అమెరికా గొంతెమ్మ కోర్కెల వల్లే చర్చలు విఫలం

• ఇరాన్ ఘాటు విమర్శలు

ఇరాన్ , అమెరికా మధ్య పశ్చిమాసియాలో యుద్ధాన్ని ముగించే లక్ష్యంతో పాకిస్తాన్‌లో జరిగిన చరిత్రాత్మక చర్చలు ఎటువంటి ముగింపు లేకుండానే ముగిశాయి. 21 గంటల పాటు నిరంతరాయంగా సాగిన ఈ చర్చల ప్రతిష్ఠంభనకు అమెరికా చేస్తున్న "అహేతుకమైన డిమాండ్లే" కారణమని ఇరాన్ తీవ్రస్థాయిలో ధ్వజమెత్తింది. ఇరాన్ ప్రజల జాతీయ ప్రయోజనాలను కాపాడేందుకు తమ ప్రతినిధి బృందం అనేక చొరవలు చూపినప్పటికీ, అమెరికా పక్షం అంగీకరించలేని షరతులు విధించడంతో చర్చల్లో పురోగతి లేకుండాపోయిందని ఇరాన్ ప్రభుత్వ అధికారిక మీడియా స్పష్టం చేసింది. అయితే, మొదటి సమావేశంలోనే పూర్తిస్థాయి ఒప్పందం కుదురుతుందని ఎవరూ ఆశించలేదని, ప్రాంతీయ మిత్రదేశాల సహకారంతో సంప్రదింపులు కొనసాగుతాయని ఇరాన్ విదేశాంగ శాఖ ఆశాభావం వ్యక్తం చేసింది.

మరోవైపు, అమెరికా ఉపాధ్యక్షుడు జె.డి. వాన్స్ ఈ చర్చల వైఫల్యం ఇరాన్‌కే పెద్ద నష్టమని హెచ్చరించారు. అణు ఆయుధాలను ఎప్పటికీ తయారు చేయబోమని ఇరాన్ నుంచి కచ్చితమైన హామీని తాము ఆశించామని, కానీ వారు అందుకు నిరాకరించారని ఆయన పేర్కొన్నారు. యుద్ధ క్షేత్రంలో సాధించలేని రాయితీలను, ముఖ్యంగా అంతర్జాతీయ చమురు రవాణాకు కీలకమైన హార్ముజ్ జలసంధిపై నియంత్రణను, అణు సామగ్రి తొలగింపును చర్చల ద్వారా సాధించాలని అమెరికా ప్రయత్నిస్తోందని ఇరాన్ వార్తా సంస్థ తస్నిమ్ ఆరోపించింది. 1979 ఇస్లామిక్ విప్లవం తర్వాత ఇరు దేశాల మధ్య అత్యున్నత స్థాయిలో జరిగిన ఈ ప్రత్యక్ష చర్చలు ఎటువంటి ఒప్పందం లేకుండా ముగియడం అంతర్జాతీయంగా ఆందోళన కలిగిస్తోంది.

గత ఫిబ్రవరి 28న అమెరికా-ఇజ్రాయెల్ దళాలు ఇరాన్‌పై దాడి చేయడంతో మొదలైన ఈ యుద్ధం, వేలాది మంది ప్రాణాలను బలిగొంది. ఇరాన్ సుప్రీం లీడర్ అలీ ఖమేనీ మరణం తర్వాత ఉద్రిక్తతలు మరింత పెరగగా, ఈ మంగళవారం డొనాల్డ్ ట్రంప్ ప్రకటించిన రెండు వారాల కాల్పుల విరమణ ఒప్పందం ప్రస్తుతం కొనసాగుతోంది. ఈ విరామ సమయంలో శాంతిని నెలకొల్పేందుకు జె.డి. వాన్స్, జారెడ్ కుష్నర్ వంటి హేమాహేమీలతో కూడిన అమెరికా బృందం, ఇరాన్ పార్లమెంటరీ స్పీకర్ గాలీబాఫ్‌తో నేరుగా చర్చలు జరిపినప్పటికీ, అమెరికా విధించిన "రెడ్ లైన్స్" , ఇరాన్ పట్టుదల కారణంగా చర్చలు అసంపూర్తిగా మిగిలాయి. అమెరికా తమ చివరి ప్రతిపాదనను ఇరాన్ ముందు ఉంచి వెనుదిరగడంతో, తదుపరి పరిణామాలు ఎలా ఉంటాయోనన్న ఉత్కంఠ నెలకొంది.