ముఖ్యంగా సెక్షన్ 8(బి) ప్రకారం ఎవరిపైనైనా అభియోగాలు మోపే ముందు వారికి నోటీసులు ఇచ్చి, తమ వాదనను వినిపించుకునే అవకాశం కల్పించాల్సి ఉంటుంది. అయితే, కేసీఆర్, ఇతరులకు అటువంటి అవకాశం కల్పించకుండానే కమిషన్ తన నిర్ధారణలకు రావడం చట్టవిరుద్ధమని కోర్టు పేర్కొంది. ప్రభుత్వ ఉత్తర్వుల ద్వారా కమిషన్ ఏర్పాటును కోర్టు సమర్థించినప్పటికీ, అది అనుసరించిన విచారణా పద్ధతి సరైనది కాదని తేల్చి చెప్పింది. దీంతో ఈ నివేదికలోని అంశాలను పరిగణనలోకి తీసుకుని ప్రభుత్వం తదుపరి చర్యలు చేపట్టే అవకాశం లేకుండాపోయింది.

ఈ తీర్పు తెలంగాణ రాజకీయాల్లో పెను సంచలనం సృష్టించింది. కొంతకాలంగా కాళేశ్వరం ప్రాజెక్టు చుట్టూ జరుగుతున్న ఆరోపణలు, ప్రత్యారోపణల నేపథ్యంలో హైకోర్టు ఇచ్చిన ఈ ఆదేశాలు బీఆర్ఎస్ శ్రేణుల్లో కొత్త ఉత్సాహాన్ని నింపాయి. తమ నాయకుడిపై రాజకీయ కక్ష సాధింపులో భాగంగానే ఇటువంటి కమిషన్లు వేశారని బీఆర్ఎస్ నేతలు వాదిస్తుండగా, తాజా తీర్పును సుప్రీంకోర్టులో సవాలు చేసే దిశగా రాష్ట్ర ప్రభుత్వం యోచిస్తోంది. శాంతియుత , న్యాయబద్ధమైన విచారణ జరగాలన్న కోర్టు వ్యాఖ్యలు ఇప్పుడు చర్చనీయాంశంగా మారాయి.

ట్రంప్ ఊరటతో ఊపిరిపీల్చుకున్న దక్షిణాసియా

•  ఇరాన్ గడువు పొడిగింపుతో భారత్‌కు కలిగే ప్రయోజనాలేంటి?
•  మధ్యవర్తిగా పాకిస్థాన్ వ్యూహమిదే!

న్యూఢిల్లీ/ఇస్లామాబాద్: పశ్చిమ ఆసియాలో యుద్ధ జ్వాలలు ఇప్పుడప్పుడే చల్లారేలా కనిపించకపోయినా, అమెరికా అధ్యక్షుడు డొనాల్డ్ ట్రంప్ కాల్పుల విరమణ గడువును పొడిగిస్తూ తీసుకున్న నిర్ణయం ప్రపంచ దేశాలకు, ముఖ్యంగా భారత్, పాకిస్తాన్‌లకు పెద్ద ఊరటనిచ్చింది. ఇరాన్‌పై దాడులు తాత్కాలికంగా ఆగిపోవడం వల్ల కేవలం యుద్ధం వాయిదా పడటమే కాకుండా, దక్షిణాసియా దేశాల ఆర్థిక,భౌగోళిక రాజకీయ ప్రయోజనాలు ముడిపడి ఉన్నాయని విశ్లేషకులు భావిస్తున్నారు. ఈ గడువు పొడిగింపు వెనుక పాకిస్తాన్ కీలక మధ్యవర్తిగా వ్యవహరిస్తుండగా, భారత్ తన వ్యూహాత్మక ప్రయోజనాలను కాపాడుకునే పనిలో పడింది.

భారత్‌కు చాబహార్ ఓడరేవు కీలకం

ఇరాన్‌తో యుద్ధం తీవ్రమైతే అంతర్జాతీయ మార్కెట్‌లో చమురు ధరలు ఆకాశాన్ని తాకడం ఖాయం, ఇది భారత ఆర్థిక వ్యవస్థపై తీవ్ర ప్రభావాన్ని చూపుతుంది. ట్రంప్ నిర్ణయంతో ధరలు స్థిరంగా ఉండే అవకాశం ఉండటం భారత్‌కు కలిగే అతిపెద్ద ప్రయోజనం. అంతేకాకుండా, ఇరాన్‌లోని చాబహార్ ఓడరేవు భారత్‌కు వ్యూహాత్మకంగా ఎంతో కీలకం. మధ్య ఆసియా దేశాలకు వాణిజ్య మార్గంగా ఉన్న ఈ రేవును కాపాడుకోవడానికి, అక్కడ ఉన్న భారతీయ పెట్టుబడులకు ప్రమాదం కలగకుండా ఉండటానికి ఈ శాంతి గడువు ఎంతో అవసరం. ఇరాన్ చుట్టూ ఉద్రిక్తతలు తగ్గితేనే భారత్ తన వాణిజ్య లక్ష్యాలను సురక్షితంగా చేరుకోగలదు.

మధ్యవర్తిగా పాకిస్తాన్ కు లబ్ధి

మరోవైపు, ఈ సంక్షోభంలో పాకిస్తాన్  కీలక పాత్రను పోషిస్తోంది. అమెరికా , ఇరాన్ మధ్య చర్చలకు వేదికగా నిలవడం ద్వారా అంతర్జాతీయ స్థాయిలో తన పరపతిని పెంచుకోవాలని ఇస్లామాబాద్ ప్రయత్నిస్తోంది. ముఖ్యంగా అమెరికాతో సంబంధాలను మెరుగుపరుచుకోవడం ద్వారా ఆర్థిక సహాయం పొందాలని, అలాగే పొరుగునే ఉన్న ఇరాన్‌తో యుద్ధం వస్తే తలెత్తే శరణార్థుల సమస్య, అశాంతిని నివారించాలని పాక్ భావిస్తోంది. ఈ చర్చలు సఫలమైతే పాకిస్తాన్ ఒక బాధ్యతాయుతమైన ప్రాంతీయశక్తిగా గుర్తింపు పొందుతుంది. మొత్తానికి ట్రంప్ ఇచ్చిన ఈ అదనపు సమయం, యుద్ధం అంచున ఉన్న దేశాలకే కాకుండా, స్థిరత్వాన్ని కోరుకునే భారత్ వంటి దేశాలకు కూడా కొత్త ఆశలను చిగురింపజేస్తోంది.

అమెరికా-ఇరాన్‌ మధ్య కాల్పుల విరమణ పొడిగింపు

• గడువు ముగుస్తున్న వేళ ట్రంప్ అనూహ్య నిర్ణయం
• యుద్ధం కంటే దౌత్యానికి ప్రాధాన్యమిస్తున్నామని వెల్లడి
• ఈలోగా సరైన స్పందన రాకపోతే తిరిగి దాడులు తప్పవని హెచ్చరిక

వాషింగ్టన్/టెహ్రాన్: పశ్చిమ ఆసియాలో యుద్ధ మేఘాలు కమ్ముకున్న వేళ అమెరికా అధ్యక్షుడు డొనాల్డ్ ట్రంప్ కీలకమైన,అనూహ్యమైన నిర్ణయం తీసుకున్నారు. ఇరాన్‌తో కుదిరిన రెండు వారాల కాల్పుల విరమణ గడువు బుధవారం తెల్లవారుజామున ముగియాల్సి ఉండగా, దాన్ని మరికొంత కాలం పొడిగిస్తున్నట్లు ఆయన ప్రకటించారు. ఇరాన్ నాయకత్వంలో నెలకొన్న అంతర్గత విభేదాల దృష్ట్యా స్పష్టమైన , ఏకీకృత ప్రతిపాదనతో చర్చలకు వచ్చేందుకు ఇరాన్‌కు మరింత సమయం ఇవ్వాలని ట్రంప్ ఈ నిర్ణయం తీసుకున్నారు. యుద్ధం కంటే దౌత్యానికే తాము ప్రాధాన్యం ఇస్తున్నామని, అయితే ఇరాన్ ఈ అవకాశాన్ని సద్వినియోగం చేసుకోవాలని ఆయన స్పష్టం చేశారు. ఒకవేళ ఈ అదనపు గడువులోగా ఇరాన్ నుంచి సరైన స్పందన రాకపోతే, తిరిగి దాడులు ప్రారంభించేందుకు తమ దళాలు సిద్ధంగా ఉన్నాయని ఆయన హెచ్చరించారు.

ఇరాన్ అగ్రనాయకత్వంలోని రాజకీయ, సైనిక విభాగాల మధ్య చర్చల విషయంలో భిన్నాభిప్రాయాలు వ్యక్తమవుతున్నట్లు వచ్చిన నివేదికల నేపథ్యంలో వైట్ హౌస్ ఈ వ్యూహాత్మక అడుగు వేసింది. ఇరాన్ పార్లమెంట్ స్పీకర్ మహమ్మద్ బాగర్ గాలిబాఫ్ వంటి సంస్కరణవాదులు చర్చల ద్వారా సమస్యను పరిష్కరించుకోవాలని చూస్తుండగా, ఐఆర్‌జీసీ కమాండర్లు మాత్రం వెనక్కి తగ్గేందుకు ఇష్టపడటం లేదని సమాచారం. ఈ అనిశ్చితిని గమనించిన ట్రంప్, ఇరాన్ ఒక నిర్ణయాత్మకమైన ప్రతిపాదనను సిద్ధం చేసుకునేందుకు వీలుగా గడువును పొడిగించారు. ఈ నిర్ణయం పట్ల అంతర్జాతీయ సమాజం హర్షం వ్యక్తం చేస్తోంది. చమురు ధరల పెరుగుదల ,ప్రపంచ ఆర్థిక వ్యవస్థపై యుద్ధ ప్రభావం పడకుండా ఉండేందుకు ఈ పొడిగింపు ఎంతో దోహదపడుతుందని నిపుణులు విశ్లేషిస్తున్నారు.

మరోవైపు, ఇస్లామాబాద్‌లో జరగాల్సిన రెండో విడత చర్చల కోసం పాకిస్తాన్ ఇప్పటికే అన్ని ఏర్పాట్లు పూర్తి చేసింది. అమెరికా ఉపాధ్యక్షుడు జె.డి. వాన్స్ నేతృత్వంలోని బృందం ఏ క్షణమైనా బయలుదేరేందుకు సిద్ధంగా ఉంది. ఇరాన్ కూడా ఈ అదనపు సమయాన్ని ఉపయోగించుకుని తన ప్రతినిధి బృందాన్ని ఇస్లామాబాద్‌కు పంపే అవకాశం ఉందని దౌత్య వర్గాలు భావిస్తున్నాయి. అణు కార్యక్రమం, నౌకాయాన భద్రత ,ఆర్థిక ఆంక్షల తొలగింపు వంటి కీలక అంశాలపై ఇరు దేశాల మధ్య ఏకాభిప్రాయం కుదిరితే పశ్చిమ ఆసియాలో శాంతి నెలకొనే అవకాశం ఉంది. ప్రస్తుతానికి యుద్ధ ప్రమాదం తప్పినప్పటికీ, ఇరాన్ ఇచ్చే ప్రతిపాదనపైనే ఈ ప్రాంత భవిష్యత్తు ఆధారపడి ఉంది.

యుద్ధమా? శాంతికా?

• ముగుస్తున్న గడువు
• సందిగ్ధంలో అమెరికా-ఇరాన్ చర్చలు
• ప్రపంచవ్యాప్తంగా చమురు సెగలు

ఇస్లామాబాద్: అమెరికా, ఇరాన్ మధ్య కుదిరిన రెండు వారాల కాల్పుల విరమణ గడువు ముగుస్తున్న తరుణంలో, ఇరు దేశాల మధ్య జరగాల్సిన రెండో విడత శాంతి చర్చలపై సందిగ్ధత నెలకొంది. బుధవారం తెల్లవారుజామున ఈ గడువు ముగియనుండగా, అటు వాషింగ్టన్, ఇటు టెహ్రాన్ నుంచి వస్తున్న పరస్పర హెచ్చరికలు పశ్చిమ ఆసియాను మళ్లీ యుద్ధ మేఘాల వైపు నెడుతున్నాయి. చర్చల కోసం పాకిస్తాన్‌ సిద్ధమైనప్పటికీ, ఇప్పటివరకు అమెరికా, ఇరాన్ ప్రతినిధులు ఇస్లామాబాద్ చేరుకోకపోవడం ఆందోళన కలిగిస్తోంది.

• హెచ్చరించిన ట్రంప్.. స్పందించని ఇరాన్

అమెరికా అధ్యక్షుడు డొనాల్డ్ ట్రంప్ ఈ ఉదయం మాట్లాడుతూ, గడువులోగా ఒప్పందం కుదరకపోతే ఇరాన్‌పై తిరిగి "భారీగా బాంబు దాడులు" ప్రారంభిస్తామని హెచ్చరించారు. కాల్పుల విరమణను పొడిగించే ఉద్దేశం తనకు లేదని, చర్చల ద్వారా ఇరాన్ తనను తాను కాపాడుకోవాలని ఆయన స్పష్టం చేశారు. అయితే, అమెరికా నావికా దళాలు అంతర్జాతీయ జలాల్లో ఇరాన్ చమురు నౌకలను అడ్డుకోవడంపై ఇరాన్ మండిపడుతోంది. అమెరికా వైఖరి "అంగీకారయోగ్యం కాదు" అని, చర్చలకు హాజరవ్వడంపై తాము ఇంకా తుది నిర్ణయం తీసుకోలేదని ఇరాన్ విదేశాంగ శాఖ ప్రకటించింది.

చమురు ధరల పెరుగుదల.. యూరప్‌లో ఆందోళన

హార్ముజ్ జలసంధిపై ఇరాన్ పట్టు బిగించడంతో అంతర్జాతీయ మార్కెట్‌లో చమురు ధరలు మండిపోతున్నాయి. బ్రెంట్ క్రూడ్ ధర ప్రస్తుతం బ్యారెల్‌కు 95 డాలర్లకు చేరుకుంది. ఇది యుద్ధం ప్రారంభమైనప్పటి కంటే 30 శాతం ఎక్కువ. అటు ఐరోపా దేశాల్లో విమాన ఇంధనం నిల్వలు మరో ఆరు వారాలకు మాత్రమే సరిపోతాయని నిపుణులు హెచ్చరిస్తున్నారు. ఈ నేపథ్యంలో యూరోపియన్ యూనియన్ దేశాల మంత్రులు బ్రస్సెల్స్‌లో అత్యవసర సమావేశం నిర్వహించారు.

• అంతర్జాతీయ పరిణామాలు - ముఖ్యాంశాలు

నౌకల స్వాధీనం: అమెరికా దళాలు 'టిఫానీ' అనే ఇరాన్ చమురు నౌకను హిందూ మహాసముద్రంలో అదుపులోకి తీసుకున్నాయి. దీనిపై ఇరాన్ ఆగ్రహం వ్యక్తం చేస్తూ, ఇది "సముద్రపు దొంగతనం" అని మండిపడింది.

పాకిస్తాన్ మధ్యవర్తిత్వం: చర్చల కోసం ఇస్లామాబాద్‌లో వేలాది మంది భద్రతా సిబ్బందిని మోహరించారు. పాక్ విదేశాంగ మంత్రి ఇషాక్ దార్ అమెరికా , చైనా రాయబారులతో భేటీ అయి, శాంతి కోసం ప్రయత్నిస్తున్నారు.

ఇజ్రాయెల్ సైనికులకు జైలు: లెబనాన్‌లో ఏసుక్రీస్తు విగ్రహాన్ని ధ్వంసం చేసిన ఇద్దరు ఇజ్రాయెల్ సైనికులకు ఆ దేశ సైన్యం 30 రోజుల జైలు శిక్ష విధించింది.

లెబనాన్ చర్చలు: ఇజ్రాయెల్, లెబనాన్ మధ్య దౌత్యపరమైన చర్చలు ఈ గురువారం వాషింగ్టన్‌లో ప్రారంభం కానున్నాయి. హిజ్బుల్లాను నిరాయుధులను చేయడమే లక్ష్యంగా ఈ చర్చలు జరగనున్నాయి.

• భారీ ప్రాణనష్టం

యుద్ధం ప్రారంభమైనప్పటి నుంచి ఇప్పటివరకు ఇరాన్‌లో సుమారు 3,375 మంది, లెబనాన్‌లో 2,290 మంది ప్రాణాలు కోల్పోయారు. ఇజ్రాయెల్, గల్ఫ్ దేశాలు, అమెరికా సైనికులు కూడా ఈ యుద్ధంలో బలయ్యారు. బుధవారం తెల్లవారుజామున గడువు ముగిసేలోపు చర్చలు ప్రారంభం కాకపోతే, పశ్చిమ ఆసియాలో మరోసారి బాంబుల మోత తప్పదని విశ్లేషకులు భావిస్తున్నారు.

అల్లు అర్జున్ 'రాకా' కోసం అదిరిపోయే ప్లాన్

• అంతర్జాతీయ స్థాయిలో మ్యూజిక్.. 
• సెన్సేషనల్ కంపోజర్ సాయి అభ్యంకర్ ఆసక్తికర వ్యాఖ్యలు

హైదరాబాద్: టాలీవుడ్ ఐకాన్ స్టార్ అల్లు అర్జున్, స్టార్ డైరెక్టర్ అట్లీ కాంబినేషన్‌లో వస్తున్న క్రేజీ ప్రాజెక్ట్ 'రాకా' (Raaka) మ్యూజిక్ పరంగా సరికొత్త చరిత్ర సృష్టించేందుకు సిద్ధమవుతోంది. ఈ చిత్రానికి సంగీతం అందిస్తున్న యువ సంచలనం సాయి అభ్యంకర్, సినిమా ఆల్బమ్ గురించి తాజాగా పలు ఆసక్తికర విషయాలను పంచుకున్నారు. దర్శకుడు అట్లీకి మొదటి రోజు నుంచే ఈ సినిమా సౌండ్ ట్రాక్ విషయంలో ఒక విభిన్నమైన, స్పష్టమైన ఆలోచన ఉందని, దాని ప్రకారం సంగీతాన్ని అంతర్జాతీయ స్థాయికి (International Standard) తీసుకెళ్లేలా తాము ప్లాన్ చేస్తున్నామని సాయి వెల్లడించారు. ఈ సినిమా కోసం ఇప్పటికే కొన్ని అద్భుతమైన ట్యూన్స్‌ను సిద్ధం చేశామని, ప్రస్తుతం లిరిక్స్ ,ఇతర పనులపై దృష్టి సారించామని ఆయన పేర్కొన్నారు.

అల్లు అర్జున్‌కు సంగీతం పట్ల ఉన్న అమితమైన ఆసక్తి, అట్లీ విజన్ కలవడంతో ఈ ఆల్బమ్ చాలా స్పెషల్‌గా ఉండబోతోందని సాయి అభ్యంకర్ ధీమా వ్యక్తం చేశారు. కేవలం దేశీయ ప్రేక్షకులే కాకుండా ప్రపంచవ్యాప్త సంగీత ప్రియులను ఆకట్టుకునేలా అంతర్జాతీయ గాయకులు, గేయ రచయితలతో (International Collaborations) కలిసి పనిచేస్తున్నట్లు ఆయన తెలిపారు. సైన్స్ ఫిక్షన్ , సూపర్‌హీరో ఎలిమెంట్స్‌తో కూడిన భారీ బడ్జెట్ చిత్రంగా తెరకెక్కుతున్న 'రాకా'లో దీపికా పదుకొనే హీరోయిన్‌గా నటిస్తుండగా, యోగి బాబు కీలక పాత్ర పోషిస్తున్నారు. ఇప్పటికే 'కచ్చి సేరా' వంటి ఇండిపెండెంట్ సాంగ్స్‌తో వైరల్ అయిన సాయి అభ్యంకర్, అల్లు అర్జున్ సినిమాతో గ్లోబల్ లెవల్‌లో తన ముద్ర వేసేందుకు సిద్ధమవుతున్నారు. ఈ సినిమా అప్‌డేట్‌తో మెగా అభిమానుల్లో అంచనాలు అప్పుడే ఆకాశాన్ని తాకాయి.

హార్ముజ్ జలసంధిని వెంటనే తెరవండి

•  సౌదీ యువరాజుతో చైనా అధ్యక్షుడు షీ జిన్‌పింగ్ కీలక చర్చలు.. 
• పశ్చిమ ఆసియాలో శాంతి కోసం గళమెత్తిన డ్రాగన్

బీజింగ్: పశ్చిమ ఆసియాలో అమెరికా-ఇరాన్ మధ్య కొనసాగుతున్న ఉద్రిక్తతలపై చైనా అధ్యక్షుడు షీ జిన్‌పింగ్ ఎట్టకేలకు తన మౌనాన్ని వీడారు. సోమవారం సౌదీ అరేబియా యువరాజు మహమ్మద్ బిన్ సల్మాన్‌తో జరిపిన అరుదైన ఫోన్ సంభాషణలో, ప్రపంచ ఇంధన రవాణాకు అత్యంత కీలకమైన హార్ముజ్ జలసంధిని వెంటనే పునఃప్రారంభించాలని ఆయన విజ్ఞప్తి చేశారు. పశ్చిమ ఆసియాలో తక్షణమే సమగ్ర కాల్పుల విరమణ అమలులోకి రావాలని, వివాదాలన్నింటినీ రాజకీయ, దౌత్య మార్గాల్లోనే పరిష్కరించుకోవాలని ఆయన ఈ సందర్భంగా స్పష్టం చేశారు. హార్ముజ్ జలసంధి ద్వారా స్వేచ్ఛా నౌకాయానం కొనసాగడం అనేది ప్రాంతీయ దేశాలతో పాటు అంతర్జాతీయ సమాజం  ఉమ్మడి ప్రయోజనమని జిన్‌పింగ్ ఉద్ఘాటించారు.

ఫిబ్రవరి 28న యుద్ధం ప్రారంభమైనప్పటి నుండి హార్ముజ్ జలసంధి మూతపడటం ప్రపంచంలోనే అతిపెద్ద గ్యాస్, చమురు దిగుమతిదారు అయిన చైనాపై తీవ్ర ప్రభావం చూపుతోంది. తన చమురు అవసరాల్లో దాదాపు 40 శాతం మధ్యప్రాచ్యం నుండే పొందుతున్న చైనాకు, ఈ దిగ్బంధనం కారణంగా ఆర్థికంగా భారీ నష్టం వాటిల్లుతోంది. మార్చి నెలలో ఆ ప్రాంతానికి చైనా ఎగుమతులు ఏకంగా 43 శాతం పడిపోవడం బీజింగ్‌ను ఆందోళనకు గురిచేస్తోంది. గత శుక్రవారం ఇరాన్ ఈ జలసంధిని తెరుస్తున్నట్లు ప్రకటించినప్పటికీ, అమెరికా తన దిగ్బంధనాన్ని ఎత్తివేయడానికి నిరాకరించడం, ఇరాన్ నౌకపై దాడులు చేయడంతో పరిస్థితి మళ్ళీ మొదటికి వచ్చింది. ఈ నేపథ్యంలోనే షీ జిన్‌పింగ్ నేరుగా సౌదీ అరేబియా మద్దతును కోరుతూ రంగంలోకి దిగారు.

మరోవైపు, పశ్చిమ ఆసియా దేశాలు తమ భవిష్యత్తును, విధిని తమ చేతుల్లోకి తీసుకోవాలని జిన్‌పింగ్ పిలుపునివ్వడం విశేషం. ఇది భద్రత కోసం అమెరికాపై అతిగా ఆధారపడటాన్ని తగ్గించుకోవాలనే పరోక్ష సంకేతంగా విశ్లేషకులు భావిస్తున్నారు. అంతర్జాతీయ నిబంధనల ప్రకారం సముద్ర మార్గాల్లో స్వేచ్ఛా రవాణాకు ఆటంకం కలిగించకూడదని ఆయన గుర్తుచేశారు. ఒకవైపు అమెరికా అధ్యక్షుడు ట్రంప్ 'పాలనా మార్పు' సంకేతాలిస్తుంటే, చైనా మాత్రం ప్రాంతీయ శక్తులు ఏకమై శాంతిని నెలకొల్పాలని కోరుతోంది. చైనా తన మధ్యవర్తిత్వంతో ఈ సంక్షోభాన్ని ఎలా చక్కదిద్దుతుందనేది ఇప్పుడు ప్రపంచవ్యాప్తంగా ఆసక్తికరంగా మారింది.

పశ్చిమ ఆసియాలో 'నిశ్శబ్ద' చర్చలు

 

• ఇరాన్‌తో శాంతి ఒప్పందానికి జె.డి. వాన్స్ ఆఖరి ప్రయత్నం
• 24 గంటల్లో ముగియనున్న కాల్పుల విరమణ గడువు

పశ్చిమ ఆసియాలో శాంతి నెలకొంటుందా లేదా మరో భీకర యుద్ధం మొదలవుతుందా అన్న ఉత్కంఠకు తెరపడటానికి కేవలం 24 గంటల సమయం మాత్రమే మిగిలి ఉంది. అమెరికా, ఇరాన్ మధ్య కుదిరిన రెండు వారాల కాల్పుల విరమణ గడువు ఏప్రిల్ 22తో ముగియనుండటంతో, ఇస్లామాబాద్ వేదికగా జరగాల్సిన రెండో విడత చర్చలపై అనిశ్చితి కొనసాగుతోంది. ఈ క్లిష్ట సమయంలో అమెరికా ఉపాధ్యక్షుడు జె.డి. వాన్స్ మరోసారి శాంతి రాయబారిగా చర్చల కోసం బయలుదేరారు. అధ్యక్షుడు డొనాల్డ్ ట్రంప్ తన విలక్షణమైన శైలిలో కఠినమైన హెచ్చరికలు జారీ చేస్తుంటే, వాన్స్ మాత్రం ఇరాన్ వైపు నుండి 'యుద్ధ వ్యతిరేక మితవాది'గా గుర్తింపు పొంది, చర్చల ద్వారా పరిష్కారం కనుగొంటారని ప్రపంచం ఆశగా ఎదురుచూస్తోంది.

గత ఆరు వారాలుగా సాగుతున్న ఈ యుద్ధం ఇప్పటికే 5,000 మందికి పైగా ప్రాణాలను బలితీసుకోగా, సుమారు 60 బిలియన్ డాలర్ల ఆస్తి నష్టం వాటిల్లింది. దీనికి అదనంగా ప్రపంచవ్యాప్తంగా చమురు సంక్షోభం తలెత్తి ధరలు ఆకాశాన్ని తాకుతున్నాయి. మొదటి విడత చర్చల్లో ఎటువంటి స్పష్టమైన ఒప్పందం కుదరకపోవడంతో, ఈ రెండో విడత చర్చలు వాన్స్ రాజకీయ భవిష్యత్తుకు కూడా అత్యంత కీలకంగా మారాయి. 2028 అధ్యక్ష ఎన్నికల బరిలో నిలవాలని భావిస్తున్న ఆయనకు, ఈ యుద్ధాన్ని ముగించిన నేతగా గుర్తింపు లభిస్తే అది పెద్ద ఎత్తున కలిసివచ్చే అవకాశం ఉంది. అయితే, అమెరికా దళాలు ఇటీవల ఇరాన్ నౌకను స్వాధీనం చేసుకోవడం ఇరాన్‌ను తీవ్ర ఆగ్రహానికి గురిచేసింది, దీంతో వారు ఈ చర్చలకు హాజరవుతారా లేదా అన్నది ఇంకా ఖరారు కాలేదు.

మరోవైపు, ఇరాన్ చర్చలకు రాకపోతే ఏప్రిల్ 22 తర్వాత భారీ ఎత్తున బాంబు దాడులు జరుగుతాయని ట్రంప్ హెచ్చరించడం పరిస్థితి తీవ్రతను తెలియజేస్తోంది. అమెరికాలో కూడా యుద్ధం పట్ల ప్రజల్లో వ్యతిరేకత పెరుగుతోందని, 66 శాతం మంది ప్రజలు తక్షణమే పోరాటం ముగియాలని కోరుకుంటున్నారని తాజా సర్వేలు చెబుతున్నాయి. ఇరాన్ అణు కేంద్రాలను లక్ష్యంగా చేసుకుని అమెరికా దాడులు చేసే ప్రమాదం ఉన్న తరుణంలో, వచ్చే కొద్ది గంటలు పశ్చిమ ఆసియా భవిష్యత్తును నిర్ణయించనున్నాయి. శాంతి స్థాపన కోసం వాన్స్ చేస్తున్న ఈ ఆఖరి ప్రయత్నం సఫలమవుతుందా లేక గల్ఫ్ ప్రాంతం మరో పెను విధ్వంసానికి సాక్షిగా నిలుస్తుందా అన్నది వేచి చూడాలి.

సమయం నా శత్రువు కాదు

• ఇరాన్ యుద్ధ విమర్శకులపై ట్రంప్ ఘాటు వ్యాఖ్యలు
•  అణు ఒప్పందంపై వెనక్కి తగ్గేదే లేదని స్పష్టీకరణ

పశ్చిమ ఆసియాలో ఇరాన్‌తో కొనసాగుతున్న ఉద్రిక్తతల నేపథ్యంలో అమెరికా అధ్యక్షుడు డొనాల్డ్ ట్రంప్ తన విమర్శకులపై విరుచుకుపడ్డారు. ఇస్లామాబాద్‌లో జరగాల్సిన శాంతి చర్చల భవిష్యత్తుపై అనిశ్చితి నెలకొన్న తరుణంలో, ఒప్పందం కోసం తనపై ఎటువంటి ఒత్తిడి లేదని ఆయన స్పష్టం చేశారు. తన 'ట్రూత్ సోషల్' ప్లాట్‌ఫామ్ వేదికగా వరుస పోస్ట్‌లు చేసిన ట్రంప్, ఇరాన్ యుద్ధంలో అమెరికా భారీ విజయం దిశగా సాగుతోందని ధీమా వ్యక్తం చేశారు. గత 47 ఏళ్లుగా ఇతర అధ్యక్షులు ప్రదర్శించని ధైర్యం, ముందుచూపుతో తాము ఇరాన్ సృష్టించిన గందరగోళాన్ని చక్కదిద్దుతున్నామని, ఈ విషయంలో సమయం తనకు శత్రువు కాదని ఆయన పేర్కొన్నారు.

ముఖ్యంగా ఇరాన్‌పై దాడి చేయమని ఇజ్రాయెల్ ప్రధాని నెతన్యాహు తనను ఒప్పించారనే వార్తలను ట్రంప్ తీవ్రంగా ఖండించారు. అక్టోబర్ 7 నాటి పరిణామాలు, ఇరాన్ వద్ద అణ్వాయుధాలు ఉండకూడదనే తన జీవితకాల దృఢ నిశ్చయమే ఈ యుద్ధానికి కారణమని ఆయన వివరించారు. ఇరాన్  కొత్త నాయకత్వం తెలివిగా వ్యవహరిస్తే ఆ దేశానికి గొప్ప భవిష్యత్తు ఉంటుందని, అయితే అక్కడ పాలనా మార్పు  జరగాలనే సంకేతాలను ఆయన ఇచ్చారు. ఇరాన్ విషయంలో తమ ఫలితాలు అద్భుతంగా ఉండబోతున్నాయని ఆయన ఈ సందర్భంగా జోస్యం చెప్పారు.

గతంలో బరాక్ ఒబామా, జో బైడెన్ హయాంలో కుదిరిన అణు ఒప్పందం దేశ భద్రతకే ముప్పుగా మారిందని, అది అణ్వాయుధాల తయారీకి రహదారిలా ఉండేదని ట్రంప్ విమర్శించారు. తాము ఇప్పుడు చేయబోయే ఒప్పందం గత ఒప్పందం కంటే ఎంతో మెరుగ్గా ఉంటుందని ఆయన హామీ ఇచ్చారు. ఒకవేళ తాను పాత ఒప్పందాన్ని రద్దు చేయకపోయి ఉంటే, ఇప్పటికే ఇజ్రాయెల్, మధ్యప్రాచ్యంలోని అమెరికా సైనిక స్థావరాలపై అణ్వాయుధ దాడులు జరిగి ఉండేవని ఆయన సంచలన వ్యాఖ్యలు చేశారు. తాజా శాంతి చర్చలు ఎలా సాగినా, అమెరికా ప్రయోజనాలే పరమావధిగా అడుగులు వేస్తామని ట్రంప్ స్పష్టం చేశారు.

దేశంలో మారుతున్న మావోయిస్టుల వ్యూహం

• బలహీనపడిన వ్యవస్థలు.. 
• తుపాకీ పట్టిన సాయుధ పోరాటం నుండి 'గ్రామ్షీ' సిద్ధాంతం వైపు అడుగులు?

భారతదేశంలో మావోయిజం దాదాపు అంతరించిపోయిందని ప్రభుత్వ వర్గాలు ప్రకటిస్తున్న తరుణంలో, ఆ ఉద్యమం తన ఉనికిని చాటుకోవడానికి సరికొత్త మార్గాలను అన్వేషిస్తున్నట్లు తాజా విశ్లేషణలు వెల్లడిస్తున్నాయి. కేంద్ర నాయకత్వం బలహీనపడటం, బస్తర్, దండకారణ్యం వంటి ప్రాంతాల్లో భద్రతా దళాల నిరంతర ఆపరేషన్ల వల్ల సీపీఐ (మావోయిస్టు) సంస్థాగత నిర్మాణం దెబ్బతిన్న మాట వాస్తవమే అయినప్పటికీ, క్షేత్రస్థాయిలో ఇంకా కేడర్ ఉనికి కొనసాగుతూనే ఉంది. ముఖ్యంగా మాజీ ఉపాధ్యాయుడు, మావోయిస్టు పార్టీ మాజీ ప్రధాన కార్యదర్శి ముప్పాళ లక్ష్మణరావు (గణపతి) వంటి సీనియర్ నేతల ఉనికి ఈ ఉద్యమానికి ఇంకా సంకేతప్రాయంగా మిగిలి ఉంది. అయితే, మారుతున్న సామాజిక, రాజకీయ పరిస్థితుల నేపథ్యంలో ఈ ఉద్యమం తన భావజాలాన్ని, పోరాట పంథాను మార్చుకుంటున్నట్లు కనిపిస్తోంది.

ప్రస్తుతం మావోయిస్టు నెట్‌వర్క్‌లలో కొన్ని సంస్థాగత మార్పులు చోటుచేసుకుంటున్నాయి. ఉత్తర భారతదేశంలో తమ ప్రభావాన్ని విస్తరించుకోవడానికి 'నార్త్ కోఆర్డినేషన్ కమిటీ' (NCC) పేరుతో కొత్త విభాగాన్ని ఏర్పాటు చేసినట్లు సమాచారం. మరోవైపు, సాయుధ పోరాటం కంటే పౌర సమాజం, సాంస్కృతిక సంస్థలు, భావజాలపరమైన చర్చల ద్వారా ప్రభావితం చేయాలనే ఆంటోనియో గ్రామ్షీ సిద్ధాంతాల వైపు కొంతమంది మొగ్గు చూపుతున్నట్లు మేధావులు అభిప్రాయపడుతున్నారు. లెనినిస్ట్, మావోయిస్ట్ ఆలోచనలను యాంత్రికంగా కాకుండా, భారతీయ పరిస్థితులకు అనుగుణంగా మార్చుకోవాల్సిన అవసరం ఉందని వారు భావిస్తున్నారు. కోల్‌కతా వంటి నగరాల్లో వేలాది మందితో జరుగుతున్న బహిరంగ సమీకరణలు, విద్యార్థి, కార్యకర్తల బృందాల కార్యకలాపాలు ఈ భావజాలం ఇంకా సజీవంగా ఉందనడానికి నిదర్శనంగా నిలుస్తున్నాయి.

భద్రతాపరంగా చూస్తే, జార్ఖండ్‌లోని సారండా అడవుల్లో ఇటీవల జరిగిన ఐఈడీ పేలుడు వంటి ఘటనలు ఇంకా సవాళ్లు మిగిలే ఉన్నాయని గుర్తుచేస్తున్నాయి. అటవీ ప్రాంతాల్లో మందుపాతరలను గుర్తించడం భద్రతా దళాలకు ఇప్పటికీ కష్టతరమైన పనిగానే ఉంది. ప్రభుత్వం కేవలం సైనిక చర్యలకే పరిమితం కాకుండా, మావోయిజం ప్రభావిత ప్రాంతాల్లో అభివృద్ధి పనులను కూడా వేగవంతం చేస్తోంది. భూమి హక్కులు, ఆర్థిక అసమానతలు, వనరుల పంపిణీ వంటి మౌలిక సమస్యలు పరిష్కారం కానంత వరకు ఈ సమస్యకు శాశ్వత పరిష్కారం దొరకదని పౌర సమాజం వాదిస్తోంది. మొత్తానికి, సంప్రదాయ మావోయిస్టు ఉద్యమం బలహీనపడినా, అది ఇప్పుడు కొత్త రూపంలో, కొత్త వ్యూహాలతో రూపాంతరం చెందుతున్న సంధి దశలో ఉంది.

మహిళా రిజర్వేషన్లపై వెనక్కి తగ్గని కేంద్రం

• బిల్లు వీగిపోయినా 2029 లక్ష్యంగా కొత్త వ్యూహాలు
• విపక్షాల ప్రతిఘటనను ఎదుర్కొనేందుకు సిద్ధమవుతున్న మోదీ ప్రభుత్వం

మహిళా రిజర్వేషన్లకు సంబంధించిన రాజ్యాంగ సవరణ బిల్లు లోక్‌సభలో ఆగిపోయినప్పటికీ, 2029 ఎన్నికల నాటికి 33 శాతం కోటాను అమలుచేయాలనే పట్టుదలతో కేంద్ర ప్రభుత్వం ఉంది. ప్రధాని నరేంద్ర మోదీ నేతృత్వంలోని ప్రభుత్వం ఈ లక్ష్యం కోసం బహుముఖ వ్యూహాలను సిద్ధం చేస్తోందని విశ్వసనీయవర్గాల సమాచారం. లోక్‌సభలో 131వ రాజ్యాంగ సవరణ బిల్లు విఫలమైనా, కేంద్రపాలిత ప్రాంతాలు, నియోజకవర్గాల పునర్విభజనకు సంబంధించిన మిగిలిన రెండు బిల్లులను ప్రభుత్వం ఇంకా ఉపసంహరించుకోలేదు. వీటిని తమకు అనుకూలమైన సమయంలో ఓటింగ్‌కు తెచ్చే అవకాశం ఉంది. 2023లో ఆమోదించిన 'నారీ శక్తి వందన్ అధినియం' (106వ రాజ్యాంగ సవరణ) ఇప్పటికే అమలులో ఉన్నందున, మహిళా రిజర్వేషన్ల మార్గం పూర్తిగా మూసుకుపోలేదని నిపుణులు అభిప్రాయపడుతున్నారు.

వచ్చే లోక్‌సభ ఎన్నికల నాటికి రిజర్వేషన్లు అమలు కావాలంటే ప్రభుత్వం ముందు ప్రధానంగా మూడు ప్రత్యామ్నాయాలు ఉన్నాయి. మొదటిది, అన్ని రాజకీయపార్టీలతో చర్చలు జరిపి, అవసరమైతే వర్షాకాల సమావేశాల్లో బిల్లును తిరిగి ప్రవేశపెట్టడం. రెండోది, లోక్‌సభ సీట్ల సంఖ్యను పెంచకుండా కేవలం నియోజకవర్గాల సరిహద్దులను మార్చడం ద్వారా రిజర్వేషన్లు కల్పించడం. దీనిపై రాజకీయ ఏకాభిప్రాయం సాధించడం సులభమని ప్రభుత్వం భావిస్తోంది. మూడోది, ఆర్టికల్ 334ఏను సవరించి, నియోజకవర్గాల పునర్విభజన (డీలిమిటేషన్)తో సంబంధం లేకుండా ప్రస్తుతం ఉన్న 543 సీట్లపైనే రిజర్వేషన్లను అమలు చేయడం. ప్రస్తుతం జరుగుతున్న జనాభా గణన 2027 నాటికి పూర్తయ్యే అవకాశం ఉన్నందున, ఆ తర్వాత డీలిమిటేషన్ ప్రక్రియను వేగవంతం చేయడం ద్వారా 2029 లక్ష్యాన్ని చేరుకోవచ్చని కేంద్రం అంచనా వేస్తోంది.

మరోవైపు, ఈ అంశంపై రాజకీయంగా దూకుడు పెంచాలని కేంద్ర ప్రభుత్వం నిర్ణయించింది. ముఖ్యంగా పశ్చిమ బెంగాల్, తమిళనాడు అసెంబ్లీ ఎన్నికల నేపథ్యంలో మహిళా బిల్లును అడ్డుకున్న విపక్షాలను ప్రజల ముందు దోషులుగా నిలబెట్టేందుకు దేశవ్యాప్త నిరసనలకు పిలుపునిచ్చింది. మహిళల హక్కులను కాలరాసిన విపక్షాల అసలు రంగును ఎండగట్టడమే లక్ష్యంగా బీజేపీ తన ప్రచారాన్ని ముమ్మరం చేస్తోంది. చట్టపరమైన అడ్డంకులను తొలగించుకుంటూనే, రాజకీయంగా విపక్షాలను ఇరకాటంలో పెట్టేలా మోదీ ప్రభుత్వం అడుగులు వేస్తోంది.