- ‘దోస్తిక్‌’ అంటే స్నేహం.. భారత్‌-ఉజ్బెకిస్తాన్‌ బంధానికి ఇదే ప్రతీక
- శతాబ్దాల స్నేహానికి, ఉమ్మడి వారసత్వానికి ఈ గౌరవం అంకితం
తాష్కెంట్‌, ఆగస్టు 29: ఉజ్బెకిస్తాన్‌ అత్యున్నత పురస్కారం అందుకోవడం తనకు ఎంతో గర్వకారణమని ప్రధాని నరేంద్ర మోదీ అన్నారు. ఈ గౌరవాన్ని వ్యక్తిగతంగా కాకుండా 140 కోట్ల మంది భారతీయులకు దక్కిన సత్కారంగా భావిస్తున్నానని తెలిపారు. తాష్కెంట్‌లో జరిగిన కార్యక్రమంలో పురస్కారాన్ని స్వీకరించిన మోదీ.. ‘దోస్తిక్‌’ అంటే స్నేహమని, భారత్‌-ఉజ్బెకిస్తాన్‌ సంబంధాల సారాంశాన్ని ఈ పదం చక్కగా ప్రతిబింబిస్తుందని పేర్కొన్నారు. భారత్‌లో ‘దోస్త్‌’ అనే పదం ప్రజలకు ఎంతో సుపరిచితమని, దేశంలోని దాదాపు ప్రతి కుటుంబంలోనూ రోజులో ఎన్నోసార్లు ఈ పదాన్ని ఉపయోగిస్తారని మోదీ అన్నారు. ఉజ్బెకిస్తాన్‌ ప్రభుత్వం తనకు అందించిన అత్యున్నత గౌరవం ద్వారా ‘దోస్తిక్‌’ స్ఫూర్తిని మరింత చాటిచెప్పిందని పేర్కొన్నారు. ఈ పురస్కారం తనకు మాత్రమే దక్కిన గౌరవం కాదని, 140 కోట్ల మంది భారతీయులకు లభించిన గౌరవమని మోదీ స్పష్టం చేశారు. భారత ప్రజల తరఫున ఉజ్బెకిస్తాన్‌ ప్రజలకు, ప్రభుత్వానికి, తన మిత్రుడు అధ్యక్షుడు షవ్కత్‌ మిర్జియోయెవ్‌కు హృదయపూర్వక కృతజ్ఞతలు తెలిపారు. ఈ అత్యున్నత పురస్కారాన్ని అత్యంత వినయంతో స్వీకరిస్తున్నానని మోదీ చెప్పారు. భారత్‌, ఉజ్బెకిస్తాన్‌ దేశాల మధ్య శతాబ్దాలుగా కొనసాగుతున్న స్నేహబంధానికి, ఇరు దేశాల ఉమ్మడి వారసత్వానికి ఈ గౌరవాన్ని అంకితం చేస్తున్నట్లు వెల్లడించారు.
