ప్రజాస్వామ్యాన్ని, రాజ్యాంగాన్ని దెబ్బతీస్తున్న బీజేపీ

• ఐసా అధ్యక్షుడు నేహా బోరా

న్యూఢిల్లీ:లోక్‌సభలో ప్రతిపక్ష నాయకుడు రాహుల్ గాంధీ నివాసంలో జరిగిన ఇండియా కూటమి సమావేశం అనంతరం నిర్వహించిన విలేకరుల సమావేశంలో ఆలిండియా స్టూడెంట్స్ అసోసియేషన్ (AISA) అధ్యక్షుడు నేహా బోరా కేంద్ర ప్రభుత్వంపై తీవ్రస్థాయిలో విరుచుకుపడ్డారు. దేశంలో ప్రజాస్వామ్యాన్ని, రాజ్యాంగాన్ని బలహీనపరుస్తున్న బీజేపీపై ప్రజలు ఐక్యంగా పోరాడాలని పిలుపునిచ్చారు.   "మనం 'ప్రజలు వర్సెస్ బీజేపీ' (We, the People versus the BJP) గురించి మాట్లాడుతున్నప్పుడు, అది ఒకే పోరాటం గురించి. ఈ దేశ ప్రజలకు, భారతీయ ప్రజాస్వామ్యానికి, రాజ్యాంగానికి ఉన్న ఏకైక శత్రువు పేరు బీజేపీ" అని నేహా బోరా స్పష్టం చేశారు.  ప్రజాస్వామ్య పునాదులను దెబ్బతీసి, పౌరులు తమ ఓటు హక్కు కోసం, నిరసన తెలిపే హక్కు కోసం రోడ్లపైకి వస్తే వాటిని అణచివేయవచ్చని బీజేపీ భావిస్తోందని, కానీ సామాన్య ప్రజలు దీనిని చూస్తూ ఊరుకోరని హెచ్చరించారు. భారతదేశాన్ని ప్రజాస్వామ్య దేశంగా మలచడంలో గానీ, రాజ్యాంగాన్ని రూపొందించడంలో గానీ బీజేపీకి ఎలాంటి పాత్ర లేదని విమర్శించారు. దేశం కోసం ప్రాణాలర్పించి, పోరాడిన సామాన్య ప్రజలు దొంగిలించబడిన ఆదేశాలను (stolen mandate), రాజ్యాంగాన్ని అపహాస్యం చేసే విధానాలను ఎట్టి పరిస్థితుల్లోనూ అంగీకరించబోరని తేల్చిచెప్పారు