దేశంలో నిర్వహించనున్న కులగణన తీరుపై కాంగ్రెస్ తీవ్ర అభ్యంతరం వ్యక్తం చేసింది. ప్రస్తుతం అనుసరిస్తున్న విధానం ప్రజలను మోసం చేసేలా ఉందని కాంగ్రెస్ ప్రధాన కార్యదర్శి (కమ్యూనికేషన్స్‌) జైరాం రమేశ్‌ విమర్శించారు. కేంద్ర ప్రభుత్వం కులగణనను శాస్త్రీయంగా, పారదర్శకంగా నిర్వహించాలని డిమాండ్‌ చేశారు. కులగణనపై కాంగ్రెస్ నేతలు ప్రధాని మోడీకి ఇప్పటికే పలు లేఖలు రాసినా ఇప్పటివరకు స్పందన రాలేదని ఆయన పేర్కొన్నారు. ప్రధాని మోడీ తొలుత కులగణనకు ఆసక్తి చూపలేదని, ఇప్పుడు కులగణన ప్రకటించిన తర్వాత వరుసగా మాట మార్చుతున్నారని జైరాం రమేశ్‌ ఆరోపించారు. ప్రస్తుత విధానాన్ని కాంగ్రెస్ అంగీకరించబోదని, ఇది కేవలం ‘వైట్‌వాష్‌’ మాత్రమేనని అన్నారు. కులాల పేర్లను ఓపెన్‌-ఎండెడ్‌గా నమోదు చేయడం వల్ల ఒకే కులానికి భిన్నమైన పేర్లు, ఉపకులాల పేర్లు నమోదై డేటా గందరగోళంగా మారే ప్రమాదం ఉందని కాంగ్రెస్ ఇప్పటికే ఆందోళన వ్యక్తం చేసింది. బిహార్‌, తెలంగాణలో అనుసరించిన విధానాలను పరిశీలించి దేశవ్యాప్తంగా మరింత సమగ్రంగా కులగణన చేపట్టాలని కాంగ్రెస్ కోరుతోంది. ఈ అంశాన్ని తాము వదిలిపెట్టబోమని జైరాం రమేశ్‌ స్పష్టం చేశారు.
No comments:
Post a Comment