బీజేపీకి కుల గణన అంటే భయం

 

• నియోజకవర్గాల పునర్విభజనపై కేంద్రం తొందరపాటును ప్రశ్నించిన అఖిలేష్ యాదవ్

లోక్‌సభలో గురువారం జరిగిన ప్రత్యేక సమావేశాల్లో సమాజ్‌వాదీ పార్టీ (ఎస్పీ) అధినేత అఖిలేష్ యాదవ్ కేంద్ర ప్రభుత్వంపై తీవ్రస్థాయిలో విమర్శలు గుప్పించారు. మహిళా రిజర్వేషన్ బిల్లును తాము మనస్ఫూర్తిగా స్వాగతిస్తున్నామని చెబుతూనే, దీనిని నియోజకవర్గాల పునర్విభజన (డీలిమిటేషన్) బిల్లుతో ముడిపెట్టి ఆకస్మికంగా తీసుకురావడంలోని ఆంతర్యాన్ని ఆయన తప్పుబట్టారు. కుల గణన జరిపితే వెనుకబడిన వర్గాల వాస్తవ గణాంకాలు బయటపడతాయని, తద్వారా ఆయా వర్గాలకు జనాభా ప్రాతిపదికన రిజర్వేషన్లు కల్పించాల్సి వస్తుందనే భయంతోనే బీజేపీ కుల గణనను వాయిదా వేస్తోందని ఆయన ఆరోపించారు. ప్రభుత్వం మహిళలను కేవలం ఒక రాజకీయ 'నినాదం'గా మారుస్తోందని, వారి అభ్యున్నతిపై నిజమైన చిత్తశుద్ధి ఉంటే తక్షణమే కుల గణన చేపట్టి అన్ని వర్గాల మహిళలకు న్యాయం చేయాలని డిమాండ్ చేశారు.

పునర్విభజన ప్రక్రియపై కేంద్రం ప్రదర్శిస్తున్న అత్యుత్సాహం వెనుక 'దొడ్డిదారి' రాజకీయాలు ఉన్నాయని అఖిలేష్ ధ్వజమెత్తారు. జనాభా లెక్కల ప్రక్రియ (Census) పూర్తి కాకుండానే, పాత గణాంకాల ఆధారంగా నియోజకవర్గాల సరిహద్దులను మార్చాలని చూడటం ప్రజలను వంచించడమేనని ఆయన పేర్కొన్నారు. ఓటర్ల జాబితాలో అక్రమాలు జరిగినప్పుడు తాము ప్రశ్నించామని, ఇప్పుడు ఆ వైఫల్యాలను కప్పిపుచ్చుకునేందుకే ప్రభుత్వం ఇటువంటి బిల్లులను హడావుడిగా ప్రవేశపెడుతోందని విమర్శించారు. బీజేపీ పాలిస్తున్న 21 రాష్ట్రాల్లో ఎంతమంది మహిళా ముఖ్యమంత్రులు ఉన్నారని ప్రశ్నిస్తూ, అధికారం కోసం మహిళలను ఒక పావుగా వాడుకుంటున్నారని మండిపడ్డారు.

సమాజ్‌వాదీ పార్టీ మహిళా రిజర్వేషన్లకు వ్యతిరేకం కాదని, అయితే ఓబీసీ , ముస్లిం మహిళలకు కూడా ఈ కోటాలో సముచిత స్థానం కల్పించాలని అఖిలేష్ స్పష్టం చేశారు. కేవలం నియోజకవర్గాల సంఖ్యను పెంచి రాజకీయ లబ్ధి పొందాలనే వ్యూహంతోనే ఈ పునర్విభజన బిల్లును తీసుకువచ్చారని, ఇది దేశ సమాఖ్య స్ఫూర్తికి విరుద్ధమని ఆయన పేర్కొన్నారు. అసంపూర్తిగా ఉన్న ఈ బిల్లులను వెనక్కి తీసుకుని, శాస్త్రీయంగా కుల గణన నిర్వహించిన తర్వాతే పునర్విభజన ప్రక్రియ చేపట్టాలని ఆయన డిమాండ్ చేశారు. ఈ చర్చ సందర్భంగా కేంద్ర హోం మంత్రి అమిత్ షా , అఖిలేష్ యాదవ్ మధ్య జరిగిన వాదోపవాదాలతో సభలో రాజకీయ వేడి రాజుకుంది.