సీఈసీ రాజీనామాకు డిమాండ్‌

 

• SIRకు వ్యతిరేకంగా అభిజీత్‌ దీప్కే, ధ్రువ్‌ రాఠీ, ప్రకాశ్‌ రాజ్‌ పోరుబాట

బెంగళూరు, అక్టోబర్‌ 8: ఓటర్ల జాబితాల ప్రత్యేక సమగ్ర సవరణ (SIR)కు వ్యతిరేకంగా సిటిజన్స్‌ ఫర్‌ జస్టిస్‌ అండ్‌ పీస్‌ (CJP) వ్యవస్థాపకుడు అభిజీత్‌ దీప్కే, యూట్యూబర్‌ ధ్రువ్‌ రాఠీ, నటుడు-కార్యకర్త ప్రకాశ్‌ రాజ్‌ ఒక్కటయ్యారు. బెంగళూరులోని ఫ్రీడం పార్క్‌లో గురువారం నిర్వహించిన ‘పీపుల్స్‌ ట్రైబ్యునల్‌’ కార్యక్రమంలో పాల్గొన్న వారు.. ముఖ్య ఎన్నికల కమిషనర్‌ (CEC) జ్ఞానేశ్‌ కుమార్‌ రాజీనామా చేయాలని, SIR ప్రక్రియను పూర్తిగా రద్దు చేయాలని డిమాండ్‌ చేశారు. ఈ సందర్భంగా మాట్లాడిన అభిజీత్‌ దీప్కే.. SIR పేరుతో ఓటర్ల జాబితాల నుంచి పేర్ల తొలగింపు జరుగుతోందని, ఇది బీజేపీకి వ్యతిరేకంగా ఉన్న వర్గాలను ఓటు హక్కుకు దూరం చేసే ప్రయత్నమని ఆరోపించారు. ప్రధాని నరేంద్ర మోదీ, ఎన్నికల సంఘం ప్రజాస్వామ్యాన్ని బలహీనపరుస్తున్నారని ఆయన విమర్శించారు. ఓటర్ల జాబితాల్లో ‘మరణించినట్లు’ చూపించిన కొందరు వ్యక్తులు తమను తాము సజీవులుగా నిరూపించుకునేందుకు నిరసనకు హాజరయ్యారని పేర్కొన్నారు. ‘‘చనిపోయింది ఆ వ్యక్తులు కాదు.. దేశ ప్రజాస్వామ్యం’’ అని వ్యాఖ్యానించారు. దేశవ్యాప్తంగా 13 కోట్ల ఓట్లు, కర్ణాటకలో సుమారు కోటి ఓట్లు తొలగించారని దీప్కే ఆరోపించారు. ఈ తొలగింపుల వల్ల బీజేపీ కొన్ని రాష్ట్రాల్లో గెలిచిందని ఆయన పేర్కొన్నారు. కేంద్ర హోంమంత్రి అమిత్‌ షా, ప్రధాని మోదీ సూచనల మేరకే ఎన్నికల సంఘం అధికారులు ఓట్లను తొలగించారని ఆయన ఆరోపించారు. CEC జ్ఞానేశ్‌ కుమార్‌ రాజీనామా చేయాలని నినాదాలు చేశారు. ఆర్‌ఎస్‌ఎస్‌ భావజాలం సమగ్ర భారతదేశం, డాక్టర్‌ బీఆర్‌ అంబేడ్కర్‌, పెరియార్‌ ఈవీ రామసామి సిద్ధాంతాలకు విరుద్ధంగా ఉందని దీప్కే ఆరోపించారు. ప్రజాస్వామ్యాన్ని, దేశాన్ని కాపాడేందుకు ఆ భావజాలానికి వ్యతిరేకంగా పోరాడాల్సిన అవసరం ఉందన్నారు. మహాత్మా గాంధీని దేశ ఆత్మగా, అంబేడ్కర్‌ను వెన్నెముకగా, జవహర్‌లాల్‌ నెహ్రూను దేశ మేధస్సుగా అభివర్ణించారు. నెహ్రూ తొలి సార్వత్రిక ఎన్నికలు నిర్వహించి, ఎన్నికలపై అవగాహన లేదా అవసరమైన పత్రాలు లేని వారికీ ఓటు హక్కు కల్పించారని ప్రశంసించారు.

‘ఈసీలో పారదర్శకత, జవాబుదారీతనం శూన్యం’

యూట్యూబర్‌ ధ్రువ్‌ రాఠీ కూడా CEC జ్ఞానేశ్‌ కుమార్‌ రాజీనామా చేయాలని డిమాండ్‌ చేశారు. SIR విషయంలో ఎన్నికల సంఘంలో ‘‘పారదర్శకత, జవాబుదారీతనం శూన్యం’’గా ఉందని ఆరోపించారు. ‘ఓటు చోరీ’ అనేది ఏదో ఒక రాజకీయ పార్టీకి సంబంధించిన అంశం కాదని, బీజేపీ, కాంగ్రెస్‌ లేదా ఇతర పార్టీలకు మద్దతిచ్చే ప్రతి పౌరుడికి సంబంధించిన సమస్య అని అన్నారు. తాను ఏ రాజకీయ పార్టీ తరఫున ఈ కార్యక్రమంలో పాల్గొనలేదని స్పష్టం చేసిన రాఠీ.. SIR ప్రభావం ప్రతి పౌరుడిపై పడే అవకాశం ఉన్నందున అందరూ దీనిపై ప్రశ్నించాల్సిన అవసరం ఉందన్నారు. పశ్చిమ బెంగాల్‌లో అసెంబ్లీ ఎన్నికలకు ముందు సుమారు 70 వేల మంది ఓటర్ల పేర్లు జాబితా నుంచి తొలగించారని, ఎన్నికల అనంతరం వారిని తిరిగి చేర్చారని ఆయన ఆరోపించారు. ఎన్నికల సమయంలో మాత్రమే వారి పేర్లు జాబితాలో లేకుండా పోయాయని పేర్కొన్నారు. బిహార్‌లో సుమారు 65 లక్షల మంది ఓటర్ల పేర్లు తొలగించారని కూడా రాఠీ ఆరోపించారు. ఈ వివరాలను ఎన్నికల సంఘం వెల్లడించలేదని, సుప్రీంకోర్టు ఆదేశాల తర్వాతే ప్రభావిత ఓటర్ల పేర్లు, చిరునామాలు బహిర్గతమయ్యాయని అన్నారు. ‘‘అందుకే ఓటు దొంగలు పదవి నుంచి తప్పుకోవాలి. CEC జ్ఞానేశ్‌ కుమార్‌ రాజీనామా చేయాలి’’ అని డిమాండ్‌ చేశారు.

‘SIRను పూర్తిగా రద్దు చేయాలి’

నటుడు-కార్యకర్త ప్రకాశ్‌ రాజ్‌ మాత్రం పోరాటం కేవలం CEC రాజీనామాతో ముగియదని స్పష్టం చేశారు. SIR ప్రక్రియనే పూర్తిగా రద్దు చేయాలని డిమాండ్‌ చేశారు. ఓట్ల తొలగింపు అంశం కేవలం ఎన్నికల జాబితాకు సంబంధించినది కాదని, పౌరుల గౌరవం, హక్కులపై దాడి చేసే ప్రయత్నంగా ఆయన అభివర్ణించారు. CEC జ్ఞానేశ్‌ కుమార్‌ ప్రధాని మోదీ, కేంద్ర హోంమంత్రి అమిత్‌ షా ఆదేశాల మేరకు వ్యవహరిస్తున్నారని ప్రకాశ్‌ రాజ్‌ ఆరోపించారు. ‘‘జ్ఞానేశ్‌ కుమార్‌ వెళ్లిపోతే ఆయన స్థానంలో మరో వ్యక్తి రావచ్చు. మాకు కావాల్సింది అది కాదు. SIR ప్రక్రియను పూర్తిగా రద్దు చేయాలి’’ అని అన్నారు. గిరిజనులు, పేదలు, ముస్లింలు, ఇతర మైనారిటీ వర్గాలకు చెందిన పలువురి పేర్లు ఓటర్ల జాబితాల నుంచి తొలగించారని ప్రకాశ్‌ రాజ్‌ ఆరోపించారు. పౌరులను భౌతికంగా తొలగించడం సాధ్యం కాకపోవడంతో వారి పేర్లను ఓటర్ల జాబితాల నుంచి తొలగించే ప్రయత్నం జరుగుతోందని ఆయన వ్యాఖ్యానించారు. SIRపై బెంగళూరులో జరిగిన ఈ నిరసనలో పౌర సమాజ సంస్థలు, CJP కార్యకర్తలు, వివిధ వర్గాలకు చెందిన ప్రజలు పాల్గొన్నారు. CEC రాజీనామాతో పాటు ఎన్నికల జాబితాల సవరణ ప్రక్రియపై పారదర్శకత, జవాబుదారీతనం ఉండాలని నిరసనకారులు డిమాండ్‌ చేశారు.