సముద్ర గర్భం నుంచి క్షేమంగా ఒడ్డుకు

 

• ఆర్టెమిస్-2 వ్యోమగాములకు వైద్య పరీక్షలు ప్రారంభం

చారిత్రక చంద్రయానాన్ని ముగించుకుని పసిఫిక్ మహాసముద్రంలో దిగిన ఆర్టెమిస్-2 వ్యోమగాములను నాసా, అమెరికా నౌకాదళ బృందాలు విజయవంతంగా ఓరియన్ క్యాప్సూల్ నుంచి బయటకు తీశాయి. శాన్ డియాగో తీరానికి సమీపంలో సముద్ర అలలపై తేలుతున్న నౌక నుంచి కమాండర్ రీడ్ వైజ్‌మాన్, విక్టర్ గ్లోవర్, క్రిస్టినా కోచ్, జెరెమీ హాన్సెన్‌లను హెలికాప్టర్ల సహాయంతో సురక్షితంగా యుద్ధనౌక యూఎస్ఎస్ జాన్ పి. ముర్తా మీదికి చేరవేశారు. పది రోజుల పాటు గురుత్వాకర్షణ శక్తికి దూరంగా, లోతైన అంతరిక్షంలో గడిపి వచ్చిన ఈ నలుగురు వీరులకు నౌకపై ఉన్న వైద్య బృందం ఘనస్వాగతం పలికింది.

ప్రస్తుతం ఈ నలుగురు వ్యోమగాములకు యుద్ధనౌకలోనే ప్రాథమిక వైద్య పరీక్షలు నిర్వహిస్తున్నారు. సుదీర్ఘ కాలం అంతరిక్ష ప్రయాణం చేయడం వల్ల వారి శరీరాల్లో కలిగే మార్పులను, ముఖ్యంగా ఎముకల సాంద్రత, రక్త ప్రసరణలో వ్యత్యాసాలను నిపుణులు నిశితంగా పరిశీలిస్తున్నారు. పది రోజుల ప్రయాణంలో సుమారు ఏడు లక్షల మైళ్లు ప్రయాణించిన ఈ బృందం, భూ వాతావరణంలోకి ప్రవేశించే సమయంలో విపరీతమైన ఒత్తిడిని ఎదుర్కొన్నప్పటికీ, ప్రస్తుతం అందరూ ఆరోగ్యంగా, ఉత్సాహంగా ఉన్నట్లు నాసా ప్రతినిధులు వెల్లడించారు.

వైద్య పరీక్షలు ముగిసిన అనంతరం, వ్యోమగాములను విమానం ద్వారా హ్యూస్టన్‌లోని నాసా జాన్సన్ స్పేస్ సెంటర్‌కు తరలించనున్నారు. అక్కడ వారు తమ కుటుంబసభ్యులను కలుసుకుంటారు. మరోవైపు, సముద్రంలో ఉన్న ఓరియన్ క్యాప్సూల్‌ను కూడా సురక్షితంగా రక్షక నౌకలోకి చేర్చే ప్రక్రియ కొనసాగుతోంది. ఈ నౌకలోని సెన్సార్ల ద్వారా సేకరించిన సమాచారం భవిష్యత్తులో చంద్రుడిపైకి మనుషులను పంపే 'ఆర్టెమిస్-3' మిషన్‌కు దిక్సూచిగా మారనుంది. పది రోజుల ఉత్కంఠకు తెరదించుతూ తమ వీరులు క్షేమంగా తిరిగి రావడంతో నాసా నియంత్రణ కేంద్రంలో సంబరాలు మిన్నంటాయి.