- ఆందోళనకారులపై టియర్‌ గ్యాస్‌, వాటర్‌ కేనన్ల ప్రయోగం..
- దేశవ్యాప్తంగా 135 మంది అరెస్టు..
- విద్యా రంగానికి నిధులు పెంచాలని, జీవన వ్యయం తగ్గించాలని డిమాండ్‌
పారిస్‌: పెరుగుతున్న జీవన వ్యయం, విద్యా రంగానికి తగినన్ని నిధులు కేటాయించకపోవడంపై ఫ్రాన్స్‌లో ప్రజాగ్రహం వెల్లువెత్తింది. దేశవ్యాప్తంగా వందలాది ప్రాంతాల్లో నిరసన ప్రదర్శనలు జరిగాయి. అధికారిక లెక్కల ప్రకారం సుమారు 4.10 లక్షల మంది ఈ ఆందోళనల్లో పాల్గొన్నారు. తొలుత చాలా ప్రాంతాల్లో నిరసనలు ప్రశాంతంగా సాగినప్పటికీ, శనివారం సాయంత్రం రాజధాని పారిస్‌లో పరిస్థితి ఉద్రిక్తంగా మారింది. ఆందోళనకారులను చెదరగొట్టేందుకు పోలీసులు టియర్‌ గ్యాస్‌, వాటర్‌ కేనన్లను ప్రయోగించారు. గతంలో జరిగిన హింసాత్మక ఘటనలు పునరావృతం కాకుండా దేశవ్యాప్తంగా భారీగా భద్రతా బలగాలను మోహరించారు.
ప్రధాన నగరాలకూ ఆందోళనలు
పారిస్‌తో పాటు లియోన్‌, లిల్లే, మార్సెయి, మాంట్‌పెల్లియర్‌, నాంటెస్‌, టులూజ్‌ నగరాల్లోనూ నిరసనలు, పోలీసులతో ఘర్షణలు చోటుచేసుకున్నాయి. లియోన్‌లో నిషేధాజ్ఞలు అమల్లో ఉన్న ప్రాంతంలో సుమారు 150 మంది నిరసనకారులు ప్రధాన రహదారిని దిగ్బంధించేందుకు ప్రయత్నించడంతో పోలీసులు టియర్‌ గ్యాస్‌ ప్రయోగించి వారిని చెదరగొట్టారు. రోన్‌ ప్రాంతీయ అధికారుల అంచనా ప్రకారం, ముందస్తు అనుమతి లేకపోయినా, నగర కేంద్రంలో సమావేశాలపై ఆంక్షలు ఉన్నప్పటికీ దాదాపు 10 వేల మంది లియోన్‌లో ర్యాలీ నిర్వహించారు.
నిరసనకారులు నగరంలోని వివిధ ప్రాంతాల్లో గుంపులుగా చేరి, స్పష్టమైన లక్ష్యం లేకుండా అటూ ఇటూ కదిలారని అధికారులు పేర్కొన్నారు. నైరుతి ఫ్రాన్స్‌లోని టులూజ్‌లో సుమారు 26 వేల మంది నిరసనల్లో పాల్గొన్నట్లు స్థానిక అధికారులు అంచనా వేశారు. మార్సెయి, లిల్లే తదితర నగరాల్లోనూ వేలాది మంది రోడ్లపైకి వచ్చారు.
దేశవ్యాప్తంగా 135 మంది అరెస్టు
నిరసనల నేపథ్యంలో ఫ్రాన్స్‌ పోలీసులు దేశవ్యాప్తంగా 135 మందిని అరెస్టు చేసినట్లు ఆ దేశ అంతర్గత వ్యవహారాల మంత్రి లారెంట్‌ నూనెజ్‌ వెల్లడించారు. ఆందోళనల సందర్భంగా పలురకాల ఆయుధాలు, ప్రమాదకర వస్తువులను స్వాధీనం చేసుకున్నట్లు అధికారులు తెలిపారు. వీటిలో లోహపు బంతులు, సీసపు గుళ్లు, బాణసంచా, స్లింగ్‌షాట్లు, ఉక్కు బంతులు, తాత్కాలికంగా తయారు చేసిన ఆయుధాలు, ఎయిర్‌సాఫ్ట్‌ తుపాకులు, జపాన్‌కు చెందిన కటానా ఖడ్గం ఉన్నట్లు వెల్లడించారు.
అయితే, ఆ రోజు తొలుత ఎలాంటి పెద్ద ఘటనలు చోటుచేసుకోలేదని మంత్రి నూనెజ్‌ పేర్కొన్నట్లు ఫ్రాన్స్‌ మీడియా వెల్లడించింది. మధ్యాహ్నం వరకు పారిస్‌లో పరిస్థితి ప్రశాంతంగానే ఉందని అక్కడి పోలీసులు తెలిపారు. సాయంత్రానికి కొన్ని ప్రాంతాల్లో ఘర్షణలు తీవ్రరూపం దాల్చడంతో భద్రతను మరింత కట్టుదిట్టం చేశారు.
ఓర్లియాన్స్‌లో తీవ్రవాద భావజాలానికి వ్యతిరేకంగా నిరసనలు
ఫ్రాన్స్‌ రాజధానికి దక్షిణాన ఉన్న ఓర్లియాన్స్‌ నగరంలో మరీన్‌ లె పెన్‌ నేతృత్వంలోని కుడిపక్ష నేషనల్‌ ర్యాలీ పార్టీ రెండు రోజుల సమావేశం నిర్వహించింది. ఈ సమావేశానికి వ్యతిరేకంగా వేలాది మంది నిరసనకారులు రోడ్లపైకి వచ్చారు. స్థానిక అధికారుల అంచనా ప్రకారం, మధ్యాహ్నం సమయానికి సుమారు 11 వేల మంది అక్కడ నిరసనల్లో పాల్గొన్నారు.
మరీన్‌ లె పెన్‌తో పాటు అధ్యక్షుడు ఇమ్మాన్యుయేల్‌ మాక్రాన్‌కు వ్యతిరేకంగా కూడా కొందరు నినాదాలు చేశారు. కుడిపక్ష రాజకీయాలకు వ్యతిరేకంగా బ్యానర్లు ప్రదర్శించారు. వామపక్ష పార్టీల నేతలు, కార్మిక సంఘాలు, విద్యార్థి సంఘాలు, సామాజిక కార్యకర్తలు, అమ్నెస్టీ ఇంటర్నేషనల్‌ వంటి సంస్థల ప్రతినిధులు ఈ నిరసనల్లో భాగస్వాములైనట్లు ఫ్రాన్స్‌ మీడియా తెలిపింది.
ఇదిలా ఉండగా, ఓర్లియాన్స్‌లో జరిగిన నేషనల్‌ ర్యాలీ పార్టీ సమావేశంలో జోర్డాన్‌ బార్డెల్లా మరోసారి పార్టీ అధ్యక్షుడిగా ఎన్నికయ్యారు. మధ్యాహ్నం మూడు గంటలకు కొద్దిసేపు ముందు జెనిత్‌ అరేనాలో ప్రారంభమైన సమావేశానికి పార్టీ ప్రతినిధులు, మద్దతుదారులు పెద్ద సంఖ్యలో హాజరయ్యారు. ‘మరీన్‌ అధ్యక్షురాలు కావాలి’ అంటూ నినాదాలు చేశారు. ఫ్రాన్స్‌ అధ్యక్ష ఎన్నికలకు ఆరు నెలల ముందు జరుగుతున్న ఈ సమావేశం రాజకీయంగా ప్రాధాన్యం సంతరించుకుంది.
విద్యార్థుల ఆందోళన నుంచి దేశవ్యాప్త ఉద్యమం
ఫ్రాన్స్‌లో తాజా నిరసనలకు నెల రోజుల క్రితం విద్యార్థులు చేపట్టిన ఆందోళనలు ప్రధాన కారణంగా నిలిచాయి. ప్రభుత్వ పాఠశాలల్లో పరిస్థితులు, ఉపాధ్యాయుల కొరత, పాఠశాలల పని వేళలు, ప్రభుత్వ-ప్రైవేటు విద్యా వ్యవస్థల మధ్య అసమానతలను నిరసిస్తూ విద్యార్థులు తొలుత ఉద్యమించారు. అనంతరం జీవన వ్యయం పెరుగుదలపై ప్రజల్లో ఉన్న అసంతృప్తి కూడా ఈ ఉద్యమానికి తోడైంది. కార్మిక సంఘాలు, పౌర సమాజ సంస్థలు, ‘యెల్లో వెస్ట్స్‌’ ఉద్యమానికి చెందినవారు సైతం నిరసనల్లో పాల్గొంటున్నారు.
వారం క్రితం జీవన వ్యయంపై జరిగిన నిరసనల్లో హింసాత్మక ఘటనలు చోటుచేసుకున్న నేపథ్యంలో, తాజా ఆందోళనలపై ప్రభుత్వం అప్రమత్తమైంది. పరిస్థితి తీవ్రతను దృష్టిలో ఉంచుకుని అధ్యక్షుడు ఇమ్మాన్యుయేల్‌ మాక్రాన్‌ సీనియర్‌ మంత్రులు, ఉన్నతాధికారులతో కూడిన రక్షణ మండలి సమావేశాన్ని నిర్వహించారు.
పెరుగుతున్న ధరలు, విద్యా రంగ సమస్యలపై మొదలైన నిరసనలు ఇప్పుడు దేశవ్యాప్త ఉద్యమంగా విస్తరించడంతో ఫ్రాన్స్‌లో పరిస్థితి ఉత్కంఠగా మారింది. ఆందోళనలను అదుపులోకి తీసుకురావడానికి ప్రభుత్వం తీసుకునే తదుపరి చర్యలపై ఆసక్తి నెలకొంది.
No comments:
Post a Comment