ఎఫ్‌సీఆర్‌ఏ సవరణ బిల్లుపై శశి థరూర్ తీవ్ర విమర్శలు

• "దీని భారాన్ని సామాన్య భారతీయులే మోయాల్సి వస్తుంది" అని హెచ్చరిక

న్యూఢిల్లీ: వచ్చే వారం పార్లమెంట్‌లో కేంద్ర ప్రభుత్వం ప్రవేశపెట్టనున్న "విదేశీ విరాళాల క్రమబద్ధీకరణ (సవరణ) బిల్లు, 2026" (FCRA) పై కాంగ్రెస్ ఎంపీ శశి థరూర్ తీవ్రస్థాయిలో ధ్వజమెత్తారు. కేంద్రం ప్రతిపాదిస్తున్న ఈ సవరణలు కార్యాచరణ అధికారాలను ఒకేచోట కేంద్రీకరించే ప్రమాదకర చర్య అని, భారత ప్రభుత్వానికి, పౌర సమాజానికి  మధ్య ఉన్న సంబంధాన్ని ఇది పూర్తిగా తిరగరాస్తోందని ఆయన ఆందోళన వ్యక్తం చేశారు. 'ది ఇండియన్ ఎక్స్‌ప్రెస్' పత్రికలో రాసిన ఒక వ్యాసంలో శశి థరూర్ కేంద్ర ప్రభుత్వంపై ఘాటు వ్యాఖ్యలు చేశారు. స్వతంత్రంగా విమర్శించే గొంతులంటే సహించలేని వైఖరితోనే ప్రభుత్వం ఈ తరహా చర్యలకు పాల్పడుతోందని ఆరోపించారు.

"ప్రస్తుత ప్రభుత్వం లాభాపేక్ష లేని స్వచ్ఛంద సంస్థలను, థింక్ ట్యాంకులను, మానవ హక్కుల సంఘాలను అభివృద్ధి భాగస్వాములుగా చూడటం లేదు. వాటిని విదేశీ కుట్రలకు స్థావరాలుగా ముద్రవేస్తూ, వాటి ప్రధాన బలహీనత అయిన విదేశీ విరాళాలపై దెబ్బకొట్టేందుకు యత్నిస్తోంది." అని శశి థరూర్ విమర్శించారు. 

కొత్త బిల్లులో ప్రతిపాదించిన కీలక మార్పులు

ఆస్తుల స్వాధీనం: ఏదైనా సంస్థ యొక్క FCRA రిజిస్ట్రేషన్ రద్దయినా, స్వచ్ఛందంగా వదులుకున్నా లేదా పునరుద్ధరించకపోవడం వల్ల గడువు ముగిసినా... ఆ సంస్థకు చెందిన విదేశీ నిధులు , ఆ నిధులతో సమకూర్చుకున్న ఆస్తులను స్వాధీనం చేసుకునేందుకు ఒక 'ప్రత్యేక అధికారి' (Designated Authority) ని నియమించే అధికారం కేంద్రానికి లభిస్తుంది. ఆరాధనా స్థలాల పరిరక్షణ: ఒకవేళ స్వాధీనం చేసుకున్న ఆస్తి ఆరాధనా స్థలమైతే, దాని మతపరమైన ప్రాధాన్యత దెబ్బతినకుండా సదరు అధికారి చర్యలు తీసుకోవాల్సి ఉంటుంది.

లక్షలాది మంది సామాన్యులపై ప్రభావం

గతంలో తీసుకొచ్చిన కఠిన నిబంధనల వల్ల విదేశీ నిధులు ఏకంగా 87 శాతం మేర తగ్గిపోయాయని, ఫలితంగా వేలాది లౌకిక, సామాజిక సేవా సంస్థలు మూతపడ్డాయని థరూర్ గుర్తుచేశారు. ఇప్పుడు ఆస్తులను కూడా స్వాధీనం చేసుకునేలా చట్టాన్ని సవరించడం సేవా రంగాన్ని పూర్తిగా నిర్వీర్యం చేస్తుందని విమర్శించారు. కేరళలోని స్వచ్ఛంద సంస్థల ఉదాహరణను ప్రస్తావిస్తూ — శతాబ్ద కాలంగా క్రిస్టియన్ ట్రస్ట్‌లు నడుపుతున్న ఆసుపత్రులు, పాఠశాలలు, వైద్య కళాశాలలు కులమతాలకు అతీతంగా పేదలకు అత్యుత్తమ సేవలు అందిస్తున్నాయని తెలిపారు. గృహ మంత్రిత్వ శాఖ తీసుకునే ఒక్క నిర్ణయంతో 500 పడకల సేవా ఆసుపత్రి రాత్రికి రాత్రే ప్రభుత్వ ఆస్తిగా మారిపోయే ప్రమాదం ఉందని, దీనివల్ల అత్యవసర వైద్య సేవలు నిలిచిపోయి ఆసుపత్రులపై ఆధారపడే సామాన్య ప్రజలే తీవ్రంగా నష్టపోతారని థరూర్ హెచ్చరించారు.

పౌర సమాజంపై దాడిని ఎదుర్కొనేందుకు ప్రతిపక్షాల ఐక్యత

దేశాభివృద్ధికి, విద్య మరియు వైద్య రంగాలకు తరతరాలుగా సేవ చేసిన సంస్థలపై ఇలాంటి శిక్షాత్మక చట్టాలను రుద్దడం తీవ్ర అన్యాయమని ఆయన అభివర్ణించారు. ఈ ప్రజాస్వామ్య వ్యతిరేక బిల్లును పార్లమెంట్‌లో గట్టిగా నిరోధించాలని ప్రతిపక్షాలకు ఆయన పిలుపునిచ్చారు.

ఆధారాల ప్రకారం

కేంద్ర హోమ్‌శాఖ గణాంకాల ప్రకారం, 2019 నుండి 2022 మధ్యకాలంలో 13,520 సంస్థలు రూ. 55,741 కోట్ల విదేశీ విరాళాలను అందుకున్నాయి. కాగా, జూలై 15, 2026 నాటికి దేశంలో 14,449 సక్రియ FCRA లైసెన్సులు ఉండగా, 22,498 లైసెన్సులు రద్దయ్యాయి మరియు 15,212 లైసెన్సుల గడువు ముగిసింది.