- అమెరికా వేదికగా రాహుల్ గాంధీ కీలక వ్యాఖ్యలు
- ఎన్నికల ప్రక్రియలో అక్రమాలు జరుగుతున్నాయన్న ఆరోపణలు ఉన్నప్పటికీ ప్రజాస్వామ్య వ్యవస్థపై నమ్మకంతోనే ఎన్నికల్లో పోటీ చేస్తున్నామని వెల్లడి
- ఎన్నికల సంఘం పనితీరు, ఓటర్ల జాబితా సవరణ ప్రక్రియపై తీవ్ర విమర్శలు
చికాగో: అమెరికా పర్యటనలో ఉన్న లోక్సభ ప్రతిపక్ష నేత రాహుల్ గాంధీ భారత ఎన్నికల వ్యవస్థ, దేశంలో ప్రజాస్వామ్య పరిస్థితులపై కీలక వ్యాఖ్యలు చేశారు. చికాగో విశ్వవిద్యాలయంలో పొలిటికల్ సైన్స్ ప్రొఫెసర్ రాబర్ట్ పేప్తో జరిగిన చర్చా కార్యక్రమంలో పాల్గొన్న ఆయన.. “స్వేచ్ఛాయుత ఎన్నికలు లేకపోతే నిజమైన రాజకీయాలే ఉండవు” (No Free Elections, No Real Politics) అని వ్యాఖ్యానించారు. భారతదేశంలో ఎన్నికల ప్రక్రియ పారదర్శకతపై తన ఆందోళనలను వ్యక్తం చేశారు.
ఎన్నికల వ్యవస్థలో లోపాలు, అక్రమాలు జరుగుతున్నాయని ఆరోపిస్తున్న ప్రతిపక్షాలు ఎన్నికలను ఎందుకు బహిష్కరించడం లేదన్న ప్రశ్నకు రాహుల్ గాంధీ సమాధానమిచ్చారు. తాము ఎన్నికలను బహిష్కరిస్తే ప్రజల దృష్టిలో ప్రజాస్వామ్య వ్యవస్థ తన చట్టబద్ధతను పూర్తిగా కోల్పోయే ప్రమాదం ఉందని అభిప్రాయపడ్డారు. ఎన్నికల వ్యవస్థను విచ్ఛిన్నం చేయడం తమ ఉద్దేశం కాదని, దాని లోపాలను వ్యవస్థలో ఉంటూనే ఎత్తిచూపుతూ ప్రజాస్వామ్యాన్ని పరిరక్షించేందుకు పోరాడుతున్నామని వివరించారు.
భారత ఎన్నికల సంఘం (ECI) చేపడుతున్న ప్రత్యేక సమగ్ర ఓటర్ల జాబితా సవరణ (Special Intensive Revision – SIR) ప్రక్రియపైనా రాహుల్ విమర్శలు గుప్పించారు. ఈ ప్రక్రియ పేరుతో లక్షలాది మంది ఓటర్ల పేర్లను జాబితా నుంచి తొలగిస్తున్నారని ఆరోపించారు. ఎన్నికల సంఘంలోని కొందరు సీనియర్ అధికారులు సైతం ఒత్తిళ్లను తట్టుకోలేక అంతర్గత సమాచారాన్ని తమకు అందిస్తున్నారని పేర్కొన్నారు. ఎన్నికల ప్రక్రియలో జరుగుతున్నాయని తాము ఆరోపిస్తున్న అక్రమాల వ్యవస్థ త్వరలోనే కుప్పకూలుతుందని ఆయన వ్యాఖ్యానించారు.
భారత్ అప్రజాస్వామిక దేశంగా మారడాన్ని తాము ఎట్టి పరిస్థితుల్లోనూ అంగీకరించబోమని రాహుల్ గాంధీ స్పష్టం చేశారు. ప్రజలు ఎలాంటి భయం లేకుండా తమ అభిప్రాయాలను వ్యక్తం చేయగలిగే ప్రజాస్వామ్య వాతావరణాన్ని తిరిగి నెలకొల్పేందుకు కృషి చేస్తామని పేర్కొన్నారు.

No comments:
Post a Comment