- ఇరాన్ పాలకులు నేడు ప్రాణాలతో ఉన్నారంటే చర్చలకు ఇస్తున్న అవకాశం మాత్రమే
- అమెరికా అధ్యక్షుడు డొనాల్డ్ ట్రంప్ తీవ్ర హెచ్చరిక
వాషింగ్టన్, ఏప్రిల్ 10: అంతర్జాతీయ ఇంధన రవాణాకు అత్యంత కీలకమైన హార్ముజ్ జలసంధి గుండా వెళ్లే నౌకలపై 'ట్రాన్సిట్ ఫీజు' వసూలు చేస్తామన్న ఇరాన్ ప్రతిపాదనపై అమెరికా అధ్యక్షుడు డొనాల్డ్ ట్రంప్ నిప్పులు చెరిగారు. ఈ మేరకు తన సామాజిక మాధ్యమ వేదిక ద్వారా ఇరాన్ పాలకులకు ఆయన కఠినమైన హెచ్చరిక జారీ చేశారు. ఇరాన్ పాలకులు నేడు ప్రాణాలతో ఉన్నారంటే అది కేవలం చర్చల కోసం తాము ఇస్తున్న అవకాశం వల్ల మాత్రమేనని, ఆ విషయాన్ని వారు మర్చిపోకూడదని ట్రంప్ ఘాటుగా వ్యాఖ్యానించారు. అంతర్జాతీయ జలమార్గాలపై ఆధిపత్యం చెలాయించాలని చూస్తే తీవ్ర పరిణామాలు ఉంటాయని ఆయన స్పష్టం చేశారు.
హార్ముజ్ జలసంధిని ప్రపంచ చమురు సరఫరాలో ఒక ముఖ్యమైన మార్గంగా పరిగణిస్తారు. దీనిని అడ్డుకోవడం లేదా ఇక్కడ పన్నులు వసూలు చేయడం వంటి చర్యలు ప్రపంచ ఆర్థికవ్యవస్థను దెబ్బతీస్తాయని అమెరికా మొదటి నుంచి హెచ్చరిస్తోంది. ఈ నేపథ్యంలో ఇరాన్ చేసిన తాజా ప్రతిపాదన అమెరికాను ఆగ్రహానికి గురిచేసింది. తమను రెచ్చగొట్టే చర్యలకు దిగితే సహించేది లేదని, చర్చలకు పిలిచింది కేవలం శాంతియుత పరిష్కారం కోసమే తప్ప ఇరాన్ అనాలోచిత నిర్ణయాలను అంగీకరించడానికి కాదని ట్రంప్ పేర్కొన్నారు. ఈ హెచ్చరికలు ఇస్లామాబాద్లో జరగబోయే అమెరికా-ఇరాన్ చర్చలకు ముందు రావడం అంతర్జాతీయ దౌత్య వర్గాల్లో కలకలం రేపుతోంది. ఒకవైపు శాంతి చర్చల కోసం ప్రతినిధి బృందాలను పంపిస్తూనే, మరోవైపు ఇరాన్ అగ్రనాయకత్వంపై ట్రంప్ ఈ స్థాయి విమర్శలు చేయడం చర్చల పక్షాన ఉత్కంఠను పెంచింది. తమ షరతులను అంగీకరించకపోతే ఇరాన్ ఉనికికే ప్రమాదం అన్నట్లుగా ట్రంప్ చేసిన వ్యాఖ్యలు పశ్చిమాసియాలో ఉద్రిక్తతలను మరింత పెంచేలా ఉన్నాయి.
No comments:
Post a Comment