డీఎంకే కురిపిస్తున్నవి మొసలి కన్నీళ్లే

• నియోజకవర్గాల పునర్విభజనపై విపక్షాల ఆందోళనను ఎండగట్టిన తేజస్వి సూర్య

మహిళా రిజర్వేషన్లు , నియోజకవర్గాల పునర్విభజన బిల్లుపై పార్లమెంట్‌లో జరుగుతున్న చర్చలో బీజేపీ ఎంపీ తేజస్వి సూర్య విపక్షాలపై, ముఖ్యంగా డీఎంకే (DMK) పార్టీపై తీవ్రస్థాయిలో విరుచుకుపడ్డారు. నియోజకవర్గాల పునర్విభజన వల్ల దక్షిణాది రాష్ట్రాల ప్రాతినిధ్యం తగ్గిపోతుందంటూ డీఎంకే నేతలు వ్యక్తం చేస్తున్న ఆందోళనలను ఆయన 'మొసలి కన్నీళ్లు'గా అభివర్ణించారు. మహిళా సాధికారత కోసం కేంద్రం చారిత్రక నిర్ణయాలు తీసుకుంటుంటే, ప్రాంతీయ వాదాన్ని రెచ్చగొట్టి అభివృద్ధిని అడ్డుకోవాలని విపక్షాలు ప్రయత్నిస్తున్నాయని ఆయన మండిపడ్డారు. దేశవ్యాప్తంగా లోక్‌సభ స్థానాల సంఖ్యను పెంచడం వల్ల అన్ని ప్రాంతాల ప్రజలకు మెరుగైన ప్రాతినిధ్యం లభిస్తుందని, దీనిని రాజకీయ కోణంలో చూడటం సరికాదని ఆయన హితవు పలికారు.

దక్షిణాది రాష్ట్రాల ప్రయోజనాలను కాపాడటంలో తమ ప్రభుత్వం ఎల్లప్పుడూ ముందుంటుందని తేజస్వి సూర్య స్పష్టం చేశారు. కేవలం జనాభా ప్రాతిపదికన మాత్రమే కాకుండా, శాస్త్రీయమైన పద్ధతుల్లో ఈ పునర్విభజన ప్రక్రియ జరుగుతుందని, ఏ ఒక్క రాష్ట్రానికి అన్యాయం జరగకుండా కేంద్రం జాగ్రత్తలు తీసుకుంటుందని ఆయన హామీ ఇచ్చారు. దశాబ్దాలుగా పెండింగ్‌లో ఉన్న మహిళా రిజర్వేషన్ల బిల్లును మోడీ ప్రభుత్వం కార్యరూపంలోకి తెస్తుంటే, దానిని అభినందించాల్సింది పోయి లేనిపోని అపోహలు సష్టించడం విచారకరమని ఆయన పేర్కొన్నారు. గతంలో కాంగ్రెస్ హయాంలో పునర్విభజన అంశంపై ఎలాంటి చర్యలు తీసుకోలేదని, ఇప్పుడు తాము సమస్యను పరిష్కరిస్తుంటే విమర్శలు చేయడం విడ్డూరంగా ఉందని ఆయన ఎద్దేవా చేశారు.

డీఎంకే ఎంపీలు సభలో లేవనెత్తిన అంశాలను తోసిపుచ్చుతూ, వారు కేవలం రాజకీయ ప్రయోజనాల కోసమే ప్రజల్లో భయాందోళనలు కలిగిస్తున్నారని తేజస్వి సూర్య ఆరోపించారు. మహిళలకు 33 శాతం రిజర్వేషన్లు కల్పించడం వల్ల దేశ రాజకీయాల్లో విప్లవాత్మక మార్పులు వస్తాయని, ఇది నారీ శక్తికి లభించిన గొప్ప గౌరవమని ఆయన కొనియాడారు. దక్షిణాది రాష్ట్రాల అభివృద్ధికి బీజేపీ కట్టుబడి ఉందని, నియోజకవర్గాల సంఖ్య పెరగడం వల్ల పాలన మరింత చేరువవుతుందని ఆయన వివరించారు. ఈ బిల్లుకు వ్యతిరేకంగా మాట్లాడటం అంటే మహిళా హక్కులకు వ్యతిరేకంగా మాట్లాడటమేనని ఆయన విపక్షాలకు హెచ్చరిక జారీ చేశారు.