కేజ్రీవాల్‌ను కలిసిన తర్వాతే బీజేపీలోకి వెళ్లానన్న విక్రమ్‌జీత్ సాహ్నీ

• ఆప్ ఎంపీల తిరుగుబాటు వెనుక అసలు కారణాలు ఇవే!

న్యూఢిల్లీ: ఆమ్ ఆద్మీ పార్టీ (AAP) ఎంపీల సామూహిక నిష్క్రమణ దేశవ్యాప్తంగా పెను సంచలనం సృష్టిస్తోంది. ఈ తిరుగుబాటులో పాల్గొన్న ఏడుగురు ఎంపీలలో ఒకరైన విక్రమ్‌జీత్ సింగ్ సాహ్నీ తాజాగా ఒక ఆసక్తికరమైన విషయాన్ని వెల్లడించారు. తాను బుధవారమే అరవింద్ కేజ్రీవాల్‌ను కలిసి, తమ నిర్ణయాన్ని ముందుగానే తెలియజేశానని ఆయన పేర్కొన్నారు. కేవలం ఒకటి లేదా ఇద్దరు ఎంపీలు రాజీనామా చేస్తే అనర్హత వేటు పడే అవకాశం ఉంటుందని, అందుకే తామంతా కలిసి వెళ్తున్నామని కేజ్రీవాల్‌కు వివరించినట్లు సాహ్నీ తెలిపారు. అయితే, అప్పటివరకు సందీప్ పాఠక్ వంటి సన్నిహితులు కూడా పార్టీని వీడుతారని కేజ్రీవాల్ నమ్మలేకపోయారని ఆయన వివరించారు.

 

• సంవత్సరకాలంగా రాజుకుంటున్న అసంతృప్తి

ఈ తిరుగుబాటు ఆకస్మికంగా జరిగింది కాదని, గత ఏడాది కాలంగా పార్టీలో అసంతృప్తి గూడుకట్టుకుని ఉందని సాహ్నీ వెల్లడించారు. పంజాబ్‌లో ఆప్ విజయానికి కీలక సూత్రధారిగా నిలిచిన సందీప్ పాఠక్‌ను, ఢిల్లీ అసెంబ్లీ ఎన్నికల ఓటమి తర్వాత పార్టీ నాయకత్వం పూర్తిగా పక్కన పెట్టేసిందని ఆయన ఆరోపించారు. తనకు ఎటువంటి పనీ ఇవ్వడం లేదని, ప్రాధాన్యం తగ్గించారని పాఠక్ తనతో పలుమార్లు ఆవేదన వ్యక్తం చేశారని సాహ్నీ తెలిపారు. అటు రాఘవ్ చద్దా విషయంలో కూడా ఇదే విధమైన వివక్ష కొనసాగిందని, రాజ్యసభలో ఆయన పదవిని తొలగించడమే ఈ తిరుగుబాటుకు తక్షణ కారణమని ఆయన వివరించారు.

• పంజాబ్ ప్రయోజనాల కోసమే ఈ నిర్ణయం

తమను 'ద్రోహులు' అని పిలుస్తున్న ఆప్ నేతలకు సాహ్నీ గట్టి కౌంటర్ ఇచ్చారు. తాము పంజాబ్‌కు ద్రోహం చేయలేదని, కేంద్ర ప్రభుత్వ మద్దతు లేకుండా రాష్ట్రం అభివృద్ధి చెందడం సాధ్యం కాదనే తాము బీజేపీలో చేరాలని నిర్ణయించుకున్నామని చెప్పారు. ఇటీవలే తాము అమిత్ షాను కలిసి పంజాబ్ సమస్యలపై చర్చించామని, కేంద్ర-రాష్ట్ర ప్రభుత్వాల మధ్య నిరంతరం గొడవలు ఉండటం వల్ల రాష్ట్రానికే నష్టమని ఆయన అభిప్రాయపడ్డారు. రాఘవ్ చద్దా, సందీప్ పాఠక్ వంటి పార్టీ మూలస్తంభాలే తమను రాజ్యసభకు తీసుకువచ్చారని, అటువంటి వారినే పార్టీ 'జీరో'గా మార్చేయాలని చూడటం భరించలేకపోయాయని ఆయన పేర్కొన్నారు.

మరోవైపు, అరవింద్ కేజ్రీవాల్ ఈ పరిణామాలపై స్పందిస్తూ.. బీజేపీ పంజాబ్ ప్రజలకు ద్రోహం చేస్తోందని మండిపడ్డారు. తిరుగుబాటు ఎంపీలను బుజ్జగించేందుకు ఆయన శుక్రవారం రాత్రి తన నివాసానికి పిలిచినప్పటికీ, ఆ భేటీ కంటే ముందే ఎంపీలు తమ నిర్ణయాన్ని బహిరంగపరచడం గమనార్హం. పదేళ్ల పార్టీ చరిత్రలో ఎన్నడూ లేని విధంగా రాజ్యసభ బలం 10 నుంచి 3కి పడిపోవడం ఆమ్ ఆద్మీ పార్టీకి కోలుకోలేని దెబ్బగా మారింది.