- దతియాలో కాంగ్రెస్ దూకుడు, మంజల్పూర్లో బీజేపీ ఆధిపత్యం
దేశవ్యాప్తంగా చోటుచేసుకున్న ప్రశ్నపత్రాల లీకేజీ విధానంపై విద్యార్థులు చేపట్టిన భారీ నిరసనల తర్వాత జరిగిన తొలి ఉపఎన్నికలు ఇవి కావడంతో, ఇవి దేశవ్యాప్త ప్రజల, ముఖ్యంగా యువ ఓటర్ల రాజకీయ మనోగతాన్ని సూచిస్తాయని భావిస్తున్నారు. ఈ క్రమంలో బిహార్, మధ్యప్రదేశ్, గుజరాత్ రాష్ట్రాల్లోని కీలక స్థానాల ఓట్ల లెక్కింపు అత్యంత ఆసక్తికరంగా సాగుతోంది. బిహార్లోని బాంకీపూర్ శాసనసభ స్థానంలో ఎన్నికల వ్యూహకర్త, రాజకీయ నాయకుడు ప్రశాంత్ కిశోర్ ప్రారంభం నుంచే స్పష్టమైన ఆధిక్యాన్ని కనబరుస్తున్నారు. 16వ రౌండ్ ఓట్ల లెక్కింపు పూర్తయ్యేసరికి కేంద్ర ఎన్నికల సంఘం గణాంకాల ప్రకారం ప్రశాంత్ కిశోర్ 31,742 ఓట్లు సాధించగా, ఆయనకు సమీప ప్రత్యర్థి అయిన బీజేపీ అభ్యర్థి నీరజ్ కుమార్ సిన్హా 8,966 కంటే ఎక్కువ ఓట్ల వెనుకంజలో ఉన్నారు. బాంకీపూర్ దశాబ్దాలుగా బీజేపీకి తిరుగులేని కోటగా ఉంటూ వచ్చింది. ఇక్కడి నుంచి ప్రాతినిధ్యం వహించిన నితిన్ నబీన్ రాజ్యసభకు ఎన్నికవ్వడంతో ఈ సీటు ఖాళీ అయింది. ఎన్నికల ప్రచార సమయంలో బీజేపీ అభ్యర్థిగా నామినేషన్ వేసిన అభిషేక్ కుమార్ సిన్హా కుటుంబ కారణాల వల్ల తప్పుకోవడంతో, బీజేపీ చివరి నిమిషంలో నీరజ్ కుమార్ను బరిలోకి దించింది. దీనిపై ప్రతిపక్షాలు తీవ్రస్థాయిలో విమర్శలు గుప్పించాయి. కాగా, తమ అభ్యర్థి రేఖా గుప్తాకు అన్నివర్గాల మద్దతు లభించిందని, ఆర్జేడీ ఇక్కడ విజయం సాధిస్తుందని తేజస్వి యాదవ్ ధీమా వ్యక్తం చేశారు.
మధ్యప్రదేశ్లోని దతియా నియోజకవర్గంలో కాంగ్రెస్ అభ్యర్థి ఘన్శ్యామ్ సింగ్ స్పష్టమైన ఆధిక్యంలో కొనసాగుతున్నారు. ఆయన 38,000కు పైగా ఓట్లు సాధించి, తొలిసారి పోటీ చేస్తున్న బీజేపీ అభ్యర్థి అశుతోష్ తివారీపై 6,500 ఓట్ల ఆధిక్యంలో ఉన్నారు. కాంగ్రెస్ ఎమ్మెల్యే రాజేంద్ర భారతి ప్రజాప్రాతినిధ్య చట్టం కింద అనర్హతకు గురవ్వడంతో ఇక్కడ ఉపఎన్నిక అనివార్యమైంది. మాజీ హోంమంత్రి నరోత్తమ్ మిశ్రాకు పట్టున్న ఈ స్థానంలో అభ్యర్థి మార్పుపై బీజేపీ కార్యకర్తల్లో తీవ్ర అసంతృప్తి వ్యక్తమైంది. గతంలో రెండుసార్లు ఎమ్మెల్యేగా పనిచేసిన రాజకుటుంబ వారసుడు ఘన్శ్యామ్ సింగ్ తన పాత సంబంధాలు, వ్యక్తిగత ప్రతిష్టతో పాటు బీజేపీ శ్రేణుల అసంతృప్తిని తనకు అనుకూలంగా మలుచుకున్నారు.
గుజరాత్లోని మంజల్పూర్ నియోజకవర్గంలో చివరి రౌండ్ ఓట్ల లెక్కింపు జరుగుతుండగా, బీజేపీ అభ్యర్థి సతీష్ గోవింద్ భాయ్ పటేల్ 29,000 కంటే ఎక్కువ ఓట్ల భారీ ఆధిక్యంతో విజయం దిశగా దూసుకుపోతున్నారు. వరుసగా మూడుసార్లు గెలిచిన బీజేపీ ఎమ్మెల్యే యోగేష్ భాయ్ నారన్దాస్ పటేల్ మరణంతో ఈ సీటు ఖాళీ అయింది. వడోదర మునిసిపల్ కార్పొరేషన్ మాజీ కౌన్సిలర్ సతీష్ పటేల్, కాంగ్రెస్ ఉపాధ్యక్షుడు భిఖాభాయ్ రబారీల మధ్య ప్రధాన పోటీ నెలకొనగా, అధికార బీజేపీ మరోసారి ఇక్కడ తన ఆధిపత్యాన్ని నిలబెట్టుకుంది.
