పాడాలనే ఉంది.. కానీ వినికిడి శక్తి సహకరించట్లేదు

• రెండేళ్ల తర్వాత తన దీనస్థితిని వివరించిన లెజెండరీ సింగర్ అల్కా యాగ్నిక్
• సంగీత దర్శకులు పిలుస్తున్నా వెళ్లలేని పరిస్థితి
• భావోద్వేగానికి గురైన బాలీవుడ్ మధుర గాయని

ముంబై: బాలీవుడ్ వెండితెరపై దశాబ్దాల పాటు తన గాత్రంతో కోట్ల మందిని అలరించిన ప్రముఖ గాయని అల్కా యాగ్నిక్ ప్రస్తుతం కఠినమైన పోరాటాన్ని సాగిస్తున్నారు. రెండేళ్లుగా 'సెన్సోరీన్యూరల్ హియరింగ్ లాస్' (Sensory Neural Hearing Loss) అనే అరుదైన వినికిడి సమస్యతో బాధపడుతున్న ఆమె, తన ప్రస్తుత పరిస్థితిపై తాజాగా  భావోద్వేగపూరితమైన అప్‌డేట్‌ను పంచుకున్నారు. ఈ అనారోగ్యం కారణంగా ఆమె సంగీత ప్రపంచానికి దాదాపు దూరమయ్యారు. తన మనసులో ఇప్పటికీ పాడాలనే బలమైన కోరిక ఉన్నప్పటికీ, శారీరక ఇబ్బందులు తనను అడ్డుకుంటున్నాయని ఆమె ఆవేదన వ్యక్తం చేశారు. ముఖ్యంగా సంగీత దర్శకులు ఇప్పటికీ కొత్త పాటల కోసం తనను సంప్రదిస్తున్నారని, కానీ తన వినికిడి సమస్య కారణంగా రికార్డింగ్ స్టూడియోకు వెళ్లలేకపోతున్నానని ఆమె వెల్లడించారు.

సెన్సోరీన్యూరల్ హియరింగ్ లాస్ అంటే ఏమిటి? ఇది లోపలి చెవిలోని నరాలు దెబ్బతినడం వల్ల వచ్చే సమస్య. దీనివల్ల శబ్దాలను స్పష్టంగా వినడం,గ్రహించడం కష్టమవుతుంది. అల్కా యాగ్నిక్ విషయంలో వైరల్ ఇన్ఫెక్షన్ కారణంగా ఈ సమస్య తలెత్తిందని గతంలో ఆమె పేర్కొన్నారు.

ప్రస్తుతం ఆమె నిరంతరం వైద్యుల పర్యవేక్షణలో ఉంటూ చికిత్స పొందుతున్నారు. సంగీతం తన ప్రాణమని, మళ్ళీ మైక్ ముందుకు వచ్చి తన అభిమానుల కోసం పాడాలని ప్రతిరోజూ కోరుకుంటున్నట్లు ఆమె తెలిపారు. "చాలామంది కంపోజర్లు నాకు ఫోన్ చేసి పాటలు పాడమని అడుగుతున్నారు. వారికి నా పరిస్థితి వివరించడం చాలా బాధగా అనిపిస్తుంది. నా వినికిడి శక్తి మెరుగుపడాలని, మళ్ళీ సాధారణ జీవితాన్ని గడపాలని ఆశిస్తున్నాను" అని ఆమె పేర్కొన్నారు. ఈ కష్టకాలంలో తన కుటుంబసభ్యులు , చిత్ర పరిశ్రమలోని సహచరులు తనకు అండగా నిలుస్తున్నారని, అభిమానుల ప్రార్థనలు తనను త్వరగా కోలుకునేలా చేస్తాయని ఆమె ఆశాభావం వ్యక్తం చేశారు. సోషల్ మీడియాలో ఆమె చేసిన ఈ ప్రకటన చూసి నెటిజన్లు ,సెలబ్రిటీలు ఆమె త్వరగా కోలుకోవాలని ఆకాంక్షిస్తున్నారు.