యుద్ధక్షేత్రంలో అమెరికాకు భారీ ఎదురుదెబ్బ

•  ఇరాన్ గగనతలంలో కూలిన ఎఫ్-15 యుద్ధ విమానం
•  గాలింపు చర్యల్లో ఉన్న హెలికాప్టర్లపై కూడా దాడులు
• పైలట్ కోసం ఇరాన్ రివార్డు ప్రకటన

న్యూఢిల్లీ/టెహ్రాన్: అమెరికా-ఇరాన్ మధ్య సాగుతున్న యుద్ధం కీలక దశకు చేరుకుంది. ఫిబ్రవరి 28న యుద్ధం ప్రారంభమైన తర్వాత తొలిసారిగా అమెరికాకు చెందిన అత్యాధునిక యుద్ధ విమానాలు ఇరాన్ దళాల చేతిలో ధ్వంసమయ్యాయి. శుక్రవారం జరిగిన వేర్వేరు ఘటనల్లో ఒక 'ఎఫ్-15ఈ స్ట్రైక్ ఈగిల్' (F-15E Strike Eagle),ఒక 'ఏ-10 వార్‌హాగ్' (A-10 Warthog) విమానాలను ఇరాన్ కూల్చివేసింది. వీటిలో ఎఫ్-15ఈ విమానం ఇరాన్ గగనతలంలోనే కూలిపోగా, అందులోని ఇద్దరు సిబ్బందిలో ఒకరిని అమెరికా ప్రత్యేక దళాలు సాహసోపేతంగా రక్షించాయి. అయితే, మరో పైలట్ ఆచూకీ ఇంకా లభించకపోవడంతో ఉత్కంఠ కొనసాగుతున్నది.

కూలిన విమానంలోని రెండో పైలట్ కోసం అమెరికా తన 'బ్లాక్ హాక్' హెలికాప్టర్లతో గాలింపు చర్యలు చేపట్టింది. ఈ క్రమంలో గాలింపులో ఉన్న రెండు హెలికాప్టర్లపై కూడా ఇరాన్ దాడులు చేసింది. తీవ్రంగా దెబ్బతిన్నప్పటికీ ఆ హెలికాప్టర్లు ఎలాగోలా ఇరాన్ సరిహద్దుల నుంచి బయటపడగలిగాయి. మరోవైపు, కువైట్ గగనతలంలో దెబ్బతిన్న ఏ-10 విమాన పైలట్ మాత్రం సురక్షితంగా బయటపడ్డారు. ఈ పరిణామాలపై స్పందించిన అమెరికా అధ్యక్షుడు డొనాల్డ్ ట్రంప్, ఇది యుద్ధమని, ఇటువంటి నష్టాలు చర్చలపై ప్రభావం చూపబోవని స్పష్టం చేశారు.

ఇరాన్ కౌంటర్ అటాక్

తమ గగనతలంలో తప్పించుకు తిరుగుతున్న అమెరికా పైలట్‌ను పట్టుకున్న వారికి భారీ బహుమతిని అందజేస్తామని ఇరాన్ అధికారిక మీడియా ప్రకటించింది. శత్రు దళాలను బంధించినా లేదా హతమార్చినా వారికి ప్రత్యేక పురస్కారాలు ఉంటాయని అక్కడి గవర్నర్ ప్రకటించడం గమనార్హం. ప్రభుత్వాన్ని మార్చడం కోసం యుద్ధం మొదలుపెట్టిన అమెరికా, ఇప్పుడు తమ పైలట్ల కోసం వెతుక్కునే స్థాయికి పడిపోయింది అంటూ ఇరాన్ పార్లమెంట్ స్పీకర్ మొహమ్మద్ బాకర్ ఖలీబాఫ్ ఎద్దేవా చేశారు.

ఫిబ్రవరి 28న ఇరాన్ సుప్రీం లీడర్ అలీ ఖమేనీ మరణం తర్వాత మొదలైన ఈ యుద్ధంలో ఇప్పటివరకు 1,900 మందికి పైగా మరణించారు. ఇందులో 13 మంది అమెరికా సైనికులు, 19 మంది ఇజ్రాయెల్ పౌరులు ఉన్నారు. ఇరాన్ వరుసగా యుద్ధ విమానాలను కూలుస్తున్నట్లు క్లెయిమ్ చేస్తున్న తరుణంలో, అమెరికా తన విమానాల నష్టాన్ని అధికారికంగా గుర్తించడం ఇదే మొదటిసారి. ప్రస్తుతం పశ్చిమాసియాలో యుద్ధ జ్వాలలు మరింత తీవ్రమయ్యే సూచనలు కనిపిస్తున్నాయి.