హోర్ముజ్ జలసంధిపై మాదే పూర్తి ఆధిపత్యం

• ఇరాన్ ఏమీ చేయలేదంటూ డొనాల్డ్ ట్రంప్ సంచలన ప్రకటన

ప్రపంచ వాణిజ్యానికి అత్యంత కీలకమైన హోర్ముజ్ జలసంధిపై అమెరికా పూర్తి నియంత్రణ సాధించిందని, దానిని తమ వద్దే ఉంచుకుంటామని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. బుధవారం తన 'ట్రూత్ సోషల్' ఖాతాలో పోస్ట్ చేసిన ట్రంప్, గల్ఫ్ ప్రాంతంలో తమ నావికాదళ దిగ్బంధనాన్ని ప్రపంచమంతా "ఉక్కు గోడ"గా అభివర్ణిస్తోందని, దీనిని అడ్డుకోవడం ఇరాన్ వల్ల కాదని ధీమా వ్యక్తం చేశారు. ఇరాన్ వైమానిక, నౌకా వ్యవస్థలు పూర్తిగా ధ్వంసమయ్యాయని, ఆర్మీకి జీతాలు ఇచ్చే పరిస్థితి కూడా లేదని ఎద్దేవా చేశారు. ఇరాన్‌లో ద్రవ్యోల్బణం 300 శాతానికి చేరి ఆర్థిక వ్యవస్థ దెబ్బతిన్నదని ఆరోపిస్తూ "ఇరాన్ కేవలం ప్రగల్భాలు మాత్రమే పలుకుతుంది తప్ప చేతల్లో ఏమీ చేయలేదు" అంటూ "ప్రెయిజ్ బీ టూ అల్లాహ్" (అల్లాహ్‌కే స్తోత్రం) అనే వాక్యంతో తన పోస్ట్‌ను ముగించారు.  ప్రపంచ పెట్రోలియం వ్యాపారంలో దాదాపు 20 శాతానికి పైగా ప్రయాణించే ఈ వ్యూహాత్మక జలసంధిలో అమెరికా, ఇరాన్, ఇజ్రాయెల్ బలగాల మధ్య ఘర్షణలు తీవ్ర స్థాయికి చేరుకోవడంతో అంతర్జాతీయంగా ఆందోళనలు వ్యక్తమవుతున్నాయి. మరోవైపు హోర్ముజ్ సంక్షోభాన్ని సమయానికి పరిష్కరించి సముద్ర రాకపోకలను పునరుద్ధరించేందుకు ఇరు దేశాల ప్రతినిధుల మధ్య తెరవెనుక దౌత్య చర్చలు సాగుతున్నాయి. అయితే యుద్ధం వల్ల జరిగిన నష్టపరిహారాన్ని, ఆంక్షల వల్ల కలిగిన ఆర్థిక నష్టాలను తమకు చెల్లించాలని ఇరాన్ డిమాండ్ చేయగా, ఆ డిమాండ్‌ను ట్రంప్ బహిరంగంగానే తిరస్కరించారు.  అమెరికా సైనిక బెదిరింపులు, ఆర్థిక ఆంక్షల ద్వారా ఏకపక్షంగా ప్రయోజనాలు పొందాలని చూస్తోందని ఇరాన్ తీవ్రంగా ఆరోపించింది. దౌత్య చర్చలు జరుగుతున్నప్పటికీ, గల్ఫ్ సముద్రంలో నౌకల రాకపోకలను పునరుద్ధరించేందుకు ఇరుదేశాల మధ్య ఇంకా స్పష్టమైన సీజ్‌ఫైర్ ఒప్పందం కుదరకపోవడంతో అంతర్జాతీయంగా క్రూడ్ ఆయిల్ ధరలు పెరిగే ముప్పు పొంచి ఉంది. సరుకు రవాణా నౌకలు కట్టుదిట్టమైన సైనిక రక్షణ మధ్య ప్రయాణిస్తున్నప్పటికీ, హోర్ముజ్ జలసంధి వద్ద ఉద్రిక్తతలు కొనసాగుతూనే ఉన్నాయి.