న్యూఢిల్లీ: ప్రధాన ఎన్నికల కమిషనర్ జ్ఞానేశ్ గుప్తా ప్రజాస్వామ్యాన్ని కాలరాసేందుకు ప్రయత్నిస్తున్నారని, ఇది పూర్తిగా బీజేపీ, అమిత్ షా, ప్రధాని మోదీల కుట్ర అని ఆర్జేడీ (RJD) నేత తేజస్వి యాదవ్ తీవ్రస్థాయిలో మండిపడ్డారు. దిల్లీలో ఇండియా కూటమి నేతల సమావేశం అనంతరం ఆయన మీడియాతో మాట్లాడుతూ.. రాజ్యాంగ సంస్థలను భయభ్రాంతులకు గురిచేస్తున్న ఈ ప్రభుత్వ తీరుపై తాము చివరి వరకు పోరాడుతామని స్పష్టం చేశారు. ఈడీ, సీబీఐ, ఐటీ శాఖలను ఇష్టానుసారంగా దుర్వినియోగం చేస్తున్న ఈ ప్రభుత్వం, ఎన్నికల సంఘాన్ని (ECI) ఇంకా పదేళ్లు వెనక్కి నెట్టి రాజ్యాంగాన్ని అపహాస్యం చేస్తోందని విమర్శించారు. ముఖ్యంగా సీఈసీ జ్ఞానేశ్ గుప్తా అధికార పార్టీకి తొత్తులా వ్యవహరిస్తున్నారని, ఆయన చేసిన తప్పునకు కచ్చితంగా శిక్ష అనుభవించాల్సి వస్తుందని హెచ్చరించారు. ప్రతిఘటనలను అణచివేసేందుకు ప్రభుత్వం భయపడిపోయిందని, చారిత్రాత్మక ప్రాధాన్యత ఉన్న జంతర్‌మంతర్ ప్రాంతాన్ని నిరసన ప్రదేశాల జాబితా నుంచి తొలగించి ఢిల్లీ సరిహద్దులకు మార్చడం వారి భయానికి నిదర్శనమని ఎద్దేవా చేశారు. ఇది గాంధీ, లోహియా, భగత్ సింగ్, కర్పూరి ఠాకూర్ పుట్టిన గడ్డ అని, ప్రజాస్వామ్యాన్ని, రాజ్యాంగాన్ని రక్షించుకునేందుకు ఎంతటి త్యాగానికైనా తాము సిద్ధమని తేల్చిచెప్పారు. ఓట్ల చోరికి, ఎన్నికల రిగ్గింగ్‌కు పాల్పడిన మోదీ, అమిత్ షా, జ్ఞానేశ్ గుప్తా ప్రజల ముందు దోషులుగా నిలబడ్డారని, ప్రతి ఒక్కరూ వారిని నిలదీస్తున్నారని స్పష్టం చేశారు.
